James 5

Luganda (BIBU1) (BIBULIYA ENTUKUVU)

← Chapter 4 Jump to:

1Mulabe eno, mmwe abagagga, mwekaabireko nga musindogoma olw'ennaku ezijja okubagwira.

2Obugagga bwammwe buvunze n'ebyambalo byammwe ennyenje zibiridde.

3Zaabu wammwe ne ffeeza bitalazze; obutalagge obwo bwe bulibalumiriza; bulirya emibiri gyammwe. Mweterekedde omuliro mu nnaku ez'oluvannyuma.

4Mulabe, empeera y'abapakasi abaalima ennimiro zammwe gye mwesigaliza, ereekaana; omulanga gw'abaabalimira gutuuse mu matu g'Omukama w'Amagye.

5Ku nsi mubadde mu kwesanyusa na mu kwejalabya; mu budde obw'okusanjaga mmwe mwali mukkusa mitima gyammwe.

6Mwasalidde omutuukirivu omusango, ne mumutta; tabalwanyisa.

7Kale nno, abooluganda, mugumiikirize okutuusa Omukama lw'alijja. Mulabe, omulimi agumiikiriza n'alindirira ebibala by'ettaka eby'omuwendo okutuusa lw'abifuna mu mwaka ogusooka oba ogusembayo.

8Nammwe nno mugumiikirize, mugumye emitima gyammwe, anti amajja g'Omukama gasembedde.

9Abooluganda, muleke ono okwemulugunyiza oli, sikulwa nga mulamulibwa; laba omulamuzi ali awo ku miryango.

10Abooluganda, ng'ekyokulabirako eky'okubonaabona n'obugumiikiriza, mulabire ku balanzi abaayogera mu linnya ly'Omukama.

11Twesiimisa abo abaaguma. Mwawulira Yobu bwe yaguma, era mwalaba enteekateeka y'Omukama, ng'Omukama bw'ali ow'ekisa, omusaasizi.

12Naye okusinga byonna, baganda bange, temulayiranga ggulu oba ensi, oba okulayira mu ngeri endala yonna; wabula bwe mugamba nti: “Yee”, mutegeeze yee, bwe mugamba nti: “Nedda”, mutegeeze nedda, sikulwa nga musalirwa omusango.

13Mu mmwe mulimu ali mu bulumi? Yeegayirire. Mulimu omusanyufu? Ayimbe ennyimba ezitendereza.

14Mu mmwe mulimu omulwadde? Atumye abakadde b'Ekleziya; bano bamusabire nga bamusiiga omuzigo mu linnya ly'Omukama.

15Essaala ey'okukkiriza erirokola omulwadde n'Omukama n'amuzza engulu; bw'aliba akoze ebibi, birimusonyiyibwa.

16Mwatuliragane nno ebibi byammwe ate musabiragane, mulyoke muwonyezebwe. Essaala y'omutuukirivu eteddirira ekola n'amaanyi.

17Eliya yali muntu wa nkula ye emu nga ffe, yeegayirira n'asaba enkuba ereme kutonnya, nayo n'emala emyaka esatu n'emyezi mukaaga nga tetonnya ku nsi.

18Ate n'addamu ne yeegayirira, eggulu ne litonnyesa enkuba, n'ettaka ne lireeta ekibala kyalyo.

19Baganda bange, singa omu mu mmwe awaba n'aleka okukkiriza, wamala wabaawo amukomyawo,

20oyo ategeere nti buli akomyawo omwonoonyi okuva mu ngeri ze enkyamu, aba alokodde omwoyo gwe mu kufa, era aba abisse ku nnamunkukumbo w'ebibi.

← Chapter 4 Jump to: