Esther 9

Lahu Bible Edited © Thailand Bible Society and Bible Society of Myanmar, 2010, 2020.

← Chapter 8 Jump to: Chapter 10 →

1Ha pa 12 maˬ teˇ maˬ, 13 nyi gaˬ la ve yoˬ. Awˬ nyi chi lehˬ, Yuˇda‸ chaw hui hta‸ tiˇ pehˍ piˇ tuˬ Haˍmanˍ tinˍ piˇ taˍ ve awˬ nyi hpeh‸ leh, Yuˇda‸ caw hui canˇ paˍ teˇ hpaˍ hta‸ kʼaw‸ te hkʼaw‸ piˇ tuˬ, Mawˍdaˍkehˇ tinˍ piˇ taˍ ve awˬ nyi htawˇ hpeh‸ ve yoˬ.

2Yuˇda‸ chaw hui lehˬ, a shu yawˇ chehˇ taˍ ve venˇ hkʼaw, canˇ paˍ hui hta‸ kʼaw‸ te hkʼaw‸ piˇ tuˬ, awˬ moˍ shawˍ leh hkʼa deh‸ gu taˍ ve yoˬ. Chaw yaˇ teˇ hpaˍ Yuˇda‸ chaw hui hta‸ kawˆ jaˇ leh, yawˇ hui hta‸ chaw teˇ gʼaˇ ka‸ ca ya‸ maˇ haˆ.

3Chi hkʼoˆ ka‸, mvuhˇmiˬ awˬ hoˉ awˬ naˬ teˇ hpaˍ htawˇ, Mawˍdaˍkehˇ hta‸ kawˆ ve pa taw, yawˇ hui Yuˇda‸ chaw hui hta‸ ga piˇ ve yoˬ.

4Awˬ lawn kʼo, chi beu‸ Mawˍdaˍkehˇ lehˬ hawˉ yehˬ hkʼaw shu a‸ kehˉ uiˍ jaˇ ve a ma‸ lonˉ hpeh‸ la peuˬ ve hta‸ mvuhˇmiˬ yaˇ teˇ gʼaˇ le le shiˍ taˍ peuˬ ve yoˬ.

5Chi hta‸ pa taw, Yuˇda‸ chaw hui lehˬ canˇ paˍ teˇ hpaˍ hta‸ yawˇ hui te gaˇ ve hkʼe te piˇ hpeh‸ ve yoˬ. Hkʼe te leh, yawˇ hui lehˬ canˇ paˍ teˇ hpaˍ hta‸ tiˇ pehˍ piˇ ve yoˬ.

6Suˇsanˍ venˇ lonˉ hkʼaw, yawˇ hui canˇ paˍ 500 gʼaˇ hta‸ tiˇ pehˍ piˇ ve yoˬ.

7Chaw oˇ ve teˇ hpaˍ awˬ hkʼaw lo, Haˍmanˍ ve yaˇ 10 gʼaˇ htawˇ lo‸-e taˍ ve yoˬ.

8Yaˇ paˍ oˇ ve 10 gʼaˇ lehˬ, Paˍshaˍdaˍtaˆ, Daˍlaˍhponˍ, Aˍsaˍpaˍtaˆ,

9Pawˇraˍtaˆ, Aˍdaˍliˆ, Aˍriˆdaˍtaˆ,

10Paˍmaˍshaˍtaˆ, Aˍriˆshehˇ, Aˍriˆdehˇ leh Vaˍzaˍtaˆ hui hpeh‸ ve yoˬ. Ya‸ hkʼaˇ, yawˇ hui shu ve mawˇ jeˬ hta‸ maˇ hiˉ yuˬ.

11Suˇsanˍ venˇ lonˉ hkʼaw Yuˇda‸ chaw hui canˇ paˍ 500 gʼaˇ hta‸ tiˇ pehˍ piˇ ve awˬ lawn, shu jawˇmawˇ lonˉ hta‸ ca hto piˇ la ve yoˬ.

12Oˇ htaˇ, jawˇmawˇ lehˬ Iˉsaˍtaˆ hta‸ chi hkʼe kʼoˆpiˇ ve yoˬ. Suˇsanˍ venˇ hkʼaw lo, Yuˇda‸ chaw hui lehˬ canˇ paˍ 500 gʼaˇ hta‸ tiˇ pehˍ piˇ peuˬ ve yoˬ. Haˍmanˍ ve yaˇ paˍ 10 gʼaˇ htawˇ tiˇ pehˍ ve hta‸ gʼa hkanˍ ve yoˬ. Awˬ nu ve venˇ teˇ hpaˍ hkʼaw lo htawˇ, yawˇ hui canˇ paˍ hkʼaˬ nyiˇ gʼaˇ hta‸ tiˇ pehˍ peuˬ naˍ maˇ shiˍ. Chi beu‸ nawˬ aˬ hto‸ ma heuˆ gaˇ sheˍ le. Ngaˬ hta‸ kʼoˆ laˇ-oˆ, teh‸ Iˉsaˍtaˆ hta‸ kʼoˆ piˇ ve yoˬ.

13Iˉsaˍtaˆ kʼaw‸ yaw hkʼaw‸ leh kʼoˆ ve, Jawˇmawˇ-oˬ, nawˬ nyi ma cawˇ ve kʼo, Yuˇda‸ chaw hui ya‸ nyi te peuˬ ve hkʼe, shawˉ pawˍ ka‸ oˇ hkʼe kʼaw‸ te piˇ tuˬ a hkaw-anˬ a ciˉ piˇ-oˆ. Haˍmanˍ ve yaˇ 10 gʼaˇ hta‸ suhˆ hkuiˉ daw hkʼoˆ lo hpeh chiˇ taˍ-o‸, teh‸ jawˇmawˇ hta‸ kʼoˆ piˇ ve yoˬ.

14Jawˇmawˇ lehˬ, yawˇ kʼoˆ ve hkʼe te tuˬ a hkaw-anˬ piˇ leh Haˍmanˍ ve yaˇ 10 gʼaˇ hta‸ suhˆ hkuiˉ daw hkʼoˆ hpeh chiˇ piˇ ve yoˬ.

15Ha pa oˇ ve 14 nyi teˇ nyi htaˇ, Suˇsanˍ venˇ hkʼaw chehˇ ve Yuˇda‸ chaw teˇ hpaˍ lehˬ, awˬ nu ve canˇ paˍ 300 gʼaˇ hta‸ kʼaw‸ tiˇ pehˍ piˇ ve yoˬ. Ya‸ hkʼaˇ, yawˇ hui shu ve mawˇ hta‸ maˇ ca hiˉ yuˬ.

16Awˬ nu ve venˇ teˇ hpaˍ hkʼaw chehˇ ve Yuˇda‸ chaw teˇ hpaˍ htawˇ, awˬ moˍ shawˍ leh, canˇ paˍ teˇ hpaˍ hta‸ tiˇ pehˍ piˇ ve yoˬ. Yawˇ hui lehˬ, canˇ paˍ 75,000 gʼaˇ hta‸ tiˇ pehˍ piˇ ve yoˬ. Ya‸ hkʼaˇ, yawˇ hui shu ve mawˇ hta‸ maˇ ca hiˉ yuˬ.

17Chi ve lehˬ, ha pa 13 nyi htaˇ yoˬ. Awˬ hkʼaw‸ nawˉ teˇ nyi, ha pa 14 nyi teˇ nyi htaˇ, yawˇ hui shu hta‸ maˇ kʼaw‸ tiˇ pehˍ piˇ-o. Yawˇ hui ha lehˬ ha kʼa hti caˇ hti dawˬ chehˇ ve yoˬ.

18Ya‸ hkʼaˇ, Suˇsanˍ venˇ hkʼaw chehˇ ve Yuˇda‸ chaw teˇ hpaˍ lehˬ, ha pa 15 nyi gaˬ htaˇ heh‸ gʼaˇ jehˇ leh, ha lehˬ ha kʼa hti caˇ hti dawˬ ve yoˬ. Ha pa 13 nyi leh 14 nyi htaˇ, yawˇ hui canˇ paˍ teˇ hpaˍ hta‸ tiˇ pehˍ piˇ chehˇ ve yoˬ.

19Chi hta‸ pa taw, venˇ ehˉ teˇ hpaˍ hkʼaw chehˇ ve Yuˇda‸ chaw teˇ hpaˍ lehˬ, ha pa oˇ ve 14 nyi htaˇ gʼaˇ jehˇ leh ha lehˬ ha kʼa hti caˇ hti dawˬ ve pawehˇ te ve yoˬ.

20Mawˍdaˍkehˇ lehˬ, awˬ lawn chi teˇ hpaˍ hta‸ li‸ daw hkʼaw lo hkʼa deh‸ bvuh‸ keu tcuh taˍ ve yoˬ.

21Oˇ hkʼe te peuˬ hkʼaw‸ nawˉ, Paˇshaˇ mvuhˇmiˬ hkʼaw chehˇ ve Yuˇda‸ chaw hui hta‸ teˇ hkʼaw‸ le le ha pa oˇ ve 13 leh 15 nyi htaˇ kanˉ maˇ te leh jehˇ taˍ tuˬ li‸ bvuh‸ feu piˇ ve yoˬ.

22Awˬ nyi oˇ ve teˇ hpaˍ lehˬ, Yuˇda‸ chaw hui canˇ paˍ ve la‸ sheh hkʼaw gʼa ponˬ ve awˬ nyi hpeh‸ ve yoˬ. Ha pa oˇ ve teˇ maˬ lehˬ, dawˇ haˍ tuˬhta‸ ha lehˬ tuˬkʼaw‸ hpeh‸ la piˇ ve ha pa hpeh‸ ve yoˬ. Awˬ yanˇ oˇ ve gaˬ la htaˇ, Yuˇda‸ chaw hui ha lehˬ ha kʼa pawehˇ te leh, haˍ ve gʼawˇ ve chaw hui hta‸ caˇ tuˬ pehˬ caˍ piˇ ve yoˬ.

23Hkʼe te leh, Yuˇda‸ chaw hui lehˬ Mawˍdaˍkehˇ kʼoˆ ve hkʼe te ve yoˬ. Oˇ ve teˇ pawˆ hta‸ tanˬ leh, pawehˇ chi te ve awˬ liˇ cawˬ la ve yoˬ.

24Aˍgaˆ ve awˬ ceuˬ awˬ hkʼaˇ, Heˍmeˍdaˍtaˆ ve yaˇ Haˍmanˍ lehˬ, Yuˇda‸ chaw hui hta‸ te luˬ te sheˆ piˇ tuˬ, mehˇ hkaˆ leh awˬ nyi oˇ ve hta‸ leuˆ yuˬ taˍ ve yoˬ.

25Ya‸ hkʼaˇ, Iˉsaˍtaˆ jawˇmawˇ geh kʼai leh, jawˇmawˇ lehˬYuˇda‸ chaw hui hta‸ te lu‸ piˇ tuˬ dawˇ nyi chehˇ ve Haˍmanˍ leh yawˇ ve yaˇ paˍ teˇ hpaˍ hta‸ suhˆ hkuiˉ daw hkʼoˆ lo hpeh chiˇ piˇ ve yoˬ.

26Chi hta‸ pa taw, yawˇ hui te chehˇ ve pawehˇ oˇ ve hta‸ Puˍrenˍ pawehˇ teh‸ kʼoˆ ve yoˬ. Awˬ lawn kʼo, Paˇshaˇ chaw hui lehˬ mehˇ hkaˆ ve hta‸ Puˇraˆ teh‸ kʼo ve pa taw, pawehˇ oˇ ve hta‸ Puˍrenˍ pawehˇ teh‸ kʼoˆ ve yoˬ.

27Hkʼe te leh, Yuˇda‸ chaw hui lehˬ Mawˍdaˍkehˇ kʼoˆ ve hkʼe, teˇ hkʼaw‸ le le awˬ yanˇ oˇ ve gaˬ la htaˇ, pawehˇ oˇ ve hta‸ te chehˇ taˍ ve yoˬ.

28Yawˇ hui lehˬ, hpeh‸ la peuˬ ve awˬ lawn chi teˇ hpaˍ hta‸ dawˇ nawˇ leh, pawehˇ chi hta‸ teˇ co peuˬ teˇ co te kʼai tuˬ kʼoˆ cheˆ taˍ ve yoˬ.

29Oˇ ve hkʼaw‸ nawˉ, Aˍbiˆheˍlaˆ ve yaˇ miˇ Iˉsaˍtaˆ htawˇ, Mawˍdaˍkehˇ kʼoˆ ve hkʼe pawehˇ chi hta‸ teˇ co peuˬ teˇ co te kʼai tuˬ, Yuˇda chaw hui hta‸ awˬ gʼaˇ piˇ ve li‸ teˇ kʼoˆbvuh‸ leh,

30Aˍshaˍruˆ uˉ peunˍ ve mvuhˇmiˬ 127 peˆ hkʼaw chehˇ taˍ ve Yuˇda‸ chaw hui geh feu piˇ ve yoˬ.

31Yuˇda‸ chaw hui awˬ nu ve pawehˇ teˇ hpaˍ te chehˇ ve hkʼe, pawehˇ chi teˇ maˬ hta‸ htawˇ awˬ yanˇ cawˇ cawˇ hkʼa deh‸ te chehˇ tuˬ, yawˇ hui hta‸ awˬ gʼaˇ piˇ ve yoˬ. Iˉsaˍtaˆ leh Mawˍdaˍkehˇ yawˇ huiˉ maˬ nyiˇ gʼaˇ gʼaˇ chi hkʼe te tuˬ awˬ gʼaˇ piˇ ve yoˬ.

32Chi hkʼe te tuˬ Iˉsaˍtaˆ awˬ gʼaˇ piˇ ve tawˇ hta‸ htawˇ, yawˇ hui li‸ daw hkʼaw hkʼa deh‸ bvuh‸ keu taˍ ve yoˬ.

← Chapter 8 Jump to: Chapter 10 →