Esther 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Iˉsaˍtaˆ caˇ tuˬ ce ve 3 nyi teˇ nyi gaˬ htaˇ, yawˇ lehˬ jawˇmawˇ ma ve veu‸ kʼaˇ hta‸ veu‸ deh leh Jawˇmawˇ ve bawehˇ lo kʼai ve yoˬ. Jawˇmawˇ lehˬ, yawˇ ve kʼaw jaw hkʼoˆ lo mui chehˇ ve yoˬ.

2Iˉsaˍtaˆ yehˬ miˉ baˬ lo huˇ chehˇ ve hta‸ yawˇ gʼa mawˬ ve teˇ yanˇ, yawˇ ve shi juˇ fuiˍ yuˬ mawˍ piˇ ve yoˬ. Hkʼe te leh, Iˉsaˍtaˆ bawehˇ hkʼaw lo‸-e leh, juˇ fuiˍ taˬ oˇ ve hta‸ htawˇ ve yoˬ.

3Oˇ htaˇ jawˇmawˇ lehˬ, Jawˇmawˇ ma Iˉsaˍtaˆ-oˬ, nawˬ aˬ hto‸ ma loˍ ve le. Ngaˬ hta‸ kʼoˆ laˇ-oˆ. Nawˬ loˍ ve hkʼe gʼa tuˬ yoˬ. Mvuhˇmiˬ teˇ hkoˇ pe‸ laˇ tuˬ lawˬ ve ka‸ pe‸ laˇ tuˬ yoˬ, teh‸ yawˇ hta‸ kʼoˆ piˇ ve yoˬ.

4Iˉsaˍtaˆ kʼaw‸ yaw hkʼaw‸ leh kʼoˆ ve, Jawˇmawˇ-oˬ, nawˬ nyi ma cawˇ ve kʼo ya‸ puiˉ haˉ Haˍmanˍ nawˬ huiˉ maˬ hta‸ ngaˬ awˍ teˇ poˬ te caˍ laˇ gaˇ ve yoˬ, teh‸ jawˇmawˇ hta‸ kʼoˆ piˇ ve yoˬ.

5Oˇ htaˇ jawˇmawˇ lehˬ, Haˍmanˍ hta‸ haˆ kuˬ yuˬ leh, Iˉsaˍtaˆ gu taˍ ve caˇ tuˬ hta‸ ca caˇ tuˬ tawˆ kʼai ve yoˬ.

6Jawˇmawˇ a pehˉ meuˇ gʼuiˬ dawˬ chehˇ htaˇ, Yawˇ Iˉsaˍtaˆ hta‸ chi hkʼe kʼoˆ piˇ ve yoˬ. Nawˬ aˬ hto‸ ma heuˆ gaˇ ve le. Ngaˬ hta‸ hto laˇ-oˆ. Ngaˬ ve mvuhˇmiˬ teˇ hkoˇ pe‸ laˇ tuˬ lawˬ ve ka‸ ngaˬ pe‸ laˇ tuˬ yoˬ, teh‸ yawˇ hta‸ kʼoˆ piˇ ve yoˬ.

7Iˉsaˍtaˆ kʼaw‸ yaw hkʼaw‸ leh kʼoˆ ve,

8Jawˇmawˇ nawˬ ngaˬ lawˬ ve hkʼe te laˇ gaˇ ve nyi ma cawˬ ve kʼo, ngaˬ chi hkʼe lawˬ gaˇ ve yoˬ. Shawˉ pawˍ ka‸ Haˍmanˍ nawˬ huiˉ maˬ ngaˬ geh awˍ ca kʼaw‸ caˇ la sheˍ. Shawˉ pawˍ heh‸ ngaˬ heuˆ gaˇ ve awˬ ceuˬ nawˬ hta‸ hto laˇ tuˬ yoˬ, teh‸ kʼoˆ piˇ ve yoˬ.

9Caˇ peuˬ hkʼaw‸ nawˉ, Haˍmanˍ ha lehˬ ha kʼa tawˆ kʼai ve yoˬ. Oˇ htaˇ, hawˉ yehˬ taˍ meu‸ hpe‸ lo mui chehˇ ve Mawˍdaˍkehˇ hta‸ yawˇ gʼa mawˬ ve yoˬ. Mawˍdaˍkehˇ yawˇ hta‸ oˉ kʼoˍ maˇ pui piˇ ve pa taw, yawˇ nyi ma zuhˆ jaˇ ve yoˬ.

10Ya‸ hkʼaˇ, yawˇ yeunˇ hkanˍ leh aˉ hkʼaw kʼo‸-e ve yoˬ. Oˇ htaˇ, yawˇ lehˬ yawˇ ve awˬ chawˇ teˇ hpaˍ leh yawˇ ve awˬ miˇ ma Zeˍrehˆ hta‸ kuˬ yuˬ ve yoˬ.

11Yawˇ oˇ hkʼe te peuˬ hkʼaw‸ nawˉ, yawˇ hkʼaˬ ma paw sha ve awˬ lawn, yawˇ yaˇ paˍ hkʼaˬ nyiˇ gʼaˇ cawˬ ve awˬ lawn, jawˇmawˇ yawˇ hta‸ hkʼaˬ ma taˍ uiˍ chehˇ ve awˬ lawn, leh awˬ nu ve a ma‸ lonˉ teˇ hpaˍ a‸ kehˉ yawˇ hkʼaˬ ma uiˍ ve awˬ lawn yawˇ hui hta‸ kʼoˆ maˍ piˇ ve yoˬ.

12Chi hkʼoˆ ka‸, jawˇmawˇ ma Iˉsaˍtaˆ jawˇmawˇ yawˇ huiˉ maˬ hta‸ ceh kuˬ leh awˍ caˍ laˇ ve awˬ lawn leh, shawˉ pawˍ ka‸ jawˇmawˇ ma geh awˍ gʼa kaw‸ caˇ tuˬ sheˍ ve awˬ lawn yawˇ hui hta‸ kʼoˆ maˍ piˇ ve yoˬ.

13Yawˇ hui hta‸ oˇ hkʼe kʼoˆ maˍ piˇ peuˬ hkʼaw‸ nawˉ yawˇ kʼoˆ ve, Hawˉ yehˬ taˍ meu‸ hpe‸ lo mui chehˇ ve Yuˇda‸ chaw Mawˍdaˍkehˇ oˇ ve hpaˇ hta‸ ngaˬ gʼa mawˬ chehˇ ve ceh ceh, ya‸ sheh ngaˬ nawˬ hui hta‸ kʼoˆ maˍ laˇ chehˇ ve awˬ ceuˬ oˇ ve teˇ hpaˍ lehˬ, te‸ chiˉ tcuhˉ kuiˬ maˇ cawˬ ve hkʼe yoˬ, teh‸ yawˇ hui hta‸ kʼoˆ piˇ ve yoˬ.

14Oˇ htaˇ, yawˇ ve awˬ miˇ ma leh yawˇ ve awˬ chawˇ teˇ hpaˍ yawˇ hta‸ chi hkʼe kʼoˆ piˇ ve yoˬ. Aˬ hto‸ ma pa taw 50 shaw‸ mvuh ve yehˬ hkuiˉ daw teˇ maˬ hta‸ nawˬ maˇ duˇ ti taˍ ve le. Shawˉ pawˍ mvuhˇ shawˉ jawˇmawˇ geh kʼai leh, Mawˍdaˍkehˇ hta‸ oˇ kaˬ lo hpeh chiˇ tuˬ ca kʼoˆ piˇ-oˆ. Oˇ hkʼe te peuˬ kʼo, nawˬ ha lehˬ ha kʼa jawˇmawˇ ma geh awˍ gʼa ca caˇ tuˬ yoˬ, teh‸ yawˇ hta‸ kʼoˆ piˇ ve yoˬ. Haˍmanˍ lehˬ tawˇ oˇ ve hta‸ nyi ma cawˇ leh, yehˬ hkuiˉ daw teˇ maˬ duˇ ti taˍ ve yoˬ.

← Chapter 4 Jump to: Chapter 6 →