James 4

Luganda (BIBU1) (BIBULIYA ENTUKUVU)

← Chapter 3 Jump to: Chapter 5 →

1Entalo ziva wa, n'empaka ziva wa eziri mu mmwe? Teziva ku kino: amaddu gammwe agatabaala mu bitundu by'omubiri gwammwe?

2Mubaako kye mwegomba ne mutakifuna; ne mutemula ne mukwatibwa ensaalwa naye ne wataba kye mutuukako; olwo ne mulwana, ne mukola entalo. Temulina kubanga temusaba.

3Musaba, naye ne mutafuna, kubanga musaba bubi, nga mugenderera kubimalira ku maddu gammwe.

4Mmwe abatali beesigwa! Temumanyi ng'omukwano n'ensi eno gwa bulabe ne Katonda? Buli yenna ateesa okuba mukwano gw'ensi, yeefuula mulabe wa Katonda.

5Mulowooza Ebiwandiiko byogera bya busa bwe bigamba nti: “Ayayaanira n'obuggya Mwoyo gwe yatusindikira asule mu ffe”?

6Kyokka eneema gy'awa ekirawo. Kyava agamba nti: “Katonda alwanyisa abeekuza, naye abeetoowaze abagirira ekisa.”

7Kale nno Katonda mumugondere; Sitaani mumulwanyise, ajja kubadduka.

8Musembere eri Katonda, naye ajja kubasemberera. Mmwe aboonoonyi, munaabe engalo zammwe zirongooke; mutukuze emitima gyammwe, mmwe bannampawengwa.

9Munakuwale, mukungubage, mukaabe. Enseko zammwe zifuuke amaziga n'essanyu lifuuke ekyobeera.

10Mwetoowaze mu maaso ga Katonda, ajja kubagulumiza.

11Abooluganda, muleke kwogera bubi ku bannammwe; ayogera obubi ku wooluganda aba amulamula, aba ayogedde bubi ku Tteeka; Etteeka ly'aba alamudde. Bw'oba olamudde Etteeka, oba tokola kye ligamba, wabula oba mulamuzi.

12Awa Etteeka ali omu era ye mulamuzi, y'oyo asobola okuwonya oba okuzikiriza. Ggwe ani olyoke olamule munno?

13Mulabe eno, mmwe mugamba nti: “Leero oba enkya tujja kugenda mu kibuga kino oba kiri, tumaleyo omwaka nga tusuubula, twefunireyo amagoba”;

14sso nno temumanyi na bya nkya. Obulamu bwammwe kye ki? Anti buli ng'olufu olulabika akabanga obubanga ne luggwaawo.

15Sso mwandigambye nti: “Omukama ng'ayagadde, bwe tunaaba abalamu, tunaakola kino oba kiri.”

16Naye kati mwetendera mu kwekuluntaza kwammwe. Okwetenda okwo kwonna kubi.

17Buli amanyi ekirungi eky'okukola, n'atakikola, aba akoze ekibi.

← Chapter 3 Jump to: Chapter 5 →