Ephesians 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Paulo ’ba Kristo Yesuni tini pele e’yo Mu nguni lelenirisiri, ’Ba alatararu Efesoa ovupi asi ada be Kristo Yesu ma alia ’diyi vu:

2’Yeta anzutiri pi ma ovu emi vu asi anzuru be engazu Mungu Ata amani pi vu Opi Yesu Kristo be.

3Mungu Opi amani Yesu Kristo ma Ata ma ru ma ovu inzizaru, eri’i asi ndriza orindini ’diyi dria fepi ama dri Kristo ma alia angu ’buariari’i;

4eri ope ama eri ma alia de nga eri ’bani nyaku ma eti ku, ama ma ovu ani alatararu azini e’yo kokoru eri ma milia letasi.

5Eri ’ba mira ama ndu ovuzu anzi i ma ngulupiniru Yesu Kristosi, ekile e’yo ovupi onyiru eri ma milia erini lelenirile,

6amani ngazu ani inzita fezu ’yeta anzutiri erini dizaru, erini fele ama dri avasi ’Ba Leleri ma aliari dri.

7Eri ma alia ama ovu onzeza amani eri ma arisiri be, ezata amani wuzu, ekile ’yeta anzutiri erini ma lonyini ovule amborurile;

8eri fe ’yeta anzutiri nderini ezuzu ama vu tu, ondua driasi e’yo vaza be,

9fezu amani e’yo erini leleniri ma e’yo vale ku zizaruri nizu, ekile e’yo ovupi onyiru eri ma milia, erini egale drio Kristo ma alia ’yezurile,

10ewunini ngaria caria ’yekeria eri ma oku afa dria tualu Kristo ma alia, afa ’bua ’diyi pi afa nyakua ’diyi be dria eri ma alia.

11Te eri ma alia indi ama ofu ovuzu eri ma yilaru ’bo, erini ama opele drio ekile eri’i e’yo dria ’yepi mi egale onyirurilerini lelerile,

12’dini ama ’ba asi ’bapi a’itasi Kristo dria oko ’diyi ma fe ani ’bani inzita fezu diza eriniri dri beni.

13Eri ma alia, emi alu indi, yi ebi eceta emi ’ba e’yo adaniri-’di bani e’yo baru emi pazu ’diri-eripi Kristo a’ipi ra ’diyi ma ruaa, Orindi Alatararu erini azile fezurisi.

14Orindi nderi eri ekile afa kule toboru awuruso amani ma e’yosi de nga onzeni afa nde ma ada kurile, inzita fezu diza eriniri dri.

15E’yo ’disi ma’i indi, ma ka a’ita emini Opi Yesu ma aliari pi ma e’yo eri, leta emini ’ba alatararu ’diyi vu driari be ’bo,

16ma kuni awa’difo ’yozu emisi ku, mani e’yo emini egaria zita mani ma alia,

17Mungu Opi amani Yesu Kristoni, Ata dizaruri, ma fe emi dri orindi onduani azini e’yo e’dazani, nita eri nizuri ma alia,

18te de eri fe diza mile emi asia ’diyi dri ’bo, emini ani e’yo teza omveta eriniri pi ma e’yo nizu, awuruso erini dizaru ’ba alatararu, diyi ma aliari ma lonyi pie,

19okpo erini amboru tu agapi dria ra ’ba eri a’ipi ’diyi vuri pie, ekile okpo erini e’yo ’yezurini ’yele okporu,

20erini ’yele ani okposi Kristo ma alia, erini eri engaria ’ba draza ma eselia, eri fezu rizu va i ma dri ndiria angu ’buariarile.

21Te eri fe eri ma ri va dri ceza opiruri pi ma drilia dria, ecoza pie, okpo pie, opi nyaza pie, azini ru dria ’dale ewu ’dorisi ’diyi pie a’dule ku, te ru ngale,’dale ewu ecapirisi ’diyi pie indi;

22eri o’ba afa dria eri ma palaa va, eri fe erini ovuzu afa dria ma drilia kanisa ma driru;

23kanisa nde ovu eri ma rua, gaza tre eri’i afa dria gapi tre e’yo driasiriniri’i.

Jump to: Chapter 2 →