Genesis 48

Lahu Bible Edited © Thailand Bible Society and Bible Society of Myanmar, 2010, 2020.

← Chapter 47 Jump to: Chapter 49 →

1Oˇ ve hkʼaw‸ nawˉ, Yoˇseh‸ lehˬ yawˇ ve awˬ pa naˬ chehˇ ve awˬ hkawˇ gʼa kaˇ ve pa taw, yawˇ ve yaˇ paˍ Maˍnaˍseˍ leh Eˇhpaˍrenˍ hta‸ shiˍ veu leh yawˇ hta‸ ca nyi tuˬ tawˆ kʼai ve yoˬ.

2Yaˍkoˆ lehˬ, yawˇ ve yaˇ paˍ Yoˇseh‸ laˬ ve awˬ hkawˇ gʼaˇ kaˇ ve teˇ yanˇ, yawˇ hkʼa cawˬ ve awˬ gʼaˇ yuˬ tawˆ leh, yawˇ ve zuh‸ hpui hkʼoˆ tu mui taˍ ve yoˬ.

3Oˇ htaˇ Yaˍkoˆ Yoˇseh‸ hta‸ kʼoˆ piˇ ve, Ngaˬ Hkaˍnanˍ mvuhˇmiˬ Luˇzaˆ venˇ hkʼaw chehˇ taˍ htaˇ, kanˇ paˆ uiˍ ve Gʼuiˬsha ngaˬ geh laˬ leh ngaˬ hta‸ awˬ bon na‸ laˇ leh kʼoˆ ve,

4Nawˬ ve awˬ ceuˬ awˬ hkʼaˇ teˇ hpaˍ lehˬ chaw ceuˬ lonˉ teˇ ceuˬ hpeh‸ la htaˇ hkʼa gaˬ, ngaˬ nawˬ hta‸ uiˍ la maˇ la piˇ tuˬ yoˬ. Mvuhˇmiˬ chi nawˬ ve awˬ ceuˬ awˬ hkʼaˇ teˇ hpaˍ hta‸ ngaˬ co co taiˍ taiˍ piˇ laˇ tuˬ yoˬ, teh‸ ngaˬ hta‸ kʼoˆ laˇ ve yoˬ.

5Ngaˬ choˬ kaˬ lo maˇ gaˬ la sheˬ gʼuˇ suhˍ, Eˇjiˇtu‸ mvuhˇmiˬ hkʼaw lo paw la taˍ ve nawˬ ve yaˇ paˍ chi ve nyiˇ gʼaˇ hta‸ htawˇ, ngaˬ ve yaˇ teˇ hpaˍ hkʼe shawˍ taˍ tuˬ yoˬ. Ruˇbenˍ leh Suˉmonˍ hui ngaˬ ve yaˇ hpeh‸ ve hkʼe, Maˍnaˍseˍ leh Eˇhpaˍrenˍ hui htawˇ ngaˬ ve yaˇ hpeh‸ ve yoˬ.

6Yaˇ oˇ ve nyiˇ gʼaˇ awˬ hkʼaw‸ nawˉ hkʼa paw la ve yaˇ teˇ hpaˍ hta‸ ngaˬ ve yaˇ teh‸ kʼaw‸ shawˍ maˇ hpeh‸. Ya‸ hkʼaˇ, yawˇ hui awˬ shinˉ yuˬ ve teˇ yanˇ, Eˇhpaˍrenˍ leh Maˍnaˍseˍ hui geh gʼa kʼaw‸ pehˬ yuˬ tuˬ yoˬ.

7Ngaˬ Meˍsoˇpoˇtaˍmiˆ mvuhˇmiˬ hkʼaw tu leh Hkaˍnanˍ mvuhˇmiˬ lo kʼaw‸ la chehˇ ve teˇ yanˇ, ya‸ kʼaw kʼaˉ lo nawˬ e Raˍhkeˍlaˆ suh-e ve yoˬ. Hkʼe te leh, ngaˬ yawˇ hta‸ Behˍlehˍ hehnˍ teh‸ kʼoˆ ve Eˇhpaˍraˆ venˇ lo kʼai ve ya‸ kʼaw hpuiˇ lo tuˍ piˇ taˉ ve yoˬ, teh‸ Yoˇseh‸ hta‸ kʼoˆ piˇ ve yoˬ.

8Yaˍkoˆ lehˬ, Yoˇseh‸ ve yaˇ teˇ hpaˍ hta‸ gʼa mawˬ ve teˇ yanˇ, Chaw chi teˇ hpaˍ a shu le, teh‸ na nyi ve yoˬ.

9Yoˇseh‸ kʼaw‸ kʼoˆ ve, Chaw chi teˇ hpaˍ lehˬ, choˬ kaˬ Eˇjiˇtu‸ mvuhˇmiˬ hkʼaw Gʼuiˬsha ngaˬ hta‸ pe‸ laˇ taˍ ve ngaˬ ve yaˇ teˇ hpaˍ hpeh‸ ve yoˬ, teh‸ kʼaw‸ yaw hkʼaw‸ piˇ ve yoˬ. Oˇ htaˇ Yaˍkoˆ kʼoˆ ve, Yawˇ hui hta‸ ngaˬ awˬ bon na‸ piˇ tuˬ, ngaˬ paˇ lo shiˍ veu laˇ-oˆ, teh‸ kʼoˆ piˇ ve yoˬ.

10Yaˍkoˆ lehˬ mawˇ jaˇ peuˬ ve pa taw, mehˆ hkʼa deh‸ maˇ mawˬ-o. Hkʼe te leh, Yoˇseh‸ yawˇ huiˉ maˬ hta‸ yawˇ awˬ pa geh shiˍ laˬ ve yoˬ. Yawˇ yawˇ huiˉ maˬ hta‸ kʼuˉ taˍ leh boˆ nu piˇ ve yoˬ.

11Oˇ htaˇ Yaˍkoˆ lehˬ, Ngaˬ nawˬ hta‸ gʼa kʼaw‸ mawˬ tuˬ a ciˉ ka‸ maˇ dawˇ. Ya‸ hkʼaˇ, Gʼuiˬsha lehˬ nawˬ ve yaˇ teˇ hpaˍ hta‸ htawˇ, ngaˬ hta‸ mawˬ tcuh laˇ sheˬ ve yoˬ, teh‸ Yoˇseh‸ hta‸ kʼoˆ piˇ ve yoˬ.

12Yoˇseh‸ lehˬ, yawˇ ve yaˇ teˇ hpaˍ hta‸ awˬ pa geh kʼaw‸ yuˬ hkʼaw‸ leh miˬ chaˇ hkʼoˆ boˆ taˍ ve yoˬ.

13Oˇ ve hkʼaw‸ nawˉ, Yoˇseh‸ lehˬ yawˇ ve yaˇ paˍ Eˇhpaˍrenˍ hta‸ awˬ pa ve la‸ mehˍ paˉ hpawˇ lo chehˇ tcuh leh, yawˇ ve yaˇ paˍ Maˍnaˍseˍ hta‸ yawˇ awˬ pa ve la‸ sha paˉ lo chehˇ tcuh ve yoˬ.

14Eˇhpaˍrenˍ lehˬ yaˇ paˍ i hpeh‸ ve htawˇ, Yaˍkoˆ yawˇ ve la‸ sheh pehˉ leh yawˇ ve la‸ sha paˉ la‸ sheh Eˇhpaˍrenˍ ve oˉ kʼoˍ hkʼoˆ taˍ ve yoˬ. Maˍnaˍseˍ lehˬ awˬ viˉ paˍ hpeh‸ ve htawˇ, Yaˍkoˆ yawˇ ve la‸ mehˍ paˉ la‸ sheh Maˍnaˍseˍ ve oˉ kʼoˍ hkʼoˆ taˍ ve yoˬ.

15Oˇ ve hkʼaw‸ nawˉ, yawˇ Yoˇseh‸ hta‸ bon na‸ piˇ leh kʼoˆ ve, Ngaˬ ve awˬ pa teˇ hpaˍ hkʼa htaˆ ka‸ gʼaˇ va chehˇ ve Aˍbraˍhanˍ leh Iˉcaˆ hui ve Gʼuiˬsha lehˬ, yaˇ paˍ chi nyiˇ gʼaˇ hta‸ awˬ bon na‸ piˇ-oˆ. Ya‸ nyi hkʼa gaˬ ngaˬ hta‸ ha‸ shaˉ laˇ chehˇ ve Gʼuiˬsha lehˬ, yawˇ huiˉ maˬ hta‸ awˬ bon na‸ piˇ-oˆ.

16Ngaˬ hta‸ haˍ kuiˬ gʼawˇ kuiˬ hkʼaw ponˬ laˇ chehˇ ve mvuhˇ naw ma tcuh yaˇ lehˬ, yaˇ paˍ chi nyiˇ gʼaˇ hta‸ awˬ bon na‸ piˇ-oˆ. Ngaˬ ve awˬ meh leh ngaˬ pa Aˍbraˍhanˍ leh Iˉcaˆ hui ve awˬ meh lehˬ, yaˇ paˍ chi nyiˇ gʼaˇ geh hkʼaˬ htaˆ ka‸ cawˬ taˍ leh, yawˇ huiˉ maˬ lehˬ miˬguiˬ chi hkʼoˆ lo awˬ ceuˬ awˬ hkʼaˇ maˇ maˇ cawˬ la piˇ-oˆ, teh‸ kʼoˆ ve yoˬ.

17Yaˍkoˆ lehˬ, yawˇ ve la‸ sha paˉ la‸ sheh Eˇhpaˍrenˍ ve oˉ kʼoˍ hkʼoˆ taˍ piˇ ve hta‸ Yoˇseh‸ gʼa mawˬ ve teˇ yanˇ, yawˇ nyi ma maˇ sha. Hkʼe te leh, yawˇ lehˬ Eˇhpaˍrenˍ ve oˉ kʼoˍ hkʼoˆ teh taˍ ve yawˇ awˬ pa ve la‸ sheh hta‸ yuˬ leh, Maˍnaˍseˍ ve oˉ kʼoˍ hkʼoˆ lo kʼaw‸ taˍ piˇ ve yoˬ.

18Peuˬ leh yawˇ kʼoˆ ve, Ngaˬ pa-oˬ, nawˬ te ve a ciˉ maˇ cawˇ sheˬ. Chi lehˬ, yaˇ paˍ uiˍ hpeh‸ ve yoˬ. Nawˬ ve la‸ sha paˉ la‸ sheh yawˇ ve oˉ kʼoˍ hkʼoˆ taˍ piˇ-oˆ, teh‸ kʼoˆ piˇ ve yoˬ.

19Ya‸ hkʼaˇ yawˇ awˬ pa kʼoˆ ve, Ngaˬ yaˇ paˍ-oˬ, ngaˬ shiˍ chehˇ ve yoˬ. Maˍnaˍseˍ awˬ ceuˬ awˬ hkʼaˇ teˇ hpaˍ htawˇ chaw ceuˬ lonˉ teˇ ceu‸ hpeh‸ la tuˬ yoˬ. Ya‸ hkʼaˇ, yawˇ ve awˬ nyi paˍ lehˬ yawˇ a‸ kehˉ leuˉ leh uiˍ jaˇ tuˬ yoˬ. Yawˇ ve awˬ ceuˬ awˬ hkʼaˇ teˇ hpaˍ lehˬ chaw ceuˬ lonˉ teˇ ceu‸ hpeh‸ la tuˬ yoˬ, teh‸ yawˇ hta‸ kʼoˆ piˇ ve yoˬ.

20Oˇ ve teˇ nyi yawˇ yawˇ hui hta‸ bon na‸ piˇ leh kʼoˆ ve, Iˉsaˍreˍlaˆ chaw teˇ hpaˍ shu hta‸ awˬ bon na‸ piˇ ve teˇ yanˇ, nawˬ hui ve awˬ meh hta‸ yuˬ leh, Gʼuiˬsha lehˬ Eˇhpaˍrenˍ leh Maˍnaˍseˍ hta‸ te piˇ ve hkʼe, nawˬ hui hta‸ htawˇ te laˇ piˇ-oˆ, teh‸ kʼoˆ leh Maˍnaˍseˍ gʼuˇ suhˍ Eˇhpaˍrenˍ hta‸ kʼaw‸ teh piˇ ve yoˬ.

21Oˇ ve hkʼaw‸ nawˉ, Yaˍkoˆ Yoˇseh‸ hta‸ kʼoˆ piˇ ve, Ngaˬ lehˬ suh la paˇ neˇ ve yoˬ. Ya‸ hkʼaˇ, Gʼuiˬsha nawˬ geh chehˇ taˍ leh, nawˬ hta‸ nawˬ ve awˬ puˍ awˬ pi hui ve mvuhˇmiˬ lo kʼaw‸ shiˍ kʼo‸-e laˇ tuˬ yoˬ.

22Ngaˬ nawˬ hta‸ hkuiˇ jaˇ da‸ jaˇ ve Sheˍhkenˍ teh‸ kʼoˆ ve mvuhˇmiˬ teˇ peˆ piˇ laˇ tuˬ yoˬ. Mvuhˇmiˬ oˇ ve lehˬ, ngaˬ la‸ caˉ pfuhˇ veu leh Aˍmawˇriˆ chaw hui geh bawˆ yuˬ taˍ ve mvuhˇmiˬ hpeh‸ ve yoˬ, teh‸ Yoˇseh‸ hta‸ kʼoˆ piˇ ve yoˬ.

← Chapter 47 Jump to: Chapter 49 →