Matthew 9

Lahu Bible Edited © Thailand Bible Society and Bible Society of Myanmar, 2010, 2020.

← Chapter 8 Jump to: Chapter 10 →

1Yeˍsuˆ haw lo‸ kʼoˍ kʼaw‸ ciˇ kʼaw‸ la leh, yawˇ ve venˇ lo gaˬ la ve yoˬ.

2Oˇ htaˇ, zuh‸ kuiˬ hkʼoˆ zuh‸ chehˇ ve hkui sheh la‸ sheh suh ve chaw teˇ gʼaˇ hta‸ shu yawˇ geh taˆ laˬ ve yoˬ. Yawˇ hui yonˍ ve nyi ma hta‸ Yeˍsuˆ gʼa mawˬ htaˇ, hkui sheh la‸ sheh suh ve chaw hta‸ kʼoˆ piˇ ve, Yaˇ paˍ-oˬ, ha lehˬ chehˇ-oˆ. Nawˬ ve venˇbaˆ hpehˇ hkʼa peuˬ teh‸ kʼoˆ piˇ ve yoˬ.

3Li‸ bvuh‸ paˍ teˇ hpaˍ hpaˍ lehˬ, Chi hpaˇ Gʼuiˬsha hta‸ maˇ shawˍ maˇ caˆ kʼoˆ ve yoˬ teh‸, a shu yawˇ ve nyi ma hkʼaw dawˇ chehˇ ve yoˬ.

4Yawˇ hui hkʼaˬ hkʼe dawˇ chehˇ ve hta‸ Yeˍsuˆ shiˍ leh kʼoˆ piˇ ve, Aˬ hto‸ ma te nawˬ hui ve nyi ma hkʼaw lo maˇ da‸ ve hta‸ dawˇ chehˇ ve le.

5Awˬ lawn kʼo, tawˇ hkʼaˬ ve teˇ hkawˇ a ciˉ kʼoˆ piˇ sha le. Nawˬ ve venˇbaˆ hpehˇ hkʼa peuˬ teh‸ kʼoˆ piˇ ve sha laˇ. Maˇ heˆ kʼo, Tu leh ya‸ kʼaw toˇ kʼai loˬ teh‸ kʼoˆ piˇ ve sha laˇ.

6Ya‸ hkʼaˇ chaw yaˇ ve Yaˇ hpu lehˬ miˬ guiˬ hkʼoˆ lo venˇbaˆ hpehˇ hkʼa tuˬ kanˇ paˆ cawˬ ve hta‸ nawˬ hui gʼa shiˍ tuˬ teh‸ kʼoˆ peuˬ leh, hkui sheh la‸ sheh suh ve chaw hta‸ kʼaw‸ kʼoˆ piˇ ve, Tu-o. Nawˬ ve zuh‸ kuiˬ hta‸ taˆ leh nawˬ ve aˉ hkʼaw lo kʼo‸-e loˬ teh‸ kʼoˆ piˇ ve yoˬ.

7Oˇ htaˇ yawˇ tu leh yawˇ ve aˉ hkʼaw lo kʼo‸-e ve yoˬ.

8Oˇ ve hta‸ chaw awˬ moˍ lonˉ teˇ hpaˍ gʼa mawˬ htaˇ, yawˇ hui kawˆ leh, chaw yaˇ hui hta‸ chi hkʼe ve kanˇ paˆ piˇ shehˍ hpaˇ Gʼuiˬsha hta‸ chiˇ uiˍ chiˇ mvuh piˇ ve yoˬ.

9Yeˍsuˆ tu leh awˬ gʼuˇ suhˍ kʼai chehˇ htaˇ, awˬ hkawnˍ shaw kuiˬ yehˬ awˬ hkʼaw lo mui chehˇ ve Ma‸htehˍ meh ve chaw teˇ gʼaˇ hta‸ yawˇ gʼa mawˬ ve yoˬ. Ngaˬ hkʼaˇ suh laˬ-o‸ teh‸, yawˇ hta‸ kʼoˆ piˇ htaˇ, yawˇ tu leh Yeˍsuˆ hkʼaˇ suh kʼai ve yoˬ.

10Oˇ ve hkʼaw‸ nawˉ, yehˬ awˬ hkʼaw lo Yeˍsuˆ hpui lawˇ paˇ mui caˇ chehˇ ve teˇ yanˇ, awˬ hkawnˍ shaw paˍ leh venˇbaˆ yaˇ hui maˇ maˇ laˬ leh, Yeˍsuˆ leh yawˇ ve awˬ la‸ gʼawˇ hui geh teˇ geh mui caˇ ve yoˬ.

11Hpaˍriˍsehˇ hui oˇ ve hta‸ gʼa mawˬ htaˇ, Yeˍsuˆ ve awˬ la‸ gʼawˇ hui hta‸ kʼoˆ piˇ ve, Nawˬ hui ve saˍ la‸ lehˬ, aˬ hto‸ ma pa taw awˬ hkawnˍ shaw paˍ leh venˇ baˆ yaˇ hui geh hkʼa geh caˇ ve le teh‸ na nyi ve yoˬ.

12Tawˇ oˇ ve hta‸ Yeˍsuˆ gʼa kaˇ htaˇ yawˇ kʼaw‸ kʼoˆ piˇ ve, Chehˇ sha ve chaw hui naˆ tsuhˇ shehˍ hpaˇ hta‸ maˇ loˍ. Naˬ ve chaw hui ceh tiˉ loˍ ve yoˬ.

13Ngaˬ lehˬ tanˇ tuˬ teˇ ceuˬ hta‸ heuˆ gaˇ ve maˇ heˆ, ha kʼaˉ ve teˇ ceuˬ hta‸ heuˆ gaˇ ve yoˬ teh‸ kʼoˆ ve tawˇ hkawˇ hta‸ nawˬ hui shiˍ tuˬ ca henˇ-oˆ. Awˬ lawn kʼo, hteˇ ve cawˇ ve chaw hui hta‸ kuˬ yuˬ tuˬ ngaˬ laˬ ve maˇ heˆ. Venˇbaˆ yaˇ hui hta‸ kuˬ yuˬ tuˬ ngaˬ laˬ ve yoˬ teh‸ kʼoˆ piˇ ve yoˬ.

14Oˇ htaˇ, Yoˇhanˬ ve awˬ la‸ gʼawˇ teˇ hpaˍ Yeˍsuˆ geh laˬ leh kʼoˆ ve, Ngaˬ hui leh Hpaˍriˍsehˇ teˇ hpaˍ caˇ tuˬ ce chehˇ ve ka‸, aˬ hto‸ ma pa taw nawˬ ve awˬ la‸ gʼawˇ teˇ hpaˍ caˇ tuˬ maˇ ce ve le teh‸ na nyi ve yoˬ.

15Yeˍsuˆ yawˇ hui hta‸ kʼoˆ piˇ ve, Awˬ miˇ ma heuˆ shehˍ hpaˇ lehˬ, hkehˉ caˇ la ve chaw hui geh chehˇ htaˇ, yawˇ hui dawˇ haˍ chehˇ tuˬ laˇ. Ya‸ hkʼaˇ, awˬ miˇ ma heuˆ shehˍ hpaˇ hta‸ yawˇ hui geh yuˬ hpaˆ ve awˬ nyi gaˬ la tuˬ yoˬ. Oˇ htaˇ yawˇ hui caˇ tuˬ ce tuˬ yoˬ.

16Veu‸ kʼaˇ awˬ piˍ hta‸ hpa awˬ suhˉ a shu ka‸ maˇ nehˉ jaw. Oˇ hkʼe nehˉ ve kʼo, nehˉ taˍ ve hpa lehˬ veu‸ kʼaˇ awˬ piˍ hta‸ gʼawˬ leh leuˉ leh kʼaw‸ tzuh‸ jaˇ tuˬ yoˬ.

17Chi hkʼa shuˍ shuˍ, shaˍ guiˬ htuˉ pui awˬ piˍ awˬ hkʼaw lo a pehˉ meuˇ gʼuiˬ awˬ suhˉ a shu ka‸ maˇ keu jaw. Oˇ hkʼe keu ve kʼo, shaˍ guiˬ htuˉ pui pe‸ hkoˇ ve pa taw, a pehˉ meuˇ gʼuiˬ sheˆ leh, shaˍ guiˬ htuˉ pui htawˇ luˬ kʼai ve yoˬ. Ya‸ hkʼaˇ, a pehˉ meuˇ gʼuiˬ awˬ suhˉ hta‸ shaˍ guiˬ htuˉ pui awˬ suhˉ awˬ hkʼaw lo keu ve kʼo, nyiˇ ceuˬ ceuˬ maˇ luˬ kʼai teh‸ kʼoˆ piˇ ve yoˬ.

18Awˬ lawn chi teˇ hpaˍ yawˇ yawˇ hui hta‸ kʼoˆ piˇ chehˇ htaˇ, bon yehˬ awˬ hoˉ teˇ gʼaˇ yawˇ geh laˬ leh yawˇ hta‸ oˉ kʼoˍ pui leh kʼoˆ ve, Chi teˇ hkui ngaˬ ve yaˇ miˇ suh peuˬ. Ya‸ hkʼaˇ, nawˬ laˬ leh yawˇ awˬ hkʼoˆ hta‸ la‸ sheh taˍ piˇ la. Yawˇ kʼaw‸ te‸ la tuˬ yoˬ teh‸ kʼoˆ piˇ ve yoˬ.

19Hkʼe te leh Yeˍsuˆ tu leh, yawˇ ve awˬ la‸ gʼawˇ hui geh chaw oˇ ve awˬ hkʼaˇ suh kʼai ve yoˬ.

20Oˇ htaˇ, teˇ chi nyiˇ hkʼaw‸ hkʼa gaˬ awˬ suhˍ ya‸ leh naˬ ve yaˇ miˇ teˇ gʼaˇ Yeˍsuˆ awˬ hkʼaw‸ nawˉ hpawˇ lo laˬ leh yawˇ ve aˉ po‸ awˬ caˍ hta‸ htawˇ ve yoˬ.

21Awˬ lawn kʼo, Yawˇ ve aˉ po‸ hta‸ ceh ngaˬ gʼa htawˇ ve kʼo, ngaˬ na-e la tuˬ yoˬ teh‸, yawˇ nyi ma hkʼaw dawˇ ve yoˬ.

22Yeˍsuˆ hpfuhˆ nyi leh yawˇ hta‸ mawˬ htaˇ, Yaˇ miˇ-oˬ, ha lehˬ chehˇ-oˆ. Nawˬ yonˍ ve teˇ ceuˬ lehˬ, nawˬ hta‸ na-e la piˇ peuˬ teh‸ kʼoˆ piˇ ve yoˬ. Oˇ teˇ hkui yaˇ miˇ oˇ ve na-e la ve yoˬ.

23Bon yehˬ awˬ hoˉ ve aˉ hkʼaw lo Yeˍsuˆ gaˬ la htaˇ, lehˉ lu meuˆ ve chaw hui leh chaw awˬ moˍ lonˉ duiˆ-ehˍ shaˇ-ehˍ te chehˇ ve hta‸ yawˇ gʼa mawˬ ve yoˬ.

24Oˇ htaˇ yawˇ yawˇ hui hta‸ kʼoˆ piˇ ve, Tawˆ kʼai loˬ. Yaˇ miˇ ehˉ chi suh ve maˇ heˆ, yawˇ zuh‸ muiˉ kʼa chehˇ ve yoˬ teh‸ kʼoˆ piˇ ve teˇ yanˇ, yawˇ hui yawˇ hta‸ gʼuiˬ ve yoˬ.

25Yawˇ chaw awˬ moˍ lonˉ hta‸ tawˆ kʼai tcuh peuˬ hkʼaw‸ nawˉ, yawˇ lo‸-e leh yaˇ miˇ ehˉ ve la‸ sheh hta‸ yuˬ hkʼa leh, yaˇ miˇ ehˉ tu la ve yoˬ.

26Hkʼe te leh awˬ lawn chi, mvuhˇmiˬ oˇ ve awˬ hkʼaw teˇ kaˬ le le lo bvuhˬ kʼai ve yoˬ.

27Yeˍsuˆ tu leh awˬ gʼuˇ suhˍ kʼai chehˇ htaˇ, mehˆ cuˉ paˍ nyiˇ gʼaˇ yawˇ awˬ hkʼaˇ suh gʼa‸ leh, Daˍviˆ ve Yaˇ hpu-oˬ, ngaˬ huiˉ maˬ hta‸ ha kʼaˉ laˇ-oˆ teh‸ kuˬ tcuhˉ taˍ ve yoˬ.

28Yawˇ yehˬ hkʼaw lo‸-e htaˇ, mehˆ cuˉ paˍ oˇ ve nyiˇ gʼaˇ yawˇ geh laˬ ve yoˬ. Yeˍsuˆ yawˇ huiˉ maˬ hta‸ kʼoˆ piˇ ve, Chi hta‸ ngaˬ te puiˉ ve teh‸ nawˬ huiˉ maˬ yonˍ ve laˇ teh‸ na nyi htaˇ, Yonˍ ve yoˬ, Jawˇmawˇ-oˬ teh‸, yawˇ huiˉ maˬ yawˇ hta‸ kʼaw‸ kʼoˆ piˇ ve yoˬ.

29Oˇ htaˇ, yawˇ huiˉ maˬ ve mehˆ shiˍ hta‸ yawˇ htawˇ leh, Nawˬ huiˉ maˬ yonˍ ve hkʼe nawˬ huiˉ maˬ awˬ pon hpeh‸ la piˇ-oˆ teh‸ kʼoˆ piˇ ve yoˬ.

30Oˇ htaˇ, yawˇ huiˉ maˬ mehˆ kʼaw‸ mawˬ la ve yoˬ. Chaw teˇ gʼaˇ ka‸ maˇ gʼa shiˍ tuˬ shaˍ ti‸ taˍ-o‸ teh‸, Yeˍsuˆ yawˇ huiˉ maˬ hta‸ hkʼa deh‸ maˍ piˇ ve yoˬ.

31Ya‸ hkʼaˇ, yawˇ huiˉ maˬ tawˆ kʼai leh, yawˇ huiˉ maˬ hta‸ pa taw mvuhˇmiˬ oˇ ve awˬ hkʼaw teˇ kaˬ le le lo Yeˍsuˆ ve awˬ lawn bvuhˬ kʼai ve yoˬ.

32Yawˇ huiˉ maˬ tawˆ kʼai chehˇ htaˇ, neˇ geh ve chaw kʼaˍ teˇ gʼaˇ hta‸ shu Yeˍsuˆ geh shiˍ veu laˇ ve yoˬ.

33Neˇ hta‸ gʼa‸ kʼoˬ peuˬ hkʼaw‸ nawˉ, chaw kʼaˍ oˇ ve tawˇ yaw la ve yoˬ. Chaw awˬ moˍ lonˉ teˇ hpaˍ anˇ leh, Iˉsaˍreˍlaˆ chaw hui awˬ hkʼaw lo chi hkʼe ve teˇ pawˆ ka‸ maˇ mawˬ jaw teh‸ yawˇ hui kʼoˆ ve yoˬ.

34Ya‸ hkʼaˇ, Hpaˍriˍsehˇ hui kʼoˆ ve, Yawˇ neˇ jawˇmawˇ hta‸ gʼaˇ va leh neˇ teˇ hpaˍ hta‸ gʼa‸ kʼoˬ ve yoˬ teh‸ kʼoˆ ve yoˬ.

35Oˇ htaˇ, venˇ hkʼaˆ teˇ kaˬ le le lo Yeˍsuˆ kʼai leh, yawˇ hui ve bon yehˬ teˇ hpaˍ awˬ hkʼaw lo maˍ piˇ leh Gʼuiˬsha ve mvuhˇmiˬ hta‸ caˉ da‸ ve ha lehˬ ve bon hkawˇ maˍ piˇ ve yoˬ. A naˍ teˇ ceuˬ le le leh naˬ ve gawˬ ve teˇ ceuˬ le le hta‸ htawˇ yawˇ gu na-e piˇ ve yoˬ.

36Chaw awˬ moˍ lonˉ teˇ hpaˍ hta‸ gʼa mawˬ htaˇ, yawˇ yawˇ hui hta‸ ha kʼaˉ ve yoˬ. Awˬ lawn kʼo, yawˇ hui lehˬ yawˬ hawˉ paˍ maˇ cawˬ ve yawˬ hkʼe nyi ma sho‸ sha‸ jaˇ leh awˬ gʼaˇ nuˇ jaˇ chehˇ ve yoˬ.

37Oˇ htaˇ, yawˇ ve awˬ la‸ gʼawˇ hui hta‸ yawˇ kʼoˆ piˇ ve, Caˬ gʼeu‸ tuˬ cawˬ maˇ jaˇ ve ka‸, gʼeu‸ shehˍ hpaˇ hui a ciˉ ceh tiˉ cawˬ ve yoˬ.

38Hkʼe te leh, yawˇ ve caˬ gʼeu‸ kuiˬ lo caˬ gʼeu‸ shehˍ hpaˇ hui hta‸ peu laˇ tuˬ, Awˬ shehˍ hpaˇ hta‸ bon lawˬ-o‸ teh‸ kʼoˆ ve yoˬ.

← Chapter 8 Jump to: Chapter 10 →