Matthew 3

Lahu Bible Edited © Thailand Bible Society and Bible Society of Myanmar, 2010, 2020.

← Chapter 2 Jump to: Chapter 4 →

1Awˬ yanˇ oˇ ve awˬ hkʼaw lo, baˆtiˆsaˬ piˇ paˍ Yoˇhanˬ tawˆ la leh kʼoˆ ve,

2Mvuhˇ naw ma mvuhˇmiˬ gaˬ la paˇ neˇ ve pa taw, venˇbaˆ hta‸ dawˇ hpfuhˆ loˬ teh‸, Yuˇda‸ mvuhˇmiˬ heh puiˉ hkʼaw lo yawˇ bon maˍ piˇ chehˇ ve yoˬ.

3Tcuh kaˍ paˍ Iˉsaˍyaˆ kʼoˆ taˍ ve lehˬ, Heh puiˉ hkʼaw lo chaw teˇ gʼaˇ kuˬ leh kʼoˆ ve, Jawˇmawˇ Gʼuiˬsha ve ya‸ kʼaw hta‸ gu taˍ loˬ. Yawˇ ve ya‸ kʼaw teˇ hpaˍ hta‸ hteˇ lehˍ te-o, teh‸ kʼoˆ taˍ ve tawˇ chi teˇ hkawˇ lehˬ, Yoˇhanˬ awˬ lawn hta‸ kʼoˆ ve yoˬ.

4Yoˇhanˬ lehˬ, kaˍlaˍoˆ awˬ mvuh te taˍ ve veu‸ kʼaˇ hta‸ veu‸ deh leh, yawˇ ve caw‸ cehˍ nyi lo shaˍ guiˬ haˍ pi caˆ tsuh‸ taˍ ve yoˬ. Yawˇ ve caˇ tuˬ lehˬ, paˉ ce‸ leh heh puiˉ hkʼaw ve pehˇ gʼuiˬ yoˬ.

5Oˇ htaˇ, Yeˍruˆsaˍlehnˍ venˇ yaˇ, Yuˇda‸ mvuhˇmiˬ yaˇ hkʼa peu-eˬ leh, Yawˇdanˍ gʼuiˬ ma awˬ paˇ awˬ kui hkʼa chehˇ ve chaw hkʼa peu-eˬ yawˇ geh kʼai ve yoˬ.

6Yawˇ hui a shu yawˇ ve venˇbaˆ hta‸ kʼaoˍ maˍ piˇ leh, Yoˇhanˬ yawˇ hui hta‸ Yawˇdanˍ gʼuiˬ ma awˬ hkʼaw lo baˆtiˆsaˬ piˇ ve yoˬ.

7Baˆtiˆsaˬ hkanˍ tuˬ Hpaˍriˍsehˇ leh Saˍduˆkehˇ chaw hui maˇ maˇ yawˇ geh laˬ ve hta‸ Yoˇhanˬ gʼa mawˬ htaˇ, yawˇ yawˇ hui hta‸ kʼoˆ piˇ ve, Vuiˬ haiˬ awˬ yaˇ teˇ hpaˍ-oˬ, gaˬ la tuˬ ve nyi ma zuhˆ ve hta‸ gʼa ponˬ tuˬ, a shu nawˬ hui hta‸ hto laˇ ve le.

8Venˇbaˆ dawˇ hpfuhˆ ve hta‸ keunˍ da‸ ve awˬ shiˍ naw‸ la-o.

9Aˍbraˍhanˍ lehˬ ngaˬ hui ve awˬ pa hpeh‸ ve yoˬ teh‸ nawˬ hui a shu yawˇ ve nyi ma hkʼaw taˇ ca dawˇ, taˇ ca kʼoˆ. Awˬ lawn kʼo, Gʼuiˬsha lehˬ haˉ pui shiˍ chi teˇ hpaˍ awˬ hkʼaw lo Aˍbraˍhanˍ ve awˬ yaˇ awˬ duˬ teˇ hpaˍ hta‸ te tawˆ la hpeh‸ ve yoˬ teh‸, ngaˬ nawˬ hui hta‸ kʼoˆ laˇ ve yoˬ.

10Chi beu‸ ka‸, suhˆ cehˬ awˬ hkuiˉ puiˍ lo ceˉ ceˇ teh taˍ peuˬ. Hkʼe te leh, da‸ ve awˬ shiˍ maˇ naw‸ ve awˬ cehˬ teˇ cehˬ le le hta‸ htu baˬ leh aˬ miˍ awˬ hkʼaw lo baˬ keu ve yoˬ.

11Nawˬ hui venˇbaˆ hta‸ dawˇ hpfuhˆ ve awˬ pon, ngaˬ nawˬ hui hta‸ iˉ kaˆ awˬ hkʼaw lo baˆtiˆsaˬ piˇ ve yoˬ. Ya‸ hkʼaˇ, ngaˬ awˬ hkʼaw‸ nawˉ laˬ tuˬ ve chaw teˇ gʼaˇ lehˬ, ngaˬ a‸ kehˉ kanˇ paˆ uiˍ ve yoˬ. Yawˇ ve hkuiˉ nuˆ hta‸ yuˬ shi tuˬ ve ceh ka‸ ngaˬ maˇ keunˍ. Chaw oˇ ve lehˬ, da‸ ve kehˬ ve Awˬ ha hpu awˬ hkʼaw lo maˇ kʼoˆ, aˬ miˍ awˬ hkʼaw lo maˇ kʼoˆ, nawˬ hui hta‸ baˆtiˆsaˬ piˇ tuˬ yoˬ.

12Yawˇ ve la‸ sheh awˬ hkʼaw lo caˬ hpeuˇ tuˬ vawˆ taˍ ve yoˬ. Yawˇ ve caˬ jaw‸ kuiˬ hta‸ kehˬ lehˍ shiˆ baˬ peuˬ hkʼaw‸ nawˉ, caˬ shiˍ hta‸ caˬ ciˇ yehˬ awˬ hkʼaw lo shaw pfuhˇ keu tuˬ yoˬ. Ya‸ hkʼaˇ, caˬ cuˉ hta‸ maˇ suh puiˉ ve aˬ miˍ awˬ hkʼaw lo tuˉ baˬ tuˬ yoˬ teh‸, Yoˇhanˬ kʼoˆ ve yoˬ.

13Oˇ htaˇ, Yeˍsuˆ lehˬ baˆtiˆsaˬ hkanˍ yuˬ tuˬ, Gaˍliˍlehˇ mvuhˇmiˬ hkʼaw tawˆ la leh, Yawˇdanˍ gʼuiˬ ma lo Yoˇhanˬ geh laˬ ve yoˬ.

14Yoˇhanˬ yawˇ hta‸ tawˍ taˍ leh kʼoˆ ve, Ngaˬ lehˬ nawˬ geh baˆtiˆsaˬ hkanˍ yuˬ cawˇ ve yoˬ. Nawˬ ngaˬ geh laˬ ve laˇ teh‸ kʼoˆ piˇ ve yoˬ.

15Yeˍsuˆ yawˇ hta‸ kʼaw‸ kʼoˆ piˆ ve, Chi beu‸ a ciˉ te laˇ-oˆ. Awˬ lawn kʼo, hteˇ ve cawˇ ve awˬ liˇ hkʼa peu-eˬ biˇ la tuˬ ngaˬ hui te cawˇ ve yoˬ teh‸ kʼoˆ piˇ ve yoˬ. Oˇ htaˇ Yoˇhanˬ yawˇ hta‸ baˆtiˆsaˬ piˇ ve yoˬ.

16Yeˍsuˆ baˆtiˆsaˬ hkanˍ yuˬ peuˬ leh iˉ kaˆ awˬ hkʼaw lo teˇ cawˬ haˉ tawˆ la htaˇ, mvuhˇ naw ma hpaw taˍ ve yoˬ. Oˇ htaˇ, Gʼuiˬsha ve Awˬ ha hpu lehˬ, aˉ pui kʼaˍ hkʼe ya‸ la leh yawˇ awˬ hkʼoˆ lo mui la ve hta‸ Yeˍsuˆ gʼa mawˬ ve yoˬ.

17Mvuhˇ naw ma hkʼoˆ lo awˬ hkawˇ bvuhˬ la leh kʼoˆ ve, Chaw chi lehˬ, ngaˬ ha‸ jaˇ ve Yaˇ hpu yoˬ. Yawˇ hta‸ ngaˬ nyi hkʼaˇ suh jaˇ ve yoˬ teh‸ kʼoˆ ve yoˬ.

← Chapter 2 Jump to: Chapter 4 →