Genesis 50

Lahu Bible Edited © Thailand Bible Society and Bible Society of Myanmar, 2010, 2020.

← Chapter 49 Jump to:

1Yoˇseh‸ lehˬ, yawˇ ve awˬ pa hkʼoˆ boˆ taˍ leh yawˇ ve mehˆ hpfuhˇ hta‸ boˆ nu leh hawˬ ve yoˬ.

2Oˇ ve hkʼaw‸ nawˉ, yawˇ awˬ pa hta‸ maw chaweh teh taˍ gʼa tuˬ, naˆ tsuhˇ hkʼa deh‸ shehˆ piˇ tuˬ yawˇ ve chaw teˇ hpaˍ hta‸ tawˇ piˇ ve yoˬ.

3Yawˇ hui lehˬ te muiˬ te jaw ve hkʼe, Yaˍkoˆ hta‸ naˆ tsuhˇ shehˆ piˇ leh hkʼa deh‸ kʼaw‸ gu htiˆ piˇ ve yoˬ. Oˇ hkʼe te ve 40 nyi maw ve yoˬ. Eˇjiˇtu‸ chaw teˇ hpaˍ lehˬ, yawˇ awˬ pon 70 nyi hkʼa gaˬ dawˇ haˍ leh paˆ hawˬ ve yoˬ.

4Yaˍkoˆ awˬ pon dawˇ haˍ leh paˆ hawˬ ve awˬ yanˇ peuˬ kʼai peuˬ hkʼaw‸ nawˉ, Yoˇseh‸ jawˇmawˇ ve a ma‸ lonˉ teˇ hpaˍ hta‸ kʼoˆ piˇ ve, Awˬ bon te leh jawˇmawˇ hta‸ chi hkʼe ca kʼoˆ piˇ-oˆ.

5Ngaˬ pa ngaˬ hta‸ chi hkʼe kʼoˆ taˉ laˇ ve yoˬ Yawˇ suh-e ve kʼo, yawˇ hta‸ Hkaˍnanˍ mvuhˇmiˬ lo yuˬ kʼo‸-e leh yawˇ gu taˉ ve tuˍ hpfuh hkʼaw ca tuˍ laˇ tuˬ ngaˬ hta‸ kʼoˆ taˉ laˇ ve yoˬ. Chi hta‸ pa taw, ngaˬ pa hta‸ oˇ kaˬ lo ca kʼaw‸ tuˍ piˇ tuˬ awˬ pon ngaˬ hta‸ a hkaw-anˬ piˇ la tuˬ yawˇ hta‸ ca kʼoˆ piˇ-oˆ. Yawˇ hta‸ tuˍ piˇ taˉ peuˬ kʼo, ngaˬ kʼaw‸ kʼaw‸ la tuˬ yoˬ, teh‸ yawˇ hui hta‸ kʼoˆ piˇ ve yoˬ.

6Oˇ htaˇ jawˇmawˇ lehˬ, Nawˬ pa hta‸ nawˬ ka ti‸ te piˇ taˍ ve hkʼe kʼai leh ca tuˍ piˇ-oˆ, teh‸ Yoˇseh‸ hta‸ kʼoˆ piˇ ve yoˬ.

7Hkʼe te leh, Yoˇsehˆ lehˬ yawˇ ve awˬ pa hta‸ ca tuˍ piˇ tuˬ tawˆ kʼai ve yoˬ. Jawˇmawˇ ve a ma‸ lonˉ hkʼa peu-eˬ, hawˉ yehˬ hkʼaw chehˇ ve chaw uiˍ chaw mvuh teˇ hpaˍ, leh Eˇjiˇtu‸ mvuhˇmiˬ hkʼaw chehˇ ve awˬ hoˉ awˬ naˬˬ hkʼa peu-eˬ yawˇ geh kʼai ve yoˬ.

8Yoˇseh‸ ve yehˬ yaˇ kʼa yaˇ hkʼa peu-eˬ, yawˇ ve awˬ viˉ awˬ nyi hkʼa peu-eˬ leh, yawˇ awˬ pa ve yehˬ yaˇ kʼa yaˇ hkʼa peu-eˬ htawˇ kʼai ve yoˬ. Yawˇ hui ve ceˇ teˇ hpaˍ leh yaˇ ehˉ teˇ hpaˍ hta‸ ceh tiˉ Gawˍshenˍ mvuhˇmiˬ hkʼaw teh taˉ ve yoˬ.

9Iˉ mvuhˇ lawˬ teˇ hpaˍ leh iˉ mvuhˇ ciˇ ve ma‸ yaˇ teˇ hpaˍ hta‸ htawˇ, yawˇ shiˍ kʼai ve yoˬ. Yawˇ hui awˬ moˍ awˬ cuˇ lonˉ te kʼai ve yoˬ.

10Yawˇdanˍ iˉ kaˆ lawˬ mvuhˇ nyi tawˆ hpawˇ lo cawˬ ve Aˍtaˆ miˬ tawˬ kuiˬ lo gaˬ ve teˇ yanˇ, yawˇ hui gʼaˇ hte‸ kuˬ hawˬ paˆ hawˬ ve yoˬ. Yoˇseh‸ oˇ kaˬ lo suhˍ nyi chehˇ leh yawˇ awˬ pa awˬ pon dawˇ haˍ leh hawˬ chehˇ taˍ ve yoˬ.

11Mvuhˇmiˬ oˇ ve hkʼaw chehˇ ve Hkaˍnaˍniˆ chaw teˇ hpaˍ lehˬ, Eˇjiˇtu‸ chaw hui Aˍtaˆ miˬ tawˬ kuiˬ lo kuˬ hawˬ paˆ hawˬ chehˇ ve hta‸ gʼa mawˬ ve teˇ yanˇ, Eˇjiˇtu‸ chaw teˇ hpaˍ gʼaˇ hte‸ kuˬ hawˬ chehˇ ve law, teh‸ kʼoˆ ve yoˬ. Hkʼe te leh chehˇ kuiˬ oˇ ve hta‸ Aˍbeˍlaˆmiˆzaˍrenˍ teh‸ meh piˇ ve yoˬ.

12Yaˍkoˆ kʼoˆ piˇ taˍ ve hkʼe, yawˇ ve yaˇ teˇ hpaˍ hkʼa deh‸ na yuˬ leh te ve yoˬ.

13Yawˇ hui yawˇ hta‸ Hkaˍnanˍ mvuhˇmiˬ hkʼaw yuˬ kʼai leh, Maˆpeˍlaˆ miˬguiˬ hkʼaw cawˬ ve haˉ kʼoˍ hkʼaw ca tuˍ piˇ ve yoˬ. Miˬguiˬ oˇ ve lehˬ, Maˍreˍ venˇ mvuhˇ nyi tawˆ hpawˇ lo cawˬ leh, Hiˇtiˆ chaw Eˇhpaˍronˍ geh Aˍbraˍhanˍ vuiˬ yuˬ taˍ ve chaw tuˍ kuiˬ hpeh‸ ve yoˬ.

14Yawˇ ve awˬ pa hta‸ tuˍ piˇ peuˬ hkʼaw‸ nawˉ, Yoˇseh‸ lehˬ yawˇ ve awˬ viˉ awˬ nyi teˇ hpaˍ leh, yawˇ geh hkʼa kʼai taˍ ve chaw hkʼa peu-eˬ ve hta‸ shiˍ leh Eˇjiˇtu‸ mvuhˇmiˬ lo kʼaw‸ la ve yoˬ

15Yawˇ hui ve awˬ pa suh peuˬ hkʼaw‸ nawˉ, Yoˇseh‸ ve awˬ viˉ awˬ nyi teˇ hpaˍ kawˆ jaˇ leh kʼoˆ ve, Yoˇseh‸ ngaˬ hui hta‸ canˇ leh, ngaˬ hui yawˇ hta‸ te piˇ taˍ ve hkʼe yawˇ ngaˬ hui hta‸ kʼaw‸ te hkʼaw‸ laˇ ve kʼo, ngaˬ hui hkʼaˬ hkʼe te tuˬ le, teh‸ kʼoˆ da‸ ve yoˬ.

16Hkʼe te leh yawˇ hui Yoˇseh‸ geh kʼai leh kʼoˆ ve, Nawˬ pa maˇ suh sheˬ htaˇ, ngaˬ hui hta‸ chi hkʼe shanˍ taˉ laˇ ve yoˬ.

17Yoˇseh‸ geh kʼai leh yawˇ nawˬ hui te ya‸ ve venˇbaˆ hta‸ hpehˇ laˇ tuˬ ca lawˬ hkawˉ-oˆ, teh‸ kʼoˆ leh shanˍ taˉ laˇ ve yoˬ. Hkʼe te leh, chi beu‸ ngaˬ hui te ya‸ ve venˇbaˆ hta‸ a ciˉ hpehˇ laˇ-oˆ, teh‸ yawˇ hta‸ kʼoˆ piˇ ve yoˬ. Tawˇ oˇ ve hta‸ gʼa kaˇ htaˇ, Yoˇseh‸ hawˬ ve yoˬ.

18Yawˇ ve awˬ viˉ paˍ teˇ hpaˍ yawˇ mehˆ gʼuˇ suhˍ boˆ taˍ leh, Ngaˬ hui lehˬ nawˬ ve awˬ ceˬ hpeh‸ ve yoˬ, teh‸ yawˇ hta‸ kʼoˆ piˇ ve yoˬ.

19Yoˇseh‸ yawˇ hui hta‸ kʼoˆ piˇ ve, Taˇ kawˆ. Ngaˬ awˬ to hta‸ Gʼuiˬsha hkʼe shawˍ taˍ maˇ hpeh‸.

20Nawˬ hui ngaˬ hta‸ haiˬ ve awˬ ceuˬ te laˇ ve yoˬ. Ya‸ hkʼaˇ, Gʼuiˬsha lehˬ oˇ ve awˬ hkʼaw lo da‸ ve kanˉ hta‸ te tawˆ la leh, ya‸ nyi ngaˬ hui gʼa mawˬ chehˇ ve hkʼe, chaw maˇ maˇ ve a sha‸ hta‸ ponˬ piˇ taˍ ve yoˬ.

21Chi hta‸ pa taw, nawˬ hui te‸ chiˉ kawˆ tuˬ maˇ loˍ. Nawˬ hui leh nawˬ hui ve miˇ yaˇ hkʼa peu-eˬ ve hta‸ ngaˬ nyi ha‸ shaˉ laˇ tuˬ yoˬ, teh‸ kʼoˆ leh yawˇ hui hta‸ nyi ma sha la piˇ ve yoˬ.

22Yoˇseh‸ lehˬ, yawˇ ve awˬ viˉ awˬ nyi teˇ hpaˍ geh Eˇjiˇtu‸ mvuhˇmiˬ hkʼaw chehˇ taˍ ve yoˬ. Yawˇ a sha‸ 110 hkʼaw‸ gaˬ leh suh-e ve yoˬ.

23Yawˇ lehˬ Eˇhpaˍrenˍ ve awˬ yaˇ leh awˬ hawehˍ teˇ hpaˍ hta‸ htawˇ, yawˇ ve yaˇ teh‸ gʼa shawˍ taˉ ve yoˬ. Maˍnaˍseˍ ve awˬ hawehˍ, Maˍhkiˆraˆ ve yaˇ teˇ hpaˍ htawˇ, yawˇ ve yaˇ teh‸ gʼa shawˍ taˉ ve yoˬ.

24Yoˇseh‸ yawˇ ve awˬ viˉ awˬ nyi teˇ hpaˍ hta‸ kʼoˆ piˇ ve, Ngaˬ lehˬ suh la paˇ neˇ ve yoˬ. Ya‸ hkʼaˇ, Gʼuiˬsha lehˬ nawˬ hui hta‸ ha‸ shaˉ laˇ leh Aˍbraˍhanˍ, Iˉcaˆ, Yaˍkoˆ hui hta‸ piˇ tuˬ ka ti‸ te piˇ taˍ ve mvuhˇmiˬ oˇ ve hkʼaw nawˬ hui hta‸ shiˍ kʼo‸-e laˇ tuˬ yoˬ.

25Gʼuiˬsha nawˬ hui hta‸ oˇ hkʼe shiˍ kʼo‸-e laˇ ve teˇ yanˇ, ngaˬ ve awˬ to hta‸ ka‸ nawˬ hui geh a ciˉ yuˬ kʼo‸-e laˇ-oˆ, teh‸ kʼoˆ piˇ leh ka ti‸ te tcuh ve yoˬ.

26Yoˇseh‸ a sha‸ 110 hkʼaw‸ gaˬ leh suh-e ve yoˬ. Yawˇ hui yawˇ hta‸ naˆ tsuhˇ shehˆ leh hkʼa deh‸ gu htiˆ piˇ peuˬ hkʼaw‸ nawˉ, kʼawˇ kʼoˍ hkʼaw keu leh Eˇjiˇtu‸ mvuhˇmiˬ hkʼaw teh taˍ ve yoˬ.

← Chapter 49 Jump to:

Recommended Reading

Commentary Genesis Commentaries → Devotional Genesis Devotional Guide → Get This Bible Lahu Bible Edited © Thailand Bible Society and Bible Society of Myanmar, , . Study Bible →