Matthew 25 — Lahu Bible Edited © Thailand Bible Society and Bible Society of Myanmar, 2010, 2020.

1Peuˬ leh, mvuhˇ naw ma mvuhˇmiˬ lehˬ, a shu yawˇ ve kawˆ faiˇ hta‸ yuˬ leh awˬ miˇ ma heuˆ shehˍ hpaˇ hta‸ ca ha‸ yuˬ ve yaˇ miˇ haˉ teˇ chi gʼaˇ hta‸ shuˍ ve yoˬ.

8Cuˇ yiˍ maˇ cawˬ ve ngaˇ gʼaˇ lehˬ, Ngaˬ hui ve kawˆ faiˇ suh la paˇ neˇ ve pa taw, nawˬ hui ve naˍ manˇ a ciˉ pe‸ laˇ-oˆ teh‸, cuˇ yiˍ cawˬ ve ngaˇ gʼaˇ hta‸ kʼoˆ piˇ ve yoˬ.

9Ya‸ hkʼaˇ, cuˇ yiˍ cawˬ ve teˇ hpaˍ lehˬ, Ngaˬ hui awˬ pon leh nawˬ hui awˬ pon naˍ manˇ maˇ law‸ hehˉ. Naˍ manˇ hawˇ shehˍ hpaˇ geh kʼai leh, nawˬ hui awˬ pon ca vuiˬ-o‸ teh‸ kʼaw‸ kʼoˆ piˇ ve yoˬ.

10Yawˇ hui ca vuiˬ chehˇ ve teˇ yanˇ, awˬ miˇ ma heuˆ shehˍ hpaˇ laˬ leh, gu taˍ hehnˇ taˍ ve chaw teˇ hpaˍ hkehˉ caˇ kuiˬ lo yawˇ geh teˇ geh lo‸-e peuˬ hkʼaw‸ nawˉ, yehˬ miˉ hoˆ taˍ ve yoˬ.

11Awˬ hkʼaw‸ nawˉ, yaˇ miˇ haˉ oˇ ve ngaˇ gʼaˇ kʼaw‸ la leh, Jawˇmawˇ-oˬ, Jawˇmawˇ-oˬ, ngaˬ hui hta‸ yehˬ miˉ a ciˉ hpaw laˇ-oˆ teh‸ kʼoˆ ve yoˬ.

12Ya‸ hkʼaˇ yawˇ lehˬ, Ngaˬ nawˬ hui hta‸ awˬ tehˬ awˬ na kʼoˆ laˇ ve, ngaˬ nawˬ hui hta‸ maˇ shiˍ teh‸, kʼaw‸ kʼoˆ piˇ ve yoˬ.

13Hkʼe te leh, awˬ nyi hta‸ maˇ kʼoˆ, awˬ yanˇ hta‸ maˇ kʼoˆ, nawˬ hui maˇ shiˍ ve pa taw hkʼa deh‸ shaw taˍ-o‸.

14Awˬ lawn kʼo, awˬ yanˇ oˇ ve lehˬ, chaw teˇ gʼaˇ awˬ kaˍ awˬ nu mvuhˇmiˬ lo kʼai-a teh‸ te ve teˇ yanˇ, yawˇ ve awˬ ceˬ teˇ hpaˍ hta‸ kuˬ leh, yawˇ ve mawˇ jeˬ yawˇ hui hta‸ chiˇ a‸ piˇ taˉ ve hta‸ shuˍ tuˬ yoˬ.

15Yawˇ hui puiˉ ve hpeh‸ ve hta‸ yawˇ nyi leh, teˇ gʼaˇ hta‸ hpu ngaˇ hinˉ, teˇ gʼaˇ hta‸ nyiˇ hinˉ leh teˇ gʼaˇ hta‸ teˇ hinˉ piˇ taˉ leh tawˆ kʼai ve yoˬ.

16Oˇ htaˇ, hpu ngaˇ hinˉ gʼa ve teˇ gʼaˇ lehˬ, teˇ cawˬ haˉ kʼai leh ca kaˬ ve pa taw, awˬ yawˬ ngaˇ hinˉ kʼaw‸ gʼa ve yoˬ.

17Oˇ ve hkʼa shuˍ shuˍ, hpu nyiˇ hinˉ gʼa ve chaw teˇ gʼaˇ htawˇ, awˬ yawˬ nyiˇ hinˉ kʼaw‸ gʼa ve yoˬ.

18Ya‸ hkʼaˇ, hpu teˇ hinˉ gʼa ve chaw teˇ gʼaˇ lehˬ, yawˇ ve awˬ shehˍ hpaˇ ve hpu hta‸ yuˬ leh miˬ kʼoˍ ca duˇ faˉ taˍ ve yoˬ.

19Awˬ yanˇ maw peuˬ hkʼaw‸ nawˉ, awˬ ceˬ oˇ ve teˇ hpaˍ ve awˍ shehˍ hpaˇ kʼaw‸ la leh, yawˇ yawˇ hui geh hpu caˇ lanˇ shawˍ nyi ve yoˬ.

20Hpu ngaˇ hinˉ gʼa taˍ ve awˬ ceˬ teˇ gʼaˇ laˬ leh, awˬ yawˬ ngaˇ hinˉ hteh‸ ka‸ yuˬ veu laˇ leh kʼoˆ ve, Jawˇmawˇ-oˬ, nawˬ ngaˬ hta‸ hpu ngaˇ hinˉ pe‸ taˉ laˇ ve yoˬ. Nyi-o, awˬ yawˬ ngaˇ hinˉ hteh‸ ngaˬ kʼaw‸ gʼa peuˬ teh‸ kʼoˆ ve yoˬ.

21Yawˇ ve awˬ shehˍ hpaˇ lehˬ, Da‸ ve yoˬ. Na yuˬ puiˉ leh da‸ ve awˬ ceˬ-oˬ, i ve teˇ ceuˬ awˬ hkʼaw lo nawˬ na yuˬ puiˉ ve pa taw, maˇ ve awˬ hkʼoˆ ngaˬ nawˬ hta‸ teh taˍ tuˬ yoˬ. Nawˬ ve awˬ shehˍ hpaˇ ha lehˬ ve hkʼe, nawˬ htawˇ ha lehˬ chehˇ-oˆ teh‸, yawˇ hta‸ kʼoˆ piˇ ve yoˬ.

22Hpu nyiˇ hinˉ gʼa taˍ ve awˬ ceˬ teˇ gʼaˇ htawˇ laˬ leh, Jawˇmawˇ-oˬ, nawˬ ngaˬ hta‸ hpu nyiˇ hinˉ pe‸ taˉ laˇ ve yoˬ. Nyi-o, awˬ yawˬ nyiˇ hinˉ hteh‸ ngaˬ kʼaw‸ gʼa peuˬ teh‸ kʼoˆ ve yoˬ.

23Yawˇ ve awˬ shehˍ hpaˇ lehˬ, Da‸ ve yoˬ. Na yuˬ puiˉ leh da‸ ve awˬ ceˬ-oˬ, i ve teˇ ceuˬ awˬ hkʼaw lo nawˬ na yuˬ puiˉ ve pa taw, maˇ ve awˬ hkʼoˆ ngaˬ nawˬ hta‸ teh taˍ tuˬ yoˬ. Nawˬ ve awˬ shehˍ hpaˇ ha lehˬ ve hkʼe, nawˬ htawˇ ha lehˬ chehˇ-oˆ teh‸, yawˇ hta‸ kʼoˆ piˇ ve yoˬ.

24Hpu teˇ hinˉ gʼa taˍ ve awˬ ceˬ teˇ gʼaˇ htawˇ laˬ leh, Jawˇmawˇ-oˬ, nawˬ lehˬ te haˍ ve chaw teˇ gʼaˇ hpeh‸ ve hta‸ ngaˬ shiˍ ve yoˬ. Nawˬ maˇ sheˍ kuiˬ lo nawˬ gʼeu‸ yuˬ leh, nawˬ maˇ hpeuˇ baˬ kuiˬ lo nawˬ shaw hpoˆ ve hta‸ ngaˬ shiˍ ve yoˬ.

25Hkʼe te leh ngaˬ kawˆ ve pa taw, nawˬ ve hpu hta‸ miˬ kʼoˍ hkʼaw duˇ faˉ taˍ ve yoˬ. Nyi-o, nawˬ ve mawˇ nawˬ hta‸ kʼaw‸ pe‸ laˇ ve yoˬ teh‸ kʼoˆ piˇ ve yoˬ.

26Awˬ shehˍ hpaˇ kʼaw‸ kʼoˆ ve, Haiˬ ve leh bawˬ ve awˬ ceˬ-oˬ, maˇ sheˍ kuiˬ lo ngaˬ gʼeu‸ yuˬ leh, maˇ hpeuˇ baˬ kuiˬ lo ngaˬ shaw hpoˆ ve hta‸ nawˬ shiˍ ve kʼo,

27hpu chi ve hta‸ yuˬ leh hpu chiˇ piˇ shehˍ hpaˇ hui hta‸ chiˇ piˇ cawˇ ve yoˬ. Oˇ hkʼe te ve kʼo, ngaˬ kʼaw‸ la ve teˇ yanˇ ngaˬ ve hpu chi ve leh awˬ yawˬ hta‸ ngaˬ kʼaw‸ gʼa tuˬ yoˬ.

28Hkʼe te leh, hpu teˇ hinˉ hta‸ yawˇ geh yuˬ hkʼaw‸ leh, hpu teˇ meunˍ cawˬ ve chaw teˇ gʼaˇ hta‸ piˇ-oˆ.

29Awˬ lawn kʼo, cawˬ ve chaw teˇ gʼaˇ le le hta‸ kʼaw‸ htehˍ piˇ leh, yawˇ maˇ maˇ cawˬ tuˬ yoˬ. Ya‸ hkʼaˇ, maˇ cawˬ ve chaw geh, yawˇ hkʼa cawˬ ve hta‸ ka‸ kʼaw‸ yuˬ tawˆ sheˬ tuˬ yoˬ.

30Awˬ bon maˇ cawˬ ve awˬ ceˬ teˇ gʼaˇ hta‸ awˬ baˬ hpawˇ naˆ ho‸ kuiˬ lo baˬ keu-o. Oˇ kaˬ lo hkʼa chehˇ ve chaw hui hawˬ leh ciˬ geu‸ tuˬ yoˬ teh‸, awˬ shehˍ hpaˇ kʼoˆ ve yoˬ.

31Chaw yaˇ ve Yaˇ hpu lehˬ, yawˇ ve awˬ me‸ awˬ hponˇ awˬ hkʼaw lo laˬ leh, mvuhˇ naw ma tcuh yaˇ hkʼa peu-eˬ yawˇ geh laˬ ve teˇ yanˇ, yawˇ ve awˬ me‸ awˬ hponˇ cawˬ ve kʼaw jaw awˬ hkʼoˆ yawˇ mui tuˬ yoˬ.

32Oˇ htaˇ, chaw ceuˬ hkʼa peu-eˬ yawˇ mehˆ gʼuˇ suhˍ hpawnˬ la leh, yawˬ hawˉ paˍ, yawˬ leh aˉ che‸ hta‸ pehˬ da‸ ve hkʼe, yawˇ yawˇ hui hta‸ pehˬ da‸ tuˬ yoˬ.

33Yawˬ teˇ hpaˍ hta‸ yawˇ ve la‸ sha paˉ taˍ leh, aˉ che‸ teˇ hpaˍ hta‸ la‸ mehˍ paˉ taˍ tuˬ yoˬ.

34Oˇ htaˇ, la‸ sha paˉ chehˇ ve chaw hui hta‸ Hkunˉ hawˉ hkanˇ chi hkʼe kʼoˆ piˇ tuˬ yoˬ. Ngaˬ Awˬ pa geh awˬ bon gʼa ve chaw teˇ hpaˍ-oˬ, laˬ-o‸. Miˬguiˬ te hpanˍ htaˇ ka‸ nawˬ hui awˬ pon gu taˍ ve mvuhˇmiˬ awˬ hkʼaw lo laˬ chehˇ la-o.

35Awˬ lawn kʼo, ngaˬ awˍ meu‸ ve teˇ yanˇ, nawˬ hui ngaˬ hta‸ awˍ caˍ laˇ ve yoˬ. Ngaˬ iˉ kaˆ shiˉ ve teˇ yanˇ, nawˬ hui ngaˬ hta‸ iˉ kaˆ taw laˇ ve yoˬ. Ngaˬ hkehˉ chaw hpeh‸ ve teˇ yanˇ, nawˬ hui ngaˬ hta‸ ha‸ yuˬ laˇ ve yoˬ.

36Ngaˬ veu‸ kʼaˇ maˇ cawˬ ve teˇ yanˇ, nawˬ hui ngaˬ hta‸ veu‸ kʼaˇ feuˉ laˇ ve yoˬ, Ngaˬ chehˇ haˍ ve teˇ yanˇ, nawˬ hui ngaˬ hta‸ nyi laˇ ga laˇ ve yoˬ. Ngaˬ htawnˍ hkʼaw chehˇ ve teˇ yanˇ, nawˬ hui ngaˬ hta‸ ca nyi la ve yoˬ teh‸ yawˇ kʼoˆ piˇ tuˬ yoˬ.

37Oˇ htaˇ, hteˇ ve cawˇ ve chaw hui yawˇ hta‸ chi hkʼe kʼaw‸ kʼoˆ piˇ tuˬ yoˬ. Jawˇ mawˇ-oˬ, nawˬ awˍ meu‸ ve hta‸ ngaˬ hui gʼa mawˬ leh awˍ caˍ laˇ ve hkʼaˬ htaˆ le. Nawˬ iˉ kaˆ shiˉ ve hta‸ ngaˬ hui gʼa mawˬ leh iˉ kaˆ taw laˇ ve hkʼaˬ htaˆ le.

38Nawˬ hkehˉ chaw hpeh‸ ve hta‸ ngaˬ hui gʼa mawˬ leh ha‸ yuˬ laˇ ve hkʼaˬ htaˆ le. Veu‸ kʼaˇ maˇ cawˬ leh veu‸ kʼaˇ feuˉ laˇ ve hkʼaˬ htaˆ le.

39Nawˬ chehˇ haˍ ve maˇ kʼoˆ, htawnˍ hkʼaw chehˇ ve maˇ kʼoˆ, ngaˬ hui gʼa mawˬ leh nawˬ hta‸ ca nyi la ve hkʼaˬ htaˆ le teh‸ kʼaw‸ kʼoˆ piˇ tuˬ yoˬ.

40Oˇ htaˇ, Hkunˉ hawˉ hkanˇ lehˬ, Ngaˬ nawˬ hui hta‸ awˬ tehˬ awˬ na kʼoˆ laˇ ve, ngaˬ awˬ viˉ awˬ nyi chi teˇ hpaˍ awˬ hkʼaw lo i jaˇ ve chaw teˇ gʼaˇ hta‸ nawˬ hui te piˇ ve pa taw, ngaˬ hta‸ te laˇ ve yoˬ teh‸, yawˇ hui hta‸ kʼaw‸ kʼoˆ piˇ tuˬ yoˬ.

41Oˇ htaˇ, la‸ mehˍ paˉ chehˇ ve chaw hui hta‸ yawˇ chi hkʼe kʼoˆ piˇ tuˬ yoˬ. Hkeu ve hta‸ gʼa hkanˍ ve chaw hui-oˬ, ngaˬ hta‸ hpaˆ da‸ leh, neˇhaiˬ leh yawˇ ve tcuh yaˇ hui awˬ pon gu taˍ ve co co taiˍ taiˍ to‸ chehˇ ve aˬ miˍ awˬ hkʼaw lo lo‸-e loˬ.

42Awˬ lawn kʼo, ngaˬ awˍ meu‸ ve teˇ yanˇ nawˬ hui ngaˬ hta‸ maˇ caˍ laˇ. Ngaˬ iˉ kaˆ shiˉ ve teˇ yanˇ, nawˬ hui ngaˬ hta‸ iˉ kaˆ maˇ taw laˇ.

43Ngaˬ hkehˉ chaw hpeh‸ ve teˇ yanˇ, nawˬ hui ngaˬ hta‸ maˇ ha‸ yuˬ laˇ. Ngaˬ veu‸ kʼaˇ maˇ cawˬ ve teˇ yanˇ, nawˬ hui ngaˬ hta‸ veu‸ kʼaˇ maˇ feuˉ laˇ. Ngaˬ chehˇ haˍ ve teˇ yanˇ maˇ kʼoˆ, htawnˍ hkʼaw chehˇ ve teˇ yanˇ maˇ kʼoˆ, nawˬ hui ngaˬ hta‸ maˇ ca nyi la teh‸ kʼoˆ piˇ tuˬ yoˬ.

44Oˇ htaˇ yawˇ hui lehˬ, Jawˇmawˇ-oˬ, nawˬ awˍ meu‸ ve, iˉ kaˆ shiˉ ve, hkehˉ chaw hpeh‸ ve, veu‸ kʼaˇ maˇ cawˬ ve, chehˇ haˍ ve, htawnˍ hkʼaw chehˇ ve hta‸ ngaˬ hui gʼa mawˬ leh, nawˬ hta‸ maˇ ga laˇ ve hkʼaˬ htaˆ le teh‸, yawˇ hta‸ kʼaw‸ kʼoˆ piˇ tuˬ yoˬ.

45Oˇ htaˇ yawˇ lehˬ, Ngaˬ nawˬ hui hta‸ awˬ tehˬ awˬ na kʼoˆ laˇ ve, chaw chi teˇ hpaˍ awˬ hkʼaw lo i jaˇ ve chaw teˇ gʼaˇ hta‸ nawˬ hui maˇ te piˇ ve pa taw, ngaˬ hta‸ nawˬ hui maˇ te laˇ ve yoˬ teh‸, yawˇ hui hta‸ kʼaw‸ kʼoˆ piˇ tuˬ yoˬ.

46Yawˇ hui lehˬ, co co taiˍ taiˍ ciˍ yanˍ ve awˬ hkʼaw lo lo‸-e tuˬ yoˬ. Ya‸ hkʼaˇ, hteˇ ve cawˇ ve chaw hui lehˬ, co co taiˍ taiˍ te‸ ve awˬ hkʼaw lo lo‸-e tuˬ yoˬ teh‸, Yeˍsuˆ kʼoˆ piˇ ve yoˬ.