1 Timothy 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Awˬ ha hpu lehˬ, chi hkʼe hkʼa tawˍ lehˆ kʼoˆ taˍ ve, Awˬ leh meuˇ ve awˬ yanˇ awˬ hkʼaw lo chaw teˇ hpaˍ hpaˍ lehˬ, yonˍ ve teˇ ceuˬ hta‸ baˬ taˉ tuˬ yoˬ. Yawˇ hui lehˬ, heˍ puiˉ ve awˬ ha teˇ hpaˍ leh, neˇ teˇ hpaˍ maˍ piˇ ve tawˇ hkawˇ teˇ hpaˍ hta‸ na yuˬ tuˬ yoˬ.

2Heˍ puiˉ jaˇ ve chaw teˇ hpaˍ hta‸ neˇhaiˬ cuˇ leh oˇ hkʼe maˍ piˇ tuˬ yoˬ. Yawˇ hui ve shiˍ puiˉ ve nyi ma hta‸ sho chiˆ ngawˉ piˇ leh hkeu‸ kʼai peuˬ ve hkʼe hpeh‸ ve yoˬ.

3Awˬ hpawˇ awˬ miˇ maˇ gʼa heuˆ da‸ leh, caˇ tuˬ teˇ hpaˍ hpaˍ hta‸ maˇ gʼa caˇ teh‸ yawˇ hui kʼoˆ ve yoˬ. Caˇ tuˬ teˇ ceuˬ lehˬ, yonˍ ve leh hteˇ ve cawˇ ve hta‸ shiˍ ve chaw teˇ hpaˍ, Gʼuiˬsha hta‸ chiˇ mvuh ve awˬ hkʼaw lo gʼa caˇ tuˬ ve awˬ pon Gʼuiˬsha te hpanˍ taˍ ve htawˇ, yawˇ hui tawˍ taˍ ve yoˬ.

4Gʼuiˬsha te hpanˍ taˍ ve awˬ ceuˬ hkʼa peu-eˬ lehˬ da‸ ve yoˬ. Gʼuiˬsha hta‸ chiˇ mvuh ve awˬ hkʼaw lo ha‸ yuˬ ve kʼo, hkʼaˬ ve teˇ ceuˬ hta‸ ka‸ maˇ gʼa baˬ.

5Awˬ lawn kʼo, Gʼuiˬsha ve tawˇ hkawˇ hta‸ pa taw maˇ kʼoˆ, bon lawˬ ve hta‸ pa taw maˇ kʼoˆ, awˬ ceuˬ oˇ ve teˇ hpaˍ da‸ peuˬ kehˬ peuˬ.

6Nawˬ lehˬ, awˬ viˉ awˬ nyi teˇ hpaˍ hta‸ awˬ lawn chi teˇ hpaˍ hkʼa deh‸ maˍ piˇ ve kʼo, Yeˍsuˆ Hkri‸ ve da‸ ve kanˉ te shehˍ hpaˇ nawˬ hpeh‸ tuˬ yoˬ. Peuˬ leh, yonˍ hkʼaˇ hta‸ caˉ da‸ ve tawˇ hkawˇ teˇ hpaˍ leh, nawˬ te kʼai chehˇ ve da‸ ve maˍ hkʼaˇ hta‸ caˉ da‸ ve tawˇ hkawˇ teˇ hpaˍ hta‸ nawˬ hkʼa deh‸ caˇ chehˇ dawˬ chehˇ ve chaw hpeh‸ tuˬ yoˬ.

7A pi kʼu teˇ hpaˍ kʼaoˍ maˍ piˇ puiˉ ve, Gʼuiˬsha hta‸ maˇ yawˆ yan ve kaˇ lao teˇ hpaˍ hta‸ taˇ na. Gʼuiˬsha hta‸ yawˆ yan puiˉ la tuˬ, nawˬ awˬ to hkʼa deh‸ te jawˬ-o‸.

8Awˬ lawn kʼo, awˬ suhˍ awˬ shaˍ hpawˇ awˬ gʼaˇ cawˬ la tuˬ te jawˬ ve teˇ ceuˬ lehˬ, awˬ bon a ciˉ ceh tiˉ cawˬ ve yoˬ. Ya‸ hkʼaˇ, Gʼuiˬsha hta‸ yawˆ yan ve teˇ ceuˬ lehˬ, hkʼa peu-eˬ awˬ hkʼaw lo awˬ bon cawˬ ve yoˬ. Chi teˇ ca‸ na‸ awˬ pon maˇ kʼoˆ, awˬ hkʼaw‸ nawˉ teˇ ca‸ na‸ awˬ pon maˇ kʼoˆ, awˬ tehˬ awˬ na awˬ bon cawˬ ve yoˬ teh‸ gʼa shiˍ ve yoˬ.

9Tawˇ hkawˇ chi lehˬ, cawˇ jaˇ leh awˬ tehˬ awˬ na ha‸ yuˬ cawˇ ve tawˇ hkawˇ hpeh‸ ve yoˬ.

10Te‸ chehˇ ve Gʼuiˬsha hta‸ ngaˬ hui dawˇ law tcuhˉ taˍ ve hta‸ pa taw, ngaˬ hui gʼaˇ hte‸ coˇ caˇ leh kanˉ te chehˇ ve yoˬ. Yawˇ lehˬ, chaw hkʼa peu-eˬ ve Htaiˍ hkʼaw‸ paˍ hpeh‸ ve yoˬ. Yonˍ ve chaw teˇ hpaˍ awˬ pon leuˉ leh Htaiˍ hkʼaw‸ paˍ hpeh‸ ve yoˬ.

11Awˬ lawn chi teˇ hpaˍ shu hta‸ tawˇ piˇ leh maˍ piˇ-oˆ.

12Nawˬ yaˇ nehˬ hpeh‸ ve hta‸ chaw teˇ gʼaˇ ka‸ maˇ shawˍ maˇ caˆ maˇ gʼa kʼoˆ maˇ gʼa te tuˬ shaˍ ti‸ te-o. Tawˇ yaw ve awˬ hkʼaw lo maˇ kʼoˆ, kanˉ te ve awˬ hkʼaw lo maˇ kʼoˆ, ha‸ pehnˇ ve, yonˍ ve leh da‸ kehˬ ve awˬ hkʼaw lo maˇ kʼoˆ, nawˬ lehˬ yonˍ ve chaw teˇ hpaˍ awˬ pon henˇ kuiˬ jawˬ kuiˬ hpeh‸ piˇ-oˆ.

13Ngaˬ gaˬ la htaˇ hkʼa gaˬ, shu hta‸ Li‸ hpu gʼaw maˍ piˇ ve, awˬ gʼaˇ piˇ ve leh maˍ piˇ ve teˇ hpaˍ hta‸ coˇ caˇ leh te chehˇ taˍ-o‸.

14Awˬ hoˉ chaw mawˇ teˇ hpaˍ nawˬ awˬ hkʼoˆ hta‸ la‸ sheh taˍ ve teˇ yanˇ, yawˇ hui lehˬ Gʼuiˬsha awˬ tan te leh yawˇ ve tawˇ hkawˇ yaw ve awˬ hkʼaw lo nawˬ hta‸ piˇ taˍ ve la‸ shawnˍ hta‸ nawˬ hkʼa deh‸ yehˇ leh te-o mehˍ.

15Nawˬ kanˉ te ve awˬ hkʼaw lo uiˍ la mvuh la chehˇ ve hta‸ chaw hkʼa peu-eˬ mawˬ hpeh‸ tuˬ, chi teˇ hpaˍ hta‸ nyi ma pfuhˇ ve awˬ hkʼaw lo gʼaˇ hte‸ te-o.

16Nawˬ awˬ to hta‸ maˇ kʼoˆ, nawˬ maˍ piˇ ve awˬ ceuˬ teˇ hpaˍ hta‸ maˇ kʼoˆ, shaˍ ti‸ te leh, chi teˇ hpaˍ awˬ hkʼaw lo yeˬ chehˇ-oˆ. Nawˬ chi hkʼe te ve kʼo, nawˬ awˬ to hta‸ maˇ kʼoˆ, nawˬ ve hkawˇ hta‸ gʼa kaˇ ve chaw teˇ hpaˍ hta‸ maˇ kʼoˆ, nawˬ htaiˍ hkʼaw‸ piˇ tuˬ yoˬ.

← Chapter 3 Jump to: Chapter 5 →