1 Timothy 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Hkʼe te leh, awˉ lawˉ teˇ ceuˬ ngaˬ nawˬ hta‸ chi hkʼe awˬ gʼaˇ pe‸ laˇ ve yoˬ. Gʼuiˬsha geh lawˬ hkawˉ ve, bon lawˬ ve, shu awˬ pon bon lawˬ ve leh chiˇ mvuh ve teˇ hpaˍ, chaw hkʼa peu-eˬ awˬ pon te-o.

2Ngaˬ hui lehˬ, dawˇ sha leh nyi ma gawˬ lehˍ ve awˬ hkʼaw lo maˇ kʼoˆ, Gʼuiˬsha hta‸ hkʼa deh‸ yawˆ yan leh, teˇ ceuˬ le le hta‸ hkʼa deh‸ te ve awˬ hkʼaw lo maˇ kʼoˆ, a sha‸ te‸ hpeh‸ tuˬ hkunˉ hawˉ hkanˇ teˇ hpaˍ leh jawˇmawˇ teˇ hpaˍ awˬ pon htawˇ oˇ hkʼe te-o.

3Oˇ hkʼe te ve lehˬ, da‸ ve kanˉ hpeh‸ leh, ngaˬ hui ve Htaiˍ hkʼaw‸ paˍ Gʼuiˬ sha nyi ma cawˇ ve kanˉ hpeh‸ ve yoˬ.

4Chaw hkʼa peu-eˬ htaiˍ hkʼaw‸ ve hta‸ gʼa tuˬ ve awˬ hkʼoˆ ka‸, hteˇ ve cawˇ ve hta‸ shiˍ la tuˬ yawˇ heuˆ gaˇ ve yoˬ.

5Awˬ lawn kʼo, Gʼuiˬsha teˇ gʼaˇ tiˉ cawˬ leh, Gʼuiˬsha leh chaw yaˇ awˬ kaˍ lo awˬ kaˍ te shehˍ hpaˇ teˇ gʼaˇ tiˉ cawˬ ve yoˬ. Yawˇ lehˬ, chaw yaˇ hpeh‸ ve Yeˍsuˆ Hkri‸ yoˬ.

6Yawˇ lehˬ, chaw hkʼa peu-eˬ hta‸ htaiˍ hkʼaw‸ piˇ tuˬ, yawˇ awˬ to tanˇ piˇ ve yoˬ. Awˬ yanˇ cawˇ ve awˬ hkʼaw lo awˬ lawn oˇ ve hta‸ shaˉ hkiˆ hkanˍ ve teˇ ceuˬ tawˆ la ve yoˬ.

7Awˬ lawn oˇ ve hta‸ shaˉ hkiˆ hkanˍ tuˬ awˬ pon, ngaˬ lehˬ bon maˍ paˍ leh tcuh yaˇ hpeh‸ la tuˬ maˇ kʼoˆ, yonˍ ve leh hteˇ ve cawˇ ve awˬ hkʼaw lo buiˇshaˆaˉnaˆ chaw hui hta‸ maˍ piˇ shehˍ hpaˇ hpeh‸ la tuˬ maˇ kʼoˆ, Gʼuiˬsha ngaˬ hta‸ leuˆ teh taˍ laˇ ve yoˬ. (Ngaˬ chi hkʼe kʼoˆ ve lehˬ, heˍ ve maˇ heˆ. Hteˇ ve cawˇ ve awˬ hkʼaw lo ngaˬ kʼoˆ ve yoˬ.)

8Hkʼe te leh, teˇ kaˬ le le lo chehˇ ve hawˉ hkʼaˆ teˇ hpaˍ lehˬ, nyi ma zuhˆ ve leh tawˇ gʼawˬ da‸ ve maˇ cawˬ ve awˬ hkʼaw lo, da‸ kehˬ ve la‸ sheh chiˇ leh bon lawˬ tuˬ ve hta‸ ngaˬ heuˆ gaˇ ve yoˬ.

9Chi hkʼa shuˍ shuˍ yaˇ miˇ teˇ hpaˍ htawˇ, nyi ma nuˇ nehˬ ve leh nyi ma taˍ puiˉ ve awˬ hkʼaw lo, keunˍ da‸ cawˇ da‸ ve veu‸ kʼaˇ teˇ hpaˍ veu‸ deh ve hta‸ ngaˬ heuˆ gaˇ ve yoˬ. Uˉ hkeh mvuh hpeˇ ve, shi hkʼeun tcuhˉ ve, piˉ ko-eˍ shehnˉ tcuhˉ ve leh, awˬ hpfuhˇ hkʼaˆ ve veu‸ kʼaˇ teˇ hpaˍ veu‸ deh ve hta‸ ngaˬ maˇ heuˆ gaˇ.

10Ngaˬ Gʼuiˬsha hta‸ yawˆ yan chehˇ ve yoˬ teh‸ kʼoˆ ve yaˇ miˇ teˇ hpaˍ lehˬ, yawˇ hui te keunˍ ve hkʼe, da‸ ve kanˉ teˇ hpaˍ hta‸ te tcuhˉ taˍ tuˬ ngaˬ heuˆ gaˇ ve yoˬ.

11Yaˇ miˇ teˇ hpaˍ lehˬ, nyi ma nuˇ nehˬ taˍ leh, ta‸ iˉ gawˬ lehˍ chehˇ ve awˬ hkʼaw lo henˇ yuˬ piˇ lawˬ-o‸.

12Yaˇ miˇ lehˬ, shu hta‸ maˍ piˇ tuˬ maˇ kʼoˆ, hawˉ hkʼaˆ awˬ hkʼoˆ hta‸ kanˇ paˆ cawˬ tuˬ maˇ kʼoˆ, ngaˬ a hkaw-anˬ maˇ piˇ. Yawˇ ta‸ iˉ gʼa chehˇ taˍ ve yoˬ.

13Awˬ lawn kʼo, Aˍdanˍ hta‸ awˉ lawˉ te hpanˍ leh, awˬ hkʼaw‸ nawˉ Eˇva‸ hta‸ te hpanˍ ve yoˬ.

14Chi hkʼoˆ ka‸, Aˍdanˍ hta‸ heˍ gʼa ve maˇ heˆ. Yaˇ miˇ hta‸ heˍ gʼa leh, yaˇ miˇ oˇ ve te ya‸ ve yoˬ.

15Ya‸ hkʼaˇ, yonˍ ve, ha‸ pehnˇ ve, da‸ kehˬ ve leh nyi ma taˍ puiˉ ve, chi teˇ hpaˍ awˬ hkʼaw lo yeˬ chehˇ ve kʼo, yaˇ paw ve pa taw yawˇ gʼa ponˬ tuˬ yoˬ.

← Chapter 1 Jump to: Chapter 3 →