Esther 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Awˬ hkʼaw‸ nawˉ maˇ maw maw jawˇmawˇ nyi ma zuhˆ ve mehˉ kʼai ve yoˬ. Ya‸ hkʼaˇ, jawˇmawˇ lehˬ Vaˍshaˍtiˍ te taˍ peuˬ ve kanˉ leh, yawˇ jawˇmawˇ ma hta‸ te piˇ taˍ peuˬ ve kanˉ hta‸ dawˇ nyi chehˇ ve yoˬ.

2Chi hta‸ pa taw, yawˇ ve a ma‸ lonˉ teˇ hpaˍ yawˇ geh laˬ leh, Aˬ hto‸ ma pa taw da‸ jaˇ ve yaˇ miˇ haˉ teˇ hpaˍ hta‸ nawˬ maˇ ca nyi ve le.

3Nawˬ ve mvuhˇmiˬ teˇ kaˬ le le lo, nawˬ ve ma‸ poˍ lonˉ teˇ hpaˍ hta‸ kʼai tcuh leh, da‸ jaˇ ve yaˇ miˇ haˉ teˇ hpaˍ hta‸ choˬ kaˬ lo shiˍ veu laˇ tcuh-o. Yaˇ miˇ haˉ oˇ ve teˇ hpaˍ hta‸ nawˬ ve awˬ ceˬ Heˍgehˇ ve la‸ sheh hkʼaw chiˇ a‸ piˇ leh, awˬ hkiˇ hkʼa deh‸ gu shawˍ piˇ lawˬ-o‸.

4Oˇ hkʼe te peuˬ hkʼaw‸ nawˉ, nawˬ nyi ma cawˇ jaˇ ve yaˇ miˇ haˉ teˇ gʼaˇ hta‸ leuˆ yuˬ leh, Vaˍshaˍtiˍ awˬ tan jawˇmawˇ ma te tcuh-o, teh‸ jawˇmawˇ hta‸ kʼoˆ piˇ ve yoˬ. Jawˇmawˇ lehˬ tawˇ oˇ ve hta‸ nyi ma cawˇ leh, yawˇ hui dawˇ hkʼaˇ piˇ ve hkʼe te ve yoˬ.

5Suˇsanˍ venˇ lonˉ chi hkʼaw, Mawˍdaˍkehˇ teh‸ kʼoˆ ve Yuˇda‸ chaw teˇ gʼaˇ chehˇ taˍ ve yoˬ. Yawˇ lehˬ, Beˍyaˍmenˍ awˬ ceuˬ awˬ hkʼaˇ hpeh‸ leh, Kiˇshaˆ, Shaˍmiˆ, Yaˍiˇraˆ hui ve awˬ ceuˬ awˬ hkʼaˇ hpeh‸ ve yoˬ.

6Baˍbuˍlonˍ jawˇmawˇ Neˍbuˍhkaˍneˍzaˍ lehˬ, Yuˇda‸ jawˇmawˇ Yeˍhkawˇniˆ leh awˬ nu ve Yuˇda‸ chaw hui hta‸ Baˍbuˍlonˍ mvuhˇmiˬ lo shiˍ kʼai ve teˇ yanˇ, Mawˍdaˍkehˇ htawˇ kʼai taˍ ve yoˬ.

7Yawˇ lehˬ, Iˉsaˍtaˆ teh‸ kʼoˆ ve awˬ shaˍ ma teˇ gʼaˇ cawˬ ve yoˬ. Heˍbrehˇ hkawˇ kʼo, yawˇ hta‸ Haˍdaˍsheˍ teh‸ kʼoˆ ve yoˬ. Yawˇ lehˬ awˬ hkiˇ awˬ naˬ da‸ jaˇ ve yoˬ. Yawˇ ve awˬ pa awˬ e suh-e peuˬ hkʼaw‸ nawˉ, Mawˍdaˍkehˇ yawˇ hta‸ gʼawˆ hu taˍ ve yoˬ.

8Jawˇmawˇ lehˬ, yawˇ ve mvuhˇmiˬ hkʼaˬ ti chi ti lo li‸ bvuh‸ feu piˇ ve teˇ yanˇ, yaˇ miˇ haˉ laiˉ gʼaˇ Suˇsanˍ venˇ lo gaˬ la ve yoˬ. Iˉsaˍtaˆ htawˇ oˇ kaˬ lo gaˬ la leh, Heˍgehˇ ve la‸ sheh hkʼaw chiˇ a‸ piˇ ve yoˬ.

9Heˍgehˇ lehˬ, Iˉsaˍtaˆ hta‸ nyi ma cawˇ jaˇ ve yoˬ. Hkʼe te leh, yawˇ Iˉsaˍtaˆ hta‸ awˬ hkiˇ hkʼa deh‸ shawˍ piˇ leh, da‸ ve caˇ tuˬ hkʼa deh‸ caˍ piˇ ve yoˬ. Yawˇ hta‸ da‸ jaˇ ve chehˇ kuiˬ lo chehˇ tcuh leh, yawˇ hta‸ ga piˇ tuˬ yaˇ miˇ haˉ 7 gʼaˇ leuˆ teh piˇ taˍ ve yoˬ.

10Mawˍdaˍkehˇ kʼoˆ piˇ taˍ ve hkʼe, Iˉsaˍtaˆ lehˬ yawˇ awˬ to Yuˇda‸ chaw hpeh‸ ve awˬ lawn chaw teˇ gʼaˇ hta‸ ka‸ maˇ hto piˇ.

11Teˇ nyi le le Mawˍdaˍkehˇ lehˬ, hawˉ yehˬ gʼuˇ suhˍ lo htawˇ kʼaw‸ nawˬ kʼaw‸ te toˇ leh, Iˉsaˍtaˆ hkʼaˬ hkʼe hpeh‸ chehˇ ve hta‸ ca nyi la chehˇ ve yoˬ.

12Yaˇ miˇ haˉ oˇ ve teˇ hpaˍ awˬ hkiˇ gu shawˍ ve teˇ hkʼaw‸ maw ve yoˬ. Muˇraˍ shehˍ leh nyiˉ ye‸ ve ha pa 6 maˬ hkʼa gaˬ gʼa te leh, awˬ nu ve naˍ manˇ hawnˉ shehˍ leh nyiˉ ye‸ ve ha pa 6 maˬ gʼa te ve yoˬ. Oˇ hkʼe te peuˬ hkʼaw‸ nawˉ, yaˇ miˇ haˉ teˇ gʼaˇ peuˬ teˇ gʼaˇ hta‸ jawˇmawˇ geh shiˍ kʼai piˇ ve yoˬ.

13Yawˇ hui jawˇmawˇ gʼuˇ suhˍ kʼai ve teˇ yanˇ, a shu yawˇ dawˇ cawˇ ve veu‸ kʼaˇ hta‸ veu‸ deh kʼai ve yoˬ.

14Mvuhˇ hpeu‸ hpawˇ ceh tiˉ yawˇ hui jawˇmawˇ geh gʼa kʼai leh, shawˉ pawˍ mvuhˇ htiˇ la ve teˇ yanˇ, jawˇmawˇ ve awˬ miˇ ma i teˇ hpaˍ hta‸ ha‸ shaˉ shehˍ hpaˇ Shaˍshaˍgaˍzaˆ uˉ peunˍ ve awˬ hawˉ lo gʼa chehˇ ve yoˬ. Jawˇmawˇ awˬ meh kuˬ laˇ ve maˇ heˆ kʼo, yawˇ jawˇmawˇ geh maˇ gʼa kʼaw‸ kʼai.

15Chi teˇ pawˆ Iˉsaˍtaˆ jawˇmawˇ geh kʼai tuˬ ve awˬ yanˇ gaˬ la ve yoˬ. Iˉsaˍtaˆ lehˬ, Aˍbiˆ heˍlaˆ ve yaˇ miˇ hpeh‸ leh, Mawˍdaˍkehˇ ve awˬ shaˍ ma hpeh‸ ve yoˬ. Yawˇ hta‸ hkʼa mawˬ ve chaw hkʼa peu-eˬ nyi ma cawˇ ve yoˬ. Yawˇ jawˇmawˇ geh kʼai tuˬve awˬ yanˇ gaˬ la htaˇ, Heˍgehˇ kʼoˆ piˇ taˍ ve hkʼe ceh yawˇ veu‸ deh kʼai ve yoˬ.

16Jawˇmawˇ Aˍshaˍruˆ mvuhˇmiˬ hta‸ uˉ peunˍ ve 7 hkʼaw‸ teˇ hkʼaw‸, ha pa 10 maˬ gaˬ htaˇ, Iˉsaˍtaˆ jawˇmawˇ geh laˬ ve yoˬ.

17Awˬ nu ve yaˇ miˇ haˉ teˇ hpaˍ a‸ kehˉ jawˇmawˇ lehˬ Iˉsaˍtaˆ hta‸ nyi ma cawˇ leh ha‸ jaˇ ve yoˬ. Hkʼe te leh, jawˇmawˇ lehˬ shi uˉ tcuhˍ hta‸ yuˬ leh yawˇ hta‸ hkʼawˆ piˇ peuˬ hkʼaw‸ nawˉ, Vaˍshaˍtiˍ awˬ tan jawˇmawˇ ma te tcuh ve yoˬ.

18Oˇ hkʼe te peuˬ hkʼaw‸ nawˉ, jawˇmawˇ lehˬ Iˉsaˍtaˆ hta‸ taˍ uiˍ taˍ mvuh ve hkʼaw, yawˇ ve ma‸ poˍ lonˉ teˇ hpaˍ hta‸ kuˬ leh, hti caˇ hti dawˬ ve pawehˇ lonˉ teˇ maˬ te tcuh leh, la‸ shawnˍ teˇ hpaˍ pehˬ piˇ ve yoˬ.

19Awˬ yanˇ oˇ ve hkʼaw, Mawˍdaˍkehˇ htawˇ jawˇmawˇ ve a ma‸ lonˉ teˇ gʼaˇ hpeh‸ la ve yoˬ.

20Iˉsaˍtaˆ lehˬ, yawˇ Heˍbrehˇ chaw hpeh‸ ve chaw teˇ gʼaˇ hta‸ ka‸ maˇ hto piˇ. Ponˬ laˬ htaˇ, yawˇ ve aˉ shuˍ paˍ ve tawˇ hta‸ na yuˬ jaw ve hkʼe, chi beu‸ ka‸ hkʼa deh‸ na yuˬ chehˇ ve yoˬ.

21Mawˍdaˍkehˇ hawˉ yehˬ hkʼaw kanˉ te chehˇ ve teˇ yanˇ, jawˇmawˇ ve bawehˇ hta‸ shaw shehˍ hpaˇ Biˇgaˍtanˍ leh Teˍrehˆ yawˇ huiˉ maˬ jawˇmawˇ hta‸ nyi ma zuhˆ leh, hkʼawˇ tiˇ pehˍ tuˬ jehˬ da‸ chehˇ ve yoˬ.

22Awˬ lawn oˇ ve hta‸ Mawˍdaˍkehˇ gʼa shiˍ leh, jawˇmawˇ ma Iˉsaˍtaˆ hta‸ kʼoˆ piˇ ve yoˬ. Iˉsaˍtaˆ teˇ caˉ jawˇmawˇ lonˉ hta‸ kʼaw‸ hto piˇ ve yoˬ.

23Hkʼe te leh, jawˇmawˇ yawˇ huiˉ maˬ hta‸ chaˬ nyi leh, Mawˍdaˍkehˇ kʼoˆ ve hkʼe cawˇ ve pa taw, jawˇmawˇ yawˇ huiˉ maˬ hta‸ suhˆ hkuiˉ daw hkʼoˆ lo hpeh yu pehˍ piˇ ve yoˬ. Awˬ lawn chi hta‸ hkʼa deh‸ bvuh‸ keu taˍ tuˬ jawˇmawˇ tawˇ piˇ ve yoˬ.

← Chapter 1 Jump to: Chapter 3 →