James 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1Baganda bange, abessa ku gw'okuyigiriza muleme kubeera bangi, kubanga mumanyi nga ffe abayigiriza tuliramulibwa n'obukaali obusingawo.

2Anti ffenna tusobya mu bingi; oli atasobya mu bigambo, oyo musajja atuukiridde, ayinza n'okufuga omubiri gwe gwonna n'aguwuliza.

3Bwe tussa amalobo mu kamwa k'embalaasi zitugondere, tusobola okufuga omubiri gwazo.

4Mulabire ku maato; newandibadde nga manene gatya, nga gavugibwa mpewo za maanyi, naye galambikibwa enkasi egoba entono ne gadda omugoba gy'aba ayagadde.

5N'olulimi bwe luli. Ku mubiri katundu katono, naye lulina ebinene bingi bye lwetenderamu. Tunuulira akaliro, kenkana wa akookya ekibira ekinene?

6N'olulimi muliro; olulimi nsi nnamba ey'obugwenyufu mu bitundu by'omubiri gwaffe. Luleeta ebbala ebbi ku mubiri gwonna; luteekera omuliro obutonde bwonna; lwo lwennyini Geyenna y'erukoleeza.

7Buli kika kya nsolo n'eky'ennyonyi, eky'ebyewalula n'eky'ebitonde mu nnyanja omuntu asobola okukifuga, era kifugwa muntu.

8Naye mpaawo muntu asobola kufuga lulimi; olulimi kabi akatatuulira awo, lujjudde obusagwa namutta.

9Lwe tweyamba okutendereza Omukama era Taata, sso era lwe tweyamba okuvumirira abantu abaatondebwa mu nfaanana ya Katonda.

10Mu kamwa ke kamu mwe muva okutendereza n'okuvumirira. Baganda bange, kino si bwe kyandibadde.

11Ensulo emu eyinza okufumbukula amazzi agawooma n'agakaawa?

12Baganda bange, omukunyu gubalako oliva, yadde omuzabbibu gubalako entontogolo z'omukunyu? N'amazzi ag'omunnyu bwe gatayinza kuwa mazzi gawooma.

13Ani mu mmwe omugezi, ategeera? Oyo ayoleke mu ngeri ennungi gy'ayisaamu ayoleke mu ggonjebwa n'amagezi ebikolwa bye.

14Naye obanga mu mitima gyammwe mukyalinamu obuggya obuka n'omulugube ogw'okwekkusa, muleke kwepanka; muba mulimba amazima.

15Amagezi ago si geego agakka nga gava waggulu; ga nsi, si ga mwoyo, ga Sitaani.

16Awali obuggya n'omulugube gw'okwekkussa, awo wabaawo kutabukatabuka na buli bikolwa omutali nsa.

17Go amagezi agava waggulu, okusookera ddala, gaba matukuvu, ga ddembe, galekera, ga kisa, gajjudde obusaasizi n'ebibala ebirungi, tegeekubiira, tegeeryanya.

18Ebibala by'obutuukirivu bisigwa mu ddembe abo abaleesi b'emirembe.

← Chapter 2 Jump to: Chapter 4 →