Hosea 2

Lahu Bible Edited © Thailand Bible Society and Bible Society of Myanmar, 2010, 2020.

← Chapter 1 Jump to: Chapter 3 →

1Chi hta‸ pa taw, nawˬ hui Iˉsaˍreˍlaˆ chaw teˇ hpaˍ teˇ gʼaˇ hta‸ teˇ gʼaˇ, Gʼuiˬsha ve chaw leh Gʼuiˬsha ha‸ ve chaw teh‸ kʼoˆ da‸ chehˇ-oˆ.

2Ngaˬ yaˇ teˇ hpaˍ-oˬ, nawˬ e hta‸ lawˬ hkawˉ-oˆ. Yawˇ lehˬ, ngaˬ miˇ ma maˇ kʼaw‸ heˆ leh, ngaˬ lehˬ yawˇ ve awˬ hpawˇ maˇ kʼaw‸ heˆ-o ve htawˇ, yawˇ haˉ chawˇ haˉ paˆ maˇ gʼa kʼaw‸ te leh, meh maˬ lanˉ maˇ gʼa kʼaw‸ te tuˬ, yawˇ hta‸ lawˬ hkawˉ-oˆ.

3Yawˇ venˇbaˆ maˇ kʼaw‸ dawˇ hpfuhˆ ve kʼo, yawˇ paw la htaˇ hkʼe kʼaw‸ hpeh‸ la tuˬ, ngaˬ yawˇ ve veu‸ kʼaˇ teˇ hpaˍ hta‸ kʼehˆ baˬ piˇ tuˬ yoˬ. Ngaˬ yawˇ hta‸ goˇ jaˇ ve miˬguiˬ hkʼa shuˍ hpeh‸ la piˇ leh, yawˇ lehˬ iˉ kaˆ shiˉ leh suh-e tuˬ yoˬ.

4Yawˇ ve yaˇ teˇ hpaˍ hta‸ ngaˬ ha kʼaˉ piˇ tuˬ ve maˇ heˆ. Awˬ lawn kʼo, yawˇ hui lehˬ ya‸ taw hkawˇ maˇ shiˍ ve meh maˬ lanˉ yaˇ teˇ hpaˍ hpeh‸ ve yoˬ.

5Ngaˬ hta‸ ha‸ ve chaw hui geh ngaˬ kʼai tuˬ yoˬ. Awˬ lawn kʼo, yawˇ hui ngaˬ hta‸ caˇ tuˬ dawˬ tuˬ, veu‸ tuˬ kʼaˇ tuˬ, naˍ manˇ leh a pehˉ meuˇ gʼuiˬ pe‸ laˇ ve yoˬ, teh‸ yaˇ miˇ oˇ ve kʼoˆ ve yoˬ.

6Chi hta‸ pa taw, yawˇ hta‸ hkʼa caw zuhˇ lo ngaˬ aˉ chuˇ ti keu piˇ taˍ tuˬ yoˬ. Yawˇ tawˆ-e maˇ gaˬ tuˬ, yawˇ hta‸ hkʼa caw zuhˇ lo ngaˬ gʼo‸ pa ko piˇ taˍ tuˬ yoˬ.

7Yawˇ ha‸ ve chaw hui geh yawˇ kʼai gaˬ tuˬ gʼaˇ hte‸ coˇ caˇ ve htawˇ, yawˇ tawˆ-e gaˬ tuˬ ve maˇ heˆ. Chaw oˇ ve teˇ hpaˍ hta‸ yawˇ ca nyi ve htawˇ, mawˬ tuˬ ve maˇ heˆ. Oˇ htaˇ yawˇ lehˬ, Ngaˬ hpawˇ geh kʼo‸-e shaˍ. Yawˇ geh gʼa chehˇ ve lehˬ, choˬ kaˬ gʼa chehˇ ve a‸ kehˉ da‸ leuˉ ve yoˬ, teh‸ kʼoˆ tuˬ yoˬ.

8Yawˇ hta‸ caˇ tuˬ dawˬ tuˬ, a pehˉ meuˇ gʼuiˬ leh naˍ manˇ piˇ chehˇ ve lehˬ, ngaˬ hpeh‸ ve hta‸ yawˇ maˇ dawˇ shiˍ puiˉ. Baˍlaˆ gʼuiˬsha hta‸ yawˇ tanˇ piˇ chehˇ ve hpu, shi, mawˇ jeˬ teˇ hpaˍ lehˬ, ngaˬ yawˇ hta‸ piˇ taˍ ve mawˇ teˇ hpaˍ hpeh‸ ve yoˬ.

9Chi hta‸ pa taw, caˬ gʼeu‸ ve awˬ yanˇ gaˬ la htaˇ, ngaˬ yawˇ hta‸ hkʼa piˇ taˍ peuˬ ve caˇ tuˬ dawˬ tuˬ, a pehˉ meuˇ gʼuiˬ leh veu‸ tuˬ kʼaˇ tuˬ hkʼa peu-eˬ ve hta‸ ngaˬ kʼaw‸ yuˬ hkʼaw‸ tuˬ yoˬ.

10Yawˇ ha‸ ve chaw teˇ hpaˍ mehˆ gʼuˇ suhˍ, yawˇ ve veu‸ kʼaˇ teˇ hpaˍ hta‸ ngaˬ kʼehˆ baˬ leh, awˬ kʼu nyi hpeh‸ la piˇ tuˬ yoˬ. Chaw teˇ gʼaˇ ka‸ yawˇ hta‸ ngaˬ ve la‸ sheh hkʼaw ponˬ piˇ gʼa tuˬ ve maˇ heˆ.

11Teˇ hkʼaw‸ teˇ pawˆ, teˇ ha pa teˇ pawˆ, teˇ shinˉ teˇ pawˆ yawˇ te chehˇ ve pawehˇ leh, yawˇ oˉ kʼoˍ pui chehˇ ve awˬ ceuˬ hkʼa peu-eˬ hta‸ ngaˬ te luˬ piˇ tuˬ yoˬ.

12Yawˇ ha‸ ve chaw teˇ hpaˍ awˬ pon yawˇ kanˉ te piˇ taˍ ve pa taw, yawˇ hui yawˇ hta‸ piˇ taˍ ve a pehˉ meuˇ te teˇ hpaˍ leh, maˉ nawˆ cehˬ teˇ hpaˍ hta‸ ngaˬ te luˬ piˇ tuˬ yoˬ. Yawˇ ve a pehˉ meuˇ hko leh iˉ shiˍ hko teˇ hpaˍ hta‸ ngaˬ hteunˍ lonˉ hpeh‸ la piˇ tuˬ yoˬ. Haiˬ ve to nuˇ to shaˆ teˇ hpaˍ lehˬ, hko oˇ ve teˇ hpaˍ hta‸ te luˬ te sheˆ piˇ tuˬ yoˬ.

13Yawˇ ngaˬ hta‸ leunˇ baˬ taˉ leh, Baˍlaˆ gʼuiˬsha hta‸ ca tanˇ ve hta‸ pa taw maˇ kʼoˆ, hpu hkʼeun shi hkʼeun tcuhˉ veu leh yawˇ ha‸ ve chaw hkʼaˇ suh gʼuiˇ kʼai peuˬ ve hta‸ pa taw maˇ kʼoˆ, ngaˬ yawˇ hta‸ ciˍ yanˍ piˇ tuˬ yoˬ, teh‸ Gʼuiˬsha kʼoˆ ve yoˬ.

14Chi hta‸ pa taw, ngaˬ yawˇ hta‸ heh puiˉ hkʼaw lo teˇ pawˆ kʼaw‸ shiˍ kʼai piˇ leh, ha‸ pehnˇ ve tawˇ yaw piˇ ve hkʼaw, yawˇ ngaˬ hta‸ kʼaw‸ ha‸ la tuˬ, ngaˬ kʼaw‸ te piˇ tuˬ yoˬ.

15Yawˇ ve a pehˉ meuˇ hko ngaˬ yawˇ hta‸ kʼaw‸ hkʼaw‸ piˇ leh, Aˍhkawˍ teh‸ kʼoˆ ve lawˬ hkʼo‸ hta‸ dawˇ law kuiˬ yehˬ miˉ kʼaw‸ hpeh‸ la piˇ tuˬ yoˬ. Oˇ kaˬ lo yawˇ lehˬ, aˬ sho-eˬ yaˇ nehˬ hpeh‸ leh Eˇjiˇtu‸ mvuhˇmiˬ hkʼaw tawˆ la chehˇ htaˇ hkʼa shuˍ, ngaˬ ve tawˇ hta‸ kʼaw‸ na yuˬ tuˬ yoˬ.

16Oˇ ve hkʼaw‸ nawˉ, yawˇ lehˬ ngaˬ hta‸ yawˇ ve awˬ hpawˇ teh‸ kʼaw‸ kʼoˆ leh, ngaˬ hta‸ yawˇ ve Baˍlaˆ gʼuiˬsha teh‸ kʼaw‸ kʼoˆ tuˬ ve maˇ heˆ.

17Baˍlaˆ gʼuiˬsha ve awˬ meh ngaˬ yawˇ hta‸ teˇ pawˆ ka‸ kʼaw‸ kuˬ piˇ lawˬ tuˬ ve maˇ heˆ.

18Oˇ htaˇ, haiˬ ve to nuˇ to shaˆ teˇ hpaˍ leh ngaˆ teˇ hpaˍ, ngaˬ ve chaw hta‸ maˇ gʼa ya‸ tuˬ ngaˬ to nuˇ to shaˆ oˇ ve teˇ hpaˍ hta‸ ka ti‸ te piˇ tuˬ yoˬ. Mvuhˇmiˬ hkʼaw cawˬ ve la‸ caˉ teˇ hpaˍ hta‸ ngaˬ yuˬ baˬ piˇ leh, ngaˬve chaw teˇ hpaˍ hta‸ gawˬ lehˍ chehˇ piˇ lawˬ tuˬ yoˬ.

19Iˉsaˍreˍlaˆ-oˬ, nawˬ hta‸ ngaˬ ve awˬ miˇ ma te tcuh laˇ tuˬ yoˬ. Ngaˬ lehˬ nawˬ hta‸ ka ti‸ yeˬ tuˬ yoˬ. Ha‸ pehnˇ ve leh ha kʼaˉ puiˉ ve awˬ ceuˬ, ngaˬ nawˬ hta‸ maˍ laˇ tuˬ yoˬ. Nawˬ lehˬ co co taiˍ taiˍ ngaˬ ve hpeh‸ tuˬ yoˬ.

20Ngaˬ lehˬ ka ti‸ yeˬ leh, nawˬ lehˬ ngaˬ ve hpeh‸ tuˬ yoˬ. Ngaˬ lehˬ Gʼuiˬsha hpeh‸ ve hta‸ nawˬ gʼa shiˍ tuˬ yoˬ.

21Oˇ htaˇ, ngaˬ ve chaw ceuˬ Yeˍsaˍreˍlaˆ ve bon lawˬ hkawˇ hta‸ ngaˬ kʼaw‸ yaw hkʼaw‸ piˇ leh, miˬguiˬ hkʼoˆ mvuhˇ yeˬ ya‸ la piˇ tuˬ yoˬ.

22Oˇ htaˇ, miˬguiˬ lehˬ awˬ shiˍ awˬ nu teˇ hpaˍ, a pehˉ meuˇ shiˍ leh shaˍlonˍ shiˍ teˇ hpaˍ kʼaw‸ naw‸ la tuˬ yoˬ.

23Ngaˬ ve chaw teˇ hpaˍ hta‸ mvuhˇmiˬ hkʼaw kʼaw‸ chehˇ tcuh leh, yawˇ hui hta‸ uiˍ la maˇ la piˇ tuˬ yoˬ. Maˇ ha‸ ve teh‸ kʼoˆ ve chaw teˇ hpaˍ leh, Ngaˬ ve chaw maˇ heˆ teh‸ kʼoˆ ve chaw teˇ hpaˍ hta‸ ngaˬ ha kʼaˉ piˇ tuˬ yoˬ. Nawˬ lehˬ ngaˬ ve chaw hpeh‸ ve yoˬ, teh‸ ngaˬ kʼoˆ tuˬ yoˬ. Nawˬ lehˬ ngaˬ hui ve Gʼuiˬsha hpeh‸ ve yoˬ, teh‸ yawˇ hui ngaˬ hta‸ kʼaw‸ yaw hkʼaw‸ laˇ tuˬ yoˬ.

← Chapter 1 Jump to: Chapter 3 →