1 Timothy 5

Luganda (BIBU1) (BIBULIYA ENTUKUVU)

← Chapter 4 Jump to: Chapter 6 →

1Akusinga obukulu tomukangavvulanga, wabula mubuulirire nga bwe wandikoze kitaawo; abalenzi abavubuka bayisenga nga baganda bo,

2abakazi abakulu nga bazadde bo, abakazi abato nga bannyoko mu butukuvu bwonna.

3Bannamwandu bassengamu ekitiibwa, bwe baba nga bannamwandu aba namaddala.

4Nnamwandu bw'aba n'abaana oba abazzukulu, abaana basooke bayige obuvunaanyizibwa bwabwe obutukuvu ku maka gaabwe, baddizeewo bazadde baabwe, kubanga kino kisiimibwa mu maaso ga Katonda.

5Omukazi nnamwandu owa namaddala, asigadde ku bubwe yekka, essuubi lye alissa mu Katonda, era anyiikirira okwegayirira n'essaala ekiro n'emisana;

6naye oyo ali mu kwejalabya, oyo afudde akyali mulamu.

7Kino ky'oba obakuutira, babe nga tebaliiko kibavunaanibwa.

8Oli bw'aba talabirira ŋŋanda ze, naddala ab'omu maka ge, okukkiriza aba akusudde eri, era mubi n'okusinga atakkiriza.

9Nnamwandu bw'aba nga takka wansi wa myaka nkaaga egy'obukulu, awandiikibwe, singa yali muka musajja omu;

10ateekwa okuba ng'amanyiddwa olw'ebikolwa bye ebirungi, nga yakuza bulungi abaana be, yayanirizanga abagenyi, yanaazanga ebigere by'abatuukirivu, yadduukiriranga abali mu bizibu, era nga yajjumbiranga buli mulimu mulungi.

11Naye tokkiriza bannamwandu bato, kubanga bwe balaluka ku Kristu, olwo baagala okuddamu okufumbirwa,

12bwe batyo ne bavunaanibwa okumenya obweyamo bwabwe obwasooka.

13Si ekyo kyokka, bayiga n'okulendera, ne bagenda nga babuna amayumba; tebakoma ku kulendera kyokka, naye bazunza n'eŋŋambo, ne beeyingiza mu bitabakwatako n'okwogera bye batandyogedde.

14Nze ŋŋamba nti bannamwandu abato bandifumbiddwa, bazaale abaana, balabirire amaka gaabwe, baleme kuwa mulabe mukisa gwa kutwogezaako bubi,

15kubanga abamu bawabidde eri Sitaani.

16Omukazi omukkiriza bw'aba alina eŋŋanda ze bannamwandu, abalabirire, Ekleziya aleme kubinikibwa mugugu, wabula asobole okuyamba abo bannamwandu aba namaddala.

17Abakadde abakulembera obulungi bagwanira ekitiibwa kya mirundi ebiri, naddala abo abakola okubuulira ekigambo n'okuyigiriza;

18Kubanga Ebiwandiiko ebitukuvu bigamba nti: “Ente ewuula eŋŋano, togisibanga mumwa,” era nti: “Omukozi asaanira empeera ye.”

19Tokkirizanga musango guvunaanibwa mukadde okuggyako ng'alumiriziddwa obujulizi bwa bantu babiri oba basatu.

20Ate abo abakola ebibi bakangavvule mu maaso ga bonna, abalala batye.

21Mu maaso ga Katonda n'aga Kristu Yezu n'ag'abamalayika abalonde, nkukuutira okukuuma amateeka gano awatali kusosolamu, nga toliimu kyekubiira.

22Toyanguyirizanga kussaako mikono, era teweetabanga mu kibi kya mulala; weekuumenga ng'oli mutukuvu.

23Lekera awo okunywa amazzi gokka, wabula nywangako ne ku vviini entonotono olw'okubeera olubuto lwo n'olw'obulwadde bwo obutatadde.

24Ebibi by'abantu abamu birabikirawo, era bibakulembeddemu okubalaza ku kibonerezo, naye ebibi by'abalala birabika luvannyuma.

25Era bwe kityo n'ebikolwa ebirungi birabikirawo, naye ne bwe biba tebirabise, tebisobola kusigala nga byekisizza.

← Chapter 4 Jump to: Chapter 6 →