Hosea 14

Lahu Bible Edited © Thailand Bible Society and Bible Society of Myanmar, 2010, 2020.

← Chapter 13 Jump to:

1Iˉsaˍreˍlaˆ chaw hui-oˬ, nawˬ hui ve Gʼuiˬsha geh lo kʼaw‸ hpfuhˆ kʼaw‸ la-o. Awˬ lawn kʼo, nawˬ hui ve venˇbaˆ teˇ hpaˍ lehˬ nawˬ hui hta‸ hkui htiˇ poˬ paiˍ piˇ lawˬ ve yoˬ.

2Gʼuiˬsha geh kʼaw‸ hpfuhˆ kʼaw‸ la leh, Gʼuiˬsha geh bon chi hkʼe lawˬ-o‸. Ngaˬ hui ve venˇbaˆ hkʼa peu-eˬ hta‸ hpehˇ hkʼa laˇ leh, ngaˬ hui ve bon lawˬ hkawˇ hta‸ a ciˉ na yuˬ laˇ-oˆ. Oˇ hkʼe te laˇ ve kʼo, ngaˬ hui ka ti‸ cawˬ taˍ ve hkʼe ngaˬ hui nawˬ hta‸ chiˇ mvuh tuˬ yoˬ.

3Aˍsuˇriˆ chaw hui lehˬ ngaˬ hui hta‸ ponˬ laˇ maˇ gʼa. Iˉ mvuhˇ lawˬ teˇ hpaˍ htawˇ, ngaˬ hui hta‸ ha‸ shaˉ laˇ maˇ gʼa. Nawˬ lehˬ ngaˬ hui ve Gʼuiˬsha hpeh‸ ve yoˬ, teh‸ shaˉ ho‸ teˇ hpaˍ hta‸ ngaˬ hui teˇ pawˆ ka‸ maˇ kʼaw‸ kʼoˆ piˇ-o. Gʼuiˬsha-oˬ, nawˬ lehˬ gʼaˇ va kuiˬ maˇ cawˬ ve chaw hui hta‸ ha kʼaˉ puiˉ ve hta‸ ngaˬ hui yonˍ ve yoˬ, teh‸ Gʼuiˬsha geh bon lawˬ-o‸.

4Gʼuiˬsha kʼoˆ ve, Ngaˬ ve chaw teˇ hpaˍ hta‸ ngaˬ geh kʼaw‸ shiˍ yuˬ tuˬ yoˬ. Nyi ma awˬ tawˬ hkʼa gaˬ, ngaˬ yawˇ hui hta‸ ha‸ tuˬ yoˬ. Ngaˬ yawˇ hui hta‸ nyi ma kʼaw‸ zuhˆ tuˬ ve maˇ heˆ.

5Iˉsaˍreˍlaˆ chaw hui awˬ pon, ngaˬ lehˬ goˇ jaˇ ve mvuhˇmiˬ hkʼaw lo ya‸ la chehˇ ve mvuhˇ yeˬ hkʼe hpeh‸ tuˬ yoˬ. Yawˇ hui lehˬ suhˉ veˆ hkʼa shuˍ veˆ la leh, Leˍbaˍnonˍ mvuhˇmiˬ hkʼaw cawˬ ve suhˆ cehˬ teˇ hpaˍ hkʼa shuˍ yeˬ chehˇ tuˬ yoˬ.

6Yawˇ hui lehˬ a sha‸ te‸ chehˇ leh kʼaw‸ uiˍ la da‸ la tuˬ yoˬ. Yawˇ hui lehˬ shaˍlonˍ cehˬ hkʼa shuˍ nyi sha jaˇ tuˬ yoˬ. Leˍbaˍnonˍ mvuhˇmiˬ hkʼaw cawˬ ve htawˇ cehˬ teˇ hpaˍ hkʼa shuˍ yawˇ hui awˬ pe‸ hawnˉ jaˇ tuˬ yoˬ.

7Yawˇ hui lehˬ ngaˬ ha‸ shaˉ ve awˬ hawˉ lo teˇ pawˆ gʼa kʼaw‸ chehˇ tuˬ yoˬ. Yawˇ hui lehˬ hko hkʼa shuˍ nyi sha jaˇ leh, a peuˉ meuˇ hko hkʼa shuˍ awˬ shiˍ maˇ maˇ naw‸ la tuˬ yoˬ. Yawˇ hui lehˬ Leˍbaˍnonˍ mvuhˇmiˬ hkʼaw cawˬ ve a pehˉ meuˇ gʼuiˬ hkʼa shuˍ awˬ meh bvuhˬ jaˇ tuˬ yoˬ.

8Iˉsaˍreˍlaˆ chaw hui lehˬ, shaˉ ho‸ teˇ hpaˍ hta‸ oˉ kʼoˍ kʼaw‸ pui tuˬ ve maˇ heˆ. Yawˇ hui ve bon lawˬ hkawˇ teˇ hpaˍ hta‸ ngaˬ kʼaw‸ yaw hkʼaw‸ piˇ leh, yawˇ hui hta‸ ha‸ shaˉ piˇ tuˬ yoˬ. Hkʼaˬ htaˆ ka‸ nawˉ lehˍ cawˬ ve suhˆ cehˬ hkʼa shuˍ, ngaˬ yawˇ hui hta‸ aˉ guiˬ ha baˬ piˇ leh, yawˇ hui hta‸ hkʼaˬ htaˆ ka‸ awˬ bon na‸ piˇ tuˬ yoˬ, teh‸ Gʼuiˬsha kʼoˆ ve yoˬ.

9Cuˇ yiˍ cawˬ ve chaw teˇ hpaˍ lehˬ, choˬ kaˬ lo bvuh‸ taˍ ve awˬ ceuˬ teˇ hpaˍ hta‸ na yuˬ leh, nyi ma hkʼaw tawnˇ taˍ piˇ-oˆ. Awˬ lawn kʼo, Gʼuiˬsha ve ya‸ kʼaw teˇ hpaˍ lehˬ, hteˇ jaˇ cawˇ jaˇ ve yoˬ. Hteˇ ve cawˇ ve chaw teˇ hpaˍ lehˬ, awˬ ceuˬoˇ ve teˇ hpaˍ hta‸ na yuˬ ve pa taw, a sha‸ gʼa te‸ chehˇ ve yoˬ. Ya‸ hkʼaˇ, venˇbaˆ yaˇ teˇ hpaˍ lehˬ, awˬ ceuˬ oˇ ve teˇ hpaˍ hta‸ maˇ shawˍ maˇ caˆ te ve pa taw, hkui htiˇ poˬ paiˍ ve yoˬ.

← Chapter 13 Jump to: