Ephesians 3

Lugbara (E’yo Siza Alatararu Munguniri BIBLIA)

← Chapter 2 Jump to: Chapter 4 →

1E’yo ’dirisi ma’i Paulo, ’ba aruru Kristo Yesuni emi ’ba Jururu ’diyi ma e’yosiri-

2emi ka azi ’yeta anzutirini Munguni fele ma dri emi e’yosiri ma e’yo eri ’bo,

3kini ece e’yo vale ku zizaruri ma dri ece ece, ekile mani sile e’yo weresi oko ’borile.

4’Dini emini e’yo ’diri laria, emi ma eco e’yo vaza mani e’yo vale ku zizaru Kristoniri vazuri amazaru beni.

5’Ba ma ori nini ndra e’yo zizaru ’diri ewu driorisi ku ekile Orindini e’yoni ecele ewu curu, dorisi ’ba ti opele alatararu erini ’diyi pi vu nabiyi berile, kini,

6’ba Jururu ’diyi ovu ’ba awuruso nyapi yi be tualu, yi ecipi rua aluru yi be, aziza Kristo Yesu ma aliari a’izu yi be tualu e’yo barisi ’diyi.

7’Ba ndra ma ’ba e’yo baru ’diri ma azi aza kopiriru, ekile ’yeta anzutiri Munguni fele ma dri okpo erini e’yo ’yezu okposirisirile.

8Te fe ’yeta anzutiri ’diri ma dri, ma ka tro ovu ’ba alatararu ’diyi ma eselia ’ba wereru turi’i, ma ma olu ’ba Jururu ’diyi ma eselia lonyi Kristoni ’bani ecole etini vale dria kuri ma e’yo bare,

9e’yo vale ku ovupi zizaru Mungu afa dria ’bapiri ma alia engazu driori ma e’yo edeza ecezu ’ba dria dri;

10eri ma fe ani geri kanisanirisi ’ba ’ba dri cepi ’diyi azini ’ba okpo be angu ’buaria ’diyi ma ni ondua Munguni ovupi esele be, kakauri;

11ekile erini edele gbudrio Kristo Yesu Opi amani ma aliarile.

12Eri ma alia ama ovu asi okporu be azini ama isu geri esizu Mungu vu ogogori asi tezasi, amani Kristoni a’ile rarisi.

13E’yo ’disi i emi ava ma nze i candi mani isule emi e’yosirisi ku; eri bani e’yo emini emi enyazu aniri’i.

14E’yo ’dirisi ma osi kumuti va Ata ma drilia,

15te omve e’yo ’bani ovuzu ataruri ’bua kani nyakua dria eri ma e’yosi,

16zizu kini eri ma fe, diza eriniri ma lonyi vusi, emini okpo isuzu Orindi erinisi agu emini alealeruri ma alia,

17Kristo ma adri asi emini ma alia a’itasi; emini ola suria va patile emi ma so pa kirikiri leta ma alia,

18emi ma ovu okporu ’ba alatararu ’diyi be dria, wala pi ma e’yo vazu, oconi pie, izu uruleruri pie, izu valeru eleri pie,

19emini ani leta Kristoni e’yo niza ’bani dria ndepi rari nizu, emi ma ga ani tre Mungu ma gaza trerile dria.

20Eri’i ecopi e’yo dria ’yepi tu aga e’yo dria amani zile kani egale ’diyi ra, okpo erini azi ’yezu ama alia okposirisiri

21ma ru ma ovu inzizaru kanisa alia, azini Kristo Yesu ma alia, a’bianzi vusi dria, ewule ewule. Amena.

← Chapter 2 Jump to: Chapter 4 →