Lamentations 4

Luganda (BIBU1) (BIBULIYA ENTUKUVU)

← Chapter 3 Jump to: Chapter 5 →

1Zaabu afumye atya, zaabu omulungi atalazze atya? Amayinja amatukuvu gasaasaanye mu nsonda ya buli luguudo.

2Batabani ba Siyoni abaali ab'omuwendo ab'ebbeeyi okwenkana zaabu omukuŋŋunte, batwalibwa batya ng'ensumbi ez'ebbumba, omulimu gw'emikono gy'omubumbi?

3N'ebibe biggyayo amabeere gaabyo ne biyonsa obwana bwabyo; naye muwala w'abantu bange akambuwadde nga maaya mu ddungu.

4Olulimi lw'omuwere ayonka lumukwatidde ku kibuno olw'ennyonta; amabujje gaasaba emmere, naye tewaali agigawa.

5Abaalyanga ebicepere bataayira mu nguudo; abaakulira mu ngoye entwakaavu baavulira mu lubungo.

6Ekibi ky'omuwala w'abantu bange kinene n'okusinga ekya Sodoma, ekyazikirizibwa mu kaseera obuseera nga tewali na mukono gukikutteko.

7Abakungu baakyo baali basinga omuzira okutukula, nga beeru okusinga amata, emibiri gyabwe nga mimyufu okukira eddulu, mu ndabika baali ng'ejjinja lya saffiro.

8Naye kati mu ndabika baddugala okusinga enziro, ku nguudo tebakyategeerekeka, ensusu zaabwe zetuggidde ku magumba gaabwe, zikaze okwenkana oluku.

9Abattibwa ekitala baali kale kale okusinga abaafa enjala; abo abaafumitibwa bakenena olw'okubulwa akookulya okuva mu nnimiro.

10N'emikono gyabwe abakazi ab'omutima omusaasizi baafumba abaana baabwe; abo ye yali emmere yaabwe nga muwala w'abantu bange azikiriziddwa.

11Omukama alaze obuswandi bwe bwonna, afukumudde obusungu bwe obwesera, ateekedde omuliro mu Siyoni, oguwemmense emisingi gyakyo.

12Bakabaka b'ensi tebakkiriza, wadde bonna abasula mu nkulungo y'ensi, nti omulabe n'omuzigu baliyingira mu miryango gya Yeruzaalemu.

13Naye ekyo kyabaawo olw'ebibi by'abalanzi be n'olw'obugwenyufu bwa bakabona be abaayiwa mu makkati ge omusaayi gw'abatuukirivu.

14Baatangatanga mu nguudo nga bamuzibe, nga basaabaanye omusaayi, ne wataba n'omu asobola kukwata ku byambalo byabwe.

15“Mugende, temuli balongoofu,” bwe batyo bwe baabawereekerezanga, “mugende, mugende, temubaako kye mukwatako!” Bwe badduka, baatangatanga, ab'amawanga ne bagamba nti: “Na wano tebajja kusengawo.”

16Omukama yennyini abasaasaanyizza, takyaddamu kubatunuulira; bakabona tebassibwamu kitiibwa, n'abakadde tebaalagwa kisa.

17Amaaso gaffe gayimbadde olw'okutunula nga tulinda obuyambi obutajja; twayima mu minaala gyaffe ne tulindirira, eggwanga eritaasobola kutulokola.

18Basuula enkessi buli we tuyita, tuleme kuyita mu makubo gaffe; entuuko zaffe zisembedde; ennaku zaffe zisigadde mbale, kubanga enkomerero yaffe etuuse.

19Abaali batuwondera baali bawenyuka okusinga empungu ez'oku ggulu; baatugoba okutuyisa mu nsozi, ne batuteegera mu ddungu.

20Omukka gw'emivumbo gyaffe, omusiige w'Omukama, yakwatirwa mu mutego gwabwe, oyo gwe twayogerangako nti: “Mu kisiikirize kyo mwe tunaabeeranga nga tuli eyo mu mawanga.”

21Sanyuka ojaganye, muwala wa Edomu ggwe asula mu nsi y'e Wuuzi; naye n'ewuwo ekikompe kiriweerezebwayo; olitamiira ne weereka bukunya.

22Ekibonerezo ky'obugwenyufu bwo kiwedde, ayi muwala wa Siyoni, takyakukuumidde mu buwaŋŋanguse nate; naye ggwe, muwala wa Edomu, ajja kubonereza obugwenyufu bwo, ayanike ebibi byo.

← Chapter 3 Jump to: Chapter 5 →