James 1

Luganda (BIBU1) (BIBULIYA ENTUKUVU)

Jump to: Chapter 2 →

1Yakobo, omuweereza wa Katonda n'owa Mukama waffe Yezu Kristu. Ya bika ekkumi n'ebibiri ebisaasaanye mu mawanga. Mirembe.

2Baganda bange, bwe mugwirwanga ebizibu ebitali bimu, mubeerenga basanyufu,

3anti mumanyi nti okukkiriza kwammwe bwe kugezebwa, kibaviiramu okugumiikiriza.

4Okugumiikiriza okwo kutuuse ku mulimu ogutukiridde, mulyoke mutuukirire, mubeere abajjuuliridde, abatalina kibabulako.

5Oba mu mmwe mulimu eyeetaaga amagezi, asabe Katonda, oyo awa bonna nga taganiriza oba okwekansulula, gajja kumuweebwa.

6Kyokka asaba asabe n'okukkiriza nga tabuusabuusa n'akatono; abuusabuusa aba ng'amayengo g'ennyanja empewo g'esunda n'egazza eno n'eri.

7Omuntu ow'engeri eyo aleme kulowooza ng'anaabaako k'afuna ew'Omukama,

8oyo omuntu, nnampawengwa, atalina w'anyweredde mu buli kintu.

9Owooluganda omutene asaana yeetendere mu kitiibwa ky'afuna,

10n'omugagga mu kutoowazibwa kwe, kubanga ajja kuyita ng'ekimuli ky'omuddo.

11Anti enjuba evaayo n'ebbugumu lyayo n'ekaza omuddo; ekimuli kyakyo ne kigwa, n'obulungi bwakyo ne buggwaawo, n'omugagga bw'aliggweerera atyo mu by'aliko.

12Omuntu agumira ebigezo yeesiimye; kubanga bw'aliwangula okugezebwa, alifuna engule ey'obulamu Katonda gye yasuubiza abamwagala.

13Tewabanga aba akemeddwa agamba nti: “Katonda y'ankema,” kubanga Katonda takemwa bwonoonefu era ye taliiko gw'akema.

14Wabula omuntu akemebwa, bw'atwalirizibwa n'asendebwasendebwa okwegomba kwe.

15Okwegomba bwe kumala okuba olubuto, ne kuzaala ekibi; ekibi bwe kikula, ne kizaala olumbe.

16Awo nno, baganda bange abaagalwa, muleme kuwubisibwa.

17Buli kiweebwa ekirungi na buli kirabo ekituukiridde kiva waggulu, kiva wa Taata owa buli kitangaala, ataliiko kufuukafuuka, oba ekisiikirize ekiva mu kukyukakyuka.

18Yaggya mu ye n'atuzaala n'ekigambo ky'amazima, tubeere ng'ebibala ebibereberye mu bitonde bye.

19Baganda bange abaagalwa, kino mukimanye. Buli muntu asaana ayanguyire okuwulira, naye aleme kubeera mwangu kwogera na kusunguwala.

20Kubanga obusungu bw'omuntu tebukola bya butuukirivu bwa Katonda.

21Kale nno muleke eri buli bugwagwa na buli bugwenyufu bwonna, mu bwetoowaze mwanirize ekigambo ekyabasigibwamu ekisobola okulokola emyoyo gyammwe.

22Kyokka mubeere abassa ekigambo mu nkola, naye si abakoma ku kuwulira obuwulizi; okwo kubeera kwerimba.

23Kubanga singa oli akoma ku kuwulira kwokka n'atassa mu nkola, abeera ng'omusajja eyeeraba mu ndabirwamu amaaso ge nga bwe gaakula,

24ng'amaze okweraba, n'agenda, ate amangu ago ne yeerabira bw'afaanana.

25Sso eyeetegereza etteeka ettuufu, etteeka ery'eddembe, n'anywera, n'ataba awulira ate ne yeerabira, naye n'assa mu nkola n'atuukiriza, oyo alyeesiima mu by'akola.

26Oli alowooza nga musomi, sso nga tatangira lulimi lwe, oyo aguya mutima gwe; eddiini ye temuli nsa.

27Mu maaso ga Katonda era Taata eddiini ennongoofu, eteriiko bbala, y'eno: okulambula bamulekwa ne bannamwandu mu nnaku zaabwe n'okwekuuma ensi eno ereme kutwonoona.

Jump to: Chapter 2 →