Ephesians 4

Lugbara (E’yo Siza Alatararu Munguniri BIBLIA)

← Chapter 3 Jump to: Chapter 5 →

1E’yo ’disi ma’i ’ba aruru Opi ma aliari, ma matu ’ba emi vu emi ma aci onyiru ekile omveta emi omvezurile,

2asi afu kokoruri pisi dria asi e’yere pie, asi teza ande kokoruri pie, ovuzu asi ndriza be emi eselia leta avasirisi,

3o’bizu asi driasi asi alu Orindiniri ma ta mbazu, emini ovule ombezaru tualu asi anzurusirisi.

4Rua eri alu, azinii Orindi eri alu, ekile yini emi omvele omveta emi omvezuri ma asi teza alusirile;

5Opi alu, a’ita alu, baputizi alu;

6Mungu alu ’ba dria ma Ataruri, eri’i ovupi afa dria ma drilia, azi ngapi e’yo dria ma aliasini, ovupi afa dria ma aliari’i.

7Fe ’yeta anzutiri ama dri alu alu o’bizaru ’dipi ekile afa feza Kristonirile.

8Eri ’yo ani, Eri ka tu uru ’bo, eri obi ’ba obile ati’baru ’diyi ra, eri fe afa feza ’ba dri,

9(E’yo ’diri, kini, Eri tu ’bo, efini ngoni ya? Eceni kini eri si va oko raka kpere nyaku ma esele valeru turia ku ya?

10’Ba sipi vari eri ’ba tupi uru ’bu agapi dria rari’i, eri ma fe afa driani gazu erisi tre beni.)

11Eri fe ’ba azini ’diyini ovuzu ’ba ti opele ’diyiru, azi ’diyi nabiru, azi ’diyi ’ba e’yo bari olupi ’diyiru, azi ’diyi ’ba ’ba ocepi ’diyiru, kani ’ba ’ba imbapi ’diyiru,

12’ba alatararu ’diyi edezu afa dria be, dri fuzu ani azi kanisa ma aza kozuri ’yezu, rua Kristoni ezozu,

13kpere ama driani ngaria caria ovuzu asi alu a’ita pini nita Mvi Munguni nizuri berisi, ovuzu ’ba zopi dri fupi ’boriru, cazu ovuzu ’dopi ekile Kristoni ’ba etole trerile;

14’dini ama ma ovu anzi nyiriru ’dani ku, ojizaru ’dile ’dole olini yi mile ojilerile, drozaru oli imbata ndu ndurisi, imbata nde ’bani imbale lokiri pisi asi onzi be, geri ndazu ’ba icizuri’i.

15Te ama ma ’yo e’yo adaru leta avasirisi, zozu Kristo ovupi driruri ma alia e’yo driasi;

16Kristosi rua dria emu i tualu ’yeke, i ecizu okpo isuti driani felerisi, ekile rua ma esele alu alu driani azi ngalerile, fezu ruani zozu, eri ma ngulupini i ezoria leta avasirisi

17E’yo ’disi ma ’yo emi tia, azini ma e’yo eti nze Opi ma alia, emi ma aci dika ekile ’ba jururu ’diyini acilerile ku, te yi ma asisile ovu toko;

18yi ma e’yo vaza bi iniciciru, yi co yi esele idri Munguniri be ziri ziri, nitaako ovupi yi ma aliarisi azini asi mbaza yinirisi;

19te yini e’yoni etumule kurisi, yi fe yi pi e’yo drinzaru vu, e’yo onzikanyaru ’diyi ’yezu dria avasi.

20Te imbani ndra emi e’yo Kristonisi ’dinile ku!

21e’yo emini eri erizuri ka adaru, ka emi imba eri ma alia ekile e’yo adaruni ovule Yesu ma aliarile:

22kini emi ma tru agu oku i ezapi teketeke li lokirirurisiri ra, eri ofuzu amve adriza okuri be;

23orindi asisile eminiri ma aliari ma ovu ’bazaru o’diru,

24emi ma su agu o’diru Munguni ’bale i ma wurasi e’yo kililiruri pisi ala tara e’yo adaniri beri.

25E’yo ’disi emi ma ku e’yo inzoruri ja, emi alu alu ma ’yo e’yo adaru ’ba emi jo ejeleari be, a’disiku ama alu aluni ovule rua esele ama agyi pierisi,

26Emini adra ’baria emi ma ’ye e’yo onzi ku; etu ma ’de emini ovuria nga kiri adrasi ’dani ku,

27emi ma fe vini pari Satani dri ku.

28’Ba afa ogupiri ma ogu dika ku, te bani eri ma nga azi onyiru okposi i ma ngulupi ma drisi, eri ma ovu ani afa be ecozu fezu ’ba alioni ndele rari dri beni.

29Emi fe e’yo onzikanyaruri ma efu emi tilia aluni ku, te lu e’yo ovupi onyiru dri fupi e’yonisiri’i, eri ma fe ani ’yeta anzutiri ’ba eripi ’diyi dri.

30Emi ma ecandi Orindi Alatararu Munguniri ku, Orindi ndesi yi ebi eceta emi ruaa emi ta mbazu cazu o’du onzetaniri ma tia.

31Te emi ma ku asi okaruri pi emi eseliasi dria ja, aoko pie, adra pie, awata pie, o’data pie, asi onzi pie dria,

32te emi ma ovu asi basi, asi ndriza be emi eselia, e’yo onzi kuzu emi eselia ja, ekile Munguni e’yo onzi emini kule Kristosirile.

← Chapter 3 Jump to: Chapter 5 →