Esther 6

Lahu Bible Edited © Thailand Bible Society and Bible Society of Myanmar, 2010, 2020.

← Chapter 5 Jump to: Chapter 7 →

1Oˇ ve teˇ haˉ, jawˇmawˇ zuh‸ muiˉ kʼa maˇ gʼa ve yoˬ. Hkʼe te leh, hawˉ yehˬ hkʼaw teh taˍ ve li‸ daw hta‸ ca yuˬ leh yawˇ hta‸ gʼaw maˍ laˇ tcuh ve yoˬ.

2Yawˇ hui li‸ oˇ ve hta‸ gʼaw kʼai chehˇ ve teˇ yanˇ, jawˇmawˇ ve bawehˇ hta‸ shaw shehˍ hpaˇ Biˇgaˍtanˍ leh Teˍrehˆ yawˇ huiˉ maˬ jawˇmawˇ hta‸ tiˇ pehˍ tuˬ hkʼawˇ jehˬ da‸ chehˇ ve awˬ lawn hta‸ htawˇ gʼaw tawˆ la ve yoˬ.

3Oˇ htaˇ jawˇmawˇ lehˬ, Ngaˬ hui Mawˍdaˍkehˇ hta‸ hkʼaˬ hkʼe te piˇ peuˬ ve le, teh‸ na nyi ve yoˬ. Te‸ chiˉ maˇ gʼa te piˇ sheˍ, teh‸ yawˇ ve awˬ ceˬ teˇ hpaˍ kʼaw‸ yaw hkʼaw‸ piˇ ve yoˬ.

4Ngaˬ ve a ma‸ lonˉ teˇ gʼaˇ gʼaˇ hawˉ yehˬ hkʼaw maˇ chehˇ laˇ, teh‸ jawˇmawˇ kʼaw‸ na nyi ve yoˬ. Oˇ ve teˇ hkui Haˍmanˍ lehˬ, Mawˍdaˍkehˇ hta‸ tiˇ pehˍ piˇ tuˬ jawˇmawˇ geh a hkaw-anˬ ca lawˬ la ve oˇ kaˬ lo gaˬ la taˍ ve yoˬ.

5Hkʼe te leh, yawˇ ve awˬ ceˬ teˇ hpaˍ lehˬ, Haˍmanˍ nawˬ hta‸ ca hpuˇ da‸ la tuˬ choˬ kaˬ lo chehˇ taˍ ve yoˬ, teh‸ jawˇmawˇ hta‸ kʼoˆ piˇ ve yoˬ. Yawˇ hta‸ haˆ lo‸ la tcuh-o, teh‸ jawˇmawˇ kʼoˆ ve yoˬ.

6Hkʼe te leh, Haˍmanˍ lo‸ la ve yoˬ. Oˇ htaˇ jawˇmawˇ lehˬ, Ngaˬ taˍ uiˍ taˍ mvuh piˇ gaˇ ve chaw teˇ gʼaˇ cawˬ ve yoˬ. Ngaˬ hkʼaˬ hkʼe gʼa te piˇ tuˬ le, teh‸ Haˍmanˍ hta‸ kʼoˆ piˇ ve yoˬ. Haˍmanˍ dawˇ nyi leh, Jawˇmawˇ taˍ uiˍ taˍ mvuh gaˇ ve awˬ kaˍ awˬ nu chaw maˇ cawˬ taˍ. Ngaˬ hta‸ tiˉ yoˬ hehˉ, teh‸ yawˇ dawˇ ve yoˬ.

7Hkʼe te leh, yawˇ jawˇmawˇ hta‸ chi hkʼe kʼoˆ piˇ ve yoˬ.

8Chaw oˇ ve hpaˇ hta‸ jawˇmawˇ ve veu‸ kʼaˇ feuˉ piˇ leh, jawˇmawˇ ve iˉ mvuhˇ hkʼoˆ ciˇ tcuh-o.

9Oˇ hkʼe te peuˬ hkʼaw‸ nawˉ, shu a‸ kehˉ uiˍ jaˇ ve a ma‸ lonˉ hta‸ venˇ hkʼaw lo iˉ mvuhˇ oˇ hta‸ sheh toˇ tcuh leh, Jawˇmawˇ taˍ uiˍ taˍ mvuh piˇ ve chaw hta‸ nyi loˬ, teh‸ kuˬ toˇ piˇ lawˬ-o‸, teh‸ jawˇmawˇ hta‸ kʼoˆ piˇ ve yoˬ.

10Oˇ htaˇ, jawˇmawˇ Haˍmanˍ hta‸ chi hkʼe kʼoˆ piˇ ve yoˬ. Nawˬ kʼoˆ ve hkʼe, jawˇmawˇ ve veu‸ kʼaˇ leh iˉ mvuhˇ hta‸ haˆ haˆ ca yuˬ leh, Yuˇda‸ chaw Mawˍdaˍkehˇ hta‸ oˇ hkʼe te piˇ-oˆ. Yawˇ lehˬ hawˉ yehˬ taˍ meu‸ hpe‸ lo mui chehˇ taˍ laˇ ve hta‸ nawˬ gʼa mawˬ tuˬ yoˬ, teh‸ yawˇ hta‸ kʼoˆ piˇ ve yoˬ.

11Hkʼe te leh, Haˍmanˍ lehˬ jawˇmawˇ ve veu‸ kʼaˇ leh iˉ mvuhˇ hta‸ yuˬ peuˬ hkʼaw‸ nawˉ, Mawˍda‸ kehˇ hta‸ feuˉ piˇ leh iˉ mvuhˇ ciˇ tcuh ve yoˬ. Iˉ mvuhˇ hta‸ yawˇ awˬ to venˇ hkʼaw lo sheh toˇ leh, Jawˇmawˇ taˍ uiˍ taˍ mvuh ve chaw hta‸ nyi loˬ, teh‸ kuˬ toˇ ve yoˬ.

12Oˇ hkʼe te taˉ peuˬ hkʼaw‸ nawˉ, Mawˍdaˍkehˇ lehˬ hawˉ yehˬ taˍ meu‸ hpe‸ lo kʼaw‸ kʼo‸-e ve yoˬ. Haˍmanˍ htawˇ, yawˇ ve mehˆ hpfuhˇ hta‸ beh leh aˉ hkʼaw lo gʼuiˇ kʼo‸-e ve yoˬ.

13Hpeh‸ la peuˬ ve awˬ lawn hkʼa peu-eˬ yawˇ ve awˬ miˇ ma leh yawˇ ve awˬ chawˇ teˇ hpaˍ hta‸ kʼoˆ maˍ piˇ ve yoˬ. Oˇ htaˇ, yawˇ hui yawˇ hta‸ chi hkʼe kʼoˆ piˇ ve yoˬ. Nawˬ lehˬ shonˇ hpawˇ lo chehˇ taˍ ve yoˬ. Mawˍdaˍkehˇ lehˬ, Yuˇda‸ chaw hpeh‸ ve pa taw, nawˬ yawˇ hta‸ te luˬ piˇ gʼa tuˬve maˇ heˆ. Yawˇ nawˬ hta‸ te luˬ laˇ tuˬ yoˬ, teh‸ yawˇ hta‸ kʼoˆ piˇ ve yoˬ.

14Yawˇ hui oˇ hkʼe kʼoˆ da‸ chehˇ htaˇ, Iˉsaˍtaˆ geh awˍ ca caˇ la tuˬ, shu ca kuˬ gaˬ la ve yoˬ.

← Chapter 5 Jump to: Chapter 7 →