Hosea 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Mvuhˇmiˬ hkʼaw chehˇ taˍ ve Iˉsaˍreˍlaˆ chaw hui hta‸ Gʼuiˬsha venˇbaˆ taˍ kuiˬ chi hkʼe cawˬ ve yoˬ. Iˉsaˍreˍlaˆ chaw teˇ hpaˍ-oˬ, yawˇ kʼoˆ chehˇ ve tawˇ hta‸ na sheˍ. Mvuhˇmiˬ hkʼaw ka ti‸ yeˬ ve leh ha‸ pehnˇ ve teˇ ceuˬ maˇ cawˬ. Ngaˬ hta‸ Gʼuiˬsha hkʼa shuˍ yawˇ hui maˇ shawˍ taˍ.

2Yawˇ hui ka ti‸ te peuˬ hkʼaw‸ nawˉ, ka ti‸ oˇ ve hta‸ kʼaw‸ te luˬ ve yoˬ. Yawˇ hui lehˬ heˍ puiˉ ve chaw, shu hta‸ tiˇ pehˍ ve chaw, shu mawˇ hkʼawˇ ve chaw, leh haˉ chawˇ haˉ paˆ te ve chaw teˇ hpaˍ hpeh‸ ve yoˬ. Haiˬ ve awˬ ceuˬ cawˬ maˇ la leh, chaw teˇ gʼaˇ peuˬ teˇ gʼaˇ tiˇ pehˍ ve hta‸ gʼa hkanˍ chehˇ ve yoˬ.

3Chi hta‸ pa taw, mvuhˇmiˬ hta‸ goˇ kʼai piˇ lawˬ leh, miˬguiˬ hkʼoˆ cawˬ ve awˬ ceuˬ hkʼa peu-eˬ suh-e peuˬ tuˬ yoˬ. To nuˇ to shaˆ, ngaˆ, leh ngaˇ teˇ hpaˍ htawˇ suh-e peuˬ tuˬ yoˬ, teh‸ Gʼuiˬsha kʼoˆ ve yoˬ.

4Gʼuiˬsha kʼoˆ ve, Ngaˬ ve chaw teˇ hpaˍ hta‸ chaw teˇ gʼaˇ ka‸ venˇbaˆ taˇ taˍ. Ngaˬ venˇbaˆ taˍ gaˇ ve chaw lehˬ, nawˬ hui paw hkuˇ teˇ hpaˍ hta‸ yoˬ.

5Mvuhˇ law‸ kʼaw mvuhˇ hpeu‸ nawˬ hui te ya‸ chehˇ ve yoˬ. Tcuh kaˍ paˍ teˇ hpaˍ htawˇ, nawˬ hui a‸ kehˉda‸ leuˉ ve kanˉ hta‸ te ve maˇ heˆ. Ngaˬ lehˬ nawˬ ve awˬ e hpeh‸ ve Iˉsaˍ reˍlaˆ hta‸ te luˬ te sheˆ piˇ tuˬ yoˬ.

6Ngaˬ ve chaw teˇ hpaˍ ngaˬ hta‸ maˇ kʼaw‸ dawˇ nawˇ ve pa taw, yawˇ hui gʼa luˬ gʼa sheˆ ve yoˬ. Nawˬ hui paw hkuˇ teˇ hpaˍ htawˇ, ngaˬ hta‸ chiˇ baˬ leh ngaˬ maˍ piˇ ve tawˇ teˇ hpaˍ hta‸ baˬ taˉ ve yoˬ. Chi hta‸ pa taw, nawˬ hui leh nawˬ hui ve yaˇ teˇ hpaˍ hta‸ ngaˬ paw hkuˇ kʼaw‸ te tcuh laˇ tuˬ ve maˇ heˆ.

7Nawˬ hui paw hkuˇ shaˬ maˇ ve kʼo shaˬ ngaˬ hta‸ te ya‸ ve yoˬ. Nawˬ hui ve awˬ me‸ awˬ hponˇ hta‸ ngaˬ yuˬbaˬ tuˬ yoˬ.

8Ngaˬ ve chaw teˇ hpaˍ venˇbaˆ te ve pa taw, nawˬ hui paw sha la ve yoˬ. Chi hta‸ pa taw, yawˇ hui teˇ hpaˍ hta‸ nawˬ hui leuˉ leh venˇbaˆ kʼaw‸ te piˇ lawˬ gaˇ ve yoˬ.

9Chaw yaˇ teˇ hpaˍ hkʼa shuˍ, nawˬ hui htawˇ ciˍ yanˍ ve hta‸ gʼa hkanˍ tuˬ yoˬ. Nawˬ hui te taˍ ve haiˬ ve kanˉ hta‸ keunˍ da‸ ve hkʼe, ngaˬ kʼaw‸ te hkʼaw‸ laˇ tuˬ yoˬ.

10Nawˬ hui Gʼuiˬsha hta‸ tuˉ tanˇ chehˇ ve teˇ yanˇ, nawˬ hui caˇ keunˍ caˇ cawˇ ve awˬ ceuˬ hta‸ gʼa caˇ chehˇ ve htawˇ, gʼa meu‸ jehˇ tuˬ yoˬ. Nawˬ hui lehˬ, awˬ kaˍ awˬ nu ve gʼuiˬsha teˇ hpaˍ hta‸ oˉ kʼoˍ pui tuˬ yoˬ. Ya‸ hkʼaˇ, nawˬ hui yaˇ cawˬ tuˬ ve maˇ heˆ. Awˬ lawn kʼo, nawˬ hui lehˬ ngaˬ hta‸ baˬ taˉ leh, awˬ kaˍ awˬ nu ve gʼuiˬsha teˇ hpaˍ hkʼaˇ suh gʼa‸ kʼai ve pa taw yoˬ, teh‸ Gʼuiˬsha kʼoˆ ve yoˬ.

11Gʼuiˬsha kʼoˆ ve, A pehˉ meuˇ gʼuiˬ teˇ ceuˬ lehˬ, ngaˬve chaw teˇ hpaˍ ve shiˍ puiˉ ve nyi ma hta‸ te luˬ piˇ chehˇ ve yoˬ.

12Yawˇ hui lehˬ, suhˆ yuˬ te taˍ ve shaˉ ho‸ geh hpeu‸ maˍ laˇ ve tawˇ teˇ hpaˍ hta‸ lawˬ na chehˇ ve yoˬ. Suhˆ taˬ lehˬ, yawˇ hui shiˍ gaˇ ve awˬ ceuˬ hta‸ kʼoˆ maˍ piˇ ve yoˬ. Yawˇ hui ngaˬ hta‸ baˬ taˉ peuˬ. Meh maˬ lanˉ hkʼa shuˍ yawˇ hui lehˬ a shu yawˇ awˬ to awˬ kaˍ awˬ nu ve gʼuiˬsha teˇ hpaˍ hta‸ chiˇ a‸ piˇ taˍ ve yoˬ.

13Hkʼaw pui hkʼoˆ cawˬ ve da‸ kehˬ ve chehˇ kuiˬ teˇ hpaˍ lo, yawˇ hui tuˉ tanˇ tuˬ hta‸ tuˉ tanˇ leh, uiˍ jaˇ nyi sha jaˇ ve suhˆ cehˬ teˇ hpaˍ awˬ hawˉ lo yawˇ hui sha hawnˉ tuˉ tanˇ chehˇ ve yoˬ. Awˬ lawn kʼo, suhˆ cehˬ oˇ ve teˇ hpaˍ aˉ gʼuiˬ ha baˬ jaˇ ve pa taw yoˬ. Nawˬ hui oˇ hkʼe te ve pa taw, nawˬ hui ve yaˇ miˇ teˇ hpaˍ meh maˬ lanˉ hpeh‸ la leh, nawˬ hui ve awˬ hkuiˇ ma teˇ hpaˍ htawˇ, haˉ chawˇ haˉ paˆ te tuˬ yoˬ.

14Ya‸ hkʼaˇ, yawˇ hui oˇ hkʼe te ve pa taw, ngaˬ yawˇ hui hta‸ ciˍ yanˍ piˇ tuˬ ve maˇ heˆ. Awˬ lawn kʼo, nawˬ hui htawˇ bon yehˬ hkʼaw chehˇ ve meh maˬ lanˉ teˇ hpaˍ geh teˇ geh awˬ nu ve gʼuiˬsha teˇ hpaˍ hta‸ ca tuˉ tanˇ piˇ chehˇ ve pa taw yoˬ. Dawˇ hkʼaˇ maˇ cawˬ ve chaw luˬ kʼai sheˆ kʼai tuˬ yoˬ, teh‸ chaw mawˇ hkawˇ cawˬ taˍ ve yoˬ.

15Nawˬ hui Iˉsaˍreˍlaˆ chaw teˇ hpaˍ ngaˬ hta‸ ka ti‸ maˇ yeˬ ve chaw hpeh‸ ve htawˇ, Yuˇ da‸ chaw teˇ hpaˍ lehˬ, nawˬ hui hkʼa shuˍ haiˬ ve chaw taˇ hpeh‸ la piˇ-oˆ. Giˇlaˍgaˍ lo maˇ kʼoˆ, Beˍteˍlaˆ lo maˇ kʼoˆ, oˉ kʼoˍ taˇ ca pui loˬ. Oˇ kaˬ lo te‸ chehˇ ve Gʼuiˬsha awˬ meh hta‸ cuˇ leh ka ti‸ taˇ ca te-o.

16Iˉsaˍreˍlaˆ chaw teˇ hpaˍ lehˬ, ta iˉ maˇ chehˇ puiˉ ve nuˇ ma haˉ hta‸ shuˍ ve yoˬ. Kʼaˆ caˇ kuiˬ lo yawˬ ehˉ hkʼa shuˍ, ngaˬ yawˇ hui hta‸ hkʼaˬ hkʼe te caˍ piˇ hpeh‸ tuˬ ve le.

17Iˉsaˍreˍlaˆ chaw hui lehˬ, shaˉ ho‸ hta‸ ceh tiˉ oˉ kʼoˍ pui chehˇ ve yoˬ.

18Yawˇ hui lehˬ, tzuhˬbvuhˆ paˍ hui hta‸ awˬ chawˇ te leh, haˉ chawˇ haˉ paˆ te ve hkʼaw, a shu yawˇ ve awˬ me‸ awˬ hponˇ hta‸ te luˬ chehˇ ve yoˬ.

19Haiˬ ve awˬ ceuˬ lehˬ, mvuhˇ haw lonˉ hkʼa shuˍ yawˇ hui hta‸ meuˆ kʼoˬ piˇ leh, yawˇ hui oˉ kʼoˍ pui chehˇ ve gʼuiˬsha lehˬ yawˇ hui hta‸ ga piˇ gʼa tuˬ ve maˇ heˆ.

← Chapter 3 Jump to: Chapter 5 →