2 Corinthians 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Paulo, ’ba ti pele Kristo Yesuni e’yo Munguni lelenirisiri, adripi Timoteo be, Kanisa Munguni ovupi Korintoari pi vu, ’ba alatararu dria ovupi Akaya dria ma alia ’diyi be:

2’Yeta anzutiri pi ma ovu emi vu asi anzuru be engazu Mungu Ata amani pi vu Opi Yesu Kristo be.

3Awa’difo Mungu Opi amani Yesu Kristo ma Ati vu, eri Ata yiki be azini Mungu asi omiza driani;

4eri ama asi omipi inzata amani ma alia driari, ’dini amani ecozu ’ba dria ovupi inzata ma alia ’diyi ma asi omizaru, asi omiza nde Munguni ama ngulupi ma asi omizurisi.

5Ekile candi Kristoni ’diyini gale ama ruaarile, ’dinile asi omiza amani ga tre Kristosi indi.

6Te yi ka ama inza ra, eri emini asi omiza pi isuzu pata be ani; yi ka ama asi omi ra, eri emini asi omiza isuzu ani, asi omiza nde emi ’bapi okporu candi trotro amani isulerile ’diyi nyazu asi tezasiri’i.

7Azini asi teza amani e’yo eminisiri eri pa so kiri kiri; amani niria kini ekile emini ti ecile ama be candi ma aliarile, ’dinile emi nga ti eci asi omiza ma alia indi.

8Te ama leni emi ma ovu nita kokoru ku, adripi, inzata amani ecapi ama ruaa Asiari ma e’yosi; te eri ovu nzizaru tu, aga okpo amani ra, ’dini ama ’bani ama asi kini ama nga ama idri pa ra, ’dini ku.

9Te ama’iruni, ama ovu e’yo liza dratani be ama ngulupi ma dria, ama ma ’ba ani a’ita amani ama ma ngulupi ma dria ku, te Mungu ’ba draza engapiri ma dria;

10eri ari ndra ama drata amboru ’dapiri ma alia ra, eri nga vini ama ari ra; ama ’ba ama asi eri ma dria e’yo drileri ma e’yosi ’bo, kini eri nga ama ari ’dani.

11Emi indi ma ko ama aza Mungu ziza eminisi, ’ba kakau ma fe ani awa’difo Mungu dri ama ma e’yosi beni, afa feza ovupi fezaru ama dri ’ba kakauni Mungu zilerisirisi.

12E’yo amani ama enyazuri ’di, e’yo eti nzeza nita ama asiarini nzeleri kini acita amani nyakua, azini tuni emi vuri, ovu e’yo alatararu ma alia azini asi lokiri kokoru Mungu ma miliarisi, ondua ruani ma alia ku, te ’yeta anzutiri Munguni ma alia,

13Te ama sini e’yo andini emi dri ku, te kiri e’yo emini ecole lale azini vale rari’i a’dule; azini ma ’ba ma asi emi dria kini emi nga e’yoni va kpere asizaniria,

14ekile emini ama ma e’yo vale nga wererile, kini emi eco emi enyazu amasi ekile amani ama enyale emisi o’du Opi amani Yesuni ma aliarile.

15Mani ovuria a’ita ’diri be, ma ega ndra okorisi muzu emi vu emi ma isu ani asi ndriza iriri beni;

16dini ma ega ndra agazu emi vu ’disi muzu Makedoniaa, azini mani engaria Makedoniaa emvizu emi vu dika, emi ma nga ani ma ji ku geri muzu Yudiaaria beni.

17E’yo’dirisimani egaria ’dinile, ma ’ye ojaojaasi ya? Kani e’yo mani egale ma ma ’yeri ma ega e’yo ruanile, mani e’yo ’yoza ojazu E, e, azini Ku, ku, ’dinile ya?

18Te ekile Munguni ovule e’yo ada berile, e’yo ’yoza amani emi vuri ovuni E pi Ku be ’dini ku.

19’Dini Mvi Munguni, Yesu Kristo ovupi oluzaru emi eselia amasiri, ada amani olule Silivano pi Timoteo beri, ovuni E azini Ku, ’dini ku; te eri ma alia eri E-ni ’dani.

20Aziza Munguni ka ovu kakau ngopi ti, eri ma alia omvizani ovu E. E’yo ’dirisi ama adri Amena ’yo erisi diza fezu Mungu dri.

21Te ama ’bapi okporu emi be Kristo ma alia, odu osupi ama driari, eri Mungu’i;

22eri ’ba afa ini ecetaruri ama dria, fe vini Orindi asi amani ma alia afa toborurile.

23Te ma omve Mungu ovuzu e’yo nzepiriru idri mani ma dria-ma ecani Korintoa ku lu mani emi kuzu asi ndrizasi.

24Ovuni kini ama opiru a’ita emini ma drilia, ’dini ku, te ama ovu ’ba ayiko emini ma aza kopi ’diyiru, a’disiku emi so pa ci

Jump to: Chapter 2 →