Mark 4

Lahu Bible Edited © Thailand Bible Society and Bible Society of Myanmar, 2010, 2020.

← Chapter 3 Jump to: Chapter 5 →

1Teˇ pawˆ gʼuiˬ po paˇ lo Yeˍsuˆ kʼaw‸ maˍ piˇ chehˇ htaˇ, chaw awˬ moˍ lonˉ yawˇ geh hpawnˬ la ve pa taw, gʼuiˬ po hkʼaw cawˬ ve haw lo‸ kʼoˍ hkʼaw yawˇ ca lo‸ mui ve yoˬ. Chaw awˬ moˍ lonˉ hkʼa peu-eˬ lehˬ, gʼuiˬ pfuhˍ paˇ lo chehˇ taˍ ve yoˬ.

2Oˇ htaˇ, yawˇ tawˇ pa haˉ te leh, awˬ lawn laiˉ ceuˬ maˍ piˇ ve yoˬ. Yawˇ maˍ piˇ ve awˬ hkʼaw lo chi hkʼe kʼoˆ ve,

3Na sheˍ. Awˬ yawˇ sheˍ paˍ teˇ gʼaˇ awˬ yawˇ ca sheˍ ve yoˬ.

4Yawˇ sheˍ ve teˇ yanˇ, awˬ yawˇ teˇ hpaˍ hpaˍ ya‸ kʼaw hpuiˇ lo ce leh, ngaˆ teˇ hpaˍ gʼawˆ caˇ sheˬ ve yoˬ.

5Awˬ yawˇ teˇ hpaˍ hpaˍ miˬ shaˍ paˇ kuiˬ haˉ pui de lo ce leh, miˬ shaˍ maˇ naˉ ve pa taw, teˇ cawˬ haˉ yeˬ la ve yoˬ.

6Ya‸ hkʼaˇ, awˬ yeˬ oˇ ve awˬ geu maˇ naw‸ ve pa taw, mvuhˇ nyi tawˆ la htaˇ, haw jaˇ chiˆ jaˇ leh nawˍ kʼai goˇ kʼai ve yoˬ.

7Awˬ yawˇ teˇ hpaˍ hpaˍ aˉ chuˇ de lo ce ve yoˬ. Aˉ chuˇ buiˇ uiˍ la leh awˬ yeˬ hta‸ hoˆ ve pa taw, awˬ shiˍ maˇ naw‸.

8Peuˬ leh awˬ yawˇ teˇ hpaˍ hpaˍ miˬ hkuiˇ da‸ kuiˬ lo ce ve yoˬ. Awˬ yeˬ yeˬ la uiˍ la leh, awˬ shiˍ maˇ maˇ naw‸ la ve yoˬ. Awˬ shiˍ shehˆ chi pun, hkaw‸ chi pun leh teˇ ha pun naw‸ maˇ la ve yoˬ.

9Kaˇ tuˬ naˍ paw cawˬ ve chaw hui hkʼa deh‸ na-o teh‸ yawˇ kʼoˆ ve yoˬ.

10Awˬ hkʼaw‸ nawˉ shu maˇ chehˇ ve teˇ yanˇ, yawˇ awˬ hkʼaˇ suh kʼai ve chaw leh tcuh yaˇ teˇ chi nyiˇ gʼaˇ, yawˇ hta‸ tawˇ pa haˉ teˇ hpaˍ awˬ lawn ca na nyi la ve yoˬ.

11Yeˍsuˆ yawˇ hui hta‸ kʼoˆ piˇ ve, Gʼuiˬsha ve mvuhˇmiˬ awˬ lawn faˉ taˍ ve awˬ ceuˬ teˇ hpaˍ hta‸ nawˬ hui shiˍ hpeh‸ ve yoˬ. Ya‸ hkʼaˇ, awˬ baˬ hpawˇ chehˇ ve chaw hui hta‸ lehˬ, hkʼa peu-eˬ tawˇ pa haˉ tiˉ gʼa te maˍ piˇ ve yoˬ.

12Aˬ hto‸ ma pa taw le teh‸ kʼoˆ kʼo, Yawˇ hui nyi ve ka‸ nyi maˇ mawˬ. Yawˇ hui kaˇ ve ka‸ na maˇ gʼa. Chi hkʼe maˇ heˆ kʼo, yawˇ hui kʼaw‸ hpfuhˆ kʼaw‸ la leh yawˇ hui ve venˇbaˆ hpehˇ hkʼa tuˬ yoˬ teh‸ kʼoˆ ve yoˬ.

13Yeˍsuˆ yawˇ hui hta‸ kʼaw‸ kʼoˆ piˇ ve, Tawˇ pa haˉ chi ve hta‸ nawˬ hui na maˇ gʼa leh laˇ. Na maˇ gʼa ve kʼo, tawˇ pa haˉ hkʼa peu-eˬ hta‸ hkʼaˬ hkʼe te na gʼa tuˬ le.

14Awˬ yawˇ sheˍ paˍ lehˬ, bon hkawˇ hta‸ sheˍ ve yoˬ.

15Ya‸ kʼaw hpuiˇ lo bon hkawˇ sheˍ ve awˬ lawn lehˬ, bon hkawˇ hta‸ kaˇ htaˇ teˇ cawˬ haˉ Saˍtanˍ laˬ leh, yawˇ hui awˬ hkʼaw lo sheˍ taˍ ve bon hkawˇ hta‸ yuˬ tawˆ ve hta‸ kʼoˆ ve yoˬ.

16Haˉ pui de lo sheˍ ve awˬ lawn lehˬ, bon hkawˇ hta‸ gʼa kaˇ leh, teˇ cawˬ haˉ ha lehˬ ha kʼa ha‸ yuˬ ve hta‸ kʼoˆ ve yoˬ.

17Ya‸ hkʼaˇ, yawˇ hui awˬ geu maˇ naw‸ ve hta‸ pa taw, teˇ tcuhˉ teˇ jaw ceh tiˉ te‸ ve yoˬ. Awˬ hkʼaw‸ nawˉ bon hkawˇ hta‸ pa taw dawˇ haˍ gaˇ haˍ leh fawˉ ve mehˍ ve hta‸ gʼa hpuˇ da‸ htaˇ, teˇ cawˬ haˉ yawˇ hui luˬ kʼai ve yoˬ.

18Aˉ chuˇ de lo sheˍ ve awˬ lawn lehˬ, yawˇ hui bon hkawˇ hta‸ kaˇ ve htawˇ,

19chi miˬguiˬ dawˇ haˍ tuˬ teˇ hpaˍ, hpu shi mawˇ jeˬ hta‸ ha lehˬ ve teˇ hpaˍ leh, awˬ kaˍ awˬ nu awˬ ceuˬ teˇ hpaˍ hta‸ sheˉ lai ve teˇ hpaˍ lehˬ, bon hkawˇ hta‸ hoˆ taˍ ve pa taw, awˬ shiˍ naw‸ la maˇ hpeh‸ ve hta‸ kʼoˆ ve yoˬ.

20Miˬ hkuiˇ da‸ kuiˬ lo sheˍ ve awˬ lawn lehˬ, bon hkawˇ hta‸ kaˇ leh ha‸ yuˬ ve pa taw, awˬ shiˍ shehˆ chi pun, hkaw‸ chi pun, teˇ ha pun naw‸ la ve chaw hta‸ kʼoˆ ve yoˬ teh‸ kʼoˆ piˇ ve yoˬ.

21Peuˬ leh Yeˍsuˆ yawˇ hui hta‸ kʼoˆ piˇ ve, Kawˆ faiˇ tuˉ leh hkʼawˍ lawˇ tcuhˍ mvuh‸ taˍ tuˬ laˇ. Maˇ heˆ kʼo, ku-iˍ hawˉ teh taˍ tuˬ laˇ. Kawˆ faiˇ taˍ kuiˬ awˬ hkʼoˆ lo teh taˍ tuˬ maˇ heˆ laˇ.

22Awˬ lawn kʼo, hkʼa faˉ taˍ ve awˬ ceuˬ teˇ hpaˍ hkʼa tawˍ lehˆ tawˆ la tuˬ yoˬ. Shu hta‸ maˇ shiˍ tcuh ve awˬ ceuˬ teˇ hpaˍ htawˇ, awˬ gʼeuˆ ba kuiˬ lo tawˆ la tuˬ yoˬ.

23Kaˇ tuˬ naˍ paw cawˬ ve chaw a shu htawˇ maˇ kʼoˆ, hkʼa deh‸ na-o.

24Peuˬ leh, yawˇ yawˇ hui hta‸ kʼoˆ piˇ ve, Nawˬ hui hkʼa gʼa kaˇ ve teˇ hpaˍ hta‸ shaˍ ti‸ taˍ-o‸. Nawˬ hui kawˬ piˇ ve hkʼa shuˍ shuˍ, shu nawˬ hui hta‸ kʼaw‸ kawˬ laˇ tuˬ ve awˬ hkʼoˆ, awˬ leuˉ ka‸ kʼaw‸ htehˍ laˇ tuˬ yoˬ.

25Awˬ lawn kʼo, cawˬ ve chaw hta‸ kʼaw‸ htehˍ piˇ tuˬ yoˬ. Maˇ cawˬ ve chaw geh, yawˇ hkʼa cawˬ ve teˇ hpaˍ hta‸ kʼaw‸ yuˬ tawˆ sheˬ tuˬ yoˬ teh‸ kʼoˆ piˇ ve yoˬ.

26Yeˍsuˆ teˇ pawˆ kʼaw‸ kʼoˆ ve, Gʼuiˬsha ve mvuhˇmiˬ lehˬ, chaw teˇ gʼaˇ heh hkʼaw lo awˬ yawˇ sheˍ ve hta‸ shuˍ ve yoˬ.

27Yawˇ mvuhˇ hpeu‸ zuh‸ leh mvuhˇ shawˉ tu la ve yoˬ. Awˬ yawˇ oˇ ve hkʼaˬ hkʼe te yeˬ la uiˍ la ve hta‸ yawˇ maˇ shiˍ.

28Miˬguiˬ yawˇ hkʼaˇ yawˇ awˬ shiˍ naw‸ la piˇ ve yoˬ. Awˉ lawˉ awˬ yeˬ yeˬ la leh, awˬ hkʼaw‸ nawˉ awˬ nu, awˬ hkʼaw‸ nawˉ awˬ nu awˬ hkʼaw lo awˬ shiˍ naw‸ la maˬ la ve yoˬ.

29Meh la leh gʼeu‸ ve awˬ yanˇ gaˬ la ve pa taw, awˬ shehˍ hpaˇ teˇ cawˬ haˉ law‸ kʼawˉ yuˬ leh gʼeu‸ ve yoˬ teh‸ Yeˍsuˆ kʼoˆ ve yoˬ.

30Peuˬ leh yawˇ kʼoˆ ve, Gʼuiˬsha ve mvuhˇmiˬ hta‸ aˬ hto‸ ma yuˬ leh tehˆ da‸ nyi tuˬ le. Tawˇ pa haˉ hkʼaˬ ve teˇ ceuˬ yehˇ leh tehˆ maˍ tuˬ le.

31Gʼuiˬsha ve mvuhˇmiˬ lehˬ, gʼawˇ caˉ yawˇ hta‸ shuˍ ve yoˬ. Awˬ yawˇ oˇ ve hta‸ heh hkʼaw lo sheˍ ve teˇ yanˇ, miˬguiˬ hkʼoˆ hkʼa cawˬ ve awˬ yawˇ hkʼa peu-eˬ a‸ kehˉ i ve htawˇ,

32sheˍ peuˬ hkʼaw‸ nawˉ awˬ yeˬ yeˬ la uiˍ la leh, gʼawˇ hpa‸ mvuhˬ naweh hkʼa peu-eˬ a‸ kehˉ uiˍ ve yoˬ. Awˬ kʼaˉ teˇ hpaˍ uiˍ la leh, mvuhˇ hpe lo poˬ ve ngaˆ teˇ hpaˍ aˉ gʼuiˬ ha baˬ kuiˬ lo gʼaˇ jehˇ hpeh‸ ve yoˬ teh‸ Yeˍsuˆ kʼoˆ ve yoˬ.

33Yawˇ hui na gʼa puiˉ ve hkʼe ceh, chi hkʼe ve tawˇ pa haˉ maˇ maˇ Yeˍsuˆ yawˇ hui hta‸ bon hkawˇ maˍ piˇ ve yoˬ.

34Tawˇ pa haˉ maˇ yehˇ kʼo, yawˇ yawˇ hui hta‸ maˇ maˍ piˇ. Ya‸ hkʼaˇ, yawˇ ve awˬ la‸ gʼawˇ hui ceh tiˉ chehˇ ve teˇ yanˇ, yawˇ yawˇ hui hta‸ awˬ lawn chi teˇ hpaˍ hkʼa peu-eˬ hkʼa deh‸ kʼaoˍ maˍ piˇ ve yoˬ.

35Oˇ teˇ nyi mvuhˇ hpeu‸ la htaˇ, Coˇ paˉ hpawˇ lo hkanˍ kʼai-a veuˬ teh‸, Yeˍsuˆ yawˇ hui hta‸ kʼoˆ piˇ ve yoˬ.

36Hkʼe te leh chaw awˬ moˍ lonˉ hta‸ yawˇ hui hpaˆ da‸ taˉ leh, Yeˍsuˆ chehˇ taˍ ve hkʼe haw lo‸ kʼoˍ hkʼaw yawˇ hui yawˇ hta‸ shiˍ kʼai ve yoˬ. Awˬ kaˍ awˬ nu haw lo‸ kʼoˍ teˇ hpaˍ ka‸ yawˇ hui geh kʼai ve yoˬ.

37Oˇ htaˇ, mvuhˇ haw lonˉ meuˆ la leh, gʼuiˬ baˇ teˇ hpaˍ haw lo‸ kʼoˍ hta‸ htinˍ lo‸ la ve pa taw, haw lo‸ kʼoˍ awˬ hkʼaw lo iˉ kaˆ biˇ la chehˇ ve yoˬ.

38Yeˍsuˆ lehˬ haw lo‸ kʼoˍ awˬ mehˍ hpawˇ lo uˉ gehˇ tcuhˉ leh, zuh‸ muiˉ kʼa chehˇ ve yoˬ. Hkʼe te leh, awˬ la‸ gʼawˇ teˇ hpaˍ yawˇ hta‸ ca nawˍ piˇ leh, Saˍ la‸-oˬ, ngaˬ hui luˬ kʼai tuˬ ve hta‸ nawˬ a ciˉ ka‸ maˇ dawˇ nyi leh laˇ teh‸ kʼoˆ piˇ ve yoˬ.

39Yeˍsuˆ tu la leh mvuhˇ haw hta‸ deˇ piˇ leh, gʼuiˬ po hta‸, Ta‸ iˉ gawˬ lehˍ chehˇ-oˆ teh‸ kʼoˆ piˇ ve yoˬ. Mvuhˇ haw dehˬ kʼai leh, ta‸ iˉ gawˬ lehˍ chehˇ sheˬ ve yoˬ.

40Oˇ htaˇ Yeˍsuˆ kʼoˆ ve, Nawˬ hui aˬ hto‸ ma pa taw kawˆ ve le. Nawˬ hui yonˍ ve nyi ma maˇ cawˬ leh laˇ teh‸, yawˇ hui hta‸ na nyi ve yoˬ.

41Yawˇ hui kawˆ jaˇ leh, teˇ gʼaˇ leh teˇ gʼaˇ kʼoˆ da‸ ve, Chi hpaˇ a shu le. Mvuhˇ haw leh gʼuiˬ po yawˇ ve hkawˇ hta‸ na yuˬ ve law teh‸ kʼoˆ da‸ ve yoˬ.

← Chapter 3 Jump to: Chapter 5 →