Matthew 24 — Lahu Bible Edited © Thailand Bible Society and Bible Society of Myanmar, 2010, 2020.

1Yeˍsuˆ bon yehˬ lonˉ awˬ hkʼaw lo tawˆ kʼai ve teˇ yanˇ, bon yehˬ lonˉ hta‸ caˉ da‸ ve yehˬ teˇ hpaˍ yawˇ hta‸ beˆ maˍ piˇ tuˬ, yawˇ ve awˬ la‸ gʼawˇ teˇ hpaˍ yawˇ geh laˬ ve yoˬ.

2Yeˍsuˆ yawˇ hui hta‸ kʼoˆ piˇ ve, Chi hkʼa peu-eˬ hta‸ nawˬ hui mawˬ ve maˇ heˆ laˇ. Ngaˬ nawˬ hui hta‸ awˬ tehˬ awˬ na kʼoˆ laˇ ve, yehˬ chi teˇ hpaˍ haˉ pui teˇ shiˍ awˬ hkʼoˆ teˇ shiˍ maˇ cawˬ htaˇ hkʼa gaˬ shu te luˬ tuˬ yoˬ.

3Oˇ htaˇ, yawˇ Shaˍlonˍ hkʼaw hkʼoˆ lo mui chehˇ ve teˇ yanˇ, awˬ la‸ gʼawˇ teˇ hpaˍ ceh tiˉ yawˇ geh laˬ leh, Awˬ ceuˬ oˇ ve teˇ hpaˍ hkʼaˬ htaˆ hpeh‸ la tuˬ le. Nawˬ kʼaw‸ ya‸ la tuˬ ve leh, miˬguiˬ chi awˬ yanˇ leh tuˬ ve awˬ heˆ hkʼaˬ hkʼe hpehˬ tawˆ la tuˬ ve le. Ngaˬ hui hta‸ a ciˉ hto laˇ-oˆ teh‸ kʼoˆ piˇ ve yoˬ.

4Yeˍsuˆ yawˇ hui hta‸ kʼaw‸ kʼoˆ piˇ ve, Chaw teˇ gʼaˇ ka‸ nawˬ hui hta‸ maˇ gʼa heˍ yuˬ beˬ yuˬ tuˬ, shaˍ ti‸ taˍ-o‸.

5Awˬ lawn kʼo, chaw maˇ maˇ ngaˬ ve awˬ meh hta‸ pfuhˇ laˬ leh, Ngaˬ lehˬ Hkri‸ yoˬ teh‸ kʼoˆ leh, chaw maˇ maˇ hta‸ heˍ yuˬ beˬ yuˬ tuˬ yoˬ.

6Ma‸ bawˆ ve leh bawˆ da‸-a teh‸ te chehˇ ve awˬ lawn hta‸ nawˬ hui gʼa kaˇ tuˬ yoˬ. Ya‸ hkʼaˇ, nawˬ hui maˇ gʼa kawˆ cheˇ tuˬ shaˍ ti‸ taˍ-o‸. Awˬ lawn kʼo, awˬ ceuˬ chi teˇ hpaˍ hpeh‸ la ve htawˇ, awˬ leh meuˇ maˇ gaˬ sheˍ.

7Chaw teˇ ceuˬ leh teˇ ceuˬ, mvuhˇmiˬ teˇ peˆ leh teˇ peˆ ya‸ da‸ jiˆ da‸ tuˬ yoˬ. Meu‸ ve kaˆ ve leh miˬ hiˆ ve teˇ hpaˍ teˇ kaˬ peuˬ teˇ kaˬ lo hpeh‸ la tuˬ yoˬ.

8Chi hkʼa peu-eˬ lehˬ, tu‸ ve hkanˍ ve awˬ hkuiˉ puiˍ ceh tiˉ hpeh‸ sheˍ ve yoˬ.

9Oˇ htaˇ, fawˉ mehˍ ve hta‸ gʼa hkanˍ tuˬ, shu nawˬ hui hta‸ chiˇ a‸ piˇ leh, nawˬ hui hta‸ tiˇ pehˍ tuˬ yoˬ. Ngaˬ ve awˬ meh hta‸ pa taw chaw ceuˬ hkʼa peu-eˬ nawˬ hui hta‸ canˇ tuˬ yoˬ.

10Oˇ htaˇ, chaw maˇ maˇ hkui htiˇ poˬ paiˍ tuˬ yoˬ. Yawˇ hui teˇ gʼaˇ leh teˇ gʼaˇ chiˇ a‸ da‸ leh, teˇ gʼaˇ leh teˇ gʼaˇ canˇ da‸ tuˬ yoˬ.

11Maˇ heˆ heˆ ve tcuh kaˍ paˍ teˇ hpaˍ htawˇ maˇ maˇ tawˆ la leh, chaw maˇ maˇ hta‸ heˍ yuˬ beˬ yuˬ tuˬ yoˬ.

12Haiˬ ve awˬ ceuˬ cawˬ maˇ la ve pa taw, chaw maˇ maˇ ha‸ pehnˇ ve teˇ ceuˬ i kʼai yawnˇ kʼai tuˬ yoˬ.

13Ya‸ hkʼaˇ, awˬ leh hkʼa gaˬ yeˬ chehˇ ve chaw lehˬ, htaiˍ hkʼaw‸ ve hta‸ gʼa tuˬ yoˬ.

14Chaw ceuˬ hkʼa peu-eˬ awˬ pon shaˉ hkiˆ hpeh‸ tuˬ, Gʼuiˬsha ve mvuhˇmiˬ hta‸ caˉ da‸ ve ha lehˬ ve bon hkawˇ chi, miˬ guiˬ hkʼoˆ teˇ kaˬ le le lo ca maˍ piˇ tuˬ yoˬ. Oˇ ve hkʼaw‸ nawˉ, awˬ leh meuˇ gaˬ la tuˬ yoˬ.

15Hkʼe te leh, tcuh kaˍ paˍ Daˍyeˍlaˆ kʼoˆ taˍ ve hkʼe, te luˬ te sheˆ puiˉ ve cha‸ chiˆ ve awˬ ceuˬ lehˬ, da‸ kehˬ ve chehˇ kuiˬ awˬ hkʼaw lo huˉ chehˇ ve hta‸ nawˬ hui gʼa mawˬ ve teˇ yanˇ, (li‸ chi hta‸ gʼaw ve chaw lehˬ shiˍ-o‸.)

16oˇ htaˇ, Yuˇda‸ mvuhˇmiˬ awˬ hkʼaw lo chehˇ ve chaw hui hkʼaw hkʼoˆ lawˬ hkʼoˆ lo hpaw-e loˬ.

17Yehˬ awˬ hkʼoˆ lo chehˇ ve chaw a shu yawˇ ve yehˬ awˬ hkʼaw lo mawˇ ca yuˬ tuˬ, taˇ kʼaw‸ ya‸-e.

18Heh hkʼaw chehˇ ve chaw htawˇ, a shu yawˇ ve veu‸ kʼaˇ ca kʼaw‸ yuˬ tuˬ taˇ kʼo‸-e.

19Awˬ yanˇ oˇ ve awˬ hkʼaw lo, yaˇ hu ma leh cuˉ dawˬ ve yaˇ ehˉ cawˬ ve chaw hui lehˬ, gʼa dawˇ haˍ jaˇ tuˬ yoˬ.

20Nawˬ hui gʼa hpaw-e ve awˬ yanˇ lehˬ, mvuhˇ kaˆ yanˇ maˇ kʼoˆ, shinˉ nyi htaˇ maˇ kʼoˆ, maˇ gʼa cawˇ tuˬ bon lawˬ-o‸.

21Awˬ lawn kʼo, miˬguiˬ hta‸ te hpanˍ ve teˇ nyi hta‸ tanˬ leh ya‸ nyi hkʼa gaˬ maˇ hpeh‸ la jaw sheˍ leh, awˬ hkʼaw‸ nawˉ ka‸ maˇ kʼaw‸ hpeh‸ la tuˬ ve tu‸ jaˇ hkanˍ jaˇ ve teˇ ceuˬ lehˬ, oˇ htaˇ hpeh‸ la tuˬ yoˬ.

22Awˬ yanˇ oˇ ve maˇ ngeh piˇ lawˬ ve kʼo, chaw teˇ gʼaˇ ka‸ ponˬ maˇ hpeh‸. Ya‸ hkʼaˇ, leuˆ yuˬ taˍ ve chaw teˇ hpaˍ hta‸ pa taw, awˬ yanˇ oˇ ve hta‸ ngeh piˇ lawˬ tuˬ yoˬ.

23Oˇ htaˇ, chaw teˇ gʼaˇ gʼaˇ lehˬ, Nyi-o, Hkri‸ choˬ kaˬ lo chehˇ taˍ ve yoˬ, oˇ kaˬ lo chehˇ taˍ ve yoˬ teh‸ nawˬ hui hta‸ kʼoˆ laˇ ve kʼo taˇ yonˍ.

24Awˬ lawn kʼo, maˇ heˆ heˆ ve Hkri‸ leh maˇ heˆ heˆ ve tcuh kaˍ paˍ teˇ hpaˍ tawˆ la tuˬ yoˬ. Yawˇ hui lehˬ, hpeh‸ ve kʼo leuˆ yuˬ taˍ ve chaw teˇ hpaˍ hta‸ htawˇ heˍ yuˬ beˬ yuˬ gʼa tuˬ, uiˍ ve anˇ tuˬ leh awˬ heˆ teˇ hpaˍ hta‸ te maˍ piˇ tuˬ yoˬ.

25Nyi loˬ, maˇ hpeh‸ la sheˍ htaˇ ka‸, ngaˬ nawˬ hui hta‸ kʼoˆ taˉ laˇ ve yoˬ.

26Hkʼe te leh yawˇ hui lehˬ, Nyi loˬ, yawˇ heh puiˉ hkʼaw lo chehˇ taˍ ve yoˬ teh‸ kʼoˆ ve ka‸ taˇ kʼai. Bawehˇ awˬ hkʼaw lo yawˇ chehˇ taˍ ve yoˬ teh‸ kʼoˆ ve ka‸ taˇ yonˍ.

27Awˬ lawn kʼo, mvuhˇ tiˉ po-e‸ lehˬ mvuhˇ nyi tawˆ hpawˇ lo ba la leh mvuhˇ nyi kʼehˬ hpawˇ lo gaˬ ve hkʼe, chaw yaˇ ve Yaˇ hpu kʼaw‸ ya‸ la tuˬ ve lehˬ, chi hkʼa shuˍ shuˍ hpeh‸ tuˬ yoˬ.

28Suh taˍ ve awˬ to hkʼa cawˬ kuiˬ lo, naˬ beuˬ ngaˆ teˇ hpaˍ hpawnˬ la tuˬ yoˬ.

29Tu‸ ve hkanˍ ve awˬ yanˇ oˇ ve peuˬ hkʼaw‸ nawˉ, teˇ cawˬ haˉ mvuhˇ nyi naˆ ho‸ kʼai leh, ha pa htawˇ awˬ gʼeuˆ maˇ kʼaw‸ ba. Meu‸ keu shiˍ teˇ hpaˍ mvuhˇ naw ma lo ce la leh, mvuhˇ naw ma ve kanˇ paˆ teˇ hpaˍ htawˇ hiˆ hiˆ naˇ naˇ kʼai tuˬ yoˬ.

30Oˇ htaˇ, chaw yaˇ ve Yaˇ hpu ve awˬ heˆ lehˬ, mvuhˇ naw ma lo tawˆ la tuˬ yoˬ. Miˬguiˬ hkʼoˆ lo chaw ceuˬ hkʼa peu-eˬ paˆ hawˬ leh, chaw yaˇ ve Yaˇ hpu lehˬ, uiˍ ve awˬ me‸ awˬ hponˇ leh kanˇ paˆ cawˬ ve awˬ hkʼaw lo, mvuhˇ naw ma ve moˬ hta‸ ciˇ ya‸ la ve hta‸ yawˇ hui gʼa mawˬ tuˬ yoˬ.

31Peuˬ leh, behˬ heh ma awˬ hkawˇ bvuhˬ chaweh meuˆ leh, yawˇ yawˇ ve mvuhˇ naw ma tcuh yaˇ teˇ hpaˍ hta‸ kʼai tcuh tuˬ yoˬ. Yawˇ hui lehˬ, mvuhˇ awˇ ceˍ miˬ awˍ hpawˇ lo yawˇ leuˆ yuˬ taˍ ve chaw hui hta‸ hpawnˬ da‸ piˇ tuˬ yoˬ.

32Maˉ nawˆ cehˬ hta‸ tehˆ maˍ ve tawˇ pa haˉ chi hta‸ henˇ yuˬ-o‸. Awˬ tuˍ tuˍ la leh, awˬ caˍ caˍ la ve teˇ yanˇ, mvuhˇ cha hkui yanˇ gaˬ la paˇ neˇ peuˬ ve hta‸ nawˬ hui shiˍ ve yoˬ.

33Chi hkʼa shuˍ shuˍ, awˬ ceuˬ chi hkʼa peu-eˬ hpeh‸ la chehˇ ve hta‸ nawˬ hui gʼa mawˬ ve teˇ yanˇ, yawˇ lehˬ yehˬmiˉhpe‸ awˬ paˇ lo gaˬ la peuˬ ve hta‸ nawˬ hui shiˍ-o‸.

34Ngaˬ nawˬ hui hta‸ awˬ tehˬ awˬ na kʼoˆ laˇ ve, chi teˇ co maˇ ponˬ kʼai sheˍ htaˇ, awˬ ceuˬ chi hkʼa peu-eˬ hpeh‸ la tuˬ yoˬ.

35Mvuhˇ naw ma leh miˬ naˆ ma mehˉ kʼai tuˬ yoˬ. Ya‸ hkʼaˇ, ngaˬ ve tawˇ hkawˇ lehˬ maˇ mehˉ kʼai taˬ.

36Awˬ nyi awˬ haˉ oˇ ve hta‸ chaw teˇ gʼaˇ ka‸ maˇ shiˍ. Mvuhˇ naw ma tcuh yaˇ hui ka‸, Yaˇ hpu ka‸ maˇ shiˍ. Awˬ pa teˇ gʼaˇ tiˉ shiˍ ve yoˬ.

37Chaw yaˇ ve Yaˇ hpu kʼaw‸ ya‸ la tuˬ ve lehˬ, Noˉa‸ ve awˬ co-e htaˇ hkʼa shuˍ shuˍ hpeh‸ tuˬ yoˬ.

38Awˬ lawn kʼo, Noˉa‸ haw lo‸ kʼoˍ hkʼaw lo‸-e ve teˇ nyi hkʼa gaˬ, iˉ kaˆ maˇ htonˍ sheˍ ve awˬ yanˇ awˬ hkʼaw lo, yawˇ hui lehˬ caˇ ve dawˬ ve, awˬ hpawˇ awˬ miˇ heuˆ da‸ leh ka piˇ ve, chi hkʼe te chehˇ ve yoˬ.

39Iˉ kaˆ htonˍ la leh yawˇ hui hta‸ poˬ chiˇ veu htaˇ hkʼa gaˬ yawˇ hui maˇ shiˍ ve hkʼe, chaw yaˇ ve Yaˇ hpu kʼaw‸ ya‸ la ve teˇ yanˇ, chi hkʼa shuˍ shuˍ hpeh‸ tuˬ yoˬ.

40Oˇ htaˇ, chaw nyiˇ gʼaˇ heh hkʼaw lo teˇ geh chehˇ taˍ ve teˇ yanˇ, teˇ gʼaˇ hta‸ shiˍ veu leh teˇ gʼaˇ hta‸ teh taˉ tuˬ yoˬ.

41Yaˇ miˇ nyiˇ gʼaˇ teˇ geh haˉ pui mawˍ geuˆ chehˇ ve teˇ yanˇ, teˇ gʼaˇ hta‸ shiˍ veu leh teˇ gʼaˇ hta‸ teh taˉ tuˬ yoˬ.

42Hkʼe te leh, nawˬ ve Awˬ jawˇmawˇ hkʼaˬ ve teˇ nyi kʼaw‸ gaˬ la tuˬ ve hta‸ nawˬ hui maˇ shiˍ ve pa taw shaw taˍ-o‸.

43Yehˬ shehˍ hpaˇ lehˬ, chaw hkʼawˇ laˬ tuˬ ve awˬ yanˇ hta‸ shiˍ taˍ ve hkʼe kʼo, yawˇ ve yehˬ awˬ hkʼaw lo chaw hkʼawˇ maˇ gʼa lo‸ la tuˬ yawˇ shaw taˍ tuˬ yoˬ teh‸ nawˬ hui shiˍ-o‸.

44Hkʼe te leh, nawˬ hui htawˇ hkʼa deh‸ gu taˍ hehnˇ taˍ-o‸. Awˬ lawn kʼo, naw hui maˇ dawˇ maˇ gaˇ ve awˬ yanˇ awˬ hkʼaw lo, chaw yaˇ ve Yaˇ hpu kʼaw‸ ya‸ la tuˬ yoˬ.

45Ka ti‸ yeˬ leh cuˇ yiˍ cawˬ ve awˬ ceˬ teˇ gʼaˇ lehˬ, a shu le. Awˬ shehˍ hpaˇ ve yehˬ yaˇ kʼa yaˇ teˇ hpaˍ hta‸ awˬ yanˇ cawˇ lehˍ caˇ tuˬ dawˬ tuˬ pehˬ piˇ tuˬ awˬ pon, yawˇ ve awˬ shehˍ hpaˇ lehˬ awˬ ceˬ oˇ ve hta‸ awˬ hoˉ te tcuh ve yoˬ.

46Awˬ ceˬ teˇ gʼaˇ chi hkʼe te chehˇ ve hta‸ yawˇ ve awˬ shehˍ hpaˇ kʼaw‸ gaˬ la leh gʼa mawˬ ve kʼo, awˬ ceˬ oˇ ve lehˬ awˬ bon uiˍ ve yoˬ.

47Ngaˬ nawˬ hui hta‸ awˬ tehˬ awˬ na kʼoˆ laˇ ve, awˬ shehˍ hpaˇ lehˬ, yawˇ ve mawˇ jeˬ hkʼa peu-eˬ awˬ hkʼoˆ awˬ ceˬ oˇ ve hta‸ awˬ hoˉ te tcuh tuˬ yoˬ.

48Ya‸ hkʼaˇ, haiˬ ve awˬ ceˬ lehˬ, Ngaˬ ve awˬ jawˇmawˇ haˆ haˆ maˇ kʼaw‸ la taˬ teh‸ yawˇ ve nyi ma hkʼaw dawˇ leh,

49awˬ kaˍ awˬ nu awˬ ceˬ teˇ hpaˍ hta‸ dawˆ leh, tzuhˬ dawˬ bvuhˆ ve chaw hui geh caˇ chehˇ dawˬ chehˇ ve kʼo,

50awˬ ceˬ oˇ ve maˇ dawˇ maˇ gaˇ ve awˬ nyi, maˇ shiˍ ve awˬ yanˇ awˬ hkʼaw lo, yawˇ ve awˬ shehˍ hpaˇ kʼaw‸ gaˬ la leh,

51yawˇ hta‸ hehnˇ chaweh ciˍ yanˍ piˇ leh chaw heˍ paˍ teˇ hpaˍ geh chehˇ piˇ lawˬ tuˬ yoˬ. Oˇ kaˬ lo hkʼa chehˇ ve chaw hui hawˬ leh ciˬ geu‸ tuˬ yoˬ.