2 Corinthians 5

Lugbara (E’yo Siza Alatararu Munguniri BIBLIA)

← Chapter 4 Jump to: Chapter 6 →

1’Dini ama ni ra kini jo nyakuru hema amanirini ka i anzu ra, ama ovu jo Munguni sileni, jo sile drisi ku ovupi ’dani ’dani ’buari be.

2Te hema ’dori ma alia ama ota ota, amani leria tu jo amani engapi ’buari suzu’i;

3ka ovu ’dini, ama ka eri su ra, ama ngani e’da pililiru ku.

4’Dini adaru ama ovupi hema ’dori ma alia ’diyi, ama ota ota ovuzu asi nziza be; ovuni kini ama le hema ’diri tru ra ’dini ku, te ama le azini su drinia’i, ’dini idri ma ki afa ecopi drapi rari ra.

5Te ’ba ama ’bapi bani e’yo ’disiri eri Mungu, Orindi fepi ama dri toboruri’i.

6E’yo ’dirisi ama ovu etuzu asi agupirusi; azini ama ni kini amani de ovuria indi rua be ama ovu Opi be ziri,

7a’disiku ama ad a’itasi, te ndretasi ku.

8’Dini ama ovu di asi agupirusi, azini ama ma milia amani ovuzu ma be ziri te Opi be indiri ovu onyiru aga ra.

9E’yo ’dirisi ama ka ovu indi kani ziri ti, ama ava ’ba ayiko fezu eri dri.

10A’disiku ama dria ma ece ama oguna Kristoni e’yo lizuri ma drilia, ’dini ’ba dria alu alu ma isu e’yo ini ’yele ndra i ruasi ’diyi, ekile erini ’yelerile, kani onyiru kani onzi.

11E’yo ’dirisi amani rota Opini ruzuri niria, ama ’ba ma asi ese imbatasi; te ama ece ama Mungu ma milia mgboru ’bo, azini ma ’ba ma asi kini ama ece ama asisile emini ma alia indi.

12Ama inzini ama ngulupi ma onyi emi tia dika ku, te ama pari fe emini emi enyazu e’yo amanisi, emi ma ovu ani e’yo omviza be ’ba yi enyapi rua e’dapi amveri ma e’yosi, te asi ma e’yosi ku ’diyi dri beni.

13’Dini ama ka aza aza, ama aza Mungu ma e’yosi; ama ka ovu ondua be, ama ovu ondua be e’yo eminisi.

14A’disiku leta avasi Kristoniri ama omini, te ama li e’yo ’dini, kini ’ba alu dra ’ba driasi, e’yo ’dirisi ’ba dria odra ani ra.

15Azini eri dra ’ba driasi, ’ba ovupi idriru ’diyi ma ovu ani idri be yi ngulupisi ku, te ’ba drapi e’yo yinisi azini engapi dikari ma e’yosi.

16E’yo ’disi engazu curu’do ama nini ’ba aluni ruasi ku; te ama ka ndra Kristoni ni ruasi ti, curu’do ama nini eri ’dini dika ku.

17E’yo ’dirisi ’ba ka ovu Kristo alia eri ovu ’bazaru o’diru; e’yo drio ’diyi aga ’bo, mi lu, ’ba yi o’diru ’bo.

18Te afa dria enga Mungu vu, eri’i ama ti ecipi i be tualu Kristo alia, azini azi ti ecitaniri fepi ama driri;

19efini ’dini, Mungu ovu Kristo alia wudrikuru ma ti ecizu i ma ngulupi be, ezata yini lazu yi dria ku, azini e’yo ti ecitaniri ejizu kuzu ama dri oluzu.

20E’yo ’dirisi ama ovu ojiou Kristoni, eri ekile Munguni matu ’ba geri ama tiliasirile. Ama matu ’ba etini vu Kristo ma paria, emi ma eci emi ti Mungu be fo!

21Eri ’ba Kristo ezata nipi kuri ezataru amasi, ama ma ofu ani onyi Munguniriru eri ma alia beni.

← Chapter 4 Jump to: Chapter 6 →