Mark 8

Lahu Bible Edited © Thailand Bible Society and Bible Society of Myanmar, 2010, 2020.

← Chapter 7 Jump to: Chapter 9 →

1Awˬ yanˇ oˇ ve awˬ hkʼaw lo, chaw awˬ moˍ uiˍ jaˇ ve kʼaw‸ hpawnˬ la leh, yawˇ hui geh caˇ tuˬ maˇ cawˬ. Hkʼe te leh Yeˍsuˆ yawˇ ve awˬ la‸ gʼawˇ hui hta‸ kuˬ hpawnˬ leh kʼoˆ piˇ ve,

2Chaw awˬ moˍ lonˉ chi hta‸ ngaˬ ha kʼaˉ ve yoˬ. Awˬ lawn kʼo, yawˇ hui ngaˬ geh chehˇ ve shehˆ nyi gaˬ peuˬ leh, caˇ tuˬ te‸ chiˉ maˇ cawˬ.

3Yawˇ hui awˍ meu‸ jehˇ chehˇ leh ngaˬ yawˇ hui hta‸ kʼo‸-e tcuh ve kʼo, ya‸ kʼaw kʼaˉ lo gʼaˇ nuˇ jaˇ tuˬ yoˬ. Yawˇ hui teˇ hpaˍ hpaˍ vuiˇ kuiˬ lo laˬ ve yoˬ teh‸, yawˇ hui hta‸ kʼoˆ piˇ ve yoˬ.

4Yawˇ ve awˬ la‸ gʼawˇ teˇ hpaˍ lehˬ, Choˬ kaˬ heh puiˉ hkʼaw lo chaw chi ma ve hta‸ hkʼa bvuhˆ gʼa caˍ piˇ tuˬ hkaoˍmonˇ hkʼaˬ lo ca gʼa tuˬ ve le teh‸, yawˇ hta‸ kʼaw‸ kʼoˆ piˇ ve yoˬ.

5Nawˬ hui geh hkaoˍ monˉ hkʼaˬ nyiˇ diˬ cawˬ le teh‸ Yeˍsuˆ yawˇ hui hta‸ na nyi htaˇ, Hkaoˍmonˇ suhˍ diˬ cawˬ ve yoˬ teh‸, yawˇ hui kʼaw‸ kʼoˆ piˇ ve yoˬ.

6Oˇ htaˇ, chaw awˬ moˍ lonˉ miˬ chaˇ hkʼoˆ mui tuˬ yawˇ tawˇ piˇ ve yoˬ. Yawˇ hkaoˍ monˇ oˇ ve suhˍ diˬ hta‸ yuˬ leh bon hta‸ chiˇ mvuh peuˬ hkʼaw‸ nawˉ hkʼeh‸ ve yoˬ. Peuˬ leh, hkaoˍmonˇ oˇ ve chaw awˬ moˍ lonˉ mehˆ gʼuˇ suhˍ ca chiˇ teh piˇ tuˬ, yawˇ ve awˬ la‸ gʼawˇ teˇ hpaˍ hta‸ yawˇ piˇ leh, yawˇ hui htawˇ chaw awˬ moˍ lonˉ mehˆ gʼuˇ suhˍ ca chiˇ teh piˇ ve yoˬ.

7Yawˇ hui geh ngaˇ ehˉ ka‸ a ciˉ cawˬ ve yoˬ. Awˬ bon hta‸ chiˇ mvuh peuˬ hkʼaw‸ nawˉ, Shu mehˆ gʼuˇ suhˍ ca chiˇ teh piˇ-oˆ teh‸, Yeˍsuˆ kʼoˆ piˇ ve yoˬ.

8Yawˇ hui hkʼa bvuhˆ caˇ peuˬ hkʼaw‸ nawˉ, caˇ leuˉ ve teˇ hpaˍ hta‸ yawˇ hui kʼaw‸ gʼawˆ ve teˇ yanˇ, suhˍ hkʼawˍ lawˇ hkʼa biˇ gʼa ve yoˬ.

9Caˇ ve chaw aˬ laˬ hkʼe awˇ hinˉ gʼaˇ cawˬ ve yoˬ. Peuˬ leh, yawˇ yawˇ hui hta‸ kʼo‸-e tcuh ve yoˬ.

10Teˇ cawˬ haˉ yawˇ ve awˬ la‸ gʼawˇ hui geh haw lo‸ kʼoˍ hkʼaw lo‸-e leh, Daˍlaˍmaˍnuˆ mvuhˇmiˬ lo ciˇ kʼai ve yoˬ.

11Oˇ htaˇ, Hpaˍriˍsehˇ teˇ hpaˍ laˬ leh, Yeˍsuˆ hta‸ tawˇ gʼawˬ da‸ ve yoˬ. Yawˇ hta‸ lawˇ nyi tuˬ, mvuhˇ naw ma ve awˬ heˆ yawˇ geh lawˬ ve yoˬ.

12Yawˇ ve nyi ma hkʼaw hkʼanˇ leh kʼoˆ ve, Chaw chi teˇ co lehˬ, aˬ hto‸ ma pa taw awˬ heˆ hta‸ lawˬ ve le. Ngaˬ nawˬ hui hta‸ awˬ tehˬ awˬ na kʼoˆ laˇ ve, chaw chi teˇ co hta‸ awˬ heˆ teˇ ceuˬ ka‸ maˇ maˍ piˇ teh‸ kʼoˆ ve yoˬ.

13Oˇ htaˇ, Yeˍsuˆ yawˇ hui hta‸ hpaˆ da‸ taˉ leh, haw lo‸ kʼoˍ awˬ hkʼaw lo kʼaw‸ lo‸-e leh gʼuiˬ po coˇ paˉ lo ciˇ kʼai ve yoˬ.

14Awˬ la‸ gʼawˇ teˇ hpaˍ hkaoˍmonˇ yuˬ kʼai tuˬ leunˇ taˉ leh, haw lo‸ kʼoˍ awˬ hkʼaw yawˇ hui hkaoˍmonˇ teˇ diˬ tiˉ cawˬ ve yoˬ.

15Yeˍsuˆ yawˇ hui hta‸ shaˍ ti‸ piˇ leh kʼoˆ ve, Hpaˍriˍsehˇ ve diˇ leh jawˇmawˇ Heˍroˆ ve diˇ hta‸ shaˍ ti‸ te leh jaw kʼai-o teh‸ kʼoˆ piˇ ve yoˬ.

16Yawˇ hui lehˬ, Ngaˬ hui hkaoˍmonˇ maˇ cawˬ ve pa taw chi hkʼe kʼoˆ ve yoˬ teh‸, teˇ gʼaˇ leh teˇ gʼaˇ kʼoˆ da‸ ve yoˬ.

17Yeˍsuˆ awˬ lawn oˇ ve hta‸ shiˍ leh yawˇ hui hta‸ kʼoˆ piˇ ve, Nawˬ hui hkaoˍmonˇ maˇ yuˬ laˬ ve awˬ lawn hta‸ aˬ hto‸ ma pa taw kʼoˆ da‸ ve le. Chi beu‸ hkʼa gaˬ nawˬ hui maˇ dawˇ gaˬ maˇ dawˇ shiˍ sheˍ leh laˇ. Nawˬ hui nyi ma heh chehˇ sheˍ leh laˇ.

18Nawˬ hui mehˆ shiˍ cawˬ ka‸ maˇ mawˬ leh laˇ. Naˍ paw cawˬ ka‸ maˇ kaˇ leh laˇ. Nawˬ hui maˇ dawˇ nawˇ leh laˇ.

19Ngaˬ hkaoˍmonˇ ngaˇ diˬ hta‸ hkʼeh‸ leh, chaw ngaˇ hinˉ gʼaˇ hta‸ caˍ piˇ peuˬ hkʼaw‸ nawˉ, nawˬ hui awˬ leuˉ hkʼaˬ nyiˇ hkʼawˍ lawˇ kʼaw‸ gʼawˆ gʼa ve le teh‸ na nyi htaˇ, Teˇ chi nyiˇ hkʼawˍ lawˇ gʼa ve yoˬ teh‸, yawˇ hui yawˇ hta‸ kʼaw‸ kʼoˆ piˇ ve yoˬ.

20Ngaˬ hkaoˍmonˇ suhˍ diˬ hta‸ yuˬ leh, chaw awˇ hinˉ gʼaˇ hta‸ caˍ piˇ peuˬ hkʼaw‸ nawˉ, nawˬ hui awˬ leuˉ hkʼaˬ nyiˇ hkʼawˍ lawˇ kʼaw‸ gʼawˆ gʼa ve le teh‸ kʼaw‸ na nyi htaˇ, suhˍ hkʼawˍ lawˇ gʼa ve yoˬ teh‸, yawˇ hui yawˇ hta‸ kʼaw‸ kʼoˆ piˇ ve yoˬ.

21Peuˬ leh yawˇ yawˇ hui hta‸, Chi beu‸ ka‸ nawˬ hui maˇ dawˇ shiˍ sheˍ leh laˇ teh‸ kʼoˆ piˇ ve yoˬ.

22Oˇ ve hkʼaw‸ nawˉ, yawˇ hui Behˇsehˇdaˆ venˇ lo gaˬ ve yoˬ. Chaw teˇ hpaˍ mehˆ cuˉ paˍ teˇ gʼaˇ hta‸ yawˇ geh shiˍ laˬ leh, yawˇ hta‸ htawˇ tuˬ Yeˍsuˆ hta‸ lawˬ hkawˉ ve yoˬ.

23Yawˇ mehˆ cuˉ paˍ ve la‸ sheh hta‸ gʼawˬ leh hkʼaˆ awˬ baˬ lo sheh tawˆ-e ve yoˬ. Yawˇ ve mehˆ shiˍ hta‸ ciˉ gʼuiˇ hpe‸ keu piˇ peuˬ hkʼaw‸ nawˉ, yawˇ awˬ hkʼoˆ la‸ sheh taˍ leh, Nawˬ teˇ ceuˬ ceuˬ mawˬ laˇ teh‸ yawˇ hta‸ na nyi ve yoˬ.

24Chaw oˇ ve chiˇ nyi leh, Ngaˬ chaw teˇ hpaˍ htaˬ mawˬ ve yoˬ. Yawˇ hui lehˬ suhˆ cehˬ hta‸ shuˍ ve ka‸, ya‸ kʼaw juˇ kʼai chehˇ ve yoˬ teh‸ kʼoˆ ve yoˬ.

25Yawˇ ve mehˆ shiˍ hta‸ Yeˍsuˆ la‸ sheh teˇ pawˆ kʼaw‸ htawˇ ve yoˬ. Chaw oˇ ve lehˬ teˇ pawˆ hkʼa deh‸ kʼaw‸ nyi htaˇ, mehˆ shiˍ da‸ la leh hkʼa peu-eˬ hta‸ hkʼa deh‸ kehˬ lehˍ mawˬ ve yoˬ.

26Oˇ htaˇ Yeˍsuˆ yawˇ hta‸, Hkʼaˆ chi awˬ hkʼaw lo taˇ lo‸-e teh‸ kʼoˆ piˇ leh, yawˇ ve aˉ hkʼaw lo kʼo‸-e tcuh ve yoˬ.

27Yeˍsuˆ leh yawˇ ve awˬ la‸ gʼawˇ teˇ hpaˍ Hpiˇliˇpuˆ Kehˉsaˍriˆ mvuhˇmiˬ awˬ hkʼaw lo cawˬ ve hkʼaˆ teˇ hpaˍ lo kʼai ve yoˬ. Ya‸ kʼaw kʼaˉ lo kʼai chehˇ htaˇ, yawˇ ve awˬ la‸ gʼawˇ teˇ hpaˍ hta‸ yawˇ na nyi ve, Shu ngaˬ hta‸ a shu hpeh‸ ve teh‸ kʼoˆ ve le.

28Awˬ la‸ gʼawˇ teˇ hpaˍ kʼaw‸ kʼoˆ ve, Chaw teˇ hpaˍ hpaˍ nawˬ hta‸ baˆtiˆsaˬ piˇ paˍ Yoˇhanˬ yoˬ teh‸ kʼoˆ ve, teˇ hpaˍ hpaˍ Eˇliˇya‸ yoˬ teh‸ kʼoˆ ve, peuˬ leh teˇ hpaˍ hpaˍ Gʼuiˬsha ve tcuh kaˍ paˍ teˇ gʼaˇ gʼaˇ hpeh‸ ve yoˬ teh‸, nawˬ hta‸ kʼoˆ ve yoˬ.

29Oˇ htaˇ Yeˍsuˆ lehˬ, Nawˬ hui teˇ hpaˍ ngaˬ hta‸ a shu hpeh‸ ve teh‸ kʼoˆ ve le teh‸ yawˇ hui hta‸ na nyi ve teˇ yanˇ, Nawˬ lehˬ Hkri‸ yoˬ teh‸, Peˍtruˆ kʼaw‸ kʼoˆ piˇ ve yoˬ.

30Yawˇ awˬ lawn chaw teˇ gʼaˇ hta‸ ka‸ maˇ gʼa hto piˇ tuˬ, Yeˍsuˆ yawˇ hui hta‸ tawˇ hehnˇ chaweh piˇ taˍ ve yoˬ.

31Oˇ htaˇ chaw yaˇ ve Yaˇ hpu lehˬ, laiˉ ceuˬ hta‸ gʼa tu‸ gʼa hkanˍ tuˬ ve awˬ lawn yawˇ yawˇ hui hta‸ maˍ piˇ ve yoˬ. Awˬ hoˉ chaw mawˇ teˇ hpaˍ, paw hkuˇ lonˉ teˇ hpaˍ leh li‸ bvuh‸ paˍ teˇ hpaˍ yawˇ hta‸ chiˇ baˬ leh tiˇ pehˍ tuˬ ve awˬ lawn maˇ kʼoˆ, shehˆ nyi teˇ nyi gaˬ kʼo yawˇ kʼaw‸ te‸ tu la tuˬ ve awˬ lawn maˇ kʼoˆ, yawˇ hui hta‸ maˍ piˇ ve yoˬ.

32Awˬ lawn chi yawˇ hkʼa tawˍ lehˆ kʼoˆ maˍ piˇ ve yoˬ. Hkʼe te leh, Peˍtruˆ yawˇ hta‸ shiˍ veu leh deˇ ve yoˬ.

33Yeˍsuˆ hpfuhˆ nyi leh yawˇ ve awˬ la‸ gʼawˇ hui hta‸ mawˬ htaˇ Peˍtruˆ hta‸ kʼoˆ piˇ ve, saˍtanˍ-oˬ, ngaˬ awˬ hkʼaw‸ nawˉ hpawˇ lo jiˆ kʼai-o. Awˬ lawn kʼo, nawˬ ve dawˇ hkʼaˇ lehˬ, Gʼuiˬsha ve dawˇ hkʼaˇ maˇ heˆ. Chaw yaˇ ve dawˇ hkʼaˇ hpeh‸ ve yoˬ teh‸ kʼoˆ leh yawˇ hta‸ deˇ ve yoˬ.

34Oˇ htaˇ, chaw awˬ moˍ lonˉ leh yawˇ ve awˬ la‸ gʼawˇ hui hta‸ yawˇ kuˬ yuˬ leh kʼoˆ piˇ ve, Chaw teˇ gʼaˇ gʼaˇ ngaˬ hkʼaˇ suh laˬ gaˇ ve kʼo, a shu yawˇ ve a loˍ hta‸ baˬ taˉ leh, a shu yawˇ ve la‸ ka hta‸ taˆ leh ngaˬ hkʼaˇ suh laˬ-o‸.

35Awˬ lawn kʼo, hkʼaˬ ve chaw teˇ gʼaˇ maˇ kʼoˆ, a shu yawˇ ve a sha‸ hta‸ ponˬ piˇ gaˇ ve kʼo, yawˇ ve a sha‸ shonˇ tuˬ yoˬ. Ya‸ hkʼaˇ, hkʼaˬ ve chaw teˇ gʼaˇ maˇ kʼoˆ, ngaˬ awˬ pon leh ha lehˬ ve bon hkawˇ awˬ pon yawˇ ve a sha‸ shonˇ ve kʼo, yawˇ ve a sha‸ hta‸ ponˬ piˇ tuˬ yoˬ.

36Chaw teˇ gʼaˇ gʼaˇ miˬguiˬ hkʼa peu-eˬ hta‸ gʼa htawˇ, yawˇ ve a sha‸ shonˇ kʼai ve kʼo, aˬ hto‸ ma awˬ bon cawˬ le.

37Chaw teˇ gʼaˇ gʼaˇ, a shu yawˇ ve a sha‸ awˬ pon aˬ hto‸ ma teˇ ceuˬ hta‸ yuˬ leh pa gʼa tuˬ le.

38Awˬ lawn kʼo, chaw hkʼaˬ ve teˇ gʼaˇ maˇ kʼoˆ, te ya‸ puiˉ leh venˇbaˆ te puiˉ ve chaw chi teˇ co awˬ hkʼaw lo ngaˬ hta‸ leh ngaˬ ve tawˇ hkawˇ hta‸ ya‸ taw ve kʼo, chaw yaˇ ve Yaˇ hpu lehˬ, yawˇ Awˬ pa ve awˬ me‸ awˬ hponˇ awˬ hkʼaw lo da‸ ve kehˬ ve mvuhˇ naw ma tcuh yaˇ hui geh teˇ geh laˬ ve teˇ yanˇ, chaw oˇ ve hta‸ ngaˬ ya‸ taw tuˬ yoˬ.

← Chapter 7 Jump to: Chapter 9 →