2 Corinthians 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Te ma ede ’diri ma asia, ma ngani eca emi vu candi be dika ku.

2’Dini ma ka candi fe emi dri, a’dini ayiko fe ma drini ya? Eri ’ba candi isupi ma driari’i ku ya?

3Ma si ndra e’yo ’diri ’dinile, mani emuria emi vu ma kazu candi isuzu emi vu ku, de onyiruni emini ayiko fezu ma dri; ma ovu a’ita be emi dria vu kini ayiko mani eri ayiko emi driani indi.

4’Dini mani ndra ovuria inzata kakau ma alia azini asi lizasi, ma si ndra e’yo emi vu mindre be tu, candi fezu emi dri ku, te fezu emini leta mani avasi agapi tu emi vuri nizu.

5Te ’ba azini ka ndra candi fe ra, feni ndra ma dri ku-te ma leni ’yo okposi ku ’bo-eri fe candi were were emi dri dria.

6Panga onzi i ’ba kakauni fele ’ba ’dinile ’diri driri fu dri eri dri ra;

7’dini kani bani onyiruni emi ma ku onzi erini, eri asi omizu, ’ba ’dinile ’diri kazu abazu candi agapiri ma alia ku.

8E’yo ’dirisi ma matu ’ba emi vu emi ma ece ale adaruri eri vu’i.

9Te ma si ndra waraga e’yo ’dirisi, emi o’bizu,, kani emi ovu e’yo eriza be e’yo dria ma alia yani.

10Te ’ba ngoni ngo emini eri ma onzi kuzuri, ma ku alu indi. ’Dini ’ba azini ma onzi mani kule ’bori, ma ka eri ku ra, ma eri ku e’yo eminisi Kristo ma milia,

11’dini Satani kazu ama ndezu lokiri inisi ku; a’disiku amani e’yo otuza erini inzoru ’di yi nile rarisi.

12Te ma ka ndra ca Troaa e’yo baru Kristonisi, azini jotile ka ovu zizaru ma dri Opi ma alia ra ti,

13ma asi ambini ku mani ma adripi Titoni isule kurisi. Te mani yi kuria, ma fu mu Makedoniaa.

14Te awa’difo Mungu vu, erini ama dri cele etuzu ari’ba agazu ari Ipezu Kristo ma aliarisi, erini nita iniri ma a ji ecele pari dri dria amasirisi,

15’Dini ama ovu Kristo ma aji arikariruri Mungu vu, ’ba yi opapi ra ’diyi pi ma eselia ’ba dri japi ’diyi be;

16’ba azini ’diyi dri ama aji drataniriru cazu drata vu, ’ba lazini ’diyi dri ama aji idriniriru cazu idri vu. A’di eco e’yo ’diyisini ya?

17’Dini ama ovuni ’ba e’yo Munguni ezapi lokirisi ekile ’ba kakau, diyile ku; te asi adarusi, ekile ’ba Munguni ’diyile, Mungu ma milia ama e’yo olu Kristo alia.

← Chapter 1 Jump to: Chapter 3 →