Hosea 8

Lugbara (E’yo Siza Alatararu Munguniri BIBLIA)

← Chapter 7 Jump to: Chapter 9 →

1Mi ’ba guka mi tia; eri nga emu ekile ajile omba ’bazu jo Munguni be, yini aziza mani ezalerisi, yini azita mani ezalerisi indi.

2Yi nga wu ma vu, Mungu amani, ama’i Israeli, ama ni mi ra,

3Israeli ’be afa ovupi onyiruri ra; ari’bani nga eri dro ra.

4Yi o’ba opiyi, te e’yo manisi ku. Yi o’ba opianzi, te ma nini e’yoni ku. Yi ede wura toko yini dahabu yinisi, mele yinisi indi, ’ba ma ja yi dri ani.

5Eri ’be kojamva miniri amve, Samaria la! Adra mani eri di yi ruaa. Yi nga eca alaru a’dungare ya?

6Te afa ’diri enga Israeli vu, onduou ede erini; te eri ovuni Munguni ku. Te ada, yi nga kojamva Samariani onyo nyingiriki.

7A’disiku yi ri olini, yi be oliriko lo’i. Anya pa sopi amvuani yo, afa i’diza erini ngani efi ’ya ku; te ka efi ka ra ti, ’ba jururu ’diyi nga yi okini.

8Oki Israeli yi ’bo; te curu’do yi ovu ’ba jururu ma eselia ekile afazu ayiko fepi kurile.

9A’disiku yi mu Asuriaa ’bo, ekile akanya asea alu ovupi a’dulerile; Efiraimu omve agupi i lepi ’diyi oyasi ra.

10Ada, yi ka ’ba omve suru eselia oyasi ti, curu’do ma nga yi oku. Azini yi e’do ovu were ’ba ’wara ’ba dri cepi ’diyi ma opini teri ’balerisi.

11Te Efiraimuni pari edeta edezu ’diyi edele kakau ezata ezazurisi, pari nde edeta edezu ’diyi ca di eri ma ezataru.

12Ma ka e’yo ambo ambo azita manini ’diyi si eri dri alifu mudri ti, yi ovu eri milia ekile afa osutarule,

13Edeta yini edele ma dri ’diyisi, yi adri za ve, yi adri nya indi; te Yehova a’ini yi ku. Curu’do eri nga di e’yo onzi yini ega, eri nga yi andri e’yo onzi ndesi; te yi nga mvi Misiria ra.

14Israeli avi Mungu i ’Bapiri ma e’yo, si jo ambo ambo ’diyi; Yuda o’ba aku kali okporu be ageinia ’diyi kakau; te ma nga aci ti pe aku erini ’diyi ma dria, aci nde nga jo okporu erini nde ’diyi ve ra.

← Chapter 7 Jump to: Chapter 9 →