2 Corinthians 9

Lugbara (E’yo Siza Alatararu Munguniri BIBLIA)

← Chapter 8 Jump to: Chapter 10 →

1Leni a ma si emi dri azi ’ba alatararu ’diyi ma aza kozuri ma e’yo ku,

2a’disiku ma ni ava emi asiari ra, ava nde ma e’yosi ma enya ma emisi ’ba Makedoniaa ’diyi ma tia, kini Akaya ovu edezaru ngonde eli alu pi ’bo; azini ava emini fe ’ba kakau ma asini engazu ra.

3Te ma pe adripi nde ’diyi ma ti, e’yo amani ama enyazu emi ma e’yosiri kazu cazu toko e’yo ’dirisi ku beni, emi ma ovu di ani edezaru ngonde ekile mani ’yolerile;

4’ba Makedoniaa ’diyi ma azi ka nga mu ma be, ka nga emi isu edekokoru, drinza ngani ama bi ku amani asi ’bale ’dinirisi ku ya? (ma ka tro ’yo emi’i ku ti).

5E’yo, dirisi ma ega onyiruni ma ma azi e’yoni adripi ’diyi ma tia yi ma mu emi vu drile, ma ede afa feza avasi emini azile okorisiri drio, ’dini eri ma ovu ani ngonde, ekile afa fele avasirile, ekile afa ’bani pale parile ku.

6Te ma ’yo ’dini: ’ba ori ripi endrasiri nga afa lo were endrasi, te ’ba ori ripi asi avasiri nga afa lo pi asi avasiri be indi.

7’Ba ma ’ye ekile erini e’yoni otule i asiarile, candisi ku, kani ’bani omile omirisi ku, a’disiku Mungu le ’ba fepi ayikosiri’i.

8Azini Mungu eco ’yeta anzutiri dria agapi turi fezaru emi dri, ’dini emi’i ovupi afa dria dri fupi emi dri ci o’du dria e’yo driasiri be ’diyi, ma aga ani azi onyiru ma alia dria.

9Ekile erini ovule sizarorile, Eri awa afa erini, eri fe ’ba alioru dri; onyi erini ovu kpere ’dani.

10Te eri’i ori fepi ’ba ori ripiri dri, anya be nyazaruri, nga ori riza fe emi dri, nga eri ere fudri ci, nga onyi emini ma efi ’yaza fe ezuzu indi;

11emini ani ecazu ovuzu afa e’iru e’yo dria ma alia, afa feza dria fezu asi onyirusi, asi onyiru nde nga vini awa’difo ji Mungu vu e’yo amanisi.

12A’disiku azi ’ba aza kozu ’diri koni ’ba alatararu ’diyi ma alio ma aza a’dule ku, te eri aga drile kpere Mungu vu indi, ’ba kakauni awa’difo fele eri dririsi.

13’Dini yini emi amaria azi ’ba aza kozu ’diri ma alia, yi inzi Mungu e’yo eriza emini, emini e’yo baru Kristoni e’dalerisi, azini afa feza emini fele yi dri azini ’ba dria dri asi avasirisi;

14yi ma ngulupi indi adri Mungu zi emisi, emi ma avani yi vale tu, ’yeta anzutiri Munguni agapi tu emi vuri ma e’yosirisi.

15Awa’difo Mungu vu afa feza erini ’ba ndepi ’yozasi rarisi!

← Chapter 8 Jump to: Chapter 10 →