Hosea 11

Lahu Bible Edited © Thailand Bible Society and Bible Society of Myanmar, 2010, 2020.

← Chapter 10 Jump to: Chapter 12 →

1Gʼuiˬsha kʼoˆ ve, Iˉsaˍreˍlaˆ lehˬ yaˇ ehˉ hpeh‸ chehˇ sheˍ htaˇ ka‸ ngaˬ yawˇ hta‸ ha‸ leh, yawˇ hta‸ ngaˬ ve yaˇ hkʼa shuˍ Eˇjiˇtu‸ mvuhˇmiˬ hkʼaw shiˍ tawˆ la piˇ taˍ ve yoˬ.

2Ya‸ hkʼaˇ, yawˇ hta‸ ngaˬ ve yaˇ hkʼe shaˬ shawˍ taˍ kʼo, shaˬ yawˇ ngaˬ geh hpaw-e ve yoˬ. Ngaˬ ve chaw teˇ hpaˍ lehˬ Baˍlaˆgʼuiˬsha hta‸ tuˉ tanˇ leh, shaˉ ho‸ teˇ hpaˍ hta‸ sha hawnˉ tuˉ tanˇ piˇ ve yoˬ.

3Iˉsaˍreˍlaˆ hta‸ ya‸ kʼaw juˇ puiˉ la tuˬ maˍ piˇ shehˍ hpaˇ lehˬ ngaˬ yoˬ. Ngaˬ ve chaw teˇ hpaˍ hta‸ ngaˬ ve la‸ sheh hkʼaw chiˇ taˆ piˇ taˍ ve yoˬ. Ya‸ hkʼaˇ, ngaˬ yawˇ hui hta‸ ha‸ shaˉ piˇ chehˇ ve hta‸ yawˇ hui maˇ dawˇ shiˍ puiˉ.

4Ha‸ pehnˇ ve hkʼaw ngaˬ yawˇ hui hta‸ kuˬ yuˬ ve yoˬ. Ngaˬ yawˇ hui hta‸ gʼawˆ yuˬ leh ngaˬ awˬ paˇ neˇ lo teh taˍ ve yoˬ. Yawˇ hui hta‸ ngaˬ hkʼa deh‸ caˍ piˇ taw piˇ chehˇ ve yoˬ.

5Yawˇ hui lehˬ, ngaˬ geh maˇ kʼaw‸ hpfuhˆ kʼaw‸ la ve pa taw, Eˇjiˇtu‸ mvuhˇmiˬ lo yawˇ hui gʼa kʼaw‸ kʼo‸-e tuˬyoˬ. Aˍsuˉriˆ chaw teˇ hpaˍ yawˇ hui hta‸ uˉ peunˍ tuˬ yoˬ.

6Yawˇ hui ve venˇ teˇ hpaˍ hkʼaw ma‸ hpeh‸ la leh, yawˇ hui ve venˇ teˇ hpaˍ luˬ kʼai sheˆ kʼai tuˬ yoˬ. Ngaˬ ve chaw teˇ hpaˍ lehˬ, a shu yawˇ ve a loˍ hta‸ tiˉ te chehˇ ve pa taw gʼa luˬ gʼa sheˆ tuˬ yoˬ.

7Yawˇ hui ngaˬ hta‸ baˬ taˉ peuˬ. Yawˇ hui chi hkʼe te ve pa taw, gʼa ponˬ tuˬ ve maˇ heˆ. Yawˇ hui pfuhˇ taˍ ve mawˇ hawˇ jaˇ ve pa taw, gʼaˇ hte‸ kuˬ hawˬ tuˬ yoˬ. Ya‸ hkʼaˇ, chaw teˇ gʼaˇ ka‸ yawˇ hui hta‸ ga piˇ tuˬ ve maˇ heˆ.

8Iˉsaˍreˍlaˆ chaw teˇ hpaˍ-oˬ, nawˬ hui hta‸ ngaˬ hkʼaˬ hkʼe te chiˇ baˬ hpeh‸ tuˬ ve le. Nawˬ hui hta‸ ngaˬ hkʼaˬ hkʼe te baˬ taˉ hpeh‸ tuˬve le. Aˍdaˍmaˍ venˇ hta‸ ngaˬ te luˬ piˇ ve hkʼa shuˍ, ngaˬ nawˬ hui hta‸ te luˬ piˇ hpeh‸ tuˬ laˇ. Maˇ heˆ kʼo, Zeˍbonˍ venˇ hta‸ ngaˬ te piˇ ve hkʼe, nawˬ hui hta‸ te piˇ hpeh‸ tuˬ ve laˇ. Ngaˬ ve nyi ma lehˬ ngaˬ hta‸ oˇ hkʼe te tcuh laˇ tuˬ ve maˇ heˆ. Awˬ lawn kʼo, ngaˬ nawˬ hui hta‸ ha‸ ve teˇ ceuˬ uiˍ jaˇ maˇ jaˇ ve yoˬ.

9Nyi ma zuhˆ ve awˬ hkʼaw lo ngaˬ nawˬ hui hta‸ ciˍ yanˍ laˇ tuˬ ve maˇ heˆ. Iˉsaˍreˍlaˆ hta‸ ngaˬ teˇ pawˆ ka‸ kʼaw‸ te luˬ piˇ tuˬ ve maˇ heˆ. Awˬ lawn kʼo, ngaˬ lehˬ chaw yaˇ hpeh‸ ve maˇ heˆ. Gʼuiˬsha hpeh‸ ve yoˬ. Ngaˬ lehˬ da‸ kehˬ ve Gʼuiˬsha hpeh‸ leh, nawˬ hui geh chehˇ taˍ ve yoˬ. Nyi ma zuhˆ ve hkʼaw ngaˬ nawˬ hui geh laˬ tuˬ ve maˇ heˆ.

10Ngaˬ lehˬ laˇ caˬ shiˉ hkʼa shuˍ yawˇ hui ve canˇ paˍ teˇ hpaˍ hta‸ ho piˇ leh, ngaˬ ve chaw teˇ hpaˍ ngaˬ hkʼaˇ suh gʼa‸ laˬ tuˬ yoˬ. Yawˇ hui lehˬ mvuhˇ nyi kʼehˬ hpawˇ lo chehˇ taˍ leh, ngaˬ geh gʼuiˇ laˬ tuˬ yoˬ.

11Yawˇ hui lehˬ, Eˇjiˇtu‸ mvuhˇmiˬ hkʼaw chehˇ taˍ ve ngaˆ teˇ hpaˍ leh, Aˍsuˇriˆ mvuhˇmiˬ hkʼaw chehˇ taˍ ve aˉ pui kʼaˍ teˇ hpaˍ hkʼa shuˍ, ngaˬ geh haˆ haˆ laˬ tuˬ yoˬ. Ngaˬ lehˬ yawˇ hui hta‸ yawˇ hui ve yehˬ lo teˇ pawˆ kʼaw‸ shiˍ kʼo‸-e piˇ tuˬ yoˬ.

12Iˉsaˍreˍlaˆ chaw teˇ hpaˍ lehˬ, heˍ ve hkʼaw ngaˬ paˇ lo hkʼa caw zuhˇ chehˇ taˍ ve yoˬ. Yuˇ da‸ chaw teˇ hpaˍ lehˬ ka ti‸ yeˬ leh da‸ kehˬ ve ngaˬ Gʼuiˬsha hta‸ kʼaw‸ hpfuhˆ chehˇ ve yoˬ, teh‸ Gʼuiˬsha kʼoˆ ve yoˬ.

← Chapter 10 Jump to: Chapter 12 →