Hosea 13

Lugbara (E’yo Siza Alatararu Munguniri BIBLIA)

← Chapter 12 Jump to: Chapter 14 →

1Efiraimu ka mira e’yo ’yo, ’ba yi ma rua ya ya; eri ’ba i amboru Israeli ma alia; te eri ka eza e’yo Baalinisi eri dra ra.

2Te curu’do yi eza di drile drile, azini yi ede yi dri wura toko dahabu yini akapi acisirisi, wura inzile inzi yini edele onduasi’diyi, yi dria alu alu onduou ma dripamvu’diyi. Yi ’yo yi tia yisi, kini, ’Ba lepi edeta edepi ’diyi ma inzi koja anzi ndruzasi!

3E’yo ’disi yi nga ovu ekile iriti o’bitisirile, ekile andrali afipi mbelerurile, ekile anyadrileko olirikoni drole akuma driasi amvelerile, ekile acika efupi pari acikani efuzuriarile.

4Te ma’i, ma Yehova Mungu mini engazu ewu mini efuzu angu Misiriarisi; emi ma ni Mungu azini ku, pe alu ma’i, a’disiku Mungu ’ba papiri azini aluni yo, kiri ma’i a’dule.

5Ma ni ndra emi angu roko driaria, pari yini ovuzu yoria;

6nyamuko yini vusi yi tra nyakasi ra, yi tra ra, te asi yini eca afuru; e’yo ’disi yi ma dri avi masi’bo.

7E’yo ’disi ma ovu yi dri ekile kamile, ma nga yi te geria o’dule.

8Ma nga dri fu yi be ekile nguru dubaru andriru ’bani anzini ’dule rarile, ma nga yi ma ale asi, ma nga yi oci kamile ’daa; nguruni nga yi asi ra.

9Dri jata mini ’di, Israeli la, mini omba ’bale ma be, ma’i mi aza kopiri berisi.

10Opi mini curu’do ngoa, erini mi pazu aku mini vusi ani ya? ’Ba e’yo mini lipi ’diyi ngoa, mini yi ma e’yo ’yole, Mi fe opi ma dri, ’ba ’ba dri cepi opiru ’diyi be ’diyi?

11Ma fe ndra opi mi dri aoko mani ma alia, te ma nze eri adra manisi.

12Ombe e’yo onzi Efiraimuni ’bo, mba e’yo onzi erini ma ta ’bo.

13Rua suza oku mvaazoni e’dulerini eca ’bo; eri mva ondua kokoru; etu osizuri eca ’bo, eri ma te pari mvani efuzu opoasiria ku.

14Te ma nga yi onze nyadri ma okpo dria; ma nga yi onze dra ma alia. Dra la, mi azo ngoa ya? Nyadri la, ’ba dri jaza mini ngoa ya? Ma ngani ma asi oja vile ku.

15Ka tro eri efi ’ya tu adripi erini ma eselia, oli engapi woko etuni efuzuriari nga eca ra, ava Yehovani engapi angu didiaari nga enga ra; yi a’di erini nga nzu ra, pari erini yini egazuri nga wi ra; eri nga afazu ayikoru ma ayiko eza dria.

16Samariani nga panga a’i azi onzi inisi, erini Mungu ini ma ti erile kurisi; yi nga e’de sei ma sia, yi nga odekua yini ogba kai kai, yi nga oku yini ovupi oporovuru ’diyi ma ale osi.

← Chapter 12 Jump to: Chapter 14 →