2 Corinthians 6

Lugbara (E’yo Siza Alatararu Munguniri BIBLIA)

← Chapter 5 Jump to: Chapter 7 →

1’Dini amani azi ngaria eri be tualu, ama matu ’ba emi vu kini emi ma a’i ’yeta anzutiri Munguni tokoru ku.

2Te eri ’yo ra, Ma eri mi etu ’yekerisi, ma ko mi aza o’du patinirisi ra. Mi lu, etu ’yekeri ’di; mi lu, o’du pataniri ’di.

3Ama ’bani afa kumuru ’ba ma geria e’yo aluni ma alia ku, ’ba kazu asu suzu ama ruaa azi amani ma e’yosi ku,

4te e’yo dria ma alia ama ece ama onyiru, ’ba azi Munguni ma aza kopi ’diyile ovuzu asi teza be tu, inzata piyi ma alia, ocoko pie, pari ewaru ’diyi pie,

5cota pie, lazu arururi pie, otrena ombasiri pie, azi okporu ’diyi pie, ovuzu o’du koza kokoru ini be rrari pie, ovuzu abirisiri pie;

6e’yo alatararuri pisi, nita pie, asi teza e’yereri pie, asi onyiru pie, Orindi Alatararuri pie, leta lokiri kokoruri ’pie,

7e’yo adaruri pie, okpo Munguni pie; afa ombani e’yo kililirurini ’diyi ’duzu dri ndiria azini dri ejiria;

8’ba ka ama inzi ra kani ka drinza fe, ka ama ru ’yo onzi kani onyiru ti. Yi ama o’da ekile ’ba ’ba icipi ’diyile, de ama ’ba adani;

9ekile ’ba nile ku ’diyile, de ’ba ni ama tu; ekile ’ba drapi dra ’diyile, te mi lu, ama de idriru; ekile ’ba cole co imbatasi ’diyile, te lini dra ama dria ku;

10ekile ’ba candi be ’diyile, de ama ayiko be o’du driasi;ekile’ba aliorule, te lonyi fezu ’ba kakau dri; ekile ’ba afa kokorule, de ama afa dria ma e’ipini.

11Ama zi tile amani mgboru e’yo ’yozu emi tia, emi ’ba Korintoa ’diyi la; asi amani ovu walaru.

12Emi isuni pari wereru dri fupi kuri ama asia ku, te emi isu pari wereruri bani ava emi ngulupi ma asiari ma alia.

13Curu’do emi ma ofe arotini tro tro-ma ’yo emi tia ekile anzi ma tiarile-emi ma zi vini emi asi walaru indi fo!

14Emi ma eci emi ovuzu ’ba a’ipi ku ’diyi ma aziru ku. Te onyi pi i emu tualu onzi be ngoni ngoni ya? Diza pi i eci ini be ngoni ngoni ya?

15Kristo pi Beliali be yi e’yo a’i alu ngoni ngoni ya? ’Ba a’ipiri ma esele ovu ’ba a’ipi kuri be tualu ngoni ngoni ya?

16Hekalu Munguni pi i eci wura inzile inzi ’diyi be ngoni ngoni ya? A’disiku ama ovu hekalu; Mungu idrirurini; ekile Munguni ’yolerile, Ma nga ovu yi ma alia, azini ma nga aci yi ma eselia, ma nga ovu Mungu yini, yi nga ovu ’ba mani.

17E’yo ’dirisi emi efu yi eseliasi, emi co emi esele yi be re, Opi ’yo emi ma elo afa alatara kokoruri ku; re ma nga emi a’i ra,

18ma nga ovu emi ma Ataru, emi nga ovu ma anzipiru azini ma ezopiru, Opi Okpo dria beri ’yo ra.

← Chapter 5 Jump to: Chapter 7 →