Genesis 3

Lao Bible (ฉบับอักษรลาว)

← Chapter 2 Jump to: Chapter 4 →

1ຕສ໊ຽວ ທິນ-ຮູ່ງ ເຕສີ໋ຍ ຕ້າຍ ເຍີຍ ຢຽດ ຕສູ໊ງ ຫລົ່ມ ຕສັ່ງ ກະນ້າຍ ເຊ ນາງ ເກົ້າ ໄກວ໋ ເຈ໋ຍ. ນາງ ໜ່າຍ ກ໋າ ວົ້ວ ເຕົ້າ ມເຊັຍ ຕອນ, “ທິນ-ຮູ່ງ ຕສະເກ້ງ ກ໊ອງ ໄມ້ ປຸນ ເມີ່ຍ ບົວ ຫຍັ່ນ ຢຽມ ນ້າຍ ຫຮວີງ ກະຍົ໌ວ ເຍີຍ ຫາຍ ຫຍູ່ງ ປ໊ຽວ ໄຟ?”

2ວົ້ວ ເຕົ້າ ມເຊັຍ ຕອນ ເຕົາ ນາງ, “ຢຽມ ຫຮວີງ ກະຍົ໌ວ ເຍີຍ ຕສູ້ງໆ ປ໊ຽວ ເຢຍ ບົວ ຫຍັ່ນ ຕຸ໊ ເຍີຍ.

3ມປ່າ ທິນ-ຮູ່ງ ກ໊ອງ, ‘ຢຽມ ຫຮວີງ ບຸດົ໋ງ ວົ້ວ ຕສູ້ງ ດຢັ໋ງ ເຍີຍ ປ໊ຽວ ທສິນ-ໝ່ານ ໄມ້ ຕູ໋ງ ຫຍັ່ນ, ລ່ຽມ ໄມ້ ຕູ໋ງ ມົວະ. ໄມ້ ເຕສີຍ ແອ໊ະ, ເມີ່ຍ ບົວ ຕສູ໊ງ ຕສຸ ໄຕ່ ອ໊ະ.’”

4ນາງ ກ໊ອງ ບົ໋ວ ມເຊັຍ ຕອນ, “ເມີ່ຍ ບົວ ໄມ້ ໄຕ່ ເຫລາະ.

5ທິນ-ຮູ່ງ ຮນັ້ງ ນ້າຍ ກ໊ອງ ເຫວີ່ຍ ຕສຸ ນິ່ນ ຮິ້ວ ຕຸ໊ ເມີ່ຍ ບົວ ຫຍັ່ນ ລິ໌ວ, ເມີ່ຍ ບົວ ໄຮ່ ຮນ້ຳ ຕຸ໊ ທົງ, ເມີ່ຍ ບົວ ຕສ່ຽວ ຮນັ້ງ ທິນ-ຮູ່ງ ນໍ, ໄຮ່ ຮິ້ວ ຕຸ໊ ຫລົງ ຮິ້ວ ຕຸ໊ ທສ້ຽວ.”

6ວົ້ວ ເຕົ້າ ມເຊັຍ ຕອນ ໝັ່ງ ປວັດ ວົ້ວ ຕສູ້ງ ປ໊ຽວ ເດສວີ່ຍ ເຍີຍ, ຕ໋າຍ ຫຍັ່ນ ຄູ້ ເຍີຍ. ນິ່ນ ຢ່າ ຮນ້ຳ ຕ້າຍ ເຊ ກ໊ອງ ໄຮ່ ປຸນ ມ່ຽນ ໄກວ ນໍ, ຕສະເກ້ງ ຫລົງ ໄຫ່. ນິ່ນ ຕສ່ຽວ ແກ໊ະ ຕ້າຍ ຫຍັ່ນ ອ໊ະ. ແອ໋ງ ປຸນ ເຕີ໋ຍ ນິ່ນ ເຍີຍ ໂອກ໋ ຫຍັ່ນ.

7ນິ່ນ ບົວ ຫຍັ່ນ ລິ໌ວ, ນິ່ນ ບົວ ໄຮ່ ຮນ້ຳ ຕຸ໊ ທົງ. ນິ່ນ ບົວ ຮິ້ວ ຕຸ໊ ກັ້ນ ແລ່ງ ແກ໊ງ ເຍີຍ ຢຽມ, ຕສ່ຽວ ເຕສ໊າະ ງົ່ງ ຫຍໍ ດຢັ໋ງ-ນ່ອມ ລຸ່ນ ຕ້າຍ ຜົງ ຈ໊ຽນ ອ໊ະ.

8ວົ້ວ ຮນອຍ, ລູ່ງ ມ໌ານ-ຫຮມວັງ ເຍີຍ ຕສຢັ້ງ ໂຫ່, ນິ່ນ ບົວ ໄຮ໌ ຕສ໊ຽວ ທິນ-ຮູ່ງ ຢຽມ ຫຮວີງ ກະຍົ໌ວ ຢັ້ງ ເຈົ໊າ. ວົ້ວ ເຕົ້າ ມຈັ່ງ ຕອນ ເຖສົາ ນິ່ນ ເຍີຍ ເອົ໊າ ຕສ່ຽວ ເປັຍ ຫຮວີງ ເຍີຍ ດຢັ໋ງ-ຫລົ່ມ ມີ່ງ ປີ໋ງ ຈ໊ຽນ ຕສ໊ຽວ.

9ມປ່າ ຕສ໊ຽວ ທິນ-ຮູ່ງ ເຫ່ວ ວົ້ວ ເຕົ້າ ມຈັ່ງ ຕອນ, “ເມີ່ຍ ຢຽມ ຫາຍ ແລ່?”

10ວົ້ວ ເຕົ້າ ມຈັ່ງ ຕອນ ເຕົາ, “ເຢຍ ໄຮ໌ ເມີ່ຍ ຢຽມ ນ້າຍ ຫຮວີງ. ເຢຍ ກ້ຳ ເດສ໋ຍ ໄຫ່ ເຫວີ່ຍ ຕສຸ ເຢຍ ແລ່ງ ແກ໊ງ ເຍີຍ ຢຽມ ຕສ່ຽວ ປີ໋ງ ເມີ່ຍ.”

11ທິນ-ຮູ່ງ ໜ່າຍ ກ໋າ, “ຫາຍ ເຕົ້າ ບົ໋ວ ເມີ່ຍ, ເມີ່ຍ ເຍີຍ ຊິນ ແລ່ງ ແກ໊ງ ເຍີຍ? ເມີ່ຍ ຫຍັ່ນ ຕົ້ງ ເຢຍ ຫັດ ເມີ່ຍ ໄມ້ ຕູ໋ງ ຫຍັ່ນ ວົ້ວ ຕສູ້ງ ປ໊ຽວ ໝີ່ ອ໊ະ ຊ່າະ?”

12ວົ້ວ ເຕົ້າ ມຈັ່ງ ຕອນ ເຕົາ, “ຕົ້ງ ເມີ່ຍ ປຸນ ຕ້າຍ ເຖສົາ ເຢຍ ຢຽມ ນ້າຍ ວົ້ວ ເຕົ້າ ມເຊັຍ ຕອນ, ນິ່ນ ປຸນ ນ້າຍ ຕສູ້ງ ດຢັ໋ງ ເຍີຍ ປ໊ຽວ ເຢຍ, ເຢຍ ຕສ່ຽວ ຫຍັ່ນ ໝີ່ ອ໊ະ.”

13ຕສ໊ຽວ ທິນ-ຮູ່ງ ໜ່າຍ ກ໋າ ວົ້ວ ເຕົ້າ ມເຊັຍ ຕອນ, “ເມີ່ຍ ໂຕສ໋ວ ທສວດ ຫາຍ ຫຍູ່ງ ສີ່ ໝີ່ ອ໊ະ?” ວົ້ວ ເຕົ້າ ມເຊັຍ ຕອນ ເຕົາ, “ນາງ ກັ້ນ ດົ໊ວ ເຢຍ, ເຢຍ ຕສ່ຽວ ຫຍັ່ນ.”

14ຕສ໊ຽວ ທິນ-ຮູ່ງ ບົ໋ວ ວົ້ວ ຕິ້ວ ນາງ, “ຫລາຍ ເມີ່ຍ ຮນັ້ງ ນ້າຍ ນໍ ໂຕສ໋ວ, “ເມີ່ຍ ຕສ່ຽວ ຕສຸ ໂຮ້ວ ເກົ້າ ເຮນ້ຍ ຢຽດ ຕສູ໊ງ ແຊງ-ຄູ້, ເກົ້າ ທສ້ຳ ຢຽດ ຕສູ໊ງ ເຮ່ຍ ຕສ້ອຍ. ເມີ່ຍ ອ໋ອຍ ຕສຸ ຫລົ່ງ ກະເຊຍ ລຸ່ຍ ຈ໊ຽນ ກັນ ເດົາ ມີ່ງ, ຢຽດ ເສີຍ ອ໋ອຍ ຕສຸ ຫຍັ່ນ ເນຍ-ບູງ.

15ເຢຍ ອ໋ອຍ ປຸນ ເມີ່ຍ ເຖສົາ ນ້າຍ ເຕົ້າ ມເຊັຍ ຕອນ ຕ໊າ ວິນ, ຢ່າ ປຸນ ເມີ່ຍ ເຍີຍ ເຕສີ໊ຍ-ຟຸນ ເຖສົາ ນິ່ນ ເຍີຍ ເຕສີ໊ຍ-ຟຸນ ໂຕສ໋ວ ວິນ-ວັ້ງ. ນິ່ນ ເຍີຍ ເຕສີ໊ຍ-ຟຸນ ອ໋ອຍ ເບ໊າະ ເມີ່ຍ ເຍີຍ ມອກ໊ອງ ຮູ້, ເມີ່ຍ ຢ່າ ອ໋ອຍ ເຍາະ ນິ່ນ ເຍີຍ ເຕສົ໋າ-ໂອກ.”

16ທິນ-ຮູ່ງ ຢ່າ ກ໊ອງ ບົ໋ວ ວົ້ວ ເຕົ້າ ມເຊັຍ ຕອນ, “ມ່າຍ ຊິນ ເຍີຍ ຕສຢັ້ງ ໂຫ່ ເຢຍ ອ໋ອຍ ຈາ ທິບ ປຸນ ເມີ່ຍ ໂຄ້ວ. ດຸ໊ດ ຊິນ ເຍີຍ ຕສຢັ້ງ ໂຫ່ ເມີ່ຍ ອ໋ອຍ ຕສຸ ມຸນ. ມປ່າ ເມີ່ຍ ຖສໍ່ ອ໋ອຍ ຫລົ່ງ ເມີ່ຍ ເຍີຍ ໂອກ໋. ເມີ່ຍ ເຍີຍ ໂອກ໋ ຢ່າ ອ໋ອຍ ກຸ໊ນ ຈ໊ຽນ ເມີ່ຍ.”

17ທິນ-ຮູ່ງ ຢ່າ ກ໊ອງ ບົ໋ວ ອາດຳ, “ຫລາຍ ເມີ່ຍ ໝວັງ ເມີ່ຍ ເຍີຍ ເອົ໊າ ເຍີຍ ຫວ່າ, ຫຍັ່ນ ຕົ້ງ ເຢຍ ຫັດ ເມີ່ຍ, ‘ໄມ້ ຕູ໋ງ ຫຍັ່ນ ວົ້ວ ຕສູ້ງ ປ໊ຽວ,’ ເດົາ ຕສ່ຽວ ຫລາຍ ເມີ່ຍ ໂຕສ໋ວ ເຍີຍ ສີ່ ຕສຸ ໂຮ້ວ. ເມີ່ຍ ຢຽດ ເສີຍ ອ໋ອຍ ຕສຸ ປັ່ງ ເດົາ ໂຕສ໋ວ ກົງ ໂຄ້ວ ຖສີງ ຕຸ໊ ຫຍັ່ນ.

18ເດົາ ອ໋ອຍ ເຫວີ່ຍ ເມີ່ຍ ທສວດ ເມ້ຍ ທສວດ ອຈິ໊ມ. ເມີ່ຍ ຢ່າ ອ໋ອຍ ຕສຸ ຫຍັ່ນ ຢຽມ ເດົາ ທສວດ ເຍີຍ ໄລ-ເມ້ຍ.

19ເມີ່ຍ ອ໋ອຍ ຕສຸ ໂຕສ໋ວ ກົງ ໂຄ້ວ ທສວດ ເຕສ໋ຍ ຊິນ ຫັ່ນ ວົ້ວ ເຕີ໋ຍ ເດົາ ຖສີງ ຕ້າຍ ໄຮ່ ທສວດ ເຕີ໋ຍ ກະນ້າຍ. ໂຕສ໋ວ ເຖົາ ເມີ່ຍ ແອ໋ງ ດສ໋ວນ ເປ໋ນ ເນຍ, ເຫວີ່ຍ ຕສຸ ເມີ່ຍ ເຊ ເນຍ ເປ໋ນ ຕ້າຍ. ເມີ່ຍ ເຊ ເນຍ, ເມີ່ຍ ອ໋ອຍ ຕສຸ ແອ໋ງ ເປ໋ນ ດສຸ່ນ ເນຍ ອ໊ະ.”

20ອາດຳ ເຖງ ນິ່ນ ເຍີຍ ເອົ໊າ ທສວດ ບົ໋ວ ເຫ່ວ ຮາວາ, ເຫວີ່ຍ ຕສຸ ນິ່ນ ໂຕສ໋ວ ລູ່ງ ເດ໊ຍ ມ່ຽນ ເຍີຍ ມາ.

21ຕສ໊ຽວ ທິນ-ຮູ່ງ ຫລົ່ງ ແຊງ-ຄູ້ ເຍີຍ ດົ໊ບ ໂຕສ໋ວ ລຸຍ-ໂຫວ ປຸນ ອາດຳ ເຖສົາ ນິ່ນ ເຍີຍ ເອົ໊າ, ຮາວາ, ຕສຸ໊.

22ຕສ໊ຽວ ທິນ-ຮູ່ງ ແອ໋ງ ກ໊ອງ, “ອີ້ ຕສັ່ນ ວົ້ວ ລ່ານ ມ່ຽນ ເຊ ຮນັ້ງ ບົວ ນໍ, ຮິ້ວ ຕຸ໊ ຫລົງ, ຮິ້ວ ຕຸ໊ ທສ້ຽວ. ອ໋ອຍ ຕສຸ ໄມ້ ຕູ໋ງ ປຸນ ນິ່ນ ຊູງ ປົ໌ວ ມີ່ງ ແກ໊ະ ຕສຢັ້ງ ແໝ່ງ ເຍີຍ ປ໊ຽວ ຫຍັ່ນ ຕສ່ຽວ ຢຽດ ລິ໌ວ ຕຸ໊ ຕສຢັ້ງ ຈ໊ຽນ.”

23ຕສ໊ຽວ ທິນ-ຮູ່ງ ຕສ່ຽວ ຕສຸ່ນ ນິ່ນ ທສວດ ເອເດນ ຫຮວີງ ຢ່າ ປຸນ ນິ່ນ ໂຕສ໋ວ ຫລຢັງ-ເດີ່ຍ ຢຽມ ທິນ-ຮູ່ງ ຫລົ່ງ ນັ້ນ ນິ່ນ ຕ້າຍ ວົ້ວ ເຕີ໋ຍ ເນຍ.

24ຕສ໊ຽວ ຕສຸ່ນ ນິ່ນ ທສວດ ລິ໌ວ, ຢຽມ ເອເດນ ຫຮວີງ ເຍີຍ ຕົງ ປູງ ແໝງ, ຕສ໊ຽວ ປຸນ ເຄລູບິມ ຕສົ໊ວ ຈ໊ຽນ. ແອ໋ງ ມ່າຍ ຕສູງ ມ່າຍ ໂຕ໌ວ ເຍີຍ ດສຸ ດ໊າວ ກວິ້ນໆ ເປຢີຍ ປູງ ເຍີຍ, ຕັ໊ງ ຈ໊ຽນ ມີ່ງ ຕສຢັ້ງ ແໝ່ງ ປ໊ຽວ ເຍີຍ ດຢັ໋ງ ວົ້ວ ຕິ້ວ ເຈົ໊າ.

← Chapter 2 Jump to: Chapter 4 →