Esther 8

Lahu Bible Edited © Thailand Bible Society and Bible Society of Myanmar, 2010, 2020.

← Chapter 7 Jump to: Chapter 9 →

1Oˇ ve teˇ nyi tiˉ awˬ hkʼaw lo, jawˇmawˇ lehˬYuˇda‸ chaw hui ve canˇ paˍ lonˉ Haˍmanˍ ve mawˇ hkʼa peu-eˬ, Iˉsaˍtaˆ hta‸ chiˇ a‸ piˇ ve yoˬ. Mawˍdaˍkehˇ lehˬ, yawˇ ve awˬ ceuˬ awˬ hkʼaˇ hpeh‸ ve awˬ lawn, Iˉsaˍtaˆ jawˇmawˇ hta‸ hto piˇ ve yoˬ. Hkʼe te leh, oˇ ve teˇ nyi hta‸ tanˬ leh Mawˍdaˍkehˇ lehˬ jawˇmawˇ ve bawehˇ hkʼaw lo‸-e tuˬ a hkaw-anˬ gʼa ve yoˬ.

2Haˍmanˍ geh kʼaw‸ yuˬ hkʼaw‸ taˍ ve yawˇ ve la‸ peˍ hta‸ jawˇmawˇ kʼehˆ leh Mawˍdaˍkehˇ hta‸ piˇ ve yoˬ. Hkʼe te leh, Iˉsaˍtaˆ lehˬ Mawˍdaˍkehˇ hta‸ Haˍmanˍ ve mawˇ hkʼa peu-eˬ hta‸ nyi ha‸ shaˉ shehˍ hpaˇ te tcuh ve yoˬ.

3Oˇ ve hkʼaw‸ nawˉ, Iˉsaˍtaˆ lehˬ jawˇmawˇ ve hkui paˇ lo boˆ taˍ leh hawˬ chehˇ ve yoˬ. Aˍ gaˆ ve awˬ ceuˬ awˬ hkʼaˇ Haˍmanˍ Yuˇda‸ chaw hui hta‸ te luˬ te sheˆ piˇ tuˬ gu taˍ ve kanˉ hkʼaˇ oˇ ve hta‸ kʼaw‸ pa laˇ tuˬ, jawˇmawˇ hta‸ lawˬ hkawˉ ve yoˬ.

4Jawˇmawˇ lehˬ, yawˇ ve shi juˇ fuiˍ taˬ yawˇ hta‸ yuˬ mawˍ piˇ ve yoˬ. Hkʼe te leh, yawˇ tu la leh jawˇmawˇ hta‸ chi hkʼe kʼoˆ piˇ ve yoˬ.

5Jawˇmawˇ nawˬ nyi ma cawˇ ve kʼo, nawˬ ve mvuhˇmiˬ hkʼaw chehˇ taˍ ve Yuˇda‸ chaw hkʼa peu-eˬ ve hta‸ tiˇ pehˍ piˇ tuˬ, Aˍgaˆ awˬ ceuˬ awˬ hkʼaˇ Haˍmanˍ bvuh‸ feu piˇ taˍ ve li‸ oˇ ve hta‸ a ciˉ kʼaw‸ yuˬ hkʼaw‸ laˇ-oˆ.

6Ngaˬ ve chaw leh ngaˬ ve awˬ ceuˬ awˬ hkʼaˇ teˇ hpaˍ hta‸ shu te luˬ te sheˆ piˇ ve hta‸ ngaˬ hkʼaˬ hkʼe te nyi hpeh‸ tuˬ ve le, teh‸ jawˇmawˇ hta‸ kʼoˆ piˇ ve yoˬ.

7Oˇ htaˇ, jawˇmawˇ Aˍshaˍruˆ lehˬ jawˇmawˇ ma Iˉsaˍtaˆ leh Mawˍdaˍkehˇ hta‸ chi hkʼe kʼoˆ piˇ ve yoˬ. Yuˇda‸ chaw hui hta‸ te luˬ piˇ tuˬ awˬ hkʼaˇ gu chehˇ ve Haˍmanˍ hta‸ ngaˬ tiˇ pehˍ piˇ peuˬ leh, yawˇ ve mawˇ hkʼa peu-eˬ Iˉsaˍtaˆ hta‸ chiˇ a‸ piˇ taˍ peuˬ ve yoˬ.

8Ya‸ hkʼaˇ, jawˇmawˇ ve awˬ meh hkʼaw yinˉ tcuhˉ taˍ peuˬ ve li‸ hta‸ kʼaw‸ yuˬ hkʼaw‸ tu te maˇ hpeh‸. Ya‸ hkʼaˇ, Yuˇda‸ chaw hui hta‸ nawˬ hui li‸ bvuh‸ feu piˇ gaˇ ve hkʼe bvuh feu piˇ-oˆ. Ngaˬ ve awˬ meh hkʼaw li‸ bvuh‸ leh yinˉ tcuhˉ feu piˇ-oˆ, teh‸ yawˇ huiˉ maˬ hta‸ kʼoˆ piˇ ve yoˬ.

9Chi hkʼe hpeh‸ la ve lehˬ, ha pa 3 maˬ teˇ maˬ 23 nyi htaˇ hpeh‸ ve yoˬ. Hkʼe te leh, Mawˍdaˍkehˇ lehˬ hawˉ yehˬ ve ceˇ leˇ lonˉ hta‸ kuˬ leh, mvuhˇmiˬ 127 peˆ lo ve awˬ hoˉ awˬ naˬ teˇ hpaˍ hta‸ li‸ bvuh‸ feu tcuh ve yoˬ. Mvuhˇmiˬ oˇ ve teˇ hpaˍ hkʼaw chehˇ taˍ ve Yuˇda‸ chaw hui geh htawˇ, li‸ bvuh‸ feu tcuh ve yoˬ.

10Mawˍdaˍkehˇ lehˬ, li‸ oˇ ve teˇ hpaˍ hta‸ jawˇmawˇ ve awˬ meh hkʼaw bvuh‸ tcuh leh, yinˉ hkʼa deh‸ tcuhˉ taˍ ve yoˬ. Oˇ hkʼe te peuˬ hkʼaw‸ nawˉ, li‸ oˇ ve teˇ hpaˍ hta‸ mvuhˇmiˬ hkʼaˬ ti chi ti lo feu kʼai ve yoˬ.

11Li‸ oˇ ve hkʼaw chi hkʼe bvuh‸ taˍ ve yoˬ. Yuˇda‸ chaw hui lehˬ, a shu yawˇ chehˇ taˍ ve venˇ hkʼaw awˬ moˍ shawˍ taˍ leh, yawˇ hui hta‸ ca ya‸ la ve chaw hta‸ kʼaw‸ te hkʼaw‸ piˇ tuˬ tawˇ piˇ taˍ ve yoˬ. Yawˇ hui hta‸ ca bawˆ la ve chaw hui hta‸ yawˇ hui kʼaw‸ bawˆ da‸ hpeh‸ leh, yawˇ hui ve miˇ yaˇ teˇ hpaˍ hta‸ te luˬ piˇ hpeh‸ ve yoˬ. Yawˇ hui ve mawˇ jeˬ teˇ hpaˍ hta‸ htawˇ, hiˉ yuˬ lu yuˬ hpeh‸ ve yoˬ.

12Paˇshaˇ mvuhˇmiˬ hkʼaˬ ti chi ti lo, Yuˇda‸ chaw hui hta‸ tiˇ pehˍ piˇ tuˬ tinˍ taˍ ve awˬ nyi lehˬ, ha pa 12 maˬ teˇ maˬ, 13 nyi htaˇ yawˇ hui oˇ hkʼe te piˇ hpeh‸ ve yoˬ.

13Awˬ nyi oˇ ve gaˬ la htaˇ, Yuˇda‸ chaw hui shu hta‸ te hkʼaw‸ piˇ gʼa tuˬ, teˇ na‸ htaˇ ka‸ mvuhˇ yaˇ miˬ yaˇ hkʼa peu-eˬ ve hta‸ awˬ lawn gʼa kaˇ piˇ taˍ ve yoˬ, teh‸ bvuh‸ taˍ ve yoˬ.

14Oˇ ve hkʼaw‸ nawˉ, li‸ yuˬ kʼoˬ paˍ teˇ hpaˍ iˉ mvuhˇ ciˇ leh hkʼaˬ hpawˇ chi hpawˇ li‸ ca yuˬ kʼoˬ kʼai ve yoˬ. Suˇsanˍ venˇ lonˉ hkʼaw lo htawˇ, li‸ oˇ ve hta‸ gʼaw maˍ piˇ ve yoˬ.

15Oˇ hkʼe te peuˬ hkʼaw‸ nawˉ, Mawˍdaˍkehˇ hawˉ yehˬ hkʼaw tawˆ kʼai ve yoˬ. Yawˇ lehˬ da‸ jaˇ nyi sha jaˇ ve veu‸ kʼaˇ hta‸ veu‸ deh taˍ leh, shi uˉ tcuhˍ hkʼawˆ taˍ ve yoˬ. Oˇ htaˇ, Suˇ sanˍ venˇ hkʼaw lo ha lehˬ leh kuˬ ve awˬ hkawˇ bvuhˬ tawˆ la ve yoˬ.

16Yuˇda‸ chaw teˇ hpaˍ dawˇ haˍ ve mehˉ kʼai leh ha lehˬ jaˇ ve yoˬ.

17Jawˇmawˇ ve li‸ oˇ ve hta‸ hkʼa gʼa mawˬ ve chaw hkʼa peu-eˬ ha lehˬ jaˇ leh, ha lehˬ ha kʼa hti caˇ hti dawˬ chehˇ ve yoˬ. Mvuhˇmiˬ yaˇ laiˉ gʼaˇ, chi teˇ pawˆ Yuˇda‸ chaw hta‸ kawˆ ve pa taw, yawˇ hui ka‸ Yuˇda‸ chaw kʼaw‸ hpeh‸ la ve yoˬ.

← Chapter 7 Jump to: Chapter 9 →