Hosea 5

Lahu Bible Edited © Thailand Bible Society and Bible Society of Myanmar, 2010, 2020.

← Chapter 4 Jump to: Chapter 6 →

1Nawˬ hui paw hkuˇ teˇ hpaˍ-oˬ, chi hta‸ na sheˍ. Iˉsaˍreˍlaˆ chaw hui-oˬ, nawˬ hui htawˇ hkʼa deh‸ na taˍ-o‸. Awˬ me‸ awˬ hponˇ cawˬ ve jawˇmawˇ teˇ hpaˍ-oˬ, nawˬ hui htawˇ na sheˍ. Nawˬ hui lehˬ, hteˇ ve cawˇ ve hkʼaw suhˉ jehˬ piˇ cawˇ ve chaw teˇ hpaˍ hpeh‸ ve yoˬ. Ya‸ hkʼaˇ, nawˬ hui oˇ hkʼe maˇ te ve pa taw, suhˉ jehˬ ve teˇ ceuˬ nawˬ hui awˬ hkʼoˆ gaˬ la tuˬ yoˬ. Awˬ lawn kʼo, nawˬ hui lehˬ Miˆsaˍpaˍ hkʼaw leh, Taˍbawˍ hkʼaw hkʼoˆ lo htaw taˍ ve va hta‸ shuˍ ve yoˬ.

2Chi hkʼoˆ ka‸ nawˬ hui lehˬ, Aˍhkeˇshaˍ venˇ hkʼaw lo naˉ chaweh duˇ taˍ ve miˬ kʼoˍ hkʼa shuˍ hpeh‸ ve pa taw, nawˬ hui hkʼa peu-eˬ hta‸ ngaˬ ciˍ yanˍ tuˬ yoˬ.

3Iˉsaˍreˍlaˆ chaw hui lehˬ, aˬ hto‸ ma hta‸ shuˍ da‸ ve hta‸ ngaˬ shiˍ chehˇ ve yoˬ. Yawˇ hui lehˬ, ngaˬ mehˆ gʼuˇ suhˍ lo ca va‸ taˍ gʼa tuˬ ve maˇ heˆ. Yawˇ hui lehˬ, ka ti‸ maˇ yeˬ ve chaw hpeh‸ leh, ngaˬ hta‸ oˉ kʼoˍ pui maˇ keunˍ ve chaw teˇ hpaˍ hpeh‸ ve yoˬ, teh‸ Gʼuiˬsha kʼoˆ ve yoˬ.

4Yawˇ hui haiˬ ve kanˉ hta‸ ceh tiˉ te chehˇ ve pa taw, yawˇ hui ve Gʼuiˬsha geh kʼaw‸ la maˇ gaˬ ve yoˬ. Yawˇ hui shaˉ ho‸ hta‸ ceh tiˉ oˉ kʼoˍ pui ve pa taw, Gʼuiˬsha hta‸ yawˇ hui maˇ shiˍ.

5Iˉsaˍreˍlaˆ chaw hui lehˬ caˆ muiˍ puiˉ jaˇ leh, caˆ muiˬ puiˉ ve nyi ma oˇ ve yawˇ hui hta‸ venˇbaˆ kʼaw‸ taˍ chehˇ ve yoˬ. Yawˇ hui te taˍ ve venˇbaˆ lehˬ, yawˇ hui hta‸ hkui htiˇ poˬ paiˍ piˇ lawˬ leh, Yuˇda‸ chaw hui htawˇ yawˇ hui geh teˇ geh paiˍ ve yoˬ.

6Yawˇ hui lehˬ, nuˇ, yawˬ teˇ hpaˍ yuˬ leh Gʼuiˬsha hta‸ ca tuˉ tanˇ piˇ ve htawˇ, te‸ chiˉ awˬ bon maˇ gʼa. Yawˇ hui Gʼuiˬsha hta‸ ca maˇ mawˬ. Awˬ lawn kʼo, yawˇ yawˇ hui hta‸ baˬ taˉ peuˬ ve pa taw yoˬ.

7Yawˇ hui lehˬ Gʼuiˬsha hta‸ ka ti‸ maˇ yeˬ ve chaw hpeh‸ leh, yawˇ hui ve yaˇ teˇ hpaˍ htawˇ yawˇ hta‸ maˇ caˉ da‸. Chi hta‸ pa taw, yawˇ hui ve mvuhˇmiˬ luˬ kʼai sheˆ kʼai tuˬ yoˬ.

8Giˇbaˍ venˇ hkʼaw lo ma‸ bawˆ tuˬ behˬ heh ma meuˆ loˬ. Raˍmaˆ venˇ hkʼaw lo htawˇ, duiˆ-ehˍ shaˇ-ehˍ te chehˇ loˬ. Beˍteˍlaˆ venˇ hkʼaw lo ma‸ bawˆ tuˬ kuˬ chehˇ taˍ loˬ. Beˍyaˍmenˍ chaw hui-oˬ, ma‸ bawˆ kuiˬ lo kʼai loˬ.

9Ciˍ yanˍ tuˬ ve awˬ nyi gaˬ la chehˇ leh, Iˉsaˍreˍlaˆ chaw hui ve mvuhˇmiˬ luˬ kʼai tuˬ yoˬ. Iˉsaˍreˍlaˆ chaw hui-oˬ, awˬ tehˬ awˬ na chi hkʼe hpeh‸ la tuˬ yoˬ.

10Gʼuiˬsha kʼoˆ ve, Yuˇda‸ awˬ hoˉ awˬ naˬ teˇ hpaˍ lehˬ Iˉsaˍreˍlaˆ chaw hui hta‸ ca bawˆ leh, yawˇ hui ve mvuhˇmiˬ hta‸ hiˉ yuˬ peuˬ ve pa taw, ngaˬ nyi ma zuhˆ jaˇ ve yoˬ. Chi hta‸ pa taw, iˉ kaˆ uiˍ taˆ la ve hkʼa shuˍ ngaˬ yawˇ hui hta‸ ciˍ yanˍ piˇ tuˬ yoˬ.

11Iˉsaˍreˍlaˆ lehˬ, fawˉ mehˍ ve hta‸ gʼa hkanˍ chehˇ ve yoˬ. Yawˇ hui lehˬ te‸ chiˉ ga laˇ maˇ gʼa ve chaw hui hta‸ gʼaˇ ca va ve pa taw, yawˇ ve mvuhˇmiˬ mehˉ kʼai ve yoˬ.

12Iˉsaˍreˍlaˆ hta‸ ngaˬ te luˬ te sheˆ piˇ leh, luˬ ve sheˆ ve teˇ ceuˬ Yuˇda‸ chaw hui awˬ hkʼoˆ ngaˬ gaˬ la piˇ tuˬ yoˬ.

13Iˉsaˍreˍlaˆ lehˬ yawˇ hkʼaˬ ma naˬ jaˇ chehˇ ve hta‸ gʼa mawˬ leh, Yuˇda‸ htawˇ yawˇ ve naˬ kuiˬ hta‸ gʼa mawˬ ve teˇ yanˇ, Iˉsaˍreˍlaˆ lehˬ Aˍsuˇriˆ jawˇmawˇ hta‸ ca peun tuˬ yoˬ. Ya‸ hkʼaˇ, yawˇ lehˬ yawˇ hui ve naˬ kuiˬ hta‸ gu na-e piˇ gʼa tuˬ ve maˇ heˆ.

14Ngaˬ lehˬ laˇ caˬ shiˉ hkʼa shuˍ, Iˉsaˍreˍlaˆ leh Yuˇda‸ chaw hui hta‸ che‸ tuˬ yoˬ. Ngaˬ yawˇ hui hta‸ tzuh‸ suhˍ leh baˬ taˉ tuˬ yoˬ. Ngaˬ yawˇ hui hta‸ gʼawˬ kʼai chehˇ ve teˇ yanˇ, chaw teˇ gʼaˇ ka‸ yawˇ hui hta‸ ga piˇ gʼa tuˬ ve maˇ heˆ.

15Yawˇ hui te ya‸ taˍ ve hkʼe gʼa hkanˍ leh, yawˇ hui ngaˬ hta‸ kʼaw‸ ca la htaˇ hkʼa gaˬ, ngaˬ ve chaw teˇ hpaˍ hta‸ ngaˬ chiˇ baˬ taˍ tuˬ yoˬ. Tu‸ hkanˍ ve hta‸ yawˇ hui gʼa hkanˍ ve teˇ yanˇ, yawˇ hui ngaˬ hta‸ kʼaw‸ ca la tuˬ yoˬ, teh‸ Gʼuiˬsha kʼoˆ ve yoˬ.

← Chapter 4 Jump to: Chapter 6 →