John 13

Lao Bible (ฉบับอักษรลาว)

← Chapter 12 Jump to: Chapter 14 →

1ເສຍ ແໝ່ງ ຕສິ໊ບ ຕສິ້ນ ດ່າງ ວົ້ວ ຮນອຍ, ເຢຊູ ຮິ້ວ ຕຸ໊ ນິ່ນ ອ໋ອຍ ຕສຸ ເລີ່ຍ ປ້າມ ເກນ ດສ໋ວນ ຕສັ່ງ ເຕ໋ຍ ວົ້ວ ເຍີຍ ຕສຢັ້ງ ໂຫ່ ເຖົາ ອ໊ະ. ເຢຊູ ຮນ້ຳ ຢຽມ ປ້າມ ເກນ ສຽນ ນິ່ນ ວົ້ວ ເຕີ໋ຍ ມ່ຽນ, ຢ່າ ປຸນ ນິ່ນ ບົວ ຮິ້ວ ຕຸ໊ ນິ່ນ ຮນ້ຳ ເຖົາ ຕ້າວ ເຖົາ ເມວີ໌ຍ.

2ເຢຊູ ເຖສົາ ນິ່ນ ເຍີຍ ໄຊ-ກໍ໋ ບົວ ຫຍັ່ນ ລູ່ງ ຫຮມວັງ ວົ້ວ ຕສັ່ນ, ຊາຕານ ຕສູ໊ງ ດົ໊ວ ລິ໌ວ ຊີມົນ ອິສະຄາລິໂອດ ເຍີຍ ຕອນ, ຢູດາດ, ປຸນ ນິ່ນ ຮນ້ຳ ທສວດ ອ໋ອຍ ໝ່າຍ ເຢຊູ.

3ເຢຊູ ຮິ້ວ ຕຸ໊ ຕສັ່ງ ເຕ໋ຍ ເຕສ໊າະ ໝ່ານ ໝວດ ຈິວ ປຸນ ຢຽມ ນິ່ນ ເຍີຍ ປົ໌ວ-ເດ໊ຍ, ຢ່າ ຮິ້ວ ຕຸ໊ ນິ່ນ ຢຽມ ທິນ-ຮູ່ງ ຕ້າຍ ແອ໋ງ ອ໋ອຍ ດສ໋ວນ ເຖົາ ທິນ-ຮູ່ງ ວົ້ວ.

4ນິ່ນ ຕສ່ຽວ ຢຽມ ວົ້ວ ເຕ້ຍ ເຈ໌ຍ ຊິນ ຕ້າຍ ໄຈ໊ ກະເຫຍ່ຍ ວົ້ວ ຢ່ຽມ ລຸຍ, ເຕສ໊າະ ສິ ຈ໊າວ ໄຊ ຈ໊ຽນ ຈ໊າຍ,

5ຢ່າ ເຕສ໊າະ ວວມ ໂຕ໋ ຈ໊ຽນ ປຸ້ນ, ເອຈ່ຍ ປົ໌ວ ເຖງ ໄຊ-ກໍ໋ ບົວ ດສ໋າວ ເຕສົ໋າ. ດສ໋າວ ລິ໌ວ, ນິ່ນ ຫລົ່ງ ໄຊ ຈ໊ຽນ ວົ້ວ ຄວ້າຍ ສິ ຈ໊າວ ຊອດ ອກາຍ.

6ດສ໋າວ ເຖົາ ຊີມົນ ປີເຕ, ປີເຕ ກ໊ອງ ບົ໋ວ ນິ່ນ, “ຕສ໊ຽວ ອ້າ! ເມີ່ຍ ອ໋ອຍ ດສ໋າວ ເຢຍ ເຍີຍ ເຕສົ໋າ?”

7ເຢຊູ ເຕົາ, “ເຢຍ ອີ້ ຕສັ່ນ ຮນັ້ງ ນ້າຍ ນໍ ໂຕສ໋ວ ເມີ່ຍ ໄມ້ ເມ່ງ ແປະ, ມປ່າ ມ່າຍ ຮນອຍ ເມີ່ຍ ຕສ່ຽວ ຮິ້ວ ຕຸ໊ ອ໊ະ.”

8ປີເຕ ກ໊ອງ, “ເຢຍ ຢຽດ ລິ໌ວ ໄມ້ ປຸນ ເມີ່ຍ ດສ໋າວ ເຢຍ ເຍີຍ ເຕສົ໋າ.” ເຢຊູ ເຕົາ, “ເຊ ກ໊ອງ ເຢຍ ໄມ້ ດສ໋າວ ເມີ່ຍ ເຍີຍ ເຕສົ໋າ ນໍ, ຢັ້ງ ນ້າຍ ເຈ໋ຍ ເມີ່ຍ ເຖສົາ ເຢຍ ໄມ້ ມ່າຍ ເມີ່ຍ ເຍີຍ ປ່ວນ ອ໊ະ.”

9ຊີມົນ ປີເຕ ເຕົາ, “ຕສ໊ຽວ ອ້າ! ວົ້ວ ຫຍູ່ງ ໄມ້ ຕານ ດສ໋າວ ເຢຍ ເຍີຍ ເຕສົ໋າ ຮນັ້ງ. ລ່ຽມ ເຢຍ ເຍີຍ ປົ໌ວ ເຖສົາ ມອກ໊ອງ ດສ໋າວ ມ່າະ!”

10ເຢຊູ ກ໊ອງ, “ຫາຍ ເຕົ້າ ດສ໋າວ ລິ໌ວ ຊິນ, ຕສຢັ້ງ ຊິນ ຕສ່ຽວ ທສີງ-ເດສ່ງ ອ໊ະ, ຂູງ ອ໋ອຍ ຕສຸ ດສ໋າວ ເຕສົ໋າ ຮນັ້ງ. ເມີ່ຍ ບົວ ເຊ ທສີງ-ເດສ່ງ ເຍີຍ, ມປ່າ ໄມ້ ເຕສີ໌ຍ ເມີ່ຍ ບົວ ເຕົ້າໆ.”

11ເຢຊູ ຮິ້ວ ຕຸ໊ ຫາຍ ເຕົ້າ ອ໋ອຍ ໝ່າຍ ນິ່ນ ຖສີງ ຕ້າຍ ກ໊ອງ, “ເມີ່ຍ ບົວ ມ່າຍ ເຕົ້າ ໄມ້ ທສີງ-ເດສ່ງ.”

12ເຢຊູ ດສ໋າວ ລິ໌ວ ໄຊ-ກໍ໋ ບົວ ເຍີຍ ເຕສົ໋າ, ນິ່ນ ແອ໋ງ ເຕສ໊າະ ນິ່ນ ເຍີຍ ລຸຍ ຕສຸ໊ ຈ໊ຽນ ມີ່ງ ເຕສວີ໌ຍ ນິ່ນ ເຍີຍ ຕ໋ອງ. ນິ່ນ ໜ່າຍ ໄຊ-ກໍ໋ ບົວ, “ເຢຍ ຮນັ້ງ ນ້າຍ ນໍ ໂຕສ໋ວ ປຸນ ເມີ່ຍ ບົວ, ເມີ່ຍ ບົວ ເມ່ງ ແປະ ເຍີຍ ໄຟ?

13ເມີ່ຍ ບົວ ເຫ່ວ ເຢຍ ໂຕສ໋ວ ໄຊ-ເຕ໋ຍ ຢ່າ ໂຕສ໋ວ ຕສ໊ຽວ. ເມີ່ຍ ບົວ ກ໊ອງ ຕຸ໊ ຫອບ ເຍີຍ ເຫວີ່ຍ ຕສຸ ເຢຍ ຕສະເກ້ງ ເຕສີ໌ຍ ອ໊ະ.

14ເຢຍ ໂຕສ໋ວ ເມີ່ຍ ບົວ ເຍີຍ ຕສ໊ຽວ ຢ່າ ໂຕສ໋ວ ເມີ່ຍ ບົວ ເຍີຍ ໄຊ-ເຕ໋ຍ ເຖງ ເມີ່ຍ ບົວ ດສ໋າວ ລິ໌ວ ເຕສົ໋າ. ຮນັ້ງ ໜ່າຍ ເມີ່ຍ ບົວ ອ໋ອຍ ຕສຸ ລ່ານ ເຖງ ລ່ານ ດສ໋າວ ເຕສົ໋າ.

15ເຢຍ ໂຕສ໋ວ ຫຍູ່ງ ເຕສີ໊ຍ ປຸນ ເມີ່ຍ ບົວ ຕສວດ. ເຢຍ ຮນັ້ງ ຫາຍ ນໍ ເຖງ ເມີ່ຍ ບົວ ໂຕສ໋ວ ລິ໌ວ, ເມີ່ຍ ບົວ ຢ່າ ອ໋ອຍ ຕສຸ ຮນັ້ງ ວົ້ວ ນໍ ໂຕສ໋ວ.

16ເຢຍ ກ໊ອງ ຕສຽນ ບົ໋ວ ເມີ່ຍ ບົວ, ໂປວ ໄມ້ ເກົ້າ ໂຮລ ຕສ໊ຽວ. ພ້າຍ ມີ່ງ ເຍີຍ ມ່ຽນ ໄມ້ ເກົ້າ ໂຮລ ພ້າຍ ນິ່ນ ມີ່ງ ວົ້ວ ເຕົ້າ.

17ອີ້ ຕສັ່ນ ເມີ່ຍ ບົວ ຮິ້ວ ຕຸ໊ ນ້າຍ ເຕີ໋ຍ ເຈົ໊າ. ເຊ ກ໊ອງ ເມີ່ຍ ບົວ ເອີຍ ຈ໊ຽນ ໂຕສ໋ວ ຕສ່ຽວ ມ່າຍ ອຈຽນ-ໂຢ້ວ ອ໊ະ.

18“ເຢຍ ໄມ້ ເຕສີ໌ຍ ກ໊ອງ ເຖົາ ເມີ່ຍ ບົວ ຢຽດ ຕສູ໊ງ. ເຢຍ ກິ໊ນ ຕ້າຍ ວົ້ວ ເຕີ໋ຍ ເຢຍ ຮິ້ວ ເຍີຍ, ມປ່າ ສີ່ ອ໋ອຍ ທສວດ ຕ້າຍ ຕ໋ອຍ ນ້າຍ ເຕີ໋ຍ ກີງ-ໂຊວ ເຍີຍ ຫວ່າ. ກີງ-ໂຊວ ກ໊ອງ, ‘ເຖສົາ ເຢຍ ຈວັ່ງ ຫຮນາງ ຫຍັ່ນ ເຍີຍ ມ່ຽນ ບ໊ຽນ ໂຮຍ້ວ ປຸນ ເຢຍ.’

19ສີ່ ໄມ້ ແກ້ງ ທສວດ ເຢຍ ຈາ-ດ່າງ ບົ໋ວ ເມີ່ຍ ບົວ. ສີ່ ທສວດ ວົ້ວ ຕສັ່ນ ເມີ່ຍ ບົວ ຕສ່ຽວ ສຽນ ເຢຍ ເຊ ຢຽດ ລິ໌ວ ຕສຢັ້ງ ຈ໊ຽນ ວົ້ວ ເຕົ້າ.

20ເຢຍ ບົ໋ວ ຕສຽນ ເມີ່ຍ ບົວ, ຫາຍ ເຕົ້າ ຕສິ໊ບ ເຢຍ ພ້າຍ ມີ່ງ ວົ້ວ ເຕົ້າ, ນິ່ນ ຢ່າ ຕສິ໊ບ ເຢຍ. ຫາຍ ເຕົ້າ ຕສິ໊ບ ເຢຍ, ນິ່ນ ຢ່າ ຕສິ໊ບ ພ້າຍ ເຢຍ ຕ້າຍ ວົ້ວ ເຕົ້າ ອ໊ະ.”

21ເຢຊູ ກ໊ອງ ລິ໌ວ ນ້າຍ ເຕີ໋ຍ ຫວ່າ ນິ່ນ ໄຮ໌ ໂຮຍ້ວ ມຸນ ໄຫ່, ເດສົ້າ ໄຫ່, ຕສ່ຽວ ກ໊ອງ, “ເຢຍ ບົ໋ວ ຕສຽນ ເມີ່ຍ ບົວ, ເມີ່ຍ ບົວ ມ່າຍ ເຕົ້າ ອ໋ອຍ ໝ່າຍ ເຢຍ.”

22ໄຊ-ກໍ໋ ບົວ, ເມີ່ຍ ໝັ່ງ ເຢຍ, ເຢຍ ໝັ່ງ ເມີ່ຍ, ຮນ້ຳ ໄມ້ ຮິ້ວ ເຢຊູ ກ໊ອງ ຕສຸ ຫາຍ ເຕົ້າ.

23ມ່າຍ ເຕົ້າ ໄຊ-ກໍ໋, ຕົ້ງ ເຢຊູ ຮນ້ຳ ວົ້ວ ເຕົ້າ, ເຕສວີ໌ຍ ນິດ ເຢຊູ.

24ຊີມົນ ປີເຕ ຕສ່ຽວ ຮນະ ມອກ໊ອງ ບົ໋ວ ວົ້ວ ເຕົ້າ ໄຊ-ກໍ໋, “ໜ່າຍ ກ໋າ, ນິ່ນ ກ໊ອງ ຫາຍ ເຕົ້າ?”

25ວົ້ວ ເຕົ້າ ໄຊ-ກໍ໋ ຕສ່ຽວ ເດງ ມີ່ງ ເກົ້າ ຟັດ ເຕີ໋ຍ ໜ່າຍ ເຢຊູ, “ຕສ໊ຽວ ອ້າ! ເມີ່ຍ ກ໊ອງ ຫາຍ ເຕົ້າ?”

26ເຢຊູ ເຕົາ, “ເຢຍ ກົ໊ວະ ອ໋າ ອຈົ໊ວ ປຸນ ຫາຍ ເຕົ້າ, ເຊ ຕົ້ງ ວົ້ວ ເຕົ້າ ອ໊ະ.” ເຢຊູ ຕສ່ຽວ ກົ໊ວະ ອ໋າ ອຈົ໊ວ ປຸນ ຊີມົນ ອິສະຄາລິໂອດ ເຍີຍ ຕອນ, ຢູດາດ.

27ຢູດາດ ຫຍັ່ນ ລິ໌ວ ວົ້ວ ອ໋າ ອຈົ໊ວ, ຊາຕານ ຕສ່ຽວ ເປັຍ ນິ່ນ ເຍີຍ ໂຮຍ້ວ ໝີ່ ອ໊ະ. ເຢຊູ ກ໊ອງ ບົ໋ວ ຢູດາດ, “ເມີ່ຍ ອ໋ອຍ ໂຕສ໋ວ ຫາຍ ຫຍູ່ງ, ກ໊ານ ມີ່ງ ໂຕສ໋ວ ອ໊ະ.”

28ຈວັ່ງ ເຕ້ຍ ເຍີຍ ມ່ຽນ ໄມ້ ມ່າຍ ຫາຍ ເຕົ້າ ເມ່ງ ແປະ ເຢຊູ ເຫວີ່ຍ ຫາຍ ຕິ່ວ ຮນັ້ງ ນ້າຍ ນໍ ກ໊ອງ.

29ເຫວີ່ຍ ຕສຸ ຢູດາດ ໂກ໋ວ ຍ່ານ ບົວະ, ມ່າຍ ເຕີ໋ຍ ຫລ່າຍ ເຢຊູ ເຫ່ວ ນິ່ນ ມີ່ງ ມ໌າຍ ເຈ໋ຍ ຕສິ໊ບ ຖຈຽມ ຫລົ່ງ ເຍີຍ ກະນ້າຍ, ໄຟ ຕໍ້ ຍ່ານ ມີ່ງ ປຸນ ມ່ຽນ ຈົ່ມ ມ່ຽນ.

30ຢູດາດ ຫຍັ່ນ ລິ໌ວ ນ້າຍ ອ໋າ ອຈົ໊ວ ຕສ່ຽວ ມີ່ງ ໝີ່ ອ໊ະ. ວົ້ວ ຕສັ່ນ ຢ່າ ຫຮມວັງ ອ໊ະ.

31ຢູດາດ ທສວດ ມີ່ງ, ເຢຊູ ກ໊ອງ, “ອີ້ ຕສັ່ນ ເຢຍ, ປ້າມ ມ່ຽນ ເຍີຍ ຕອນ, ຕຸ໊ ອຈັງ-ຫລ່າງ. ທິນ-ຮູ່ງ ຢ່າ ເຫວີ່ຍ ເຢຍ, ປ້າມ ມ່ຽນ ເຍີຍ ຕອນ, ຕຸ໊ ອຈັງ-ຫລ່າງ.

32ເຊ ກ໊ອງ ທິນ-ຮູ່ງ ເຫວີ່ຍ ເຢຍ ຕຸ໊ ອຈັງ-ຫລ່າງ, ທິນ-ຮູ່ງ ຢ່າ ອ໋ອຍ ປຸນ ເຢຍ ຕຸ໊ ອຈັງ-ຫລ່າງ ຢ່າ ລ່ຽມ ເຕສີ້ຍ ຕຸ໊.

33“ເຢຍ ເຍີຍ ຝຸຈ໊ວຍ ອ່າ, ເຢຍ ແອ໋ງ ເຖສົາ ເມີ່ຍ ບົວ ຢຽມ ເຕີ໋ຍ ຕັ້ງ ຮນັ້ງ. ເມີ່ຍ ບົວ ອ໋ອຍ ລໍ໌ ເຢຍ ມປ່າ ຮນັ້ງ ເຢຍ ບົ໋ວ ເຈ໋ຍ ວົ້ວ ເຕີ໋ຍ ໂຕສ໋ວ ໂຮລ ເຍີຍ ຢິວໄທ ມ່ຽນ ນໍ, ອີ້ ຕສັ່ນ ເຢຍ ແອ໋ງ ກ໊ອງ ບົ໋ວ ເມີ່ຍ ບົວ, ‘ເຢຍ ມີ່ງ ເຍີຍ ຕ໋ອງ ເມີ່ຍ ບົວ ໄມ້ ໄຮ່ ມີ່ງ.’

34ອີ້ ຕສັ່ນ ເຢຍ ປຸນ ຕິ້ວ ຊຢັງ-ຫລີ່ງ ເມີ່ຍ ບົວ, ບົ໋ວ ເມີ່ຍ ບົວ ລ່ານ ອ໋ອຍ ຕສຸ ຮນ້ຳ ລ່ານ. ເຢຍ ຮນັ້ງ ຫາຍ ນໍ ຮນ້ຳ ເມີ່ຍ ບົວ, ເມີ່ຍ ບົວ ອ໋ອຍ ຕສຸ ຮນັ້ງ ວົ້ວ ນໍ ລ່ານ ຮນ້ຳ ລ່ານ.

35ເຊ ກ໊ອງ ເມີ່ຍ ບົວ ລ່ານ ຮນ້ຳ ລ່ານ, ຕສວັ໋ງ ມ່ຽນ ຕສ່ຽວ ຮິ້ວ ຕຸ໊ ເມີ່ຍ ບົວ ໂຕສ໋ວ ເຢຍ ເຍີຍ ໄຊ-ກໍ໋.”

36ຊີມົນ ປີເຕ ໜ່າຍ ເຢຊູ, “ຕສ໊ຽວ ອ້າ! ເມີ່ຍ ອ໋ອຍ ມີ່ງ ຫາຍ?” ເຢຊູ ເຕົາ, “ເຢຍ ມີ່ງ ເຍີຍ ຕ໋ອງ, ອີ້ ຕສັ່ນ ເມີ່ຍ ກັນ ເຢຍ ມີ່ງ ໄມ້ ຕຸ໊. ມປ່າ ອກະຮ້າ ເມີ່ຍ ອ໋ອຍ ກັນ ເຢຍ ມີ່ງ.”

37ປີເຕ ໜ່າຍ, “ຕສ໊ຽວ ອ້າ! ເຢຍ ເຫວີ່ຍ ຫາຍ ຕິ່ວ ອີ້ ຕສັ່ນ ໄມ້ ໄຮ່ ກັນ ເມີ່ຍ ມີ່ງ? ເຢຍ ຫຍຸ່ນ ເຫວີ່ຍ ເມີ່ຍ ເຊ້ຍ ແໝ່ງ ໄຕ່.”

38ເຢຊູ ເຕົາ, “ເມີ່ຍ ຕສະເກ້ງ ຫຍຸ່ນ ເຫວີ່ຍ ເຢຍ ເຊ້ຍ ແໝ່ງ ໄຕ່ ໄຟ? ເຢຍ ກ໊ອງ ຕສະ ບົ໋ວ ເມີ່ຍ, ໄຈ ຕສູ໊ງ ໄມ້ ແກ້ງ ອກ໋າຍ, ເມີ່ຍ ໄມ້ ຫຍ່ຽມ ເຢຍ ປົວ ດສຸ່ນ.”

← Chapter 12 Jump to: Chapter 14 →