1 Timothy 6

Lahu Bible Edited © Thailand Bible Society and Bible Society of Myanmar, 2010, 2020.

← Chapter 5 Jump to:

1Gʼuiˬsha ve awˬ meh hta‸ maˇ kʼoˆ, ngaˬ hui maˍ piˇ ve teˇ hpaˍ hta‸ maˇ kʼoˆ, shu maˇ shawˍ maˇ caˆ maˇ gʼa kʼoˆ tuˬ, shu vuiˬ taˍ ve awˬ ceˬ gʼa hpeh‸ chehˇ ve chaw teˇ hpaˍ lehˬ, a shu yawˇ ve awˬ shehˍ hpaˇ hta‸ teˇ ceuˬ le le awˬ hkʼaw lo yawˆ yan keunˍ ve yoˬ teh‸ shiˍ cawˇ ve yoˬ.

2Hkri‸ yaˇ hpeh‸ ve awˬ shehˍ hpaˇ awˬ hawˉ lo gʼa chehˇ ve awˬ ceˬ teˇ hpaˍ lehˬ, a shu yawˇ awˬ shehˍ hpaˇ ve awˬ viˉ awˬ nyi hpeh‸ la peuˬ ve pa taw, yawˇ hui hta‸ maˇ shawˍ maˇ caˆ te maˇ cawˇ. Yawˇ hui awˬ pon leuˉ leh kanˉ hkʼa deh‸ te cawˇ ve yoˬ. Awˬ lawn kʼo, yawˇ hui oˇ hkʼe te ve teˇ yanˇ, ha‸ ve Hkri‸ yaˇ hpeh‸ ve awˬ shehˍ hpaˇ teˇ hpaˍ lehˬ, awˬ bon gʼa ve yoˬ.

3Awˬ lawn chi teˇ hpaˍ hta‸ nawˬ maˍ piˇ leh awˬ gʼaˇ piˇ-oˆ. Chaw teˇ gʼaˇ gʼaˇ lehˬ, peun da‸ ve teˇ ceuˬ shu hta‸ maˍ piˇ leh, ngaˬ hui ve Jawˇ mawˇ Yeˍsuˆ Hkri‸ ve da‸ jaˇ biˇ jaˇ ve tawˇ hkawˇ leh, Gʼuiˬsha hta‸ yawˆ yan ve awˬ lawn maˍ piˇ ve tawˇ hkawˇ hta‸ yawˇ maˇ ha‸ yuˬ ve kʼo,

4yawˇ lehˬ nyi ma uiˍ leh, te‸ chiˉ ka‸ maˇ shiˍ ve chaw hpeh‸ ve yoˬ. Tawˇ na da‸ leh, tawˇ hkawˇ teˇ hpaˍ awˬ lawn tawˇ gʼawˬda‸ ve hta‸ ceh tiˉ yawˇ te gaˇ tcuhˉ taˍ ve yoˬ. Oˇ hkʼe te ve teˇ ceuˬ lehˬ, hkawehˉ da‸ ve, deˇ da‸ ya‸ da‸ ve, maˇ shawˍ maˇ caˆ kʼoˆ ve, shu awˬ lawn haiˬ ve hta‸ ca dawˇ ve leh,

5da‸ ve hta‸ dawˇ nyi puiˉ ve teˇ ceuˬ luˬ kʼai sheˆ kʼai ve awˬ hkʼoˆ ka‸, hteˇ ve cawˇ ve tawˇ hkawˇ a ciˉ ka‸ maˇ cawˬ ve chaw teˇ hpaˍ tawˇ gʼawˬ da‸ ve, chi teˇ hpaˍ hta‸ te tawˆ la puiˉ ve yoˬ. Gʼuiˬsha hta‸ yawˆ yan ve pa taw awˬ yawˬ gʼa tuˬ yoˬ teh‸ yawˇ hui dawˇ taˍ ve yoˬ.

6Awˬ tehˬ kʼoˆ kʼo, Gʼuiˬsha hta‸ yawˆ yan ve awˬ hkʼaw lo nyi hkʼaˇ suh ve kʼo, awˬ yawˬ uiˍ jaˇ ve yoˬ.

7Awˬ lawn kʼo, chi miˬguiˬ hkʼoˆ lo ngaˬ hui lo‸ la ve teˇ yanˇ, te‸ chiˉ maˇ yuˬ laˬ leh, ngaˬ hui tawˆ kʼai ve teˇ yanˇ htaˇ htawˇ, te‸ chiˉ yuˬ kʼai maˇ hpeh‸.

8Hkʼe te leh, caˇ tuˬ dawˬ tuˬ leh veu‸ tuˬ kʼaˇ tuˬ cawˬ ve kʼo, ngaˬ hui nyi hkʼaˇ suh tuˬ yoˬ.

9Paw sha la gaˇ ve chaw teˇ hpaˍ lehˬ, venˇbaˆ beˬ ve, va htaw taˍ ve leh, cuˇ yiˍ maˇ cawˬ ve awˬ hkʼoˆ ka‸ te luˬ puiˉ ve sheˉ lai ve laiˉ ceuˬ awˬ hkʼaw lo ce lo‸-e ve yoˬ. Sheˉ lai ve oˇ ve teˇ hpaˍ lehˬ, chaw yaˇ hta‸ luˬ kuiˬ sheˆ kuiˬ lo kʼa piˇ lawˬ ve yoˬ.

10Awˬ lawn kʼo, hpu hta‸ sheˉ lai ve teˇ ceuˬ lehˬ, haiˬ ve hkʼa peu-eˬ ve awˬ hkuiˉ puiˍ hpeh‸ ve yoˬ. Chaw teˇ hpaˍ hpaˍ lehˬ, hpu hta‸ sheˉ lai ve hta‸ pa taw, yonˍ ve teˇ ceuˬ hta‸ hpfuhˆ baˬ taˉ leh, dawˇ haˍ tuˬ laiˉ ceuˬ yawˇ hui ve nyi ma hta‸ juˆ pawnˍ peuˬ ve yoˬ.

11Gʼuiˬsha ve chaw-oˬ, nawˬ lehˬ awˬ ceuˬ oˇ ve teˇ hpaˍ hta‸ jaw kʼai-o. Hteˇ ve cawˇ ve teˇ ceuˬ, Gʼuiˬsha hta‸ yawˆ yan ve teˇ ceuˬ, yonˍ ve teˇ ceuˬ, ha‸ pehnˇ ve teˇ ceuˬ, nyi ma yeˬ ve teˇ ceuˬ leh, nyi ma nuˇ nehˬ ve teˇ ceuˬ, awˬ ceuˬ chi teˇ hpaˍ awˬ hkʼaˇ suh hkʼa deh‸ kʼai-o.

12Yonˍ ve hta‸ caˉ da‸ ve, da‸ ve bawˆ da‸ tuˬ teˇ ceuˬ hta‸ bawˆ da‸ chehˇ-oˆ. Co ti‸ ha ti‸ hta‸ hkʼa deh‸ vawˆ taˍ-o‸. Oˇ ve hta‸ gʼa tuˬ awˬ pon Gʼuiˬsha nawˬ hta‸ kuˬ yuˬ leh, shaˉ hkiˆ hkanˍ shehˍ hpaˇ laiˉ gʼaˇ mehˆ gʼuˇ suhˍ da‸ ve shaˉ hkiˆ nawˬ hkanˍ taˍ peuˬ.

13Awˬ ceuˬ hkʼa peu-eˬ hta‸ a sha‸ te‸ piˇ shehˍ hpaˇ Gʼuiˬsha mehˆ gʼuˇ suhˍ maˇ kʼoˆ, jawˇmawˇ Poˍtiˆ Piˉla‸ gʼuˇ suhˍ da‸ ve shaˉ hkiˆ hkanˍ ve Yeˍsuˆ Hkri‸ mehˆ gʼuˇ suhˍ maˇ kʼoˆ, ngaˬ nawˬ hta‸ tawˇ chi hkʼe pe‸ laˇ ve yoˬ.

14Ngaˬ hui ve Jawˇmawˇ Yeˍsuˆ Hkri‸ kʼaw‸ tawˆ la htaˇ hkʼa gaˬ, nawˬ ya‸ kuiˬ leh venˇbaˆ taˍ kuiˬ a ciˉ ka‸ maˇ cawˬ ve awˬ hkʼaw lo, yawˇ tawˇ piˇ taˍ ve hta‸ hkʼa deh‸ na yuˬ leh te kʼai-o.

15Gʼuiˬsha nyi ma cawˇ ve awˬ yanˇ awˬ hkʼaw lo, yawˇ hta‸ kʼaw‸ tawˆ la piˇ tuˬ yoˬ. Gʼuiˬsha lehˬ, awˬ bon uiˍ shehˍ hpaˇ hpeh‸ leh, yawˇ teˇ gʼaˇ tiˉ uˉ peunˍ shehˍ hpaˇ hpeh‸ ve yoˬ. Yawˇ lehˬ, hkunˉ hawˉ hkanˇ awˬ hkʼoˆ Hkunˉ hawˉ hkanˇ hpeh‸ leh, jawˇ mawˇ awˬ hkʼoˆ Jawˇmawˇ hpeh‸ ve yoˬ.

16Yawˇ ceh tiˉ co co taiˍ taiˍ a sha‸ te‸ chehˇ leh, a shu teˇ gʼaˇ ka‸ awˬ paˇ lo kʼai maˇ hpeh‸ ve awˬ gʼeuˆ awˬ hkʼaw lo chehˇ taˍ ve yoˬ. Chaw teˇ gʼaˇ ka‸ yawˇ hta‸ maˇ mawˬ jaw leh, mawˬ maˇ hpeh‸ ve yoˬ. Co co taiˍ taiˍ awˬ me‸ awˬ hponˇ leh kanˇ paˆ yawˇ geh cawˬ piˇ-oˆ. A menˬ.

17Chi teˇ ca‸ na‸ awˬ hkʼaw lo paw sha ve chaw teˇ hpaˍ nyi ma maˇ gʼa uiˍ tuˬ leh, luˬ puiˉ sheˆ puiˉ ve mawˇ jeˬ teˇ hpaˍ hta‸ maˇ gʼa dawˇ law tuˬ, yawˇ hui hta‸ tawˇ piˇ-oˆ. Ngaˬ hui gʼa ha lehˬ tuˬ awˬ pon awˬ ceuˬ hkʼa peu-eˬ pe‸ laˇ shehˍ hpaˇ Gʼuiˬsha hta‸ ceh tiˉ gʼa dawˇ law tuˬ, yawˇ hui hta‸ tawˇ piˇ-oˆ.

18Yawˇ hui lehˬ, shu hta‸ awˬ bon te piˇ tuˬ maˇ kʼoˆ, da‸ ve kanˉ maˇ chaweh te tuˬ maˇ kʼoˆ, shu hta‸ pehˬ piˇ tanˇ piˇ ve awˬ hkʼaw lo maˇ chaweh piˇ tuˬ maˇ kʼoˆ, yawˇ hui hta‸ tawˇ piˇ-oˆ.

19Awˬ tehˬ awˬ na yeˬ ve a sha‸ te‸ ve teˇ ceuˬ hta‸ vawˆ taˍ hpeh‸ tuˬ, awˬ hkʼaw‸ nawˉ teˇ ca‸ na‸ awˬ hkʼaw lo yawˇ hui da‸ ve awˬ hkuiˉ puiˍ cawˬ tuˬ ve awˬ pon, da‸ ve awˬ ceuˬ teˇ hpaˍ hta‸ shaw hpoˆ taˍ-o‸ teh‸, yawˇ hui hta‸ tawˇ piˇ-oˆ.

20Tiˆmoˉseˍ-oˬ, nawˬ hta‸ a‸ piˇ taˍ ve awˬ ceuˬ hta‸ hkʼa deh‸ ha‸ shaˉ taˍ-o‸. Cuˇ yiˍ cawˬ ve teh‸ kʼoˆ ve htawˇ, maˇ heˆ heˆ ve cuˇ yiˍ teˇ ceuˬ hta‸ caˉ da‸ ve, Gʼuiˬsha hta‸ maˇ yawˆ yan ve awˬ hkʼaw lo hkʼe leˇ kʼoˆ guiˇ ve teˇ hpaˍ leh tawˇ gʼawˬ da‸ ve teˇ hpaˍ hta‸ jaw kʼai-o.

21Maˇ heˆ heˆ ve cuˇ yiˍ oˇ ve hta‸ chaw teˇ hpaˍ hpaˍ hkanˍ yuˬ ve hta‸ pa taw, yonˍ ve hta‸ caˉ da‸ ve awˬ hkʼaw lo yawˇ hui ya‸ kʼaw ya‸ kʼai peuˬ. Nawˬ hui geh awˬ bon cawˬ piˇ-oˆ.

← Chapter 5 Jump to: