Ephesians 5

Lugbara (E’yo Siza Alatararu Munguniri BIBLIA)

← Chapter 4 Jump to: Chapter 6 →

1E’yo ’disi emi ma ’ye e’yo, ma si ekile Munguni ’yelerile, ekile anzi lele avasi ’diyile.

2Emi ma aci ani letasi ekile Kristoni emi lelerile, ekile erini i ma ngulupi fele afa feza edetaru Mungu dri ovuzu afa aji be arikariruriru amasirile.

3Te ali ’baza pi ma ru ma efu emi tilia e’yo alatara kokoruri pie dria, li ’bazu afasiri pie aluni ku, ekile e’yoni ’ba alatararu ’diyi silerile.

4E’yo drinzaruri pi ma ovo emi eselia aluni ku, e’yo ’yoza azazaruri pie, aparaka pie, ’diyi e’yo onyiruni yo; te adani awa’difo ’yozu Mungu tiari’i.

5Te emi ma ni ’di, kini, ’ba ali o’bapiri kani ’ba e’yo onzikanyaru ’yepiri, kani ’ba li ’bapi ’ba azini ma afasiri (eri ’ba wura toko inzipiri) aluni isuni awuruso suru Kristo pini Mungu beri ma eselia ku.

6’Ba aluni ma ici emi e’yo ’yole efi kokoru ’diyisi ku, te e’yo ’diyisi adra Mungunini emu ani anzi e’yo inzipi ku ’diyi ma dria.

7E’yo ’disi emi ma eci ti yi be ku,

8a’disiku emi ndra inini, te curu’do emi dizani Opi ma alia; emi ma aci ani anzi dizanile

9(te dizu ma efi ’yazari e’yo onyiru ’diyi ma alia dria, e’yo kililiruri pie, e’yo adaruri pie),

10emi o’bi e’yo ngori ayiko fe Opi driniari nizu.

11Emi ma eci emi ti ’yeta efi ’yaza kokoru inini ’diyi be ku, te bani emi ma ega yi ma dria ega.

12A’disiku e’yo yini ’yele zizaru ’diyi eri ’ba dri drinzaru ’yozu;

13te e’yo dria dizani egale yi ma dria ’diyi e’da yi ra, a’disiku afa afa e’dapi ceri eri dizani.

14E’yo ’disi eri ’yo ra, Mi oru mi, mi ’ba o’du kopiri, mi ma enga ’ba draza ma eselia, te Kristoni nga diza fe mi dri.

15E’yo ’disi emi ma ovu mile be acita emini ndrezu kililiru, ekile ’ba ondua kokoru ’diyile ku, te ekile ’ba onduaru ’diyile;

16etu ma aga emi dria pirini ku, ewuni ovule onzinsi.

17E’yo ’disi emi ma ovu egata kokoru ku, te emi ma va e’yo Opini leleri.

18Emi ma ati ewasi ku, a’disiku e’yo nderi e’yo saaruni; te emi ma ga tre Orindisi,

19e’yo ’yozu emi eselia zaburi pisi, ongo pie, ongo Orindini imbale ’diyi pie, ongo ngozu o’disi, ngozu emi asia Opi dri,

20awa’difo fezu o’du dria e’yo driasi Mungu Ata dri, Opi amani Yesu Kristo ma rusi.

21Emi ma ovu inzita onyiru be emi eselia ruta Kristonisi.

22Emi oku, emi ma ovu inzitasi agupi emini vu ekile Opi vurile.

23A’disiku agupi eri oku ma drini, ekile Kristoni ovule kanisa ma drinirile, eri ’ba rua papiri’i.

24Te ekile kanisani Kristo ma e’yo inzilerile, oku ma inzi agupi yini e’yo driasi ’dinile.

25Emi agupi, emi le oku emini avasi ekile Kristoni kanisa lele avasi i ma ngulupi fezu erisirile,

26dini eri ma ’ba eri alaru, eri ojizu e’yo Mungunirisi, ekile yisirile,

27eri ma fe ani kanisani pa sozu dizaru eri ma milia nyibele kokoru, e’yo onzi kani afa azini ’dinile ’diyi kokoru dria, te eri ma ovu alaru azini e’yo kokoru.

28’Dinile le agupi ma le oku yini ekile yini yi ngulupi ma rua lelerile. A’disiku agupi oku ini lepiri le ’di i ma ngulupi’i.

29Drio ’ba aluni nguni nga i ngulupi ma rua onzi ku, te eri adri eri agei te tani mbazu ekile Kristoni kanisa ma agei telerile,

30a’disiku ama rua erini ma esele.

31E’yo ’dirisi ’ba ma ku i ati pi landri be, ma ebi i oku ini be, te yi iri tro nga yi oja ovuzu fila aluru.

32E’yo zizaru vale ku ’diri amboru itu, te ma ’di e’yo Kristo pini kanisa,beri ’yo’i,

33Te emi alu alu ma le loku emini, emini emi ngulupi lelerile, te oku ma inzi vini agupi ini indi.

← Chapter 4 Jump to: Chapter 6 →