Matthew 19

Lahu Bible Edited © Thailand Bible Society and Bible Society of Myanmar, 2010, 2020.

← Chapter 18 Jump to: Chapter 20 →

1Tawˇ chi teˇ hpaˍ hta‸ Yeˍsuˆ maˍ piˇ peuˬ hkʼaw‸ nawˉ, yawˇ Gaˍliˍlehˇ mvuhˇ miˬ awˬ hkʼaw tawˆ kʼai leh, Yawˇdanˍ gʼuiˬ ma coˇ paˉ lo cawˬ ve Yuˇda‸ mvuhˇ miˬ teˇ tawn lo gaˬ ve yoˬ.

2Chaw awˬ moˍ lonˉ teˇ hpaˍ yawˇ awˬ hkʼaˇ suh kʼai leh, oˇ kaˬ lo yawˇ yawˇ hui hta‸ gu na-e piˇ ve yoˬ.

3Oˇ htaˇ, yawˇ hta‸ lawˇ nyi tuˬ Hpaˍriˍsehˇ teˇ hpaˍ yawˇ geh laˬ leh, Hkʼaˬ hkʼe ve awˬ lawn teˇ ceuˬ hta‸ pa taw maˇ kʼoˆ, a shu yawˇ ve awˬ miˇ ma hta‸ baˬ hpeh‸-aw laˇ teh‸ na nyi ve yoˬ.

4Yawˇ kʼaw‸ kʼoˆ ve. Te hpanˍ shehˍ hpaˇ lehˬ, awˬ hkuiˉ puiˍ htaˇ ka‸ hawˉ hkʼaˆ leh yaˇ miˇ hta‸ te hpanˍ taˍ peuˬ leh kʼoˆ ve,

5Chi hta‸ pa taw hawˉ hkʼaˆ lehˬ, yawˇ ve awˬ pa awˬ e hta‸ hpaˆ da‸ taˉ leh yawˇ ve awˬ miˇ ma hta‸ caˉ da‸ leh, yawˇ huiˉ maˬ teˇ suhˍ teˇ shaˍ tiˉ hpeh‸ la tuˬ yoˬ teh‸ bvuh‸ taˍ ve tawˇ hkawˇ hta‸ nawˬ hui maˇ gʼaw jaw laˇ.

6Chi hta‸ pa taw, yawˇ huiˉ maˬ nyiˇ gʼaˇ hpeh‸ ve maˇ heˆ, teˇ gʼaˇ tiˉ hpeh‸ la peuˬ. Hkʼe te leh, Gʼuiˬsha caˉ da‸ piˇ taˍ ve hta‸ chaw yaˇ maˇ gʼa yuˬ hpaˆ da‸ piˇ teh‸ kʼoˆ piˇ ve yoˬ.

7Yawˇ hui kʼaw‸ kʼoˆ ve, Hkʼe te kʼo, hpaˆ da‸ ve li‸ piˇ peuˬ htaˇ heh‸, awˬ miˇ ma hta‸ baˬ-o‸ teh‸, aˬ hto‸ ma pa taw Moˉseˍ tawˇ piˇ taˍ ve le teh‸, yawˇ hta‸ kʼaw‸ na nyi ve yoˬ.

8Yawˇ kʼaw‸ kʼoˆ ve, Nawˬ hui nyi ma heh ve pa taw, a shu yawˇ ve awˬ miˇ ma hta‸ baˬ tuˬ Moˉseˍ a hkaw-anˬ piˇ ve yoˬ. Ya‸ hkʼaˇ, awˬ hkuiˉ puiˍ htaˇ lehˬ chi hkʼe maˇ heˆ.

9Ngaˬ nawˬ hui hta‸ kʼoˆ laˇ ve, haˉ chawˇ haˉ paˆ te ve teˇ ceuˬ maˇ heˆ kʼo, a shu yawˇ awˬ miˇ ma hta‸ baˬ leh awˬ kaˍ awˬ nu yaˇ miˇ hta‸ ca heuˆ ve chaw hkʼaˬ ve teˇ gʼaˇ maˇ kʼoˆ, haˉ chawˇ haˉ paˆ te ve yoˬ teh‸, yawˇ hui hta‸ kʼoˆ piˇ ve yoˬ.

10Awˬ la‸ gʼawˇ teˇ hpaˍ lehˬ, Awˬ hpawˇ awˬ miˇ heuˆ ve teˇ ceuˬ chi hkʼe hpeh‸ ve kʼo, maˇ heuˆ ve lehˬ da‸ leuˉ ve yoˬ teh‸ kʼoˆ ve yoˬ.

11Oˇ htaˇ yawˇ yawˇ hui hta‸ kʼoˆ piˇ ve, Tawˇ chi teˇ hkawˇ hta‸ chaw hkʼa peu-eˬ hkanˍ yuˬ maˇ hpeh‸. Hkanˍ yuˬ tuˬ awˬ bon gʼa taˍ ve chaw teˇ hpaˍ ceh tiˉ hkanˍ yuˬ hpeh‸ ve yoˬ.

12Awˬ lawn kʼo, chaw teˇ hpaˍ hpaˍ lehˬ, paw la htaˇ ka‸ awˬ tawnˇ hpeh‸ taˍ ve yoˬ. Chaw teˇ hpaˍ hpaˍ lehˬ, awˬ tawnˇ hpeh‸ la tuˬ shu yawˇ hui hta‸ te piˇ taˍ ve yoˬ. Chaw teˇ hpaˍ hpaˍ lehˬ, mvuhˇ naw ma mvuhˇmiˬ aw pon a shu yawˇ ve awˬ to hta‸ chaw awˬ tawnˇ hpeh‸ la piˇ ve yoˬ. Chi hta‸ hkanˍ yuˬ hpeh‸ ve chaw lehˬ, hkanˍ yuˬ-o‸ teh‸ kʼoˆ ve yoˬ.

13Oˇ htaˇ, yaˇ ehˉ teˇ hpaˍ awˬ hkʼoˆ hta‸ Yeˍsuˆ la‸ sheh taˍ leh bon lawˬ piˇ tuˬ, yaˇ ehˉ teˇ hpaˍ hta‸ shu yawˇ geh shiˍ laˬ ve yoˬ. Awˬ la‸ gʼawˇ teˇ hpaˍ lehˬ, shiˍ laˬ ve chaw teˇ hpaˍ hta‸ deˇ ve yoˬ.

14Ya‸ hkʼaˇ Yeˍsuˆ kʼoˆ ve, Yaˇ ehˉ teˇ hpaˍ hta‸ ngaˬ geh laˬ piˇ-oˆ. Yawˇ hui hta‸ taˇ tawˍ taˍ. Awˬ lawn kʼo mvuhˇ naw ma mvuhˇ miˬ lehˬ, chaw oˇ hkʼe ve mvuhˇmiˬ hpeh‸ ve yoˬ teh‸ kʼoˆ piˇ ve yoˬ.

15Yaˇ ehˉ teˇ hpaˍ awˬ hkʼoˆ hta‸ la‸ sheh taˍ peuˬ hkʼaw‸ nawˉ, yawˇ oˇ kaˬ lo tawˆ kʼai ve yoˬ.

16Oˇ htaˇ, chaw teˇ gʼaˇ yawˇ geh laˬ leh kʼoˆ ve, Saˍ la‸-oˬ, co ti‸ ha ti‸ gʼa tuˬ, ngaˬ da‸ ve kanˉ hkʼaˬ ve teˇ maˬ hta‸ gʼa te tuˬ le teh‸ na nyi ve yoˬ.

17Yawˇ kʼaw‸ kʼoˆ ve, Aˬ hto‸ ma pa taw nawˬ ngaˬ hta‸ da‸ ve awˬ lawn na nyi laˇ ve le. Da‸ ve awˬ shehˍ hpaˇ teˇ gʼaˇ tiˉ cawˬ ve yoˬ. A sha‸ te‸ kuiˬ lo nawˬ lo‸-e gaˇ ve kʼo, awˬliˇtawˇhkawˇ teˇ hpaˍ hta‸ na yuˬ leh te-o teh‸, yawˇ hta‸ kʼoˆ piˇ ve yoˬ.

18Hkʼaˬ ve teˇ maˬ le teh‸ yawˇ na nyi htaˇ, Yeˍsuˆ kʼaw‸ kʼoˆ ve, Chaw hta‸ taˇ tiˇ pehˍ, haˉ chawˇ haˉ paˆ taˇ te, shu ve mawˇ hta‸ taˇ hkʼawˇ, shu hta‸ maˇ heˆ heˆ ve shaˉ hkiˆ taˇ hkanˍ,

19nawˬ ve awˬ pa aw e hta‸ yawˆ yawˆ yan yan te-o, nawˬ awˬ to hta‸ ha‸ ve hkʼe nawˬ awˬ paˇ awˬ kui chehˇ ve chaw hta‸ ha‸-o‸ teh‸ kʼoˆ piˇ ve yoˬ.

20Chaw haˉ paˍ oˇ ve lehˬ, Chi hkʼa peu-eˬ hta‸ ngaˬ na yuˬ leh te peuˬ. Ngaˬ aˬ hto‸ ma teˇ ceuˬ hta‸ loˍ sheˍ le teh‸, kʼaw‸ kʼoˆ piˇ ve yoˬ.

21Yeˍsuˆ yawˇ hta‸ kʼaw‸ kʼoˆ piˇ ve, Nawˬ biˇ la gaˇ ve kʼo, nawˬ kʼo‸-e leh, nawˬ ve mawˇ jeˬ hta‸ hawˇ baˬ leh haˍ yaˇ gʼawˇ yaˇ hta‸ pehˬ piˇ-oˆ. Mvuhˇ naw ma hkʼoˆ lo awˬ hpfuhˇ hkʼaˆ ve mawˇ nawˬ cawˬ taˍ tuˬ yoˬ. Peuˬ leh nawˬ kʼaw‸ laˬ leh ngaˬ hkʼaˇ suh laˬ-o‸ teh‸ kʼoˆ piˇ ve yoˬ.

22Chaw haˉ paˍ lehˬ, tawˇ hkawˇ chi hta‸ gʼa kaˇ htaˇ, yawˇ dawˇ haˍ jaˇ leh kʼo‸-e ve yoˬ. Awˬ lawn kʼo, yawˇ mawˇ jeˬ cawˬ maˇ jaˇ ve yoˬ.

23Yeˍsuˆ yawˇ ve awˬ la‸ gʼawˇ hui hta‸ kʼoˆ piˇ ve, Ngaˬ nawˬ hui hta‸ awˬ tehˬ awˬ na kʼoˆ laˇ ve, paw sha ve chaw lehˬ, mvuhˇ naw ma mvuhˇmiˬ awˬ hkʼaw lo lo‸-e tuˬ haˍ jaˇ ve yoˬ.

24Ngaˬ nawˬ hui hta‸ teˇ pawˆ kʼaw‸ kʼoˆ laˇ ve, kaˍlaˍoˆ teˇ hkeh gʼo‸ naˍ hkʼawˇ awˬ hkʼaw lo‸-e tuˬ ve lehˬ, paw sha ve chaw teˇ gʼaˇ Gʼuiˬsha ve mvuhˇmiˬ awˬ hkʼaw lo lo‸-e tuˬ ve a‸ kehˉ sha ve yoˬ teh‸ kʼoˆ ve yoˬ.

25Awˬ la‸ gʼawˇ teˇ hpaˍ tawˇ oˇ ve hta‸ gʼa kaˇ htaˇ, yawˇ hui anˇ jaˇ leh, Hkʼe te kʼo, htaiˍ hkʼaw‸ ve hta‸ a shu gʼa hpeh‸ tuˬ le teh‸ kʼoˆ ve yoˬ.

26Yeˍsuˆ yawˇ hui hta‸ nyi leh, Chaw yaˇ lehˬ chi hta‸ te maˇ gʼa. Ya‸ hkʼaˇ, Gʼuiˬsha lehˬ hkʼa peu-eˬ hta‸ te gʼa ve yoˬ teh‸ kʼoˆ piˇ ve yoˬ.

27Oˇ htaˇ Peˍtruˆ kʼoˆ ve, Ngaˬ hui lehˬ hkʼa peu-eˬ hta‸ baˬ taˉ leh nawˬ awˬ hkʼaˇ suh laˬ peuˬ. Hkʼe te leh, ngaˬ hui aˬ hto‸ ma gʼa tuˬ ve le.

28Yeˍsuˆ yawˇ hui hta‸ kʼoˆ piˇ ve, Ngaˬ nawˬ hui hta‸ awˬ tehˬ awˬ na kʼoˆ laˇ ve, miˬguiˬ awˬ suhˉ kʼaw‸ gu te ve awˬ yanˇ awˬ hkʼaw lo chaw yaˇ ve Yaˇ hpu lehˬ, yawˇ ve awˬ me‸ awˬ hponˇ cawˬ ve kʼaw jaw awˬ hkʼoˆ mui ve teˇ yanˇ, nawˬ hui ngaˬ awˬ hkʼaˇ suh laˬ ve chaw teˇ hpaˍ htawˇ, kʼaw jaw teˇ chi nyiˇ maˬ awˬ hkʼoˆ mui leh, Iˉsaˍreˍlaˆ chaw teˇ chi nyiˇ ceuˬ hta‸ suhˉ gʼa jehˬ tuˬ yoˬ.

29Ngaˬ ve awˬ meh hta‸ pa taw, a shu yawˇ ve yehˬ, a shu yawˇ ve awˬ viˉ awˬ nyi, a shu yawˇ ve awˬ pa awˬ e, a shu yawˇ ve awˬ yaˇ awˬ duˬ leh a shu yawˇ ve ti mi hta‸ baˬ taˉ ve chaw teˇ gʼaˇ le le, oˇ ve a‸ kehˉ teˇ ha pun kʼaw‸ gʼa leh, co ti‸ ha ti‸ awˬ shinˉ hta‸ htawˇ gʼa tuˬ yoˬ.

30Ya‸ hkʼaˇ, shu awˬ gʼuˇ suhˍ chehˇ ve chaw maˇ maˇ, shu awˬ hkʼaw‸ nawˉ gʼa kʼaw‸ chehˇ tuˬ yoˬ. Shu awˬ hkʼaw‸ nawˉ chehˇ ve chaw maˇ maˇ, shu awˬ gʼuˇ suhˍ gʼa kʼaw‸ chehˇ tuˬ yoˬ.

← Chapter 18 Jump to: Chapter 20 →