James 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Baganda bange, nga bwe mukkiriza Mukama waffe Yezu Kristu, Mukama ow'Ekitiibwa, muleme kubaamu kusosola.

2Singa bwe muba mukuŋŋaanye, wayingirayo omuntu ayambadde empeta eza zaabu n'engoye amakula, ne wayingirayo n'omwavu ayambadde ebiziina,

3mumala mufa ku oli ayambadde engoye amakula, ne mumugamba nti: “Ggwe tuulira wano,” omwavu ye ne mumugamba nti: “Yimirira eri,” oba nti: “Tuula awo wansi ku muziziko gw'ebigere byange,”

4olwo temusosolaganye, temufuuse balamuzi ab'endowooza embi?

5Muwulirize, baganda bange abaagalwa: Abo abaavu mu nsi Katonda si be yalonda babe abagagga mu kukkiriza, basikire obwakabaka Katonda bwe yasuubiza abamwagala?

6Naye mmwe omwavu temumussizzaamu kitiibwa. Abagagga si be babanyigiriza? Si be babawalaawala okubatwala mu mbuga?

7Si be bo abavuma erinnya eddungi lye muyitibwa?

8Bwe mutuukiriza Etteeka ery'obwakabaka, nga bwe kiri mu Biwandiiko nti: “Oyagalanga munno nga bwe weeyagala,” muba mukoze bulungi.

9Naye bwe musosola mu bantu, muba mukoze kibi; Etteeka ligubasalira nti mulimenye.

10Oli aba akutte Etteeka lyonna amala agwa mu kamu ku lyo, aba amenye lyonna.

11Anti eyagamba nti: “Toyendanga,” era ye yagamba nti: “Tottanga.” Bw'oba toyenda, naye n'otta, Etteeka oba olimenye.

12Mwogere, era muyise ng'abantu abagenda okulamulibwa mu tteeka ery'eddembe.

13Atalaga kisa aliramulibwa awatali kisa; sso ekisa kiwangula okulamulibwa.

14Baganda bange, oli okugamba nti alina okukkiriza, sso nga talina bikolwa, kigasa ki? Okukkiriza kwe kuyinza okumulokola?

15Muganda wo oba mwannyoko bw'aba ayita bwereere, talina kaakulya aka buli lunaku,

16omu mu mmwe amala abagamba nti: “Mugende mirembe, mubugume, mukkute,” awatali kubawa ebyo omubiri bye gwetaaga, kigasa ki?

17N'okukkiriza bwe kubeera, bwe kutabeera na bikolwa, kubeera kufu.

18Naye oli ayinza okugamba nti: “Ggwe olina okukkiriza, nze nnina ebikolwa.” Kale ndaga okukkiriza kwo okutalina bikolwa, nange nkulage okwange nga nkola ebikolwa.

19Ggwe okkiriza nga Katonda ali omu; okola bulungi. Naye n'amasitaani gakkiriza ne gakankana n'okukankana.

20Musiru ggwe, oyagala okumanya ng'okukkiriza okutaliiko bikolwa temuba kantu?

21Kitaffe Yiburayimu teyayitibwa mutuukirivu bwe yatambira Yizaake omwana we ku mwaliiro?

22Olabye nno, okukkiriza kwagenderanga wamu n'ebikolwa. Ebikolwa bye byafuulanga okukkiriza okutuukiridde.

23Olwo Ebiwandiiko ne bituukirira ebigamba nti: “Yiburayimu yakkiriza Katonda; ekyo ne kimubalirwa ng'obutuukirivu,” n'ayitibwa na mukwano gwa Katonda.

24Mulabye nno, nti omuntu okufuuka omutuukirivu kiva ku bikolwa, si ku kukkiriza kwokka.

25Kye kimu era ne Rakabu, malaaya, si bikolwa bye byamuyisa omutuukirivu bwe yayaniriza ababaka ate n'abafulumiza mu kkubo eddala?

26Ng'omubiri awatali mwoyo bwe guba omufu, n'okukkiriza awatali bikolwa bwe kubeera okufu.

← Chapter 1 Jump to: Chapter 3 →