Mark 6 — Lahu Bible Edited © Thailand Bible Society and Bible Society of Myanmar, 2010, 2020.

1Yeˍsuˆ oˇ kaˬ lo tawˆ kʼai leh yawˇ ve mvuhˇmiˬ lo kʼaw‸ gaˬ la ve yoˬ. Yawˇ ve awˬ la‸ gʼawˇ teˇ hpaˍ ka‸ yawˇ awˬ hkʼaˇ suh kʼai ve yoˬ.

2Shinˉ nyi gaˬ leh bon yehˬ awˬ hkʼaw lo yawˇ maˍ piˇ ve yoˬ. Gʼa kaˇ ve chaw laiˉ gʼaˇ anˇ jaˇ leh kʼoˆ ve, Chaw chi hpaˇ lehˬ, chi hkʼe ve awˬ ceuˬ teˇ hpaˍ hta‸ hkʼaˬ lo gʼa ve le. Yawˇ gʼa ve cuˇ yiˍ lehˬ, hkʼaˬ hkʼe ve cuˇ yiˍ le. Chi taw taw kanˇ paˆ uiˍ ve kanˉ yawˇ la‸ hkʼaw hkʼaˬ hkʼe te hpeh‸ la ve le.

3Yawˇ lehˬ, Maˍriˆ ve yaˇ paˍ la‸shaˉmaˉ hpeh‸ ve maˇ heˆ laˇ. Yaˍkoˆ, Yoˇseˍ, Yuˇda‸, Siˉmonˍ hui ve awˬ viˉ paˍ maˇ heˆ laˇ. Yawˇ awˬ nyi ma teˇ hpaˍ ka‸, ngaˬ hui geh chehˇ ve maˇ heˆ laˇ teh‸ kʼoˆ leh, yawˇ hui yawˇ hta‸ nyi ma luˬ ve yoˬ.

4Yeˍsuˆ yawˇ hui hta‸ kʼoˆ piˇ ve, Gʼuiˬsha ve tcuh kaˍ paˍ teˇ gʼaˇ lehˬ, awˬ me‸ awˬ hponˇ cawˬ ve yoˬ. Ya‸ hkʼaˇ, a shu yawˇ ve mvuhˇmiˬ, a shu yawˇ ve awˬ viˉ awˬ nyi leh, a shu yawˇ ve yehˬ awˬ hkʼaw lo lehˬ, awˬ me‸ awˬ hponˇ maˇ cawˬ teh‸ kʼoˆ ve yoˬ.

5Chehˇ haˍ ve chaw teˇ hpaˍ hpaˍ awˬ hkʼoˆ la‸ sheh taˍ leh gu na-e piˇ ve ceh tiˉ maˇ heˆ kʼo, oˇ kaˬ lo kanˇ paˆ uiˍ ve kanˉ awˬ kaˍ awˬ nu ve hta‸ yawˇ te maˇ hpeh‸.

6Yawˇ hui maˇ yonˍ puiˉ ve pa taw, yawˇ anˇ jaˇ ve yoˬ. Oˇ ve hkʼaw‸ nawˉ, yawˇ teˇ hkʼaˆ peuˬ teˇ hkʼaˆ lo hkʼa zuhˇ kʼai leh bon maˍ piˇ ve yoˬ.

7Oˇ htaˇ, tcuh yaˇ teˇ chi nyiˇ gʼaˇ hta‸ yawˇ kuˬ yuˬ leh, nyiˇ gʼaˇ teˇ kaˬ nyiˇ gʼaˇ teˇ kaˬ kʼai tcuh ve yoˬ. Neˇ cha‸ chiˆ teˇ hpaˍ hta‸ gʼaˇ tuˬ, yawˇ hui hta‸ kanˇ paˆ piˇ ve yoˬ.

8Juˇ fuiˍ teˇ taˬ maˇ heˆ kʼo, ya‸ kʼaw kʼaˉ awˬ pon awˬ kaˍ awˬ nu te‸ chiˉ taˇ yuˬ kʼai. Miˉ chaw ka‸, hkaoˍmonˇ ka‸ taˇ pfuhˇ kʼai. Haˍ pi caˆ hkʼaw lo hpu taˇ doˆ pfuhˇ kʼai.

9Hkuiˉ nuˆ tcuhˉ leh, aˉ po‸ teˇ hkʼoˆ ceh tiˉ deh kʼai-o teh‸, Yeˍsuˆ yawˇ hui hta‸ tawˇ piˇ ve yoˬ.

10Yeˍsuˆ yawˇ hui hta‸ kʼaw‸ kʼoˆ piˇ ve, Hkʼaˬ ve teˇ kaˬ maˇ kʼoˆ, shu ve yehˬ hkʼaw nawˬ hui lo‸-e ve teˇ yanˇ, hkʼaˆ oˇ ve awˬ hkʼaw lo maˇ tawˆ kʼai sheˍ ve ceh ceh, oˇ ve teˇ yehˬ awˬ hkʼaw lo ceh tiˉ chehˇ taˍ-o‸.

11Hkʼaˬ ve teˇ kaˬ lo maˇ kʼoˆ, nawˬ hui hta‸ maˇ ha‸ yuˬ leh nawˬ hui ve tawˇ hkawˇ hta‸ maˇ na ve kʼo, oˇ kaˬ lo nawˬ hui tawˆ kʼai htaˇ, yawˇ hui hta‸ shaˉ hkiˆ te maˍ piˇ tuˬ, hkui taw kʼaw hta‸ ngawˉ taˍ ve je‸ meu-e hta‸ hpi baˬ taˉ-oˆ teh‸, yawˇ hui hta‸ kʼoˆ piˇ ve yoˬ.

12Hkʼe te leh yawˇ hui tawˆ kʼai leh, Chaw yaˇ hui lehˬ a shu yawˇ ve venˇbaˆ hta‸ dawˇ hpfuhˆ cawˇ ve yoˬ teh‸ bon maˍ piˇ ve yoˬ.

13Yawˇ hui neˇ maˇ maˇ hta‸ gʼa‸ kʼoˬ leh, naˬ ve gawˬ ve chaw maˇ maˇ hta‸ naˍ manˇ shehˍ leh gu na-e piˇ ve yoˬ.

14Oˇ htaˇ Yeˍsuˆ awˬ lawn bvuhˬ kʼai jaˇ ve pa taw, hkunˉ hawˉ hkanˇ Heˍroˆ gʼa kaˇ ve yoˬ. Chaw teˇ hpaˍ hpaˍ kʼoˆ ve, Baˆtiˆsaˬ piˇ paˍ Yoˇhanˬ suh kuiˬ lo kʼaw‸ te‸ la peuˬ. Chi hta‸ pa taw, kanˇ paˆ uiˍ ve kanˉ chi teˇ hpaˍ hta‸ yawˇ te hpeh‸ ve yoˬ.

15Chaw teˇ hpaˍ hpaˍ kʼoˆ ve, Yawˇ lehˬ Eˇliˇya‸ yoˬ. Awˬ kaˍ awˬ nu teˇ hpaˍ kʼoˆ ve, Yawˇ lehˬ aˬ sho-eˬ htaˇ Gʼuiˬsha ve tcuh kaˍ paˍ teˇ hpaˍ hta‸ shuˍ ve tcuh kaˍ paˍ teˇ gʼaˇ hpeh‸ ve yoˬ.

16Jawˇmawˇ Heˍroˆ gʼa kaˇ leh, Chaw chi lehˬ, ngaˬ oˉ kʼoˍ tawˆ peuˬ ve Yoˇhanˬ yoˬ. Yawˇ suh kuiˬ lo kʼaw‸ te‸ tu la peuˬ teh‸ kʼoˆ ve yoˬ.

17Awˬ lawn chi lehˬ chi hkʼe yoˬ. Jawˇmawˇ Heˍroˆ ve awˬ nyi paˍ Hpiˇliˇpuˆ ve awˬ miˇ ma Heˍroˍdiˆ hta‸ jawˇmawˇ Heˍroˆ heuˆ ve yoˬ. Yaˇ miˇ oˇ ve hta‸ pa taw, yawˇ chaw hta‸ hpehˇ leh Yoˇhanˬ hta‸ hpeh yuˬ leh htawnˍ hkʼaw keu taˍ ve yoˬ.

18Aˬ hto‸ ma hta‸ pa taw le teh‸ kʼoˆ kʼo, Nawˬ awˬ nyi paˍ ve awˬ miˇ ma hta‸ nawˬ heuˆ maˇ cawˇ teh‸, Yoˇhanˬ jawˇmawˇ Heˍroˆ hta‸ kʼoˆ piˇ ve hta‸ pa taw yoˬ.

19Chi hta‸ pa taw, Heˍroˍdiˆ Yoˇhanˬ hta‸ canˇ jaˇ leh tiˇ pehˍ gaˇ ve yoˬ. Ya‸ hkʼaˇ, tiˇ pehˍ maˇ hpeh‸ sheˍ.

20Awˬ lawn kʼo, Yoˇhanˬ lehˬ hteˇ ve cawˇ ve da‸ ve kehˬ ve chaw hpeh‸ ve hta‸ jawˇmawˇ Heˍroˆ shiˍ ve pa taw, yawˇ hta‸ kawˆ leh hkʼa deh‸ ha‸ shaˉ taˍ ve yoˬ. Yoˇhanˬ maˍ piˇ ve tawˇ hkawˇ hta‸ jawˇmawˇ Heˍroˆ gʼa kaˇ htaˇ, yawˇ nyi ma sho‸ sha‸ chehˇ ve htawˇ, ha lehˬ ha kʼa na gaˇ ve yoˬ.

21Jawˇmawˇ Heˍroˆ paw ve hta‸ dawˇ nawˇ tuˬ pawehˇ te ve awˬ nyi kʼaw‸ gaˬ la leh, yawˇ lehˬ yawˇ awˬ hawˉ ve jawˇmawˇ teˇ hpaˍ, ma‸ poˍ teˇ hpaˍ leh Gaˍliˍlehˇ mvuhˇ miˬ awˬ hkʼaw ve awˬ hoˉ awˬ naˬ teˇ hpaˍ hta‸ kuˬ leh hti caˇ hti dawˬ ve yoˬ.

22Awˬ yanˇ cawˇ ve pa taw, Heˍroˍdiˆ ve awˬ yaˇ miˇ lo‸-e leh pawehˇ te maˍ piˇ htaˇ, jawˇmawˇ Heˍroˆ leh yawˇ geh mui caˇ chehˇ ve chaw teˇ hpaˍ nyi ma cawˇ jaˇ ve yoˬ. Hkʼe te leh hkunˉ hawˉ hkanˇ Heˍroˆ yaˇ miˇ hta‸ kʼoˆ piˇ ve, Nawˬ heuˆ gaˇ ve hkʼe lawˬ-o‸. Ngaˬ nawˬ hta‸ pe‸ laˇ tuˬ yoˬ teh‸ kʼoˆ ve yoˬ.

23Chi hkʼoˆ ka‸ yawˇ hkanˍ leh yaˇ miˇ hta‸ kʼoˆ piˇ ve, Nawˬ hkʼa lawˬ ve teˇ hpaˍ, ngaˬ ve mvuhˇmiˬ teˇ hkoˇ hkʼa gaˬ ngaˬ pe‸ laˇ tuˬ yoˬ teh‸ kʼoˆ ve yoˬ.

24Oˇ htaˇ, yaˇ miˇ oˇ ve tawˆ kʼai leh, Ngaˬ aˬ hto‸ ma hta‸ gʼa lawˬ tuˬ le teh‸, yawˇ ve awˬ e hta‸ na nyi ve yoˬ. Awˬ e lehˬ, Baˆtiˆsaˬ piˇ paˍ Yoˇhanˬ ve oˉ kʼoˍ hta‸ lawˬ yuˬ-o‸ teh‸ kʼaw‸ kʼoˆ piˇ ve yoˬ.

25Hkʼe te leh, teˇ cawˬ haˉ yaˇ miˇ oˇ ve hkunˉ hawˉ hkanˇ geh haˆ haˆ kʼaw‸ lo‸-e leh kʼoˆ ve, Baˆtiˆsaˬ piˇ paˍ Yoˇhanˬ ve oˉ kʼoˍ hta‸ hkehˇ pe le awˬ hkʼaw keu leh ngaˬ hta‸ haˆ haˆ pe‸ laˇ tuˬ heuˆ gaˇ ve yoˬ teh‸ lawˬ ve yoˬ.

26Hkunˉ hawˉ hkanˇ lehˬ, dawˇ haˍ jaˇ ve htawˇ, yawˇ hkanˍ taˍ peuˬ ve hta‸ pa taw leh yawˇ geh mui caˇ chehˇ ve chaw teˇ hpaˍ hta‸ pa taw, yawˇ kʼoˆ taˍ ve tawˇ hkawˇ hta‸ maˇ te luˬ gaˇ.

27Oˇ htaˇ hkunˉ hawˉ hkanˇ lehˬ, shaw shehˍ hpaˇ teˇ gʼaˇ hta‸, Yoˇhanˬ ve oˉ kʼoˍ ca tawˆ veu laˇ-oˆ teh‸ kʼoˆ leh, teˇ cawˬ haˉ kʼai tcuh ve yoˬ. Yawˇ kʼai leh, htawnˍ hkʼaw lo Yoˇhanˬ ve oˉ kʼoˍ hta‸ tawˆ ve yoˬ.

28Oˉ kʼoˍ oˇ ve hkehˇ pe le hkʼaw keu veu laˇ leh yaˇ miˇ hta‸ piˇ ve yoˬ. Hkʼe te leh awˬ yaˇ miˇ htawˇ, awˬ e hta‸ piˇ ve yoˬ.

29Yoˇhanˬ ve awˬ la‸ gʼawˇ teˇ hpaˍ lehˬ, awˬ lawn oˇ ve hta‸ gʼa kaˇ htaˇ, yawˇ hui laˬ leh yawˇ ve awˬ to hta‸ yuˬ leh, tuˍ hpfuh hkʼaw lo ca tuˍ ve yoˬ.

30Oˇ htaˇ, tcuh yaˇ teˇ hpaˍ Yeˍsuˆ geh hpawnˬ la leh, yawˇ hui hkʼa te hkʼa maˍ ve awˬ lawn hkʼa peu-eˬ yawˇ hta‸ kʼaw‸ kʼaoˍ piˇ ve yoˬ.

31Oˇ htaˇ Yeˍsuˆ lehˬ, Nawˬ hui teˇ hpaˍ laˬ-o‸. Heh puiˉ hkʼaw chaw gawˬ kuiˬ lo gʼaˇ a ciˉ ca jehˇ sheˍ teh‸, yawˇ hui hta‸ kʼoˆ piˇ ve yoˬ. Awˬ lawn kʼo, chaw maˇ maˇ yiˬ yiˬ laˬ laˬ te chehˇ ve hta‸ pa taw, yawˇ hui awˍ ka‸ caˇ maˇ tanˇ ve yoˬ.

32Hkʼe te leh, yawˇ hui haw lo‸ kʼoˍ ciˇ leh heh puiˉ hkʼaw chaw gawˬ kuiˬ teˇ kaˬ lo kʼai ve yoˬ.

33Yawˇ hui tawˆ kʼai ve hta‸ chaw maˇ maˇ gʼa mawˬ gʼa shiˍ ve yoˬ. Hkʼe te leh, hkʼaˬ venˇ chi venˇ lo chehˇ ve chaw hui gʼuiˬ po jaˇ lo gʼuiˇ kʼai leh, awˬ gʼuˇ suhˍ gaˬ ve yoˬ.

34Yeˍsuˆ haw lo‸ kʼoˍ hkʼaw tawˆ kʼai htaˇ, chaw awˬ moˍ lonˉ hta‸ gʼa mawˬ ve yoˬ. Yawˇ hui lehˬ, yawˬ hawˉ paˍ maˇ cawˬ ve yawˬ teˇ hpaˍ hta‸ shuˍ ve pa taw, yawˇ yawˇ hui hta‸ ha kʼaˉ leh awˬ lawn laiˉ ceuˬ maˍ piˇ ve yoˬ.

35Mvuhˇ hpeu‸ la htaˇ, yawˇ ve awˬ la‸ gʼawˇ teˇ hpaˍ yawˇ geh laˬ leh kʼoˆ ve, Choˬ kaˬ lehˬ heh puiˉ hkʼaw hpeh‸ leh, mvuhˇ ka‸ hpeu‸ la yoˬ.

36Chaw chi teˇ hpaˍ lehˬ, awˬ paˇ awˬ kui cawˬ ve hkʼaˆ hkʼaw pan hkʼaw lo kʼai leh caˇ tuˬ ca vuiˬ caˇ-e tuˬ, yawˇ hui hta‸ hpehˇ piˇ-oˆ teh‸ kʼoˆ piˇ ve yoˬ.

37Ya‸ hkʼaˇ yawˇ lehˬ, Nawˬ hui teˇ hpaˍ yawˇ hui hta‸ caˍ piˇ-oˆ teh‸, yawˇ hui hta‸ kʼaw‸ kʼoˆ piˇ htaˇ, awˬ la‸ gʼawˇ hui lehˬ, Ngaˬ hui hkaoˍmonˇ nyiˇ ha hteh‸ hpfuhˇ ca vuiˬ leh, yawˇ hui hta‸ gʼa caˍ piˇ tuˬ laˇ teh‸ kʼaw‸ kʼoˆ piˇ ve yoˬ.

38Yeˍsuˆ kʼoˆ ve, Nawˬ hui geh hkaoˍmonˇ hkʼaˬ nyiˇ diˬ cawˬ le. A ciˉ ca nyi sheˍ teh‸ kʼoˆ piˇ htaˇ, yawˇ hui ca nyi peuˬ leh, Hkaoˍmonˇ ngaˇ diˬ leh ngaˇ nyi hkeh cawˬ ve yoˬ teh‸ kʼaw‸ kʼoˆ piˇ ve yoˬ.

39Oˇ htaˇ Yeˍsuˆ lehˬ, Mvuh‸ nawˉ lehˍ ve awˬ hkʼoˆ chaw chi ma ve hta‸ awˬ moˍ awˬ moˍ te mui tcuh-o teh‸ yawˇ hui hta‸ kʼoˆ piˇ ve yoˬ.

40Yawˇ hui lehˬ, teˇ ha gʼaˇ teˇ moˍ, ngaˇ chi gʼaˇ teˇ moˍ, chi hkʼe awˬ moˍ awˍ moˍ te mui ve yoˬ.

41Yeˍsuˆ hkaoˍmonˇ oˇ ve ngaˇ diˬ leh ngaˇ oˇ ve nyiˇ hkeh hta‸ yuˬ peuˬ hkʼaw‸ nawˉ, mvuhˇ naw ma lo chiˇ nyi leh bon hta‸ chiˇ mvuh ve yoˬ. Hkaoˍmonˇ oˇ ve hta‸ yawˇ hkʼeh‸ peuˬ leh, chaw chi ma ve mehˆ gʼu suhˍ lo ca chiˇ teh piˇ tuˬ, awˬ la‸ gʼawˇ hui hta‸ piˇ ve yoˬ. Ngaˇ oˇ ve nyiˇ hkeh hta‸ htawˇ, chaw hkʼa peu-eˬ hta‸ pehˬ piˇ ve yoˬ.

42Oˇ htaˇ, chaw hkʼa peu-eˬ hkʼa bvuhˆ gʼa caˇ ve yoˬ.

43Chi hkʼoˆ ka‸, caˇ leuˉ ve hkaoˍmonˇ awˬ hkʼeh‸ leh ngaˇ shaˍ awˬ peˆ teˇ hpaˍ hta‸ kʼaw‸ gʼawˆ ve teˇ yanˇ, teˇ chi nyiˇ hkʼawˍ lawˇ hkʼa biˇ gʼa ve yoˬ.

44Hkaoˍmonˇ hta‸ caˇ ve chaw hui, hawˉ hkʼaˆ chaw mawˇ tiˉ ngaˇ hinˉ gʼaˇ cawˬ ve yoˬ.

45Chaw awˬ moˍ lonˉ hta‸ Yeˍsuˆ hpehˇ piˇ chehˇ htaˇ, yawˇ ve awˬ la‸ gʼawˇ teˇ hpaˍ hta‸ haw lo‸ kʼoˍ hkʼaw teˇ cawˬ haˉ lo‸-e tcuh leh, gʼuiˬ po coˇ paˉ Behˇsehˇdaˆ venˇ lo yawˇ hui hta‸ awˉ lawˉ hkanˍ kʼai tcuh ve yoˬ.

46Yawˇ chaw awˬ moˍ lonˉ hta‸ hpaˆ da‸ peuˬ hkʼaw‸ nawˉ, bon ca lawˬ tuˬ yawˇ hkʼaw pui hkʼoˆ lo taˆ-e ve yoˬ.

47Mehˆ muiˉ naˆ la htaˇ haw lo‸ kʼoˍ lehˬ, gʼuiˬ po awˬ kʼaw ji lo gaˬ peuˬ. Yeˍsuˆ lehˬ, gʼuiˬ pfuhˍ paˇ lo yawˇ teˇ gʼaˇ tiˉ chehˇ taˉ ve yoˬ.

48Mvuhˇ haw hpawˇ maˇ cawˇ ve pa taw, awˬ la‸ gʼawˇ teˇ hpaˍ haw lo‸ kʼoˍ gʼawˆ heuˬ jaˇ ve hta‸ yawˇ gʼa mawˬ htaˇ, tanˇ hkuiˇ shehˆ naˍ riˍ ponˬ peuˬ hkʼaw‸ nawˉ, Yeˍsuˆ gʼuiˬ po hkʼoˆ ya‸ kʼaw juˇ kʼai leh, yawˇ hui hta‸ ponˬ kʼai-a teh‸ te ve yoˬ.

49Yawˇ gʼuiˬ po hkʼoˆ ya‸ kʼaw juˇ kʼai chehˇ ve hta‸ yawˇ hui gʼa mawˬ htaˇ, chaw ha ku yoˬ teh‸ dawˇ leh, gʼaˇ hte‸ kuˬ ve yoˬ.

50Awˬ lawn kʼo, yawˇ hui hkʼa peu-eˬ yawˇ hta‸ gʼa mawˬ leh kawˆ jaˇ ve yoˬ. Teˇ cawˬ haˉ yawˇ yawˇ hui hta‸ tawˇ yaw leh, Nyi ma ha‸ hanˉ te-o. Taˇ kawˆ, ngaˬ yoˬ teh‸ kʼoˆ piˇ ve yoˬ.

51Oˇ htaˇ haw lo‸ kʼoˍ hkʼaw yawˇ yawˇ hui geh lo‸-e leh, mvuhˇ haw dehˬ sheˬ leh, yawˇ hui anˇ jaˇ tehˬ tehˬ ve yoˬ.

52Awˬ lawn kʼo, hkaoˍmonˇ hta‸ anˇ tuˬ te maˍ ve awˬ lawn yawˇ hui maˇ dawˇ shiˍ maˇ dawˇ pawnˍ. Yawˇ hui nyi ma ka‸ heh chehˇ sheˍ ve yoˬ.

53Yawˇ hui gʼuiˬ po coˇ paˉ lo hkanˍ kʼai leh, Geˍneˍsaˍrehˆ mvuhˇmiˬ lo gaˬ htaˇ, haw lo‸ kʼoˍ hta‸ gʼuiˬ pfuhˍ lo hpeh taˍ ve yoˬ.

54Haw lo‸ kʼoˍ awˬ hkʼaw lo yawˇ hui tawˆ-e leh, chaw teˇ hpaˍ teˇ cawˬ haˉ yawˇ hta‸ shiˍ ve yoˬ.

55Mvuhˇmiˬ oˇ ve awˬ hkʼaw lo chaw oˇ ve teˇ hpaˍ teˇ kaˬ le le lo gʼuiˇ kʼai leh, Yeˍsuˆ hkʼaˬ lo chehˇ ve hta‸ gʼa kaˇ kʼo, chaw naˬ chaw gawˬ teˇ hpaˍ hta‸ zuh‸ hpui hkʼoˆ taˆ veu leh, oˇ kaˬ lo kʼai ve yoˬ.

56Yawˇ hkʼa lo‸-e kuiˬ teˇ kaˬ le le, hkʼaˆ hkʼaw maˇ kʼoˆ, venˇ hkʼaw maˇ kʼoˆ, pan hkʼaw maˇ kʼoˆ, tcuh awˬ paˇ chaw hpawnˬ da‸ kuiˬ lo chaw naˬ teˇ hpaˍ hta‸ shu ca yuˬ teh taˍ ve yoˬ. Yawˇ ve aˉ po‸ awˬ caˍ hta‸ ceh gʼa htawˇ tuˬ, yawˇ hta‸ lawˬ hkawˉ leh, hkʼa htawˇ ve chaw teˇ hpaˍ na-e la ve yoˬ.