1 Timothy 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Chaw mawˇ hta‸ deˇ maˍ piˇ ve taˇ te. Awˬ pa hkʼa shuˍ shuˍ shawˍ taˍ leh, yawˇ hui hta‸ awˬ gʼaˇ piˇ-oˆ. Yaˇ nehˬ teˇ hpaˍ hta‸ awˬ viˉ awˬ nyi hkʼe shawˍ taˍ-o‸.

2Chaw mawˇ ma teˇ hpaˍ hta‸ awˬ e hkʼa shuˍ shuˍ shawˍ taˍ leh, yaˇ nehˬ hpeh‸ ve yaˇ miˇ teˇ hpaˍ hta‸, da‸ kehˬ ve nyi ma hkʼa biˇ cawˬ ve awˬ hkʼaw lo, awˬ viˉ awˬ nyi hkʼe shawnˍ taˍ-o‸.

3Ga piˇ paˍ maˇ cawˬ ve mehˇchawˇma teˇ hpaˍ hta‸ hkʼa deh‸ nyi ha‸ shaˉ-oˆ.

4Mehˇchawˇma lehˬ, awˬ yaˇ maˇ heˆ kʼo awˬ hawehˍ cawˬ ve kʼo, yaˇ oˇ ve teˇ hpaˍ lehˬ a shu yawˇ yehˬ hkʼaw ve chaw teˇ hpaˍ hta‸ ha‸ shaˉ leh, awˬ pa awˬ e awˬ puˍ awˬ pi teˇ hpaˍ hta‸ awˬ bon kʼaw‸ te hkʼaw‸ piˇ ve teˇ ceuˬ lehˬ, Gʼuiˬsha hta‸ yawˆ yan ve awˬ liˇ awˬ hkʼaw lo awˉ lawˉ teˇ ceuˬ hpeh‸ ve yoˬ teh‸, yawˇ hui hta‸ maˍ piˇ-oˆ. Awˬ lawn kʼo, chi hkʼe ha‸ shaˉ piˇ ve teˇ ceuˬ hta‸ Gʼuiˬsha nyi ma cawˇ ve yoˬ.

5Ga piˇ paˍ maˇ cawˬ leh, yawˇ teˇ gʼaˇ tiˉ chehˇ taˍ ve mehˇchawˇma lehˬ, Gʼuiˬsha hta‸ dawˇ law chehˇ leh, tanˇ hkuinˇ tanˇ vanˇ htaˇ lawˬ hkawˉ ve awˬ hkʼaw lo bon lawˬ tcuhˉ taˍ ve yoˬ.

6Ya‸ hkʼaˇ, ha lehˬ tuˬ hta‸ ceh tiˉ ca ve mehˇchawˇma lehˬ, yawˇ te‸ chehˇ ve htawˇ, suh taˍ peuˬ ve chaw hpeh‸ ve yoˬ.

7Shu venˇbaˆ taˍ kuiˬ maˇ gʼa cawˬ tuˬ, mehˇchawˇma hui ve awˬ yaˇ awˬ duˬ teˇ hpaˍ hta‸ oˇ hkʼe tawˇ piˇ-oˆ.

8Chaw teˇ gʼaˇ gʼaˇ lehˬ, a shu yawˇ ve awˬ ceuˬ awˬ hkʼaˇ hta‸ maˇ kʼoˆ, leuˉ leh a shu yawˇ ve yehˬ hkʼaw ve chaw hta‸ maˇ kʼoˆ, maˇ ha‸ shaˉ ve kʼo, yawˇ lehˬ yonˍ ve teˇ ceuˬ hta‸ baˬ taˉ peuˬ. Yawˇ lehˬ, maˇ yonˍ ve chaw a‸ kehˉ haiˬ ve yoˬ.

9A sha‸ hkaw‸ chi hkʼaw‸ maˇ gaˬ sheˍ ve mehˇchawˇma teˇ hpaˍ ve awˬ meh hta‸ mehˇchawˇma ve caˇ lanˇ awˬ hkʼaw lo taˇ bvuh‸ keu.

10Awˬ hpawˇ teˇ gʼaˇ tiˉ heuˆ jaw ve, da‸ ve kanˉ te ve yoˬ teh‸ shu shaˉ hkiˆ hkanˍ ve, awˬ yaˇ awˇ duˬ hta‸ ha‸ shaˉ ve, hkehˉ chaw hta‸ ha‸ yuˬ ve, Hkri‸ yaˇ hui ve hkui sheh hta‸ tsuhˇ piˇ ve, tu‸ ve hkanˍ ve chaw teˇ hpaˍ hta‸ ga piˇ ve leh, da‸ ve kanˉ teˇ ceuˬ le le hta‸ hkʼa deh‸ te ve mehˇchawˇma hpeh‸ ve kʼo, caˇ lanˇ awˬ hkʼaw lo awˬ meh bvuh‸ keu-o.

11Ya‸ hkʼaˇ, yaˇ nehˬ hpeh‸ ve mehˇchawˇma teˇ hpaˍ hta‸ caˇ lanˇ awˬ hkʼaw lo awˬ meh taˇ bvuh‸ keu. Awˬ lawn kʼo, yawˇ hui Hkri‸ hta‸ hpfuhˆ baˬ taˉ ve teˇ yanˇ, awˬ hpawˇ kʼaw‸ heuˆ gaˇ la tuˬ yoˬ.

12Hkʼe te leh, awˉ lawˉ htaˇ ve ka ti‸ hta‸ yawˇ hui te luˬ ve pa taw, ciˍ yanˍ ve hta‸ gʼa hkanˍ ve yoˬ.

13Chi hkʼoˆ ka‸, yawˇ hui teˇ yehˬ peuˬ teˇ yehˬ lo kʼai leh, bawˬ la puiˉ ve yoˬ. Bawˬ ve ceh tiˉ maˇ heˆ. Yawˇ hui tawˇ maˇ leh, kʼoˆ maˇ keunˍ ve teˇ hpaˍ hta‸ yawˇ hui kʼoˆ ve yoˬ. Yawˇ hui hta‸ maˇ caˉ da‸ ve shu te kuiˬ hta‸ ca sho‸ sha‸ piˇ ve chaw hpeh‸ ve yoˬ.

14Hkʼe te leh, yaˇ nehˬ hpeh‸ ve mehˇ chawˇ ma teˇ hpaˍ lehˬ, awˬ hpawˇ kʼaw‸ heuˆ tuˬ, yaˇ paw la piˇ tuˬ leh, a shu yawˇ ve yehˬ kʼa hta‸ hkʼa deh‸ nyi ha‸ shaˉ tuˬ ngaˬ heuˆ gaˇ ve yoˬ. Chi hkʼe te ve kʼo, canˇ paˍ lehˬ ngaˬ hui hta‸ maˇ shawˍ maˇ caˆ kʼoˆ maˇ hpeh‸.

15Awˬ lawn kʼo, chi beu‸ ka‸ mehˇ chawˇ ma teˇ hpaˍ hpaˍ ya‸ kʼai leh, Saˍtanˍ awˬ hkʼaˇ suh kʼai peuˬ.

16Yonˍ ve yaˇ miˇ teˇ gʼaˇ lehˬ, yawˇ hta‸ caˉ da‸ ve mehˇchawˇma teˇ hpaˍ cawˬ ve kʼo, yawˇ awˬ to yawˇ hui hta‸ ga piˇ cawˇ ve yoˬ. Hkri‸ yaˇ awˬ moˍ lehˬ, ga piˇ paˍ maˇ cawˬ ve mehˇchawˇma hpeh‸ ve chaw teˇ hpaˍ hta‸ ga piˇ hpeh‸ tuˬ, awˬ vuiˬ chi Hkri‸ yaˇ awˬ moˍ awˬ hkʼoˆ hta‸ taˇ gaˬ piˇ.

17A shu yawˇ ve kanˉ hkʼa deh‸ te ve awˬ hoˉ chaw mawˇ teˇ hpaˍ hta‸ nyiˇ pun yawˆ yan cawˇ ve yoˬ. Bon maˍ ve leh shu hta‸ maˍ piˇ ve kanˉ hta‸ te ve awˬ hoˉ chaw mawˇ teˇ hpaˍ hta‸ leuˉ leh yawˆ yan cawˇ ve yoˬ.

18Awˬ lawn kʼo, Li‸ hpu hkʼaw kʼoˆ taˍ ve, Caˬ shiˍ naˆ chehˇ ve nuˇ maw‸ kʼaw hta‸ nawˬ maˇ gʼa hoˆ taˍ. Peuˬ leh, Kanˉ te shehˍ hpaˇ lehˬ, gʼaˇ hpfuhˇ gʼa cawˇ ve yoˬ teh‸ kʼoˆ taˍ ve yoˬ.

19Shaˉ hkiˆ hkanˍ shehˍ hpaˇ nyiˇ gʼaˇ, maˇ heˆ kʼo shehˆ gʼaˇ maˇ cawˬ ve kʼo, awˬ hoˉ chaw mawˇ awˬ hkʼoˆ hta‸ venˇbaˆ taˍ ve chaw teˇ hpaˍ ve tawˇ hkawˇ hta‸ taˇ na.

20Venˇbaˆ te tcuhˉ taˍ ve chaw teˇ hpaˍ hta‸ chaw hkʼa peu-eˬ mehˆ gʼuˇ suhˍ deˇ maˍ piˇ-oˆ. Oˇ hkʼe te ve kʼo, awˬ kaˍ awˬ nu chaw teˇ hpaˍ htawˇ kawˆ ve nyi ma cawˬ tuˬ yoˬ.

21Awˬ ceuˬ chi teˇ hpaˍ hta‸ te ve teˇ yanˇ, maˇ fuiˍ maˇ pehˬ leh, shu ve mehˆ hpfuhˇ hta‸ maˇ nyi ve awˬ hkʼaw lo te-o teh‸, Gʼuiˬsha leh Yeˍsuˆ Hkri‸ mehˆ gʼuˇ suhˍ maˇ kʼoˆ, leuˆ yuˬ taˍ ve mvuhˇ naw ma tcuh yaˇ teˇ hpaˍ mehˆ gʼuˇ suhˍ maˇ kʼoˆ, ngaˬ nawˬ hta‸ tawˇ piˇ ve yoˬ.

22A shu hta‸ ka‸ aˉ yaˇ haˆ haˆ taˇ piˇ. Awˬ kaˍ awˬ nu chaw teˇ hpaˍ venˇbaˆ te chehˇ ve hta‸ nawˬ a ciˉ ka‸ taˇ caˉ da‸. Nawˬ awˬ to da‸ lehˍ kehˬ lehˍ chehˇ taˍ-o‸.

23Chi hkʼaw‸ nawˉ iˉ kaˆ ceh tiˉ taˇ dawˬ. Nawˬ ve gʼoˇ peˬ awˬ pon leh, nawˬ teˇ hkui teˇ hkui naˬ chehˇ ve awˬ pon, a pehˉ meuˇ gʼuiˬ hta‸ ka‸ a ciˉ dawˬ-o‸.

24Chaw teˇ hpaˍ hpaˍ ve venˇbaˆ hkʼa tawˍ lehˆ tawˆ la leh, suhˉ jehˬ kuiˬ lo yawˇ hui hta‸ sheh kʼai chehˇ ve yoˬ. Chaw teˇ hpaˍ hpaˍ ve venˇbaˆ awˬ hkʼaw‸ nawˉ tawˆ la tuˬ yoˬ.

25Oˇ ve hkʼa shuˍ shuˍ, da‸ ve kanˉ teˇ hpaˍ htawˇ hkʼa tawˍ lehˆ tawˆ la ve yoˬ. Chi beu‸ hkʼa tawˍ lehˆ maˇ tawˆ la sheˍ ve teˇ hpaˍ hta‸ hkʼaˬ htaˆ ka‸ faˉ taˍ gʼa tuˬ ve maˇ heˆ.

← Chapter 4 Jump to: Chapter 6 →