Mark 16

Lahu Bible Edited © Thailand Bible Society and Bible Society of Myanmar, 2010, 2020.

← Chapter 15 Jump to:

1Shinˉ nyi peuˬ ve teˇ yanˇ, Maˍriˆ Maˍgaˍdaˍlaˆ, Yaˍkoˆ ve awˬ e Maˍriˆ leh Saˍloˍmenˍ hui lehˬ, Yeˍsuˆ ve awˬ to hta‸ ca pfuhˍ piˇ tuˬ sha hawnˉ vuiˬ ve yoˬ.

2Teˇ shinˉ awˬ hkʼaw lo awˉ lawˉ teˇ nyi mvuhˇ shawˉ teˇ na‸ mvuhˇ nyi tawˆ la ve teˇ yanˇ, yawˇ hui tuˍ hpfuh lo kʼai ve yoˬ.

3Oˇ htaˇ yawˇ hui lehˬ, Tuˍ hpfuh awˬ hkʼoˇ meuˇ hta‸ tsuhˇ taˍ ve haˉ pui hta‸ ngaˬ hui awˬ pon a shu hpfuhˆ baˬ laˇ tuˬ le teh‸, teˇ gʼaˇ leh teˇ gʼaˇ kʼoˆ da‸ ve yoˬ.

4Yawˇ hui chiˇ nyi ve teˇ yanˇ, haˉ pui oˇ ve hpfuhˆ baˬ taˍ ve hta‸ gʼa mawˬ ve yoˬ. Haˉ pui oˇ ve lehˬ uiˍ jaˇ ve yoˬ.

5Tuˍ hpfuh awˬ hkʼaw lo yawˇ hui lo‸-e ve teˇ yanˇ, hpuˉ lehˍ ve aˇ po‸ zuhˬ ma veu‸ taˍ ve chaw haˉ paˍ teˇ gʼaˇ la‸ sha paˉ lo mui chehˇ ve hta‸ gʼa mawˬ leh yawˇ hui kawˆ jaˇ ve yoˬ.

6Yawˇ yawˇ hui hta‸ kʼoˆ piˇ ve, Taˇ kawˆ. La‸ ka hkʼoˆ lo hta‸ pehˍ ve Naˬzaˍrehˆ chaw Yeˍsuˆ hta‸ nawˬ hui ca ve yoˬ. Yawˇ kʼaw‸ te‸ tu la peuˬ. Yawˇ choˬ kaˬ maˇ chehˇ. Yawˇ hta‸ teh taˍ kuiˬ lo ca nyi la-o.

7Ya‸ hkʼaˇ nawˬ hui kʼai leh, yawˇ ve awˬ la‸ gʼawˇ teˇ hpaˍ leh Peˍtruˆ hta‸ chi hkʼe hto piˇ-oˆ. Nawˬ hui gʼuˇ suhˍ Gaˍliˍlehˇ mvuhˇ miˬ lo yawˇ kʼai tuˬ yoˬ. Yawˇ nawˬ hui hta‸ kʼoˆ taˉ laˇ ve hkʼe, oˇ kaˬ lo nawˬ hui yawˇ hta‸ gʼa mawˬ tuˬ yoˬ teh‸, yawˇ hui hta‸ kʼoˆ piˇ ve yoˬ.

8Yaˇ miˇ oˇ ve teˇ hpaˍ lehˬ, tuˍ hpfuh hkʼaw lo tawˆ kʼai leh, kawˆ cheˇ leh anˇ jaˇ ve awˬ hkʼaw lo yawˇ hui gʼuiˇ kʼo‸-e ve yoˬ. Yawˇ hui kawˆ jaˇ ve pa taw, teˇ gʼaˇ hta‸ ka‸ maˇ hto piˇ.

9Teˇ shinˉ awˬ hkʼaw lo awˉ lawˉ teˇ nyi mvuhˇ shawˉ teˇ na‸ yawˇ kʼaw‸ te‸ tu la peuˬ hkʼaw‸ nawˉ yawˇ awˬ to Maˍriˆ Maˍgaˍdaˍlaˆ hta‸ awˉ lawˉ maw piˇ ve yoˬ. Yaˇ miˇ oˇ ve lehˬ, ponˬ laˬ htaˇ neˇ suhˍ hkeh geh taˍ ve hta‸ Yeˍsuˆ gʼa‸ kʼoˬ piˇ jaw ve yaˇ miˇ teˇ gʼaˇ hpeh‸ ve yoˬ.

10Yeˍsuˆ geh chehˇ jaw ve chaw teˇ hpaˍ dawˇ haˍ gʼaˇ haˍ leh hawˬ chehˇ ve teˇ yanˇ, Maˍriˆ kʼai leh yawˇ hui hta‸ hto piˇ ve yoˬ.

11Yeˍsuˆ te‸ chehˇ leh Maˍriˆ yawˇ hta‸ gʼa mawˬ ve awˬ lawn yawˇ hui gʼa kaˇ htaˇ, maˇ yonˍ.

12Oˇ ve awˬ hkʼaw‸ nawˉ, yawˇ hui awˬ hkʼaw lo chaw nyiˇ gʼaˇ hkʼaˆ hkʼaw lo kʼaw‸ kʼo‸-e chehˇ htaˇ, yawˇ awˬ ho‸ awˬ han peun da‸ ve awˬ hkʼaw lo yawˇ awˬ to yawˇ huiˉ maˬ hta‸ maw piˇ ve yoˬ.

13Yawˇ huiˉ maˬ kʼaw‸ laˬ leh, chehˇ taˉ ve chaw teˇ hpaˍ hta‸ hto piˇ ve htawˇ yawˇ hui maˇ yonˍ.

14Oˇ ve awˬ hkʼaw‸ nawˉ, tcuh yaˇ teˇ chi teˇ gʼaˇ awˍ mui caˇ chehˇ ve teˇ yanˇ, yawˇ awˬ to yawˇ hui hta‸ maw piˇ ve yoˬ. Yawˇ hui maˇ yonˍ puiˉ ve leh nyi ma ka‸ heh ve hta‸ pa taw, yawˇ yawˇ hui hta‸ deˇ piˇ ve yoˬ. Awˬ lawn kʼo, yawˇ kʼaw‸ te‸ tu la peuˬ hkʼaw‸ nawˉ, yawˇ hta‸ gʼa mawˬ ve chaw teˇ hpaˍ ve hkawˇ hta‸ yawˇ hui maˇ yonˍ ve pa taw yoˬ.

15Peuˬ leh, yawˇ yawˇ hui hta‸ kʼoˆ piˇ ve, Miˬ guiˬ hkʼoˆ teˇ kaˬ le le lo kʼai leh chaw hkʼa peu-eˬ hta‸ ha lehˬ ve bon hkawˇ ca maˍ piˇ-oˆ.

16Yonˍ leh baˆtiˆsaˬ hkanˍ yuˬ ve chaw lehˬ, htaiˍ hkʼaw‸ ve hta‸ gʼa tuˬ yoˬ. Maˇ yonˍ ve chaw lehˬ, ciˍ yanˍ ve hta‸ gʼa hkanˍ tuˬ yoˬ.

17Yonˍ ve chaw teˇ hpaˍ awˬ hkʼaw lo awˬ heˆ chi teˇ hpaˍ hta‸ gʼa mawˬ tuˬ yoˬ. Ngaˬ ve awˬ meh hta‸ cuˇ leh, neˇ teˇ hpaˍ hta‸ yawˇ hui gʼa‸ kʼoˬ tuˬ yoˬ. Yawˇ hui tawˇ laiˉ ceuˬ yaw chiˇ mvuh tuˬ yoˬ.

18Yawˇ hui lehˬ, vuiˬ teˇ hpaˍ hta‸ yuˬ hpeh‸ tuˬ yoˬ. Awˬ taw‸ ma hta‸ dawˬ ve ka‸, yawˇ hui te‸ chiˉ maˇ hpeh‸. Chaw naˬ teˇ hpaˍ awˬ hkʼoˆ hta‸ yawˇ hui la‸ sheh taˍ leh chaw oˇ ve teˇ hpaˍ na-e la tuˬ yoˬ teh‸, Yeˍsuˆ kʼoˆ piˇ ve yoˬ.

19Hkʼe te leh, Jawˇmawˇ Yeˍsuˆ yawˇ hui hta‸ oˇ hkʼe kʼoˆ piˇ peuˬ hkʼaw‸ nawˉ, Gʼuiˬsha yawˇ hta‸ mvuhˇ naw ma hkʼoˆ lo chiˇ taˆ-e leh, Gʼuiˬsha ve la‸ sha paˉ lo yawˇ mui taˍ ve yoˬ.

20Awˬ la‸ gʼawˇ teˇ hpaˍ htawˇ tawˆ kʼai leh teˇ kaˬ le le lo bon hkawˇ ca maˍ piˇ ve yoˬ. Jawˇ mawˇ Gʼuiˬsha lehˬ yawˇ hui geh kanˉ te leh awˬ heˆ teˇ hpaˍ te tawˆ la ve awˬ hkʼaw lo, bon hkawˇ oˇ ve hta‸ yeˬ la piˇ lawˬ ve yoˬ.

← Chapter 15 Jump to: