1 Timothy 4

Luganda (BIBU1) (BIBULIYA ENTUKUVU)

← Chapter 3 Jump to: Chapter 5 →

1Mwoyo agambira ddala kaati, nti mu biseera eby'oluvannyuma abamu balireka okukkiriza ne bawuliriza emyoyo gy'obulimba n'enjigiriza y'emyoyo emibi,

2olw'obukuusa bw'abalimba, abo emmeeme zaabwe ezaasiriizibwa.

3Bagaana obufumbo ne balagira okulekayo ebika by'emmere Katonda gye yatondera abo abakkiriza era abamanyi amazima bagirye nga beebaza.

4Buli kyatondebwa Katonda kirungi; tewali kyandigaaniddwa bwe kiba nga kiriiriddwa n'okwebaza,

5kubanga kitukuzibwa n'ekigambo kya Katonda n'essaala.

6Bino bw'onoobigamba abooluganda, onooba muweereza mulungi owa Kristu Yezu, eyaliisibwa ebigambo by'okukkiriza n'eby'enjigiriza ennungi gye wagoberera.

7Weewalire ddala enfumo omutali ddiini n'eŋŋambo ensirusiru. Weetendeke mu bulamu obusomi.

8Kwo okutendeka omubiri kugasa, naye katono, naye byo eby'eddiini bigasa mu byonna, engeri gye birina kye bisuubiza mu bulamu buno ne mu bulamu obulijja.

9Ekyogerwa kino kya mazima era kisaanye okukwatibwa kyonna.

10Kino kye tukolerera era kye tulafuubanira, kubanga essuubi lyaffe twalissa mu Katonda omulamu, Omulokozi w'abantu bonna, naddala ow'abo abakkiriza.

11Bino by'oba olagira n'okuyigiriza.

12Tokkirizanga n'omu kukunyooma olw'obuvubuka, wabula abakkiriza bawe ekyokulabirako mu kwogera, mu mpisa, mu kwagala, mu kukkiriza ne mu butukuvu.

13Okutuusa nga nzize, nyiikirira okusoma Ebiwandiiko ebitukuvu, okubuulirira n'okuyigiriza.

14Togayaaliriranga kirabo ky'olina ekyakuweebwa mu kigambo ky'abalanzi ku olwo olukiiko lw'abakadde lwe lwakussaako emikono.

15Kino ky'oba weefubirira, kino ky'oba weemalirako, bonna balabe bw'ogenda weeyongera.

16Weefeeko era fa ne ku ky'oyigiriza, okinywerereko; bw'onookola bw'otyo ojja kwewonya, owonye n'abo abakuwuliriza.

← Chapter 3 Jump to: Chapter 5 →