1 Timothy 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Hkri‸ yaˇ awˬ moˍ hta‸ nyi ha‸ shaˉ shehˍ hpaˇ te ve kanˉ hta‸ ca ve chaw lehˬ, da‸ ve kanˉ hta‸ ca ve yoˬ teh‸ kʼoˆ ve tawˇ chi teˇ hkawˇ cawˇ tehˬ ve yoˬ.

2Hkʼe te leh, Hkri‸ yaˇ awˬ moˍ hta‸ nyi ha‸ shaˉ shehˍ hpaˇ teˇ gʼaˇ lehˬ, venˇ baˆ taˍ kuiˬ maˇ cawˬ ve chaw, awˬ miˇ ma teˇ gʼaˇ tiˉ cawˬ ve chaw, shaˍ ti‸ taˍ puiˉ ve chaw, nyi ma taˍ puiˉ ve chaw, te keunˍ te cawˇ ve hta‸ te ve chaw, hkehˉ chaw hta‸ ha‸ yuˬ puiˉ ve chaw leh, maˍ piˇ puiˉ ve chaw teˇ gʼaˇ gʼa hpeh‸ ve yoˬ.

3Yawˇ a pehˉ meuˇ gʼuiˬ dawˬ ponˬ dawˬ leuˉ ve chaw leh, shu hta‸ ya‸ da‸ dawˆ da‸ ve chaw maˇ gʼa hpeh‸. Ya‸ hkʼaˇ, nyi ma nuˇ nehˬ ve chaw, shu hta‸ tawˇ maˇ gʼawˬ da‸ puiˉ ve chaw, hpu hta‸ maˇ sheˉ lai puiˉ ve chaw teˇ gʼaˇ gʼa hpeh‸ ve yoˬ.

4Yawˇ ve yehˬ kʼa hta‸ hkʼa deh‸ uˉ peunˍ leh, yehˬ yaˇ kʼa yaˇ teˇ hpaˍ hta‸ hteˇ ve cawˇ ve awˬ hkʼaw lo hkʼa deh‸ te tuˬ maˍ gʼaˇ ve chaw teˇ gʼaˇ gʼa hpeh‸ ve yoˬ.

5Awˬ lawn kʼo, a shu yawˇ ve yehˬ kʼa hta‸ uˉ peunˍ maˇ gʼaˇ ve chaw lehˬ, Gʼuiˬsha ve Hkri‸ yaˇ awˬ moˍ hta‸ hkʼaˬ hkʼe te nyi ha‸ shaˉ gʼa tuˬ le.

6Yawˇ lehˬ, Hkri‸ yaˇ awˬ suhˉ maˇ gʼa hpeh‸. Maˇ heˆ kʼo, yawˇ nyi ma uiˍ la mvuh la leh neˇhaiˬ ve ciˍ yanˍ kuiˬ lo ce lo‸-e tuˬ yoˬ.

7Awˬ baˬ hpawˇ chehˇ ve chaw mehˆ gʼuˇ suhˍ yawˇ da‸ ve awˬ meh cawˬ ve chaw gʼa hpeh‸ ve yoˬ. Maˇ heˆ kʼo, shu hkʼaiˉ leh venˇbaˆ taˍ ve hta‸ gʼa hkanˍ leh, neˇhaiˬ va htaw taˍ ve hta‸ yaw tuˬ yoˬ.

8Chi hkʼa shuˍ shuˍ, ga piˇ shehˍ hpaˇ teˇ hpaˍ htawˇ, dawˇ yeˬ gaˇ yeˬ ve chaw gʼa hpeh‸ ve yoˬ. Ha tehˬ nyiˇ maˬ cawˬ ve chaw, a pehˉ meuˇ gʼuiˬ dawˬ ponˬ dawˬ leuˉ ve chaw, hpu shi mawˇ jeˬ hta‸ sheˉ lai ve chaw maˇ gʼa hpeh‸.

9Da‸ ve kehˬ ve shiˍ puiˉ ve nyi ma awˬ hkʼaw lo, hpeu‸ maˍ laˇ peuˬ ve yonˍ hkʼaˇ teˇ hpaˍ hta‸ hkʼa deh‸ yonˍ yeˬ ve chaw gʼa hpeh‸ ve yoˬ.

10Yawˇ hui hta‸ htawˇ awˉ lawˉ lawˇ nyi sheˍ. Lawˇ nyi peuˬ leh, venˇbaˆ taˍ tuˬ maˇ cawˬ kʼo, ga piˇ shehˍ hpaˇ te tcuh cawˇ ve yoˬ.

11Chi hkʼa shuˍ shuˍ, ga piˇ shehˍ ma teˇ hpaˍ htawˇ, dawˇ yeˬ gaˇ yeˬ ve chaw gʼa hpeh‸ ve yoˬ. Ca hkʼaiˉ ca kʼoˆ puiˉ ve chaw maˇ gʼa hpeh‸, shaˍ ti‸ cawˬ ve chaw leh teˇ ceuˬ le le awˬ hkʼaw lo ka ti‸ yeˬ ve chaw gʼa hpeh‸ ve yoˬ.

12Ga piˇ shehˍ hpaˇ lehˬ, awˬ miˇ ma teˇ gʼaˇ tiˉ gʼa cawˬ ve yoˬ. A shu yawˇ ve awˬ yaˇ awˬ duˬ leh, a shu yawˇ ve yehˬ kʼa hta‸ hkʼa deh‸ uˉ peunˍ ve chaw gʼa hpeh‸ ve yoˬ.

13Awˬ lawn kʼo, ga piˇ shehˍ hpaˇ ve kanˉ hta‸ hkʼa deh‸ te ve chaw hui lehˬ, da‸ ve awˬ meh gʼa ve awˬ hkʼoˆ, Yeˍsuˆ Hkri‸ hta‸ yonˍ ve awˬ hkʼaw lo, ha‸ hanˉ ve nyi ma ka‸ cawˬ la ve yoˬ.

14Maˇ maw maw nawˬ geh laˬ tuˬ ngaˬ dawˇ law taˍ ve htawˇ, ngaˬ haˆ haˆ maˇ gaˬ la kʼo,

15Gʼuiˬsha ve yehˬ kʼa awˬ hkʼaw lo hkʼaˬ hkʼe te keunˍ te cawˇ ve teˇ hpaˍ hta‸ nawˬ gʼa shiˍ tuˬ, awˬ lawn chi teˇ hpaˍ ngaˬ nawˬ hta‸ bvuh‸ laˇ ve yoˬ. Yehˬ kʼa oˇ ve lehˬ, te‸ chehˇ ve Gʼuiˬsha ve awˬ moˍ hpeh‸ ve yoˬ. Awˬ moˍ oˇ ve lehˬ, hteˇ ve cawˇ ve awˬ ceuˬ awˬ pon, awˬ hkuiˉ daw leh awˬ hkuiˉ puiˍ hpeh‸ ve yoˬ.

16Ngaˬ hui Gʼuiˬsha hta‸ yawˆ yan leh oˉ kʼoˍ pui ve awˬ liˇ teˇ hpaˍ lehˬ, tcuhˉ kuiˬ naˉ jaˇ tehˬ tehˬ ve yoˬ teh‸, ngaˬ htawˇ shaˉ hkiˆ hkanˍ hpeh‸ ve yoˬ. Gʼuiˬsha lehˬ, awˬ suhˍ awˬ shaˍ pfuhˇ ve hta‸ hkʼa tawˍ lehˆ gʼa mawˬ peuˬ. Yawˇ hteˇ ve cawˇ ve awˬ lawn hta‸ Awˬ ha hpu shaˉ hkiˆ hkanˍ peuˬ. Mvuhˇ naw ma tcuh yaˇ teˇ hpaˍ yawˇ hta‸ gʼa mawˬ peuˬ. Yawˇ awˬ lawn awˬ kaˍ awˬ nu chaw ceuˬ teˇ hpaˍ hta‸ bon maˍ piˇ peuˬ. Miˬguiˬ yaˇ teˇ hpaˍ yawˇ hta‸ yonˍ peuˬ. Awˬ me‸ awˬ hponˇ awˬ hkʼaw lo yawˇ taˆ kʼo‸-e peuˬ.

← Chapter 2 Jump to: Chapter 4 →