Mark 12

Lahu Bible Edited © Thailand Bible Society and Bible Society of Myanmar, 2010, 2020.

1Oˇ htaˇ, yawˇ yawˇ hui hta‸ tawˇ pa haˉ teˇ hpaˍ te maˍ piˇ leh kʼoˆ ve, Chaw teˇ gʼaˇ lehˬ, a pehˉ meuˇ hko te leh ti taˍ peuˬ hkʼaw‸ nawˉ, hkʼa caw zuhˇ ko taˍ leh, a pehˉ meuˇ shiˍ nyiˉ kuiˬ duˇ taˍ ve yoˬ. Shaw kuiˬ yehˬ mvuh ve hta‸ htawˇ te leh, hko te paˍ teˇ hpaˍ hta‸ ngaˍ piˇ taˉ leh, awˬ kaˍ awˬ nu mvuhˇ miˬ lo yawˇ kʼai ve yoˬ.

2Awˬ yanˇ gaˬ la ve teˇ yanˇ, hko oˇ ve awˬ hkʼaw lo a pehˉ meuˇ shiˍ teˇ hpaˍ hta‸ gʼa tuˬ, hko te paˍ teˇ hpaˍ geh awˬ ceˬ teˇ gʼaˇ hta‸ yawˇ kʼai tcuh ve yoˬ.

3Yawˇ hui yawˇ hta‸ yuˬ tiˍ taˍ leh dawˆ peuˬ hkʼaw‸ nawˉ, awˬ kʼawˇ lehˍ kʼo‸-e peu ve yoˬ.

4Awˬ hkʼaw‸ nawˉ teˇ pawˆ, awˬ kaˍ awˬ nu awˬ ceˬ teˇ gʼaˇ hta‸ yawˇ yawˇ hui geh kʼai tcuh ve yoˬ. Yawˇ hui yawˇ ve oˉ kʼoˍ hta‸ dawˆ hkʼaw sheˬ leh, hkʼa mvuhˇ hkʼa na te piˇ ve yoˬ.

5Peuˬ leh, yawˇ awˬ kaˍ awˬ nu awˬ ceˬ teˇ gʼaˇ hta‸ kʼaw‸ kʼai tcuh ve teˇ yanˇ, yawˇ hui yawˇ hta‸ tiˇ pehˍ ve yoˬ. Awˬ kaˍ awˬ nu awˬ ceˬ laiˉ gʼaˇ hta‸ yawˇ kʼaw‸ kʼai tcuh ve htawˇ, teˇ hpaˍ hpaˍ hta‸ yawˇ hui dawˆleh, teˇ hpaˍ hpaˍ hta‸ yawˇ hui tiˇ pehˍ ve yoˬ.

6Yawˇ ha‸ jaˇ ve yaˇ paˍ ceh tiˉ yawˇ geh cawˬ taˉ ve yoˬ. Ngaˬ ve yaˇ paˍ hta‸ yawˇ hui yawˆ yan tuˬ yoˬ teh‸ yawˇ kʼoˆ leh, awˬ leh meuˇ teˇ pawˆ yawˇ ve yaˇ paˍ hta‸ yawˇ hui geh kʼai tcuh ve yoˬ.

7Ya‸ hkʼaˇ, hko te paˍ teˇ hpaˍ kʼoˆ ve, Chaw chi lehˬ, awˬ shinˉ gʼa shehˍ hpaˇ hpeh‸ ve yoˬ. Laˬ-o‸, yawˇ hta‸ tiˇ pehˍ-a veuˬ. Oˇ hkʼe te ve kʼo, yawˇ ve awˬ shinˉ hta‸ ngaˬ hui gʼa tuˬ yoˬ teh‸, teˇ gʼaˇ leh teˇ gʼaˇ kʼoˆ da‸ ve yoˬ.

8Oˇ htaˇ, yawˇ hui yawˇ hta‸ yuˬ leh tiˇ pehˍ peuˬ hkʼaw‸ nawˉ hko awˬ baˬ hpawˇ lo chiˇ baˬ ve yoˬ.

9Hkʼe te leh, hko awˬ shehˍ hpaˇ hkʼaˬ hkʼe te piˇ tuˬ le. Yawˇ laˬ leh hko te paˍ teˇ hpaˍ hta‸ tiˇ pehˍ peuˬ hkʼaw‸ nawˉ, hko oˇ ve awˬ kaˍ awˬ nu chaw teˇ hpaˍ hta‸ kʼaw‸ ngaˍ piˇ tuˬ yoˬ.

10Yehˬ kawˍ shehˍ hpaˇ hui baˬ taˍ ve haˉ pui shiˍ lehˬ, awˬ hkuiˉ puiˍ awˬ ceˍ kʼaweh‸ lo kawˍ taˍ ve haˉ pui shiˍ hpeh‸ la peuˬ.

11Chi lehˬ, Jawˇmawˇ Gʼuiˬsha te ve kanˉ hpeh‸ leh, ngaˬ hui mehˆ gʼuˇ suhˍ anˇ tuˬ hpeh‸ ve yoˬ, teh‸ Li‸ hpu awˬ hkʼaw lo nawˬ hui maˇ gʼaw jaw laˇ teh‸ kʼoˆ piˇ ve yoˬ.

12Yawˇ hui yawˇ hta‸ hpeh yuˬ gaˇ ve yoˬ. Awˬ lawn kʼo, tawˇ pa haˉ chi yawˇ yawˇ hui awˬ lawn kʼoˆ chehˇ ve hta‸ yawˇ hui shiˍ ve yoˬ. Ya‸ hkʼaˇ, chaw awˬ moˍ lonˉ hta‸ kawˆ ve pa taw, yawˇ hui yawˇ hta‸ hpaˆ da‸ taˉ leh tawˆ kʼai ve yoˬ.

13Yeˍsuˆ tawˇ yaw ve awˬ hkʼaw lo, hkʼaˬ hkʼe te leh yawˇ hta‸ tawˇ yaw ya‸ piˇ lawˬ tuˬ, yawˇ hui lehˬ Hpaˍriˍsehˇ teˇ hpaˍ hpaˍ leh Heˍroˆ chaw teˇ hpaˍ hpaˍ hta‸ yawˇ geh kʼai tcuh ve yoˬ.

14Oˇ htaˇ yawˇ hui laˬ leh kʼoˆ ve, Saˍ la‸-oˬ, nawˬ lehˬ hteˇ ve cawˇ ve chaw hpeh‸ leh, chaw teˇ gʼaˇ hta‸ ka‸ nawˬ maˇ kawˆ ve hta‸ ngaˬ hui shiˍ ve yoˬ. Chaw yaˇ ve mehˆ hpfuhˇ hta‸ nawˬ maˇ nyi leh Gʼuiˬsha ve ya‸ kʼaw hta‸ hteˇ lehˍ maˍ piˇ ve yoˬ. Jawˇmawˇ Kehˉsaˍ hta‸ a moˇ keu piˇ cawˇ laˇ, maˇ keu piˇ cawˇ laˇ.

15Ngaˬ hui gʼa keu piˇ tuˬ laˇ, maˇ gʼa keu piˇ tuˬ laˇ teh‸, yawˇ hta‸ na nyi ve yoˬ. Yawˇ lehˬ, yawˇ hui heˍ puiˉ ve chaw hpeh‸ ve teh‸ shiˍ leh, Nawˬ hui aˬ hto‸ ma te ngaˬ hta‸ lawˇ nyi ve le. Ngaˬ gʼa nyi tuˬ, hpu teˇ hteh‸ ngaˬ geh yuˬ laˬ-o‸ teh‸, yawˇ hui hta‸ kʼoˆ piˇ ve yoˬ.

16Hkʼe te leh, yawˇ hui yuˬ laˬ ve yoˬ. Yawˇ yawˇ hui hta‸ kʼoˆ piˇ ve, A shu ve awˬ han, a shu ve awˬ meh cawˬ le teh‸ na nyi htaˇ, Jawˇmawˇ Kehˉsaˍ ve yoˬ teh‸, yawˇ hui kʼaw‸ kʼoˆ piˇ ve yoˬ.

17Yeˍsuˆ yawˇ hui hta‸ kʼaw‸ kʼoˆ piˇ ve, Jawˇmawˇ Kehˉsaˍ ve mawˇ jawˇmawˇ Kehˉsaˍ hta‸ piˇ-oˆ. Gʼuiˬsha ve mawˇ Gʼuiˬsha hta‸ piˇ-oˆ teh‸ kʼoˆ htaˇ, yawˇ hui yawˇ hta‸ anˇ jaˇ ve yoˬ.

18Oˇ ve hkʼaw‸ nawˉ, kʼaw‸ te‸ tu la ve maˇ cawˬ teh‸ kʼoˆ ve Saˍduˆkehˇ chaw teˇ hpaˍ yawˇ geh laˬ leh kʼoˆ ve,

19Saˍ la‸-oˬ, Moˉseˍ ngaˬ hui awˬ pon chi hkʼe bvuh‸ taˍ ve, Chaw teˇ gʼaˇ ve awˬ viˉ paˍ yaˇ maˇ cawˬ leh suh ve kʼo, awˬ nyi paˍ teˇ gʼaˇ lehˬ yawˇ ve awˬ miˇ ma hta‸ kʼaw‸ heuˆ leh awˬ viˉ paˍ awˬ pon awˬ ceuˬ awˬ hkʼaˇ gʼa cawˬ piˇ ve yoˬ teh‸ bvuh‸ taˍ ve yoˬ.

20Ponˬ laˬ htaˇ, awˬ viˉ awˬ nyi suhˍ gʼaˇ cawˬ ve yoˬ. Awˉ lawˉ teˇ gʼaˇ lehˬ, awˬ miˇ ma hta‸ heuˆ leh, yaˇ maˇ cawˬ sheˍ htaˇ suh ve yoˬ.

21Nyi gʼaˇ teˇ gʼaˇ htawˇ, yaˇ miˇ oˇ ve hta‸ heuˆ leh, yaˇ maˇ cawˬ sheˍ htaˇ suh ve yoˬ. Shehˆ gʼaˇ teˇ gʼaˇ htawˇ oˇ ve hkʼa shuˍ shuˍ yoˬ.

22Chi hkʼa shuˍ shuˍ awˬ viˉ awˬ nyi suhˍ gʼaˇ hkʼa gaˬ yaˇ maˇ cawˬ taˉ ve yoˬ. Yawˇ hui hkʼa peu-eˬ suh peuˬ hkʼaw‸ nawˉ, yaˇ miˇ oˇ ve htawˇ suh ve yoˬ.

23Kʼaw‸ te‸ tu la ve teˇ yanˇ, yaˇ miˇ oˇ ve hkʼaˬ ve teˇ gʼaˇ ve awˬ miˇ ma hpehˬ tuˬ le. Awˬ lawn kʼo, yawˇ hui suhˍ gʼaˇ yaˇ miˇ oˇ ve hta‸ heuˆ peuˬ ve yoˬ teh‸ na nyi ve yoˬ.

24Yeˍsuˆ yawˇ hui hta‸ kʼaw‸ kʼoˆ piˇ ve, Li‸ hpu hta‸ ka‸, Gʼuiˬsha ve kanˇ paˆ hta‸ ka‸ nawˬ hui maˇ shiˍ ve pa taw, nawˬ hui dawˇ ya‸ ve maˇ heˆ laˇ.

25Awˬ lawn kʼo, suh ve chaw hui kʼaw‸ te‸ tu la ve teˇ yanˇ, awˬ hpawˇ awˬ miˇ heuˆ da‸ ve maˇ kʼoˆ, ka piˇ ve maˇ kʼoˆ, maˇ te. Mvuhˇ naw ma hkʼoˆ chehˇ ve mvuhˇ naw ma tcuh yaˇ hui hkʼe hpeh‸ tuˬ yoˬ.

26Suh ve chaw hui kʼaw‸ te‸ tu la ve awˬ lawn Gʼuiˬsha Moˉseˍ hta‸ kʼoˆ piˇ taˍ ve hkʼe, Moˉseˍ bvuh‸ taˍ ve li‸ awˬ hkʼaw lo nawˬ hui maˇ gʼaw jaw laˇ. Aˉ chuˇ buiˇ awˬ lawn bvuh‸ taˍ ve teˇ tawn awˬ hkʼaw lo, Ngaˬ lehˬ Aˍbraˍhanˍ ve Gʼuiˬsha, Iˉcaˆ ve Gʼuiˬsha leh Yaˍkoˆ ve Gʼuiˬsha hpeh‸ ve yoˬ teh‸, Gʼuiˬsha yawˇ hta‸ kʼoˆ piˇ ve yoˬ.

27Yawˇ lehˬ, suh ve chaw hui ve Gʼuiˬsha hpeh‸ ve maˇ heˆ. Te‸ chehˇ ve chaw hui ve Gʼuiˬsha hpeh‸ ve yoˬ. Nawˬ hui dawˇ ya‸ jaˇ ve yoˬ teh‸ kʼoˆ piˇ ve yoˬ.

28Oˇ htaˇ, li‸ bvuh‸ paˍ teˇ gʼaˇ laˬ leh yawˇ hui tawˇ gʼawˬ da‸ chehˇ ve hta‸ gʼa kaˇ htaˇ, Yeˍsuˆ yawˇ hui hta‸ hkʼa deh‸ kʼaw‸ yaw hkʼaw‸ piˇ ve hta‸ gʼa shiˍ leh, Awˬliˇtawˇhkawˇ hkʼa peu-eˬ awˬ hkʼaw lo hkʼaˬ ve teˇ hkawˇ uiˍ leuˉ ve le teh‸ yawˇ hta‸ na nyi ve yoˬ.

29Yeˍsuˆ yawˇ hta‸ kʼoˆ piˇ ve, Uiˍ leuˉ ve teˇ maˬ lehˬ, Iˉsaˍreˍlaˆ chaw teˇ hpaˍ-oˬ, na sheˍ. Ngaˬ hui ve Jawˇmawˇ Gʼuiˬsha lehˬ, yawˇ teˇ gʼaˇ ceh tiˉ Jawˇmawˇ hpeh‸ ve yoˬ.

30Nawˬ ve nyi ma hkʼa peu-eˬ, nawˬ ve co ha hkʼa peu-eˬ, nawˬ ve dawˇ hkʼaˇ hkʼa peu-eˬ leh nawˬ ve awˬ gʼaˇ awˬ shaˉ hkʼa peu-eˬ nawˬ ve Jawˇmawˇ Gʼuiˬsha hta‸ gʼa ha‸ ve yoˬ.

31Nyiˇ hkawˇ teˇ hkawˇ lehˬ, Nawˬ awˬ to hta‸ ha‸ ve hkʼe, nawˬ awˬ paˇ awˬ kui chehˇ ve chaw hta‸ gʼa ha‸ ve yoˬ. Awˬliˇtawˇhkawˇ chi nyiˇ hkawˇ a‸ kehˉ uiˍ ve maˇ cawˬ teh‸ kʼoˆ ve yoˬ.

32Li‸ bvuh‸ paˍ oˇ ve kʼaw‸ kʼoˆ ve, Cawˇ ve yoˬ, Saˍ la‸-oˬ. Gʼuiˬsha teˇ gʼaˇ tiˉ cawˬ leh, yawˇ maˇ heˆ kʼo awˬ kaˍ awˬ nu Gʼuiˬsha maˇ cawˬ ve teh‸ nawˬ kʼoˆ ve lehˬ hteˇ jaˇ ve yoˬ.

33Chi hkʼoˆ ka‸, nyi ma hkʼa peu-eˬ, cuˇ yiˍ maˍ yiˍ hkʼa peu-eˬ, awˬ gʼaˇ awˬ shaˉ hkʼa peu-eˬ yawˇ hta‸ ha‸ leh, a shu yawˇ awˬ to hta‸ ha‸ ve hkʼe awˬ paˇ awˬ kui chehˇ ve chaw hta‸ ha‸ ve lehˬ, aˬ miˍ tuˉ tanˇ ve hkʼa peu-eˬ leh tanˇ tuˬ hkʼa peu-eˬ a‸ kehˉ uiˍ ve yoˬ teh‸, yawˇ hta‸ kʼoˆ piˇ ve yoˬ.

34Yawˇ hkʼa deh‸ dawˇ nyi leh yaw hkʼaw‸ ve hta‸ Yeˍsuˆ gʼa mawˬ htaˇ, Nawˬ lehˬ Gʼuiˬsha ve mvuhˇmiˬ hta‸ maˇ vuiˇ da‸ teh‸ yawˇ hta‸ kʼoˆ piˇ ve yoˬ. Oˇ ve hkʼaw‸ nawˉ chaw teˇ gʼaˇ ka‸ yawˇ hta‸ kʼaw‸ na nyi maˇ haˆ ve yoˬ.

35Yeˍsuˆ bon yehˬ lonˉ awˬ hkʼaw lo maˍ piˇ chehˇ htaˇ, yawˇ teˇ pawˇ kʼaw‸ kʼoˆ ve, Hkri‸ lehˬ Daˍviˆ ve Yaˇ hpu yoˬ teh‸, aˬ hto‸ ma te li‸ bvuh‸ paˍ teˇ hpaˍ kʼoˆ ve le.

36Da‸ ve kehˬ ve Awˬ ha hpu Daˍviˆ hta‸ dawˇ pawnˍ piˇ ve awˬ hkʼaw lo yawˇ kʼoˆ ve, Jawˇmawˇ Gʼuiˬsha lehˬ ngaˬ ve Jawˇmawˇ hta‸ kʼoˆ piˇ ve, Nawˬ ve canˇ paˍ teˇ hpaˍ hta‸ nawˬ ve hkui sheh awˬ hawˉ lo ngaˬ taˍ htaˇ hkʼa gaˬ ngaˬ ve la‸ sha paˉ lo mui chehˇ-oˆ, teh‸ kʼoˆ taˍ ve yoˬ.

37Daˍviˆ awˬ to yawˇ hta‸ Jawˇmawˇ teh‸ kʼoˆ ve kʼo, hkʼaˬ hkʼe te leh yawˇ ve yaˇ hpu hpeh‸ tuˬ ve le teh‸ na nyi ve yoˬ. Chaw awˬ moˍ lonˉ oˇ ve lehˬ, yawˇ ve tawˇ hkawˇ hta‸ ha lehˬ ha kʼa na yuˬ ve yoˬ.

38Yawˇ maˍ piˇ chehˇ ve awˬ hkʼaw lo yawˇ teˇ pawˆ kʼaw‸ kʼoˆ ve, Li‸ bvuh‸ paˍ teˇ hpaˍ hta‸ shaˍ ti‸ te-o. Yawˇ hui lehˬ, aˉ po‸ zuhˬ ve hta‸ deh leh ca te toˇ gaˇ ve yoˬ. Tcuh hkʼaw lo shu yawˇ hui hta‸ yawˆ yan laˇ ve hta‸ maˇ kʼoˆ,

39bon yehˬ awˬ hkʼaw lo awˬ me‸ awˬ hponˇ cawˬ ve mui hkʼawˇ hta‸ maˇ kʼoˆ, hti caˇ hti dawˬ kuiˬ lo awˬ me‸ awˬ hponˇ cawˬ ve mui kuiˬ hta‸ maˇ kʼoˆ, yawˇ hui heuˆ gaˇ ve yoˬ.

40Yawˇ hui lehˬ, mehˇchawˇma ve yehˬ hta‸ hiˉ yuˬ leh, venˇbaˆ maˇ gʼa tawˆ la tuˬ maw chaweh bon lawˬ ve yoˬ. Shu a‸ kehˉ leuˉ leh uiˍ jaˇ ve ciˍ yanˍ ve hta‸ yawˇ hui gʼa hkanˍ tuˬ yoˬ teh‸ kʼoˆ ve yoˬ.

41Oˇ htaˇ, hpu tanˇ keu kuiˬ awˬ gʼuˇ suhˍ teˇ hpawˇ lo yawˇ mui chehˇ leh, chaw chi ma ve hpu tanˇ keu kuiˬ lo hpu keu ve hta‸ nyi chehˇ ve yoˬ. Paw sha ve chaw laiˉ gʼaˇ hpu maˇmaˇ keu ve yoˬ.

42Oˇ htaˇ haˍ gʼawˇ ve mehˇchawˇma teˇ gʼaˇ laˬ leh, kuiˇ peh‸ shanˍ ehˉ nyiˇ maˬ keu ve yoˬ. Peh‸ shanˍ ehˉ oˇ ve nyiˇ maˬ lehˬ, teˇ peh‸ hpfuhˇ ceh tiˉ cawˬ ve yoˬ.

43Yeˍsuˆ yawˇ ve awˬ la‸ gʼawˇ hui hta‸ kuˬ yuˬ leh yawˇ hui hta‸ kʼoˆ piˇ ve, Ngaˬ nawˬ hui hta‸ awˬ tehˬ awˬ na kʼoˆ laˇ ve, hpu tanˇ keu kuiˬ lo keu ve chaw hkʼa peu-eˬ a‸ kehˉ haˍ gʼawˇ ve mehˇchawˇma chi teˇ gʼaˇ lehˬ leuˉ leh keu maˇ ve yoˬ.

44Awˬ lawn kʼo, yawˇ hui cawˬ maˇ jaˇ ve awˬ hkʼaw lo yuˬ tawˆ leh keu ve yoˬ. Ya‸ hkʼaˇ, yaˇ miˇ chi teˇ gʼaˇ lehˬ, haˍ gʼawˇ jaˇ ve awˬ hkʼaw lo, yawˇ ve a sha‸ hu tuˬ hkʼa cawˬ ve hkʼa peu-eˬ hta‸ yuˬ tawˆ leh keu ve yoˬ teh‸ kʼoˆ ve yoˬ.

← Chapter 11 Jump to: Chapter 13 →