Ephesians 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Te emi odra ndra ra e’yo onzi pi ma alia ezata emini be.

2Emi ad ndra e’yo onzi ’diyi ma alia, ekile ’ba ewu nyaku ’dorinisi ’diyile, ekile opi ovupi okpo be oli uru agaduari ma alia, orindi azi ngapi okposi anzi e’yo a’ipi ku ’diyi ma aliarini lelerile.

3Te ama’i indi, ama dria aci ndra e’yo onzi ’diyi ma alia li ruanisi, e’yo rua pini lele asisile be ’diyi ’yezu; ama ndra idri amani ma alia ami adrani, ekile ’ba azi ’diyile.

4Te Mungu ovupi yiki ma e’irori, leta erini amboru erini ama lezurisi,

5amani ndra tro ovuria drazaru e’yo onzisiri ti, eri ’ba ndra ama idriru Kristo be te emi ovu pazaru ’yeta anzutirisi,

6eri enga ama eri be tualu, fezu amani rizu eri be tualu angu ’buaria, Kristo Yesu ma alia,

7ewu ngapi ecapirisi eri ma ece ani ’yeta anzutiri erini ma lonyi agapi turi, erini asi ndriza fele ama dri Kristo Yesu ma aliarisi.

8A’disiku emi ovu pazaru ’yeta anzutirisi geri a’itanisi; te’diri engani de emi vu ku, i eri afa feza Munguni feleniri’i

9’yetasi ku, ’ba aluni kazu i enyazu ku.

10Te ama ovu eri ma dripamvu, ’bazaru Kristo Yesu ma alia, amani ani ’yeta onyiro Munguni edele kule ama dri ngonde drio amani acizu yi ma alia ’diyi ’yezu beni.

11E’yo ’disi emi ma avi ku kini emi ovu ndra ’ba Jururu ruasi, ’ba agele lile drisi ’ba ruaa ’diyini omvele agele lizaako ’diyi-

12kini ewu ndra ’darisi emi ovu Kristo kokoru, esele cozaru suru Israelini be ziri ziri, ’ba jururu ovupi aziza azile ’diyi be ku ’diyi, asi ’baza kokoru azini Mungu kokoru nyakua.

13Te curu’do Kristo Yesu ma alia yi eji emi ovupi ndra ziri ’diyi ogogo ari Yesunisi.

14Te eri asi anzuru amaniri’i, eri fe esele iri ’diyini ovuzu aluruni, eri anzu jo aliza ama esele copiri,

15rua erini ma alia eri ’ba nguta ari’barori azita ecarale e’yo sile azitaru ’diyi berini feleri i dezu, eri ma ’ba ani ’ba iri ’diyini ovuzu ’ba alu o’diru i ma ngulupi ma alia, asi anzuru ’bazu ’dinile,

16eri ma fe ’ba iri ’diyini ti ecizu Mungu be rua alu ma alia, geri pati alazanisi, ngutani ma ti adizu pati alaza ndensi.

17Te eri emu asi anzuru ma e’yo baru oluzu emi ovupi re ’diyi ma tia, azini asi anzuru oluzu ’ba ogogo ’diyi ma tia indi;

18a’disiku erisi ama iri tro isu geri esizu Ata vu ogogori Orindi alu ma alia.

19Ka’dini emi ovuni di jururu, kani ani- ’baru dika ku, te emi ovu ’ba alatararu ’diyi ma aziru, emi ’ba Mungu vile akua ’diyi,

20odro emi ’ba ti opele ’diyi pi ma jo eti ma dria nabiyi be, Kristo Yesu ma ngulupini de oni jo ma kalaariruai;

21eri ma alia jo alu pi ma esele, ecile tualu onyiru ’diyi, zo cazu ovuzu hekalu alatararu Opi ma alia;

22eri ma alia si vini emi indi tualu ovuzu pari Munguni ovuzuriru Orindi ma alia.

← Chapter 1 Jump to: Chapter 3 →