Hosea 11

Lugbara (E’yo Siza Alatararu Munguniri BIBLIA)

← Chapter 10 Jump to: Chapter 12 →

1Israelini ndra ovuria mvaru, ma le ndra eri ra, azini ma omve mva mani engazu Misiria.

2Yini yi omvele rari ti, yi apa yisi drile drile; yi ede edeta Baali dri, yi eve obiese wura tokoni dri.

3Ma imba ndra Efiraimuni acizu ma’i, ma o’du yi ma wua; te yi nini kini ma ati yi rua ma’i, ’dinini ku.

4Ma ose ndra yi kali tetenisi, baka letanirisi, azini ma ovu ndra yi vu ekile ’ba kulumbu ma baka ayupi yi ma ombelearile; azini ma ’ba nyaka yi ma drilia ma’i.

5Yi ngani mvi angu Misiria dika ku, te ’ba Asuriani nga ovu opi yini, yini gale emvikokoru ma vu sirisi.

6Te seini nga e’de aku yini ma dria, azini eri nga pati katalaru yini ’diyi onyo ra, nga yi eza teketeke ra, e’yo yi ma ngulupini amale ’diyisi.

7’Ba mani ’ba yi asi ’dani asizu vile ma kuzu; ka tro yi omve Mungu ovupi ururi ti, ’ba aluni diza fepi eri drini yo.

8Ma nga mi ku ngoni ngoni ya, Efiraimu la! Ma nga mi ’be ngoni ngoni ya; Israeli la! Ma nga mi ’ba ekile Adimale ngoni ngoni ya! Ma nga mi ’ba Zeboimule ngoni ngoni ya! Asi mani oja i ma alia, asi ndriza ga ma asia tre curu’do.

9Ma ngani ’ye adra mani acirurisi ku, ma ngani dri atri Efiraimu ma dri jazu ku; a’disiku ma Mungu’i, ma ovuni ’bani ku, Mungu Alatararu ovupi emi eseliari, azini ma ngani fi aku ndea aokosi ku.

10Yi nga aci Yehova ma vutia, eri nga wu ekile kamile; te eri nga wu ra, azini anzi nga emu rua yaza be engazu woko etuni ’ derialeruria;

11yi nga emu rua yaza be ekile ariale engazu Misiria, ekile a’balaule engazu angu Asuriaria; azini ma nga fe yi ma adri jo yini ma alia, Yehova ’yo ra.

12Efiraimu ace ma kuru inzosi, azini suru Israelini ace ma lokirisi; te Yuda adri nga opiru Mungu be, eri ovu ’ba adaru Mungu Alatararu be.

← Chapter 10 Jump to: Chapter 12 →